RAU 1 AMO | DAHAKA DAINAI ITA KOIKOI LASI?
Koikoi be Idaunegai Karana Ta, A?
Hitoshi be Japan ai, kampani ta dekenai akaun gaukara ia karaia. Nega ta ena bosi ida moni idia sekea lalonai, bosi ese ia hamaoroa ripoti koikoina ta do ia torea. Hitoshi ia gwau ia ura lasi koikoi dalanai gaukara do ia karaia. Unai dainai, bosi ese ia hagaria bona ia gwau bema ia karaia lasi do ia hadokoa, bona gabeai Hitoshi ese ena gaukara ia haboioa.
Hua haida lalonai, Hitoshi be ia lalometau moni gaukara namona ta do ia davaria eiava lasi. Nega ta moni gaukara ta ena intaviu lalonai, Hitoshi ia gwau ia ura lasi koikoi dalanai gaukara ia karaia. Ia ia intaviu henia tauna ia gwau, “Emu laloa dalana be idau momokani!” Ena be ena famili bona turadia ese idia hagoadaia do ia koikoi lasi, to Hitoshi ia laloa momo. Hegeregere, ia gwau, “egu abidadama lau gwauraia hedinarai be namo eiava lasi.”
Hitoshi ena haheitalai amo ita diba, taunimanima haida idia abia dae koikoi karana be maoro lasi. Momokani, haida idia laloa bisinesi lalonai unai bamona kara ese bisinesi ia hadikaia diba. South Africa ai, gaukara hahinena ta ia gwau, “taunimanima iboudiai be idia koikoi bona nega haida unai ese egu lalona ia veria lau koikoi totona.”
Hari inai negai hereva koikoi karana be ia bada noho. Lagani haida gunanai, Massachusetts Amherst ena iunivesiti ai doketa ta ladana, Robert S. Feldman, ia davaria miniti 10 ena herevahereva lalonai tatau bona hahine 60 pesen be nega tamona sibona idia koikoi. Feldman ia gwau: “Unai be hoa gauna. Ai laloa lasi taunimanima be dina ta ta maurina lalonai do idia koikoi.” Ena be momo idia badu bema haida ese idia koidia, to momo ese koikoi karadia idia karaia noho.
Dahaka dainai hari, koikoi, henaohenao bona koikoi karadia ma haida idia vara noho? Edena dala ai koikoi karana ese taunimanima ibounai edia mauri ia hadikaia diba? Bona mai anina bada gauna be, edena dala ai koikoi karadia ita dadaraia diba?
