Nga jeki sá, je Hitoshi nʼio kisikinroajen kon nga tsín tísokóle jngo xá jñani tsín kʼoendiso. Tobʼelañá, ñandia kʼianga tíbajngixá, je Hitoshi kʼoakitso nga tsín kʼoanacha ya tʼaxále. Kʼoa je chjota xi choʼnda tíbajngi i kitsole: “Liʼya xi kʼoatso josi”. Je familiale kao miyole Hitoshi kitsjoanganʼiole, kʼoakitsole nga tosi tonda kixi katama. Tonga je Hitoshi chan to jao kisʼele. Itso: “Chan i̱ kixian: Ngisala nda tsa tsín joxián josʼin sikjaʼaitsjen”.

Jme xi koanle je Hitoshi kui bakóná nga tsín tongatsʼi chjota nga bechjí nga kixi maa. Tjínkʼa je xi tsín kjenndiaale kʼoa ngisa je xi negosio tjínle. Ya Sudáfrica, jngo chjoón xi i̱ kitso: “Ya jñani sixá ñaki tobʼanacha je chjota. Kʼoa nʼio ñʼai maná nga kixi maa”.

Je xi ngisa síchjén je chjota kui énndiso. Jela kjoan jao jan nó tjínle nga kiskotʼayason je Universidad xi tsʼe Massachusetts kʼoa je psicólogo xi Robert Feldman ʼmi kʼoakitso nga 60% mani je chjota xi ñandia bʼéndiso kʼianga te minuto. Je Robert Feldman i kitso: “Tokʼoakoannajin. Alikui ʼyaijin tsa kʼoasikji bʼéndiso chjota”. Ánni nga kʼoasʼin bʼéndisosíni chjota nga̱ tsín ʼya xi sasénle nga sʼendisole.

Ánni nga kʼoasikji bʼéndisoni chjota, nga síchéni kʼoa nga tsín kixi tíjna jmesani xi sʼín. Jósʼin bʼetʼaná nga kʼoasʼín. Kʼoa jméni xi koasenkaoná nga tsín kʼoati sʼiaan tsanda ñá.