MUTWE WAKAMA | VIKA TUNAPANDE KUPWILA VA VUTHUNGA?
Kulinga Vyuma mu Vuthunga Kukwethi na Theho Ndi?
Hitoshi wakovelele vipangi vya kutotala vimbongo ku kampani imo ya mu Japan. Omwo Hitoshi wakele na kwituluka mu chipangi cha kutotaletha vimbongo, mukulunu wendi wa vipangi wamulekele ngwendi napande kwana lipoti lya makuli. Oloni Hitoshi wamukumbulwile ngwendi chitakutaku chendi kuchitava ane lipoti lya makuli. Hitoshi vamujujwithile ngwavo vamusheka ha vipangi.
Mu vingonde vyakaveleho, Hitoshi wombwele omwo wayongwele ngwendi vipangi vyendi vihwa. Ha kulivanga omwo vakele na kumwilula mangana akovele vipangi, Hitoshi wendekele ngwendi kakapanga chipangi chendi mu makuli embwe. Oloni munu uje wakele na kumwilula wendekele ngwendi, “Viyongola vyove vyavikalu kuvithzivithitha.” Nanga yendi na vavuthamba vendi vamukanyamethele mangana emane mbe mu chetheko echi, oloni ikeye washangumukile kukala na vimbunge vivali. Chakumwenako, wendekele ngwendi, “Njilithina ngocho kumwetha vuthunga mu kukulahela kwange.”
Ou muthzimbu wa Hitoshi umwetha ngwawo kethi ngwe vanu voshe vamona vuthunga kupwa vwa theho. Vanu vamo, maneneni vaka-mingotho vanatha kumona ngwavo kulinga vyuma mu vuthunga kunatha kuvavindametha. Munakathzi umo wa ku South Africa wendekele ngwendi, “Njikapanga na vanu vaka-kulinga vyuma mu makuli, ngechi vithimbu vimo njikashaka kuvatembwinina.”
Kukwitha kunapu ngila imo ivali na kupangetha manene vanu matangwa ano. Ku myaka ya kunima, Robert S. Feldman uje wanangukilile ha Univesiti ya Massachusetts Amherst wawanene ngwendi vakulunu vavangi vakakwithi vakwavo mu vyuma vyoshe vivathimutwiya. Wendekele ngwendi, “Twakomokele manene. Kutwathinganyekele ngwetu vanu vatha kukwitha vakwavo mu litangwa na litangwa.” Vanu vavangi kuvashakele munu wa kuvakwitha, oloni vakevo vakakwithi.
Mwafwa vika kukwitha na kwiva na vingila vyeka vya makuli vinatumu manene ano matangwa? Vanu vamona vati makuli? Twatha kujenjuka vati ku kulinga vyuma mu makuli?
