OSAPI YO KONDYE | OITYI WESUKISILA OKUKALA OMUKUATYILI?
Okuti Oukuatyili Otyituwa tyo Kohale?
Hitoshi, ankho uundapa moseketa yo vokuvalula onombongo yeongano limwe mo Japau. Puetyi ankho Hitoshi nomutumini wae vawana okuvalula onombongo mbanyingila, emupopila okuti po nopapelo mbumwe, una okuhoneka-po omatutu. Hitoshi emukumbulula okuti kapondola okukemba, mokonda yetyi ekahi nokulilongesa. Moluotyo, omutumini wa Hitoshi ahande okumuloya, iya konyima apolwa movilinga.
Okutuka opo, Hitoshi ankho utupu vali ehambu tyina asoka kovilinga makavasa vali. Etyi avasa ovilinga ovikuavo, Hitoshi evepopila okuti kapondola okulinga ovilinga viakutikinya ounkhembi. Iya una ankho wemutambula, akumbulula okuti: “Hineive omunthu usoka ngotyo!” Ombunga ya Hitoshi nomapanga ae, avemupe ondundo opo atualeko netokolo liae liokukala omukuatyili. Mahi, oe ahimbika okusoka inkha ukahi nokulinga umwe nawa. Mongeleka, wati: “Ame hityii inkha okukala omukuatyili konthele yekolelo liange, otyiwa umwe.”
Etyi tyalamba na Hitoshi katyihambukiswa. Katyieta ehambu okusoka okuti kovanthu ovanyingi oukuatyili kausilivila. Alo umwe ovanthu vamwe veyele otyituwa otyo, haunene movitanda. Omukai umwe ko Afrika do Sul, wati: “Ame ndyiundapa pokati kovanthu vehe-vakuatyili. Ovikando vimwe ndyikala nehando enene liokulinga etyi valinga.”
Onkhalelo imwe yotyituwa otyo, okukemba, kukahi nokuliyandyana hono. Omunongo utiwa Robert S. Feldman wo Sikola imwe Onene, walingile eovololo konthele yotyo. The University of Massachusetts Amherst. Meovololo olio, wamona okuti metompho lio nominutu 10 vala, povanthu 100 ovakulu, 60 vakemba otyikando tyike. Feldman wati: “Otyo tyetuhuvisa unene. Ankho katusoko okuti ounkhembi weliyandyana unene pokati kovanthu hono.” Ovanthu ovanyingi veyele okukembwa, mahi ovanyingi vakemba. Otyo katyihuvisa?
Omokonda yatyi okukemba, nokuvaka, no nonkhalelo ononkhuavo mbomatutu, viakakela unene hono? Oñgeni ounkhembi ukalesa ovanthu aveho? Haunene, oñgeni matulityilika okutokela movituwa ovio?
