Pënaty ojts tpanëjkxtë Kristë myëjpëjtaktë extëmë Pablo jyënany: “Ndunäˈänëm tukëˈëyë tëyˈäjtën myëët”. ¿Ti yˈandijpyë tyäˈädë ää ayuk?

¿Tiko niˈamukë jäˈäy nyayˈixyëty mä kyatsoonyëm? Yëˈko oy kyëxëˈëgäˈäny. Per ta diˈib mas jëjpˈam ets kyaj dyuˈunëty ko nnayˈoytyuˈunëm. Ti nmëdäjtëm jodoty winmäˈänyoty, mbäät oy xyajkëxëˈkëm o axëëk.

Biiblyë yajxon tnigajpxy ko yëˈë ndunäˈänëm diˈib axëëk, jyënaˈany: “Yë naaxwiinyëtë jaˈay mutsknëm jëtuˈun tmëtsoˈontaakëtë tuuntëkoˈoy kajpxtëkoˈoyën” (Génesis 8:21, TY). Pën jukyˈäjtëm tëyˈäjtën myëët, tsojkëp nduˈunëmë mëjää parë kyaj xymyëmadakëm tijaty xyajtëgoyäˈänëm. Apostëlë Pablo duˈun nyaynyimaytyakë ko ttuunyë mëjää: “Yëˈë njot nwinmäˈänyëts kyupejkypy amumduˈukjot ko yˈoyëty [...] ja Diosë yˈanaˈamën, [...] per taa mäts ëj nˈity tuˈuk diˈibëts xymyëtsipˈäjtp. Yëˈë pojpë yëˈëts xytyuknimiimp ja axëk winmäˈäny, esë tyäˈädë tsyiptundë diˈibëts ëj nnijäˈäp diˈibë oy, es dëˈënëts xymyëdaty extëmë tsimyjyaˈayën, es xytyukmëdunyëts aguanë ja pojpë” (Romanʉs 7:22, 23).

Extëm ko nwinguwäˈkëmë jotmay diˈib mbäät xytyuktuˈunëm diˈib kyaj yˈoyëty, kyaj tiko xymyëmadakëm, pes mbäät këˈëm nnayjëjwijtsëmbijtëm. Kyaj tiko xytyuumbëˈäjtëm tijaty xyajtëgoyäˈänëm, këˈëm mbäät nwinˈijxëm pën ndunäˈänëm diˈib oy o diˈib axëëk. Ko njëjpkudijëmë axëëkpë jot winmäˈäny, yëˈë nety nwinˈijxëm diˈib oy, mä tyamë jäˈäy kyaj jyukyˈattë tëyˈäjtën myëët.

Parë tuˈugë jäˈäy jyukyˈatët tëyˈäjtën myëët, tsojkëp yajxon tnijawët ti oy ets ti axëëk. Per jotmaymyëët njënäˈänëm ko mayë jäˈäy jeˈeyë kyëxëˈëgäˈändë ko jyukyˈattë tëyˈäjtën myëët. Ta net nyaynyikäjpxtuˈudëdë ko pääty kyaj ttundë tijaty tëyˈäjtën myëët mët ko dyajtëgoyˈattë tijaty. Tuˈugë liibrë duˈun jyënaˈany: “Nwinˈëˈënëmë jäˈäy ets duˈunyëm nwinmäˈäyëm ko tëyˈäjtën myëët tijaty nduˈunëm” (The [Honest] Truth About Dishonesty Ko jyantsy [tyëyˈäjtënëty] ets ko kyatëyˈäjtënëty). Per ¿ti mbäät xypyudëjkëm parë nnijäˈäwëm ti oy ets ti axëëk?

Abëtsemy nyaxwinyëdë, miyonkˈamë jäˈäy të tnijawëdë ko Biiblyë mbäät xytyuˈumoˈoyëm ets myëmiimbyë anaˈamën etsë käjpxwijën diˈib nitii mëët kyayaˈijxkijpxyë (Salmo 19:7). Xymyoˈoyëmë käjpxwijën diˈib mbäät xypyudëjkëm mä familyë, mä tuunk ayoˈon, parë njukyˈäjtëm wäˈäts ets parë nmëwingoˈonëmë Dios, nan kyaj nyaxyë yˈanaˈamën etsë kyäjpxwijën. Duˈunyëm tpudëkë jäˈäy oy mä tsyoondë, oy ti ayuk tkäjpxtë ets oy ti koloor yˈixˈattë. Ko ngäjpxëmë Biiblyë, nbawinmäˈäyëm  ets ko nbanëjkxëm wiˈix xytyuˈumoˈoyëm, nëjkxëp tijaty nduˈunëm tëyˈäjtën myëët.

Kyaj jeˈeyë tsyekyëty nnijäˈäwëmë Biiblyë parë njukyˈäjtëm tëyˈäjtën myëët, pes tyam xytyuktunäˈänëmë jäˈäy diˈib kyaj yˈoyëty. Pääty, tsojkëp nmënuˈkxtakëmë Dios parë xypyudëjkëm ets nduˈunëm tijaty tëyˈäjtën myëët (Filipʉs 4:6, 7, 13). Duˈun nëjkx nmëdäjtëmë jotmëkˈäjtën parë nitsiptuˈunëm diˈib oy ets njukyˈäjtëm tëyˈäjtën myëët.

Hitoshi diˈib të yˈokˈyajmaytyakpë mä tim jawyiimbë artikulo, tyukˈoyˈäjt mëjwiin kajaa ko yaˈixyˈajty ko tëyˈäjtën myëët tijaty ttuny, pes ojts tuˈugë jäˈäy tyuunkmoˈoyëty diˈib yajtsobatypy ko kyaj yˈandaˈaky. Hitoshi jyënaˈany: “Mëjwiin kajaats nmëjjawë kojëts nbaty tuˈugë tuunk mäjëts kyaj axëëgë njot nwinmäˈäny njawët”.

Nanduˈun nimay të jyattë. Min nˈokˈijxëm wiˈix të ttukˈoyˈattë pënaty të tkuytyundë Biiblyë kyäjpxwijën ko jyukyˈattë “tëyˈäjtën myëët”.

• Kyaj ti yˈatsipy mä jot winmäˈäny

  “Jatsë netyë njëmëjt 13 kojëts nbëtsëëmy eskuelë, tajëts ndëjkë tuumbë mëdë jäˈäy diˈib maˈtstëp. Nbatyëts kajaabë nmeeny nsentääbë mäjëts nduny diˈib kubojkp. Ok, tajëts nbëjky etsëts nˈëxpëjktsondaktë Biiblyë mëdë Jyobaa tyestiigëty. Tajëts nnijäˈäwëdë ko Jyobaa * yˈaxëkˈijxypy tijaty kyayajtuny tëyˈäjtën myëët, päätyëts nyajtëgäjtstë njukyˈäjtën. Mä jëmëjt 1990 tajëts nëbajttë extëmë Jyobaa tyestiigë” (Proverbios 6:16-19).

  “Ujtsëts ijtyë ndëjk mët tijatyëts nmeˈtsypy, per tyam kyaj nyekydyuˈunëty. Kojëts njukyˈaty tëyˈäjtën myëët, kyajts ti xyˈatsipy mäjëtsë njot nwinmäˈäny. Ets kojëts njamyetsy ja xëë tiempë mäjëts ijty nmeetsy, nmoobyëtsë dyoskujuyëmë Jyobaa kojëts të xypyaˈˈayoy. Agujk jotkujkëts nnayjawëty kojëts nëjkxy mää poˈkxpë ux ux, pes nnijäˈäwëbëts ko Jyobaa jotkujk yajnayjawëty tijatyëts nduumpy” (Cheryl diˈib Irlanda).

  “Kojëts ja nwintsën tnijäˈäwë ko kyajts ngupëjky mäjëts tuˈugë jäˈäy xyjameenymyoˈoyany, tajëts xyˈanmääy: Yëˈëjënë mDios tuump parë mˈitët extëm tuˈugë jäˈäy diˈib yajtukjotkujkˈäjtp. Oˈoyëdëbëts ko yä mduny. Kojëts njukyˈaty tëyˈäjtën myëët, wäˈätsëtsë njot nwinmäˈäny njawë Jyobaa wyindum. Ets nan mbäädëtsë nfamilyë nbudëkë etsë wiinkpëty” (Sonny diˈib Hong Kong).

• Agujkˈäjt jotkujkˈäjtën

  “Yëˈëts nbudëjkëp pënaty nyiwintsënˈäjttëbë bankë kanäk paˈis. Mä duˈumbë tuunk, kyaj mayë jäˈäy ttundë tijaty tëyˈäjtën myëët mët ko tganaratäˈändë meeny sentääbë. Niˈamukë jäˈäy ak duˈun wyinmaytyë: Kyajts nwinmay tyim axëëgëty nˈandakojëm waanë parë niˈigyë meeny nganaräjtëm ets parë mas oyë xëë tiempë nyajnäjxëm. Per ko kojëts njukyˈaty tëyˈäjtën myëët, agujk jotkujkëts nnayjawëty. Ets tëjëtsë nwinmäˈäny nbëjtaˈaky ko oy ti tyun jyatëdët, duˈunyëmëts njukyˈatäˈäny. Nwintsëndëjkëts nyijäˈäwëdëp ko ninäˈäjëts xykyayaˈˈandäˈäktët ets ko ninäˈäjëts ngawinˈëënäˈändë” (Tom diˈib Estados Unidos).

• Yajwintsëˈkëm

  “Ja nwintsënëts xyˈanmääy parëts kyaj tëyˈäjtën nigäjpxët tijatyë nety të tyëgoy, per kyajts ngupëjky. Ko yajnijäˈäwë pënatyë nety të myeetsy, tajëts ja nwintsën ojts tkukäjpxë kojëts kyaj nˈandaky. Tsojkëbë jotmëkˈäjtën parë njukyˈäjtëm tëyˈäjtën myëët. Per ko duˈun njukyˈäjtëm, ta nyajtukjotkujkˈäjtëm ets nyajwintsëˈkëm” (Kaori diˈib Japón).

Yajkunuˈkxëm ko njukyˈäjtëm tëyˈäjtën myëët, pes kyaj ti xyˈatsijpëm mä jot winmäˈäny, agujk jotkujk nˈijtëm ets yajwintsëˈkëm. ¿Këdii tsobatp ko duˈun njukyˈäjtëm?