Biiblã pʋgẽ, gɛrkã gom-bil ning b sẽn mi n lebg tɩ “yɩ sõama” wã rat n yeelame tɩ tall pʋ-peelem, wall maan bũmb sẽn yaa sõma bɩ sẽn zemse.

Kiris-nebã tũuda a Poll sẽn yeelã ne b sũur fãa, n modgd n dat tɩ b ‘yel-manesmã yɩ sõama ne nebã fãa.’ Rẽ baooda bõe?

Yibeoog fãa, neb wʋsg geta b meng nen-gɛtg pʋgẽ n yaool n yi b zagsẽ. Bõe yĩng tɩ b maand woto? Bala, b rat n manega b mens tɩ zemse. La bũmb n be t’a yõod yɩɩd f sẽn na n maneg f zug wall f ning fu-neeba. Sɩda, fo sẽn yaa ned ning f sũur pʋgẽ wã tõe n kɩtame tɩ nebã nand-fo wall b zãag ne-fo.

Wẽnnaam Gomdã wilga vẽeneg tɩ ninsaal sũurã tʋlsem yaa wẽnga. Sɩngr 8:21 yeta woto: “Hal ninsaal yãadem wakate, a tagsda wẽng maaneg bal a sũurẽ.” Dẽnd yɩl n tõog n yɩ pʋ-peel soaba, rẽndame tɩ f mao ne yel-wẽndã ninsaal fãa sẽn dog ne wã. Tʋm-tʋmd a Poll bilga yẽ meng sẽn maood to-to ne yel-wẽndã, n yeel woto: “Mam sũurã zĩ-zulungẽ wã, mam sũ-noog bee ne Wẽnnaam tõodã. La mam yãta tõog a to mam yĩngã wilẽ, t’a maood ne mam yam-wekrã tõogã n kɩtd tɩ mam ya yel-wẽnã sẽn be mam yĩngã wilẽ wã tõog yamba.”—Rom-dãmbã 7:22, 23.

Makre, d yamã sã n wa be wẽng maaneg tɩ d rat ne d sũur fãa n tʋm pʋ-lika, d pa segd n tũ d sũurã raab ye. D ket n tara d sẽn tõe n maane. D sã n yiisd tags-wẽns d yamẽ, d tõogd n kell n talla d pʋ-peelmã, baa d sẽn vɩ ne neb sẽn nong pʋ-likã.

Yɩl n yɩ pʋ-peelem soaba, d segd n tara noy sẽn yaa sõma n tũudẽ. Bʋko, sẽn pak neb wʋsg n yɩɩd yaa b maneg b mensã wa b sẽn date. B pa baood n bãng b yel-manesmã, b no-goamã la b tʋm-tʋmdɩ wã sã n yaa sõma ye. Rẽ n so tɩ b getẽ tɩ pʋ-lik sã n tõe n manega b yelle, pa wẽng ye. Sebr a yembr yeela woto: “Naoor wʋsgo, d sakd n maana pʋ-lik bilfu, d sã n miẽ tɩ nebã na n ket n get-d-la wa pʋ-peelem soaba.” La rẽ yĩnga noy beeme n tõe n sõng-d tɩ d bãng pʋ-lik buudã fãa sã n yaa wẽng bɩ? N-ye, beeme.

Dũniyã gill zugu, neb milyõ-rãmb n yã tɩ Biiblã saglsã sõngd-b-la hal wʋsgo. Sɩd me, Biiblã saglsã sõmblem ka to ye. (Yɩɩn-sõamyã 19:8) A saglsã tõe n sõnga zagsã neba, tʋm-tʋmdbã, la sõng ned buud fãa t’a zã a meng sõma, la a bãng n tũ Wẽnnaam. Hal pĩnd n tãag masã, sagl-kãens ket n yaa sõma wʋsgo. Yaa sagls sẽn nafd ned buud fãa me. D sã n karemd Biiblã, n bʋgsd a goamã zugu,  la d tũud a saglsã, d tõogd n yɩɩ pʋ-peelem soaba, la nin-tɩrga.

La yɩl n tõog n bas pʋ-lika, d pa segd n bãng Biiblã sẽn yetã bal ye. Rẽndame tɩ d tũud a saglsã. Tõnd vɩɩ dũni-wẽng pʋgẽ, tɩ neb wʋsg pẽdgd tõnd n dat tɩ d maan sẽn pa segde. Woto kɩtame tɩ d segd n pʋʋsd Wẽnnaam n kot-a sõngre. (Filip-rãmbã 4:6, 7, 13) Rẽ, d paamda raood n tõog n ket n maand sẽn yaa tɩrga, la d yɩ pʋ-peelem dãmb bũmb fãa pʋgẽ.

A Hitoshi, rao ning yell d sẽn gom pipi sõsgã pʋgẽ wã paama yʋ-noogo, a pʋ-peelmã yĩnga. Rũndã-rũndã, ned n dɩk-a tʋʋma, hal n pẽgd-a. A Hitoshi yeela woto: “Mam sũur nooma m sẽn tõog n paam tʋʋmd sẽn sõngd maam tɩ m tar sũur-kaset sẽn pa ningd-m taalã.”

Neb kẽer me sũy n noome, bala, bãmb me tara sũur-kaset sẽn pa ningd-b taale. Ad neb a wãn makre. Yaa neb sẽn tũ Biiblã sẽn sagl tɩ d mao tɩ d yel-manesmã yɩ sõma ne nebã fãa wã, tɩ naf-ba.

• Sũur-kaset sẽn pa ningd-f taale

  “Mam yii lekoll m sẽn wa n tar yʋʋm 13, n tɩ tʋm ne wagda. Woto yĩnga, mam paoongã fãa la bal tũu ne pʋ-lik la zãmbo. Kaoosg zugẽ, mam kẽe kãadem, tɩ maam ne m sɩdã wa sɩng Biiblã zãmsg ne a Zeova Kaset rãmbã. B sõnga tõnd tɩ d bãng tɩ Wẽnnaam a Zeova * kisa pʋ-lik buud fãa, tɩ tõnd toeem yam. Yʋʋmd 1990 soabã pʋgẽ, tõnd rɩka d mens n kõ a Zeova n deeg lisgu, n lebg a kaset rãmba.—Yel-bũnã 6:16-19.

  “Pĩnda, mam doogã ra pida ne wagdem teedo, la m yiisa te-kãens fãa, tɩ kɩt tɩ m sũur-kasetã pa le ningd-m taal ye. Mam sã n tẽeg m wagdmã sẽn kaoos yʋʋm wʋsgã, m pʋʋsda a Zeova bark ne m sũur fãa, a sẽn zoe mam nimbãanega, n sõng-m tɩ m yi yel-kãngã pʋgẽ wã. Mam sẽn mi tɩ m tata a Zeova yam masã wã, m sũurã tara laafɩ, tɩ yʋng fãa, m sã n kẽ gãag bɩ sakd m gõeem.”—A Cheryl sẽn be Irlãnd.

  “Mam tʋʋmã taoor soab sẽn bãng tɩ ned n bao n na n madg mam noor tɩ m tõdgã, a yeela woto: ‘Fo Wẽnnaamã kɩtame tɩ fo yaa ned b sẽn tõe n teege! Fo sẽn tʋmd ne tõndã yaa bark tɛkẽ.’ Mam sẽn modgd n maand pʋ-peelem bũmb fãa pʋgẽ wã kɩtame tɩ Wẽnnaam a Zeova taoore, m tar sũur-kaset sẽn pa ningd-m taale. Woto kɩtame tɩ m tõe n sõng m zakã neb la neb a taab me tɩ b rɩk m naoore.”—A Sonny sẽn be Hõng Kõng.

• Yam sẽn gãe bãane

  “Mam tʋmda bãnkẽ. Tʋʋm-kãngã pʋgẽ, naoor wʋsgo, b getame tɩ f sẽn na n tar ligd wʋsg yõod n yɩɩd f sẽn na n maand pʋ-peelem. Neb wʋsg yetame tɩ pʋ-lik bilf sã n tõe n kẽes b yõodo, pa wẽng ye. La mam sẽn modgd n maand pʋ-peelmã kɩtame tɩ m yam gãe bãane. Mam tʋlla ne m sũur fãa n ket n maand woto, baa sẽn na n yɩla. Mam tʋʋmdã taoor dãmb miime tɩ mam pa na n tol n togs-b ziri, wall m yag n sõng-b ye.”—A Tom sẽn be Etazĩni.

• Yʋ-noogo

  “Teed n wa n menem tõnd tʋʋmã zĩigẽ tɩ tʋʋmdã taoor soab ye sagl maam tɩ m yag ziri, tɩ mam tõdge. B sẽn wa n paam wagda wã n yõgã, tʋʋmdã taoor soab a to n pẽg maam, m pʋ-peelmã yĩnga. Yɩl n tall pʋ-peelem dũni-kãngã pʋgẽ baooda raoodo. La d sã n modge, d paamda yʋ-noogo.”—A Kaori sẽn be Zapõ.

Sũur-kaset sẽn pa ningd-f taale, yam sẽn gãe bãane, la yʋ-noog yaa bark toor-toor sẽn wilgd vẽeneg tɩ pʋ-peelem nafda neda. Bɩ bõe?