Rogo Ziazia Kekeapai yo, gu pa-Giriki i asaha ti kura regbo nga “pe rengo” si nzunzu nga “guhe du ni wenehe gbe.” Si ima rengba kadu a nga guhe du bibihe ni bawenehe nibipa ruru mangaapai.

AKristano nadia agu afugo ga Mbori toro adu kugii Pauro ko kehe na nyanyakipaha nga: Ani nakpi ‘nyemu ka sunga na rurupai rogo apai dunduko.’ Gipai re nakoda gine?

Badungu aboro naabitiyo rogo bitirobi na aˈuru dunduko mbata fu i kuru ku dagba aboro. Tipagine? Bambiko i naida bibiyo ngbaangba. Ono gu kurapai kinaho nyakipaha kisusi ti kpe mangerii wenengai watadu ka vo wene roko. Nirengo, gu bororani du ku dimoyo ima rengba ka mbakada bibi rani si ngbaangba watadu ka gbarasaha.

Fugo Mbori nagumbaha ziazia nga kpotoraniyo naida ka manga gupai du ni gbegberẽhe. Bambata Pai 8:21 naya, “gu ga aboro berã du kpotoyo yo, si ni gbigbita ha tona ti parangayo.” Sidu, tipa ka gumba kina rengo kindi, ani duwa ka ani sovura kuti gu nyemu manga ingapai du kpotoraniyo. Gu mokedi nangia Pauro afura tipa gu vura ko aasoho na ingapai ki ya: “Bambiko rago nangba ti re na ga Mbori rugute ku kpotore yo. Ono mi bi kura rugute rogo apare yo, si niso vura na gu rugute du berãre yo, ki ye na mi ni zizi boro ku tii gu rugute nga ga ingapai du rogo apare yo.”​—ARomo 7:22, 23.

Ni kpiapai, ho ngbaduraniyo azomia rani ni ani mangi gupai du ni gbegberẽhe na ani kidu na bakere nyemu ka pe ziree, si aziongo rani ngbaome ani mangi gupai re te. Ani ima rengba ka manga siapai nibipa gupai re. Ho ani asia ka ká gbegberẽ berã ni, ani ima rengba ka nye kaa gumba kina rengo kindi si ki vura du nga aboro ziree ke rani ake kirikiri.

Tipa kaa gumba kina rengo kindi, si naida ani kakuti ruru mangaapai. Ono tie, si nafu kina gberãrago nga, badungu aboro nadia bakere regbo kina kuti berãpa gu gene i ‘avo roko’ ngbaha kisusi wai i aberãpa gu maapai du ni ruruhe. Ni sangbanaha, i nabipa gu ziree i agumbaha nga gbegberẽpai ti ni te tipa wa ka si rẽ na gupai i amangaha. Gu buku nga The (Honest) Truth About Dishonesty ape gupai nga: “Si ni nyanyakipa pai ani pe ziree ki da kuti gu bangiriba aboro nikaa bi rani abi kindi nga airarengo.” Ono tie ya mo rugute ho sigira yo ho nga gu rengbe ka undo rani ani diberã tipa gu bakio ziree si aida ani gumbaha, ka si du nga gbegberẽpai ho ti pe ziree te? Ani na tambuahe nga rugute kinaho.

Badungu aboro rogo zegino dunduko ima bi gupai nga Ziazia Kekeapai ima rẽ tipa gu zingo re. Ziazia Kekeapai nafu agu arugute ka i aringbisanga ha kuti kurahe ya. (Atambuahe 19:7) Si nafu wene arugute tipa apai wa gu raka nga ga aborokporo, sunge marã, wene mangaapai, na agu apai nga ga toro. Si ima raka tipa gbanga regbo. Agu andiko du rogoho na bangua  arugute, si tipa aringara dũ, rangi kpoto aboro dũ na ngbatunga aboro dunduko. Ka ani ageda Ziazia Kekeapai, kini berẽkurii gupai si agumbaha, na kini mangipai kuti gaha arugute, ani ima rengba ka raba ngbadurani yo si nipe kina rengo na si du ni ruruhe.

Wa vura duhe wo, badungu apai si aida ani mangihe tipa ka diabe gu vura nga ga pe ziree, angianga kina du sa na gu ndikidi inohe nga ga Ziazia Kekeapai ya. Kurapai berewe nga, ani naraka rogo gu zegino naima hi be gbegberẽ apai na si nasosoda rani ani idi na gaha gbegberẽ mangaapai. Si du nga ndu gupai si aida ani kpari ti ni fu Mbori tipa ko undo rani na ki songodi rani. (AFiripoio 4:6, 7, 13) Ka ani mangihe wo, ani ima rengba kadu na wingbaduse ka kakuti gupai du ni ruruhe na kini pe rengo rogo apai yo dunduko.

Hitoshi fugoko nidu ti tonatona gi magazini re aima gbia undo ti du ni gu borosunge na pe kina rengo. Ko namangasunge awere fu gu bairasunge nabi gako pa pe rengo na nyanyakipaha. Hitoshi aya, “Mi na ngbarago nga mi gbia gu sunge nasa re mi du na gigiri sangbakpotoreyo.”

Kura aboro ima bi gipai re nga rengo du. Mo bingo bete akpiapai nga ga agu aboro naima gbia undo ti mangayo pai kuti gu bangua rugute nga ga Ziazia Kekeapai nga “ka sunga na rurupai rogo apai dunduko.”

• Gigiri Sangbakpotoseyo

  Cheryl du Ireland yo aya, “mi ambu sukuru ho garã re adu ni 13 tipa ka mangasunge na airadĩ. Ni sangbanaha, 95 rii kama nga ga gu marã naadu bere aye mbiko dĩ. Kusa, mi adi kumba na mi gbiati kumbami ki tona ka wirika Ziazia Kekeapai na aDezire Yekova. Ani awiriki gupai nga Yekova * Mbori nasoga gu mangaapai nga ga biriki, sidu, ani adiberã ka aria gaani gene raka. Rogo gu garã nangia 1990 ani akpara gaani raka fu Yekova na ki zi bapatiza na ki da ni aDezire Yekova.”​—Asanza 6:16-19.

  “Mbata kusayo, kpure aima hi be aũdĩ, ono awere, ngbatunga ahe wa gure yo te; na si nafu gigiri sangbakpotoseyo fere. Ho mi aberã ni kuriipa gu dungu agarã mi adihe kutingba sunge dĩ, mi na bakere tambuahe fu Mbori tipa gako bakere inapai. Si nafu kina ngbarago fere ho mi andu ni ka ra ki ini gupai nga Yekova awere na ngbarago na mi.”

  Sonny du Hong Kong yo aya, “ho gimi bairasunge agi gupai ni nga mi aka marã mobirimo be gu boro naida ka ngbehe bere, ko aya: ‘Ga mo Mbori nasa ro ni gu boro rengbe aboro ka kido kuti ni! Nirengo, si ni pa maku kadu na mo rogo gi basunge re.’ Kaa pe rengo rogo apai yo dunduko nasa re mi du na gigiri sangbakpotoreyo bangiri Yekova Mbori. Si nasa re a mi undo gimi aborokporo na gu kura aboro tipa i mangi kina ngisapai.”

• Zereda Berãse Yo

  Tom du Amerika yo aya, “mi namangasunge rogo gu baigo marã nga ga zegino. Rogo gi sunge re, gupai aboro abihe na nyanyakipaha nga gbia aũkumuko kisusi pe rengo. Gu bipai du badungu aboro na ni nga, ‘Gini gbegberẽpai du ti pe ziree tooni ka si du nga si naye na aũkumuko fu boro na ki undo ni ni du na marã be ni?’ Ono mbiko pe mi rengo, mi na zereda berãre yo. Mi ima diaberã kaa pe kina rengo kindi ka si vura ye na kina gini sangbanapai vurũ. Gimi abairasunge ima ino gupai nga mi apenga ziree fuyo watadu tipa yo a te.”

• Si Naye na Irisa

  Kaori du Japan yo aya, “gimi bangerekuriisunge angarasi re mi pe ziree tipa ahe naingi basunge yo, ono mi aima ká. Ho i akuru bara agu airadĩ re ni, gimi bairasunge afu tambuahe fere tipa pe rengo. Si naida wingbaduse tipa kaa pe rengo rogo gi zegino hi be ziree re. Ono niyangaraha, ani rengbe ka gbia gu kido na irisa nga ga kura aboro.”

Gigiri sangbakpotoseyo, zereda berãse yo, na irisa nga gu mosoro naye be pe rengo. Ya mo mo idi kuti gupai re?