Evangeliu stiʼ Lucas ruzeeteʼ bichiá Jesús rollo stiʼ Isaías, biindaʼ ni ne bitopa ni sti biaje. Ne ra ziluxe Evangeliu stiʼ Juan, bizeeteʼ maʼ qué ñanda nucaa guiráʼ ca señal ni biʼniʼ Jesús lu rollo stiʼ (Lucas 4:16-20; Juan 20:30; 21:25, Traducción del Nuevo Mundo).

Ximodo guyáʼ ca rollo que yaʼ. Ruquiidicabe caadxi pedasu guidi, pergaminu o papiro dede guzáʼcabe ti tira ziuulaʼ. Óracaruʼ rutópacabe ni né ti rodilluhuiiniʼ ne riaana ladu cá letra que neza dentru. Biaʼ ziuulaʼ rollo que runi marcárcabe caadxi columna luni ne ndaaniʼ cani rucaacabe ca diidxaʼ ni racaláʼdxicabe. Pa nabé ziuulaʼ pergaminu que la? guiropaʼ ladu ni riguucabe rodillu, ti zaqué ganda guchiá ni cayuundaʼ ni que né ti chu si náʼ ne iquiiñeʼ sti chu que para gutopa ni dede ra guidxela ra racalaʼdxiʼ guʼndaʼ.

Libru The Anchor Bible Dictionary na: «Zanda gaca ti rollo ziuulaʼ maca para guicá interu ti libru luni (zanda gácani biaʼ 10 metru) ne cadi guihuinni ni tan naroʼbaʼ ora gutópacabe ni». Casi Evangeliu stiʼ Lucas la? zándaca biquiiñeʼ biaʼ 9,5 metru de rollo para gucuá ni. Nuu biaje rugácabe ruaa ni ne ñee ni, runi pulírcabe ni né guié pómez ne rutieecabe ra rugácabe ca. ▪

Dede dxi bizulú guyuu sacerdote ndaaniʼ guidxi Israel, maca nexheʼ tobi si naquiiñeʼ gaca xaíque stiʼ ca sacerdote ne laasibe nga gácabe ni dede dxi gátibe (Números 35:25). Aarón nga guca primé xaíque stiʼ ca sacerdote, de raqué maʼ gudiʼdiʼ ni lu náʼ xiiñibe huaniisi (Éxodo 29:9). Stale de cani za de Aarón gúcacaʼ sacerdote, peru huaxiéʼ si tu guca xaíque stiʼ ca sacerdote.

Dxi guyuu guidxi Israel lu náʼ xcaadxi guidxi, cani runi mandar ni cadi naca judíu guleecaʼ ca xaíque stiʼ ca sacerdote ne guluucaʼ tu gúpacaʼ gana. Peru ni rihuinni nga ribícabe tuuxa ni zeeda de ti familia risaca para gaca xaíque stiʼ ca sacerdote, jma nga ribícabe tobi ni za de Aarón. Ruluíʼ si biquiiñecabe diidxaʼ «xaíque sti ca sacerdote» para guiníʼcabe de ca binni ni jma risaca nuu lade ca sacerdote. Lade cani guca xaíque stiʼ ca sacerdote zándaca nuu 24 sacerdote ni beeda gaca xaíque stiʼ ca tribu ni guyuu dxiqué, tuuxa jma risaca lade ti familia de sacerdote o tobi ni maca guca xaíque stiʼ ca sacerdote casi Anás (1 Crónicas 24:1-19; Mateo 2:4; Marcos 8:31; Hechos 4:6).