1, 2. (a) Ano an kaiba sa “dai ikaladawan na daing bayad na balaog” nin Diyos? (b) Anong mga hapot an pag-uulayan ta sa artikulong ini?

KAN isugo ni Jehova sa daga an saiyang bugtong na Aki, itinao Niya an magigin pinakanakakalabi sa gabos na balaog o regalo nin pagkamuot! (Juan 3:16; 1 Juan 4:9, 10) Inapod iyan ni apostol Pablo na “dai ikaladawan na daing bayad na balaog” nin Diyos. (2 Cor. 9:15, NW) Taano ta ginamit niya an ekspresyon na iyan?

² Aram ni Pablo na an perpektong atang ni Cristo iyo an garantiya na mauutob an gabos na marahayon na mga panuga nin Diyos. (Basahon an 2 Corinto 1:20.) Kaya, kaiba sa “dai ikaladawan na daing bayad na balaog” na iyan an gabos na karahayan asin maimbod na pagkamuot ni Jehova na ipinapahiling niya sa sato paagi ki Jesus. Talagang makangangalas an regalong iyan mala ngani ta dai iyan lubos na mailaladawan sa mga tataramon nin tawo. Ano an dapat na magin epekto sa sato kan siring kapambihirang regalo? Asin mantang nag-aandam  kita sa pagselebrar kan Memoryal kan kagadanan ni Cristo sa Miyerkules, Marso 23, 2016, sa anong praktikal na mga paagi kita dapat na pahiruon kan regalong ini?

3, 4. (a) Ano an namamatian mo pag may nagregalo sa saimo? (b) Paano puwedeng mabago nin sarong espesyal na regalo an saimong buhay?

³ Nauugma kita pag rineregaluhan kita. Pero, may mga regalo na espesyal o mahalagang marhay na puwedeng makapabago sa satong buhay. Halimbawa, ipamugtak na nasangkot ka sa sarong krimen asin sinentensiyahan ka nin kagadanan. Pero bigla na sanang may sarong tawo na dai mo man kamidbid an nagboluntaryo na akuon an padusa na para sa saimo. Andam siyang magadan para sa saimo! Ano an magigin epekto sa saimo kan arog kaiyan kapambihirang regalo?

⁴ Huli sa mamumuton asin espesyal na regalong iyan, siguradong iisipon mo nang marhay an mga gigibuhon mo asin babaguhon pa ngani an paagi mo nin pamumuhay. Posibleng marhay na papahiruon ka man kaiyan na magin mas bukas-palad saka mamumuton sa iba, asin magin magpatawad pa ngani sa mga nagkasala sa saimo. Mantang nabubuhay ka, matanaw ka nin dakulang utang na buot sa tawong iyan na isinakripisyo an sadiri para sa saimo.

5. Taano ta nakakalabing marhay an regalo nin Diyos na pantubos kisa sa iba pang regalo?

⁵ Pero, nakakalabing marhay an regalong itinao sa sato ni Jehova paagi ki Cristo kisa sa regalo sa halimbawang ini. (1 Ped. 3:18) Taano? Isipon ini: Huli sa namana tang kasalan, gabos kita may sentensiyang kagadanan. (Roma 5:12) Pero huli sa pagkamuot, isinugo ni Jehova si Jesus sa daga tanganing ‘manamitan niya an kagadanan para sa lambang tawo.’ (Heb. 2:9) Bako sanang presenteng buhay ta an ilinigtas ni Jehova, kundi nagbugtak man siya nin basehan para permanenteng mapara an kagadanan. (Isa. 25:7, 8; 1 Cor. 15:22, 26) An gabos na nagtutubod ki Jesus mabubuhay na matuninong asin maugma sagkod lamang, sa langit man iyan bilang kairibang tagapamahala ni Cristo o sa daga bilang mga sakop kan Kahadian nin Diyos. (Roma 6:23; Kap. 5:9, 10) Anong iba pang bendisyon an kaiba sa regalong ini ni Jehova?

6. (a) Arin sa mga bendisyon na kaiba sa regalo ni Jehova an hinahalat mo nang marhay? (b) Papahiruon kita kan pagkamuot nin Diyos na gibuhon an anong tulong bagay?

⁶ Ini pa an kaiba sa regalo ni Jehova: Gigibuhon na paraiso an daga, papaumayan an gabos na may hilang, asin bubuhayon liwat an mga gadan. (Isa. 33:24; 35:5, 6; Juan 5:28, 29) Siyertong namumutan niyato si Jehova asin an saiyang Aki huli sa “dai ikaladawan na daing bayad na balaog” na ini. Pero, pinapahiro kita kan pagkamuot nin Diyos na gibuhon an ano? Pag-ulayan niyato kun paano kita pinapahiro kaiyan na (1) arugon na marhay an halimbawa ni Jesu-Cristo, (2) ipahiling an satong pagkamuot sa mga tugang, asin (3) patawadon an iba nin gikan sa puso.

7, 8. Ano an dapat na mamatian niyato mapadapit sa pagkamuot ni Cristo, asin dapat kitang pahiruon kaini na gibuhon an ano?

⁷ Inot, dapat kitang pahiruon kaiyan na gamiton an satong buhay para ki Cristo Jesus. Si apostol Pablo nagsabi: “Pinapahiro kami kan pagkamuot kan Cristo.” (Basahon an 2 Corinto 5:14, 15.) [1] Aram ni Pablo na kun inaako niyato an dakulang pagkamuot ni Cristo, mapapahiro kita kaiyan na mamuhay para sa saiya. Iyo, kun lubos niyatong nasasabutan an ginibo ni Jehova para sa sato asin kun napapahiro kan saiyang pagkamuot an satong puso, gugustuhon niyatong mamuhay sa paaging inuuyunan ni Cristo Jesus. Paano ta iyan magigibo?

⁸ An mga namumuot ki Jehova napapahirong  arugon an halimbawa ni Cristo, na sinusunod na marhay an saiyang mga lakad. (1 Ped. 2:21; 1 Juan 2:6) Kun kita nagkukuyog sa Diyos asin ki Cristo, pinapatunayan niyato na namumutan ta sinda. Si Jesus nagsabi: ‘An mag-ako kan sakong mga tugon asin magkuyog kaiyan, namumuot sa sako. An namumuot sa sako mamumutan kan sakong Ama, mamumutan ko man siya asin mapamidbid ako sa saiya.’—Juan 14:21, BPV [2]; 1 Juan 5:3.

9. Anong mga panggigipit an naeeksperyensiyahan niyato?

⁹ Sa panahon na ini nin Memoryal, marahay na hurop-hurupon kun paano ta ginagamit an satong buhay. Ihapot sa sadiri: ‘Sa anong mga bagay naaarog ko na si Cristo Jesus? Ano pa an puwede kong pauswagon?’ Mahalagang marhay an pagsiyasat na ini sa sadiri huling pirmi kitang ginigipit kan mga tawo sa kinaban na arugon an saindang pamumuhay. (Roma 12:2) Kun dai kita mag-iingat, puwede kitang magin parasunod kan madunong na mga tawo, artista, asin mahusay na mga parakawat sa kinaban na ini. (Col. 2:8; 1 Juan 2:15-17) Paano niyato malalabanan an mga panggigipit na iyan?

10. Anong mga hapot an puwede tang ihapot sa sadiri sa panahon na ini nin Memoryal, asin papahiruon kita kan mga simbag diyan na gibuhon an ano? (Hilingon an ritrato sa kapinunan kan artikulo.)

¹⁰ Magayon man na pagkakataon an panahon nin Memoryal para inspeksiyunon an satong mga bado, koleksiyon nin pelikula asin musika, pati na an mga naka-save sa satong kompyuter, cellphone, saka tablet. Mantang ginigibo mo iyan, haputon an sadiri: ‘Kun yaon si Jesus sa dudumanan ko, masusupog daw ako na sulot ko an badong ini? Kun isusulot ko ini, iisipon daw kan gabos na saro akong parasunod ni Cristo Jesus?’ (Basahon an 1 Timoteo 2:9, 10.) ‘Magugustuhan daw ni Jesus an hinihiling kong mga pelikula o dinadangog kong mga musika? Pag sinubli niya an cellphone o tablet ko, masusupog daw ako sa mga mahihiling niya diyan? Masasakitan daw akong ipaliwanag ki Jesus kun taano ta gusto kong kawaton an sarong video game?’ Dapat na pahiruon kita kan satong pagkamuot ki Jehova na halion an ano man na bagay na bakong angay para sa sarong disipulo ni Cristo, gurano man iyan kamahal. (Gui. 19:19, 20) Kan magdusay kita, nanuga kita na dai na kita mamumuhay para sa satong sadiri kundi para ki Cristo. Kaya, dapat na halion niyato an ano man na makakaulang sa sato na lubos na maarog si Cristo.—Mat. 5:29, 30; Fil. 4:8.

11. (a) Paano kita pinapahiro kan satong pagkamuot ki Jehova asin ki Jesus na maghulit? (b) Paano kita papahiruon kan satong pagkamuot na tabangan an iba sa kongregasyon?

¹¹ Pinapahiro man kita kan satong pagkamuot ki Jesus na magin maigot sa paghuhulit asin paggibo nin mga disipulo. (Mat. 28:19, 20; Luc. 4:43) Sa panahon nin Memoryal, may oportunidad kita na mag-auxiliary payunir asin gumamit nin 30 o 50 oras sa paghuhulit. Puwede mo daw na i-adjust an mga gibuhon mo sa aroaldaw para magibo iyan? Iniisip nin sarong 84 anyos na lalaking balo na dai na niya kayang mag-auxiliary payunir huli sa edad niya asin maluyang salud. Pero, gusto siyang tabangan kan mga payunir sa lugar niya. Isinakay siya ninda sa saindang lunadan asin maingat na nagpili nin teritoryo na puwede niyang hulitan tanganing maabot niya an saiyang pasuhan na 30 oras. Matatabangan mo man daw an saro sa saimong kakongregasyon na makapag-auxiliary payunir sa panahon nin Memoryal? Siyempre, dai man kita gabos makakapag-auxiliary payunir. Pero, magagamit ta an satong panahon asin kusog para madugangan an satong paglilingkod ki Jehova. Kun gigibuhon ta ini, arog ni Pablo, maipapahiling niyato na pinapahiro kita kan pagkamuot ni Cristo. Papahiruon kita kan pagkamuot nin Diyos na gibuhon an ano pang ibang bagay?

12. Pinapahiro kita kan pagkamuot nin Diyos na gibuhon an ano?

¹² Ikaduwa, dapat kitang pahiruon kan pagkamuot nin Diyos na mamutan an satong mga tugang. Aram ini ni apostol Juan. Siya nagsurat: “Mga namumutan, kun sa arog kaining paagi kita namutan nin Diyos, kun siring may obligasyon man kita na magkaminuruot-muutan.” (1 Juan 4:7-11, NW) Kaya huling inako ta an pagkamuot nin Diyos, may obligasyon kitang mamutan an satong mga tugang. (1 Juan 3:16) Paano niyato maipapahiling an satong pagkamuot sa sainda?

13. Anong halimbawa nin pagkamuot sa iba an ipinahiling ni Jesus?

¹³ Pag-isipan an halimbawa ni Jesus. Kan siya nasa daga, tinabangan niya an mga tawo, lalo na idtong mga tawong hamak. Pinaumayan niya an mga pilay, buta, bungog, asin pula. (Mat. 11:4, 5) Nauugma si Jesus na tukduan an mga gutom sa espirituwal, idtong mga ibinibilang kan Judiong mga lider nin relihiyon na mga tawong ‘isinumpa.’ (Juan 7:49) Namutan niya an mga tawong hamak asin nagmaigot na tabangan sinda.—Mat. 20:28.

14. Ano an puwede mong gibuhon para maipahiling an pagkamuot mo sa mga tugang?

¹⁴ Marahay man na pagkakataon an panahon nin Memoryal para pag-isipan kun paano mo matatabangan an mga tugang. Halimbawa, tibaad may mga kakongregasyon kang may edad na, na nangangaipo nin tabang. Puwede mo daw na dalawon an namumutan na mga tugang na ini? Puwede mo daw sindang darahan nin kakanon, tabangan sa mga gibuhon sa harong, pasakayon sa lunadan pasiring sa pagtiripon, o agdahon sinda na makapartner mo sa ministeryo? (Basahon an Lucas 14:12-14.) Tugutan niyatong pahiruon kita kan pagkamuot nin Diyos na ipahiling an satong pagkamuot sa mga tugang.

15. Ano an dapat niyatong akuon?

¹⁵ Ikatulo, dapat na pahiruon kita kan pagkamuot ni Jehova na patawadon an satong mga tugang. Bilang mga aki kan inot na tawong si Adan, namana niyato gabos an kasalan asin an padusa kaiyan na kagadanan. Mayo nin siisay man sa sato an makakapagsabing, “Dai ko kaipuhan an pantubos.” Dawa an pinakamaimbod na lingkod nin Diyos nangangaipo kan regalo ni Jehova na pantubos paagi ki Cristo. Dapat akuon kan lambang saro sa sato na pinatawad kita sa sarong dakulaon na pagkakautang. Taano ta mahalaga ini? Makukua ta an simbag sa sarong ilustrasyon ni Jesus.

16, 17. (a) Ano an manunudan niyato sa ilustrasyon ni Jesus dapit sa hadi asin mga uripon? (b) Pagkatapos na hurop-hurupon an ilustrasyon ni Jesus, ano an determinado mong gibuhon?

 ¹⁶ Inistorya ni Jesus an dapit sa sarong hadi na pinatawad an saiyang uripon sa dakulaon na utang—10,000 na talento, o 60,000,000 na denario. Pero, dai pinatawad kan uripon na iyan an saiyang kapwa uripon sa kakadikit na utang kaini sa saiya—100 na denario. Naanggot na marhay an hadi kan maaraman niya an pagigin daing hirak kan uripon na kinahirakan asin pinatawad niya. Sinabi kan hadi: ‘Maraot kang uripon! Pinatawad taka kan gabos mong utang, huli ta nakimahirak ka sako. Nahirak ka man kutana sa kapwa mo uripon, siring na ako nahirak saimo.’ (Mat. 18:23-35, BPV) Iyo, an pambihirang pagkahirak kan hadi dapat na nagpahiro kutana sa uripon na iyan na patawadon an saiyang kapwa uripon. Kaagid kaiyan, dapat na pahiruon kita kan pagkamuot asin pagkahirak ni Jehova na gibuhon man an ano?

¹⁷ Magayon na pagkakataon an panahon nin Memoryal para pag-isipan kun baga may itinatago kitang raot nin buot sa kiisay man na tugang. Kun igwa, marahayon na panahon ini para arugon si Jehova, na andam na ‘magpatawad.’ (Neh. 9:17; Sal. 86:5) Kun pinapahalagahan ta an ginibo ni Jehova na pagpatawad sa sato mismong dakulaon na utang, papatawadon man niyato an iba nin gikan sa puso. Kun dai niyato mamumutan asin papatawadon an iba, dai kita makakalaom na mamumutan asin papatawadon kita nin Diyos. (Mat. 6:14, 15) Totoo, dai na mababago kan pagpapatawad an mga nangyari na, pero makakatabang iyan para magkaigwa kita nin mas maugmang puturo.

18. Paano natabangan kan pagkamuot nin Diyos an sarong sister na tiuson an pagkabakong perpekto kan saro pang sister?

¹⁸ Tibaad magin dipisil para sa sato na ‘magin matinios’ sa pagkabakong perpekto kan satong mga tugang. (Basahon an Colosas 3:13, 14; Efeso 4:32.) Halimbawa, tinabangan ni Lily, sarong daing agom na sister, an sarong kakongregasyon niyang balo na si Carol. [3] Ipinagmamaneho niya ini, tinatabangan sa pamamakal nin mga kaipuhan, asin iba pang praktikal na tabang. Pero sa ibong kan gabos na ginigibong ini ni Lily, matatsar pa man giraray si Carol asin masakit pakibagayan. Dawa arog kaiyan, nagpokus si Lily sa marahay na mga kuwalidad ni Carol. Padagos niyang tinabangan ini sa laog nin pirang taon sagkod na magkahilang ini nin grabe, dangan nagadan. Dawa nagin dipisil para ki Lily an pagtabang ki Carol, sinabi niya: “Hinahalat kong mahiling si Carol pag binuhay na siya liwat. Gusto kong mamidbid siya na perpekto na.” Iyo, mapapahiro kita kan pagkamuot nin Diyos na tiuson an pagkabakong perpekto kan satong mga tugang asin halaton an panahon na permanente nang magigin perpekto an mga tawo.

19. Paano ka papahiruon kan “dai ikaladawan na daing bayad na balaog” nin Diyos?

¹⁹ Talagang tinawan kita ni Jehova nin “dai ikaladawan na daing bayad na balaog.” Lugod na pirmi niyatong pahalagahan an regalong ini. Hurop-hurupon niyato, lalo na sa panahon na ini nin Memoryal, an gabos na ginibo ni Jehova asin ni Jesus para sa sato. Iyo, lugod na pahiruon kita kan pagkamuot ninda na arugon na marhay an halimbawa ni Jesus, ipahiling an satong pagkamuot sa mga tugang, asin patawadon sinda nin gikan sa puso.