1, 2. a) ¿Mbaʼe mbaʼépa oike “pe rregálo ijojahaʼỹva” Jehová omeʼẽvapa? b) ¿Mbaʼépa ñarrespondéta ko artíkulope?

JEHOVÁ ñanderayhueterei rupi, ombou Itaʼýra ko yvy ape ári omano hag̃ua ñanderehehápe (Juan 3:16; 1 Juan 4:9, 10). Ndaipóri ni peteĩ rregálo ivaliosovéva upévagui. Ndareíri apóstol Pablo imanduʼávo pe sakrifísiore, heʼi haʼeha “pe rregálo ijojahaʼỹva” (2 Cor. 9:15). ¿Mbaʼépa heʼise raʼe Pablo?

² Haʼe oikuaa porã Jesús sakrifísio rupive Jehová katuete okumplitaha opa mbaʼe oprometéva (elee 2 Corintios 1:20). Péro “pe rregálo ijojahaʼỹva” ndahaʼéi Jesús sakrifísionte. Upévape oike opa mbaʼe porã Ñandejára omeʼẽtava ñandéve ñanderayhúgui. Añetehápe ningo ko rregálo ndaijojahái. Upévare iporã ñañeporandu: “¿Mbaʼéichapa añeñandu ko rregálo porãitére? ¿Mbaʼépa ikatúma ajapo koʼág̃a og̃uahẽ mboyve pe Konmemorasión?”. Ko áñope pe fécha jagueromanduʼa hag̃ua Jesucristo omano hague, hoʼáta miércoles 23 de marzo.

3, 4. a) ¿Mbaʼéichapa ñañeñandu jarresivi jave peteĩ rregálo? b) ¿Mbaʼéichapa peteĩ rregálo ikatu ñanekambia?

³ Katuete javyʼa jarresivi jave peteĩ rregálo. Péro oĩ rregálo okambiáva ñande rekove. Ñamoĩmína peteĩ ehémplo. Epensami rejapoha peteĩ mbaʼe ivaietereíva, ha upeakuére rehoha kárselpe ha osẽ ndéve péna de muérte. Péro upéi ou peteĩ persóna nde ni ndereikuaáiva, ha heʼi haʼe omanotaha nde vése. ¿Mbaʼéichapa reñeñandúta?

⁴ Katuete reagradeséta upe persónape, ha upévare ikatu voi rekambia heta mbaʼépe. Por ehémplo, ikatu reporohayhuve, nembaʼeporãve ótrondi ha reperdona umi ofallávape nendive. Oime vaʼerã reñehaʼãmbaitéta siémpre rehechauka reagradeseha chupe.

5. ¿Mbaʼérepa ikatu jaʼe Jehová omeʼẽha ñandéve pe rregálo iporãvéva?

⁵ Pe rregálo Jehová omeʼẽva ñandéve tuichaiteve hína pe ehémplo ñamoĩ vaʼekuégui (1 Ped. 3:18). Opavave ñande ningo pekadór, upéicha rupi entéro ñaime kondenádo a muérte (Rom. 5:12). Upéicharõ jepe, Ñandejára ñanderayhueterei ha ombou Itaʼýra “omano [hag̃ua] opavave rehehápe” (Heb. 2:9). Péro Jesús sakrifísio rupive ikatu jahupyty heta mbaʼe. Por ehémplo, yvyporakuéra nomanomoʼãvéima (Is. 25:7, 8; 1 Cor. 15:22, 26). Entéro persóna ojeroviáva Jesúsre oikóta vyʼápe ha pyʼaguapýpe opa árare. Oĩta umi oikótava yvágape Cristo ndive, ha umi ótro katu ko yvy ape ári (Rom. 6:23; Apoc. 5:9, 10). Péro oĩ hetaiteve mbaʼe ojehupytýva Jesús sakrifísio rupive.

6. a) ¿Mbaʼe promésapa nde reipotaitereíma oñekumpli? b) ¿Mbaʼéichapa ikatu jahechauka jaagradeseha Ñandejárape?

⁶ ¿Mbaʼépa ojehupytýta avei pe rregálo Jehová omeʼẽva rupive? Por ehémplo, ko yvýgui oikóta peteĩ paraíso, umi hasýva okueráta, ha umi omano vaʼekue oikove jeýta (Is. 33:24; 35:5, 6; Juan 5:28, 29). ¡Ajépa jahayhuete Jehová ha Jesúspe omeʼẽ haguére ñandéve ko “rregálo ijojahaʼỹva”! Péro, ¿mbaʼéichapa ikatu jahechauka ñandeagradesidoha? Primero, jasegi vaʼerã Jesús ehémplo. Segundo, jahayhu ñane ermanokuérape. Ha tercero, ñaperdona ñande pyʼaite guive umi ofallávape ñanendive.

7, 8. a) ¿Mbaʼépa jajapóta jaagradeséramo Jesús ñanderayhu haguére? b) ¿Maʼerãpa Jesús oheja ñandéve iñehémplo?

⁷ Primero, ñande jahechakuaa mbaʼeichaitépa Jehová ñanderayhu, ha upéva ñanemomýi ñambotuicha hag̃ua Jesúspe. Pablo oskrivi vaʼekue: “Cristo mborayhu oreovliga rojapo hag̃ua ko mbaʼe” (elee 2 Corintios 5:14, 15). Pablo oikuaa jaagradeséramo Jesús ñanderayhu haguére, jahayhúta ha ñambotuichataha avei chupe. Ñantende porãramo Jehová ojapo vaʼekue ñanderehehápe, jaikóta Jesús oipotaháicha jaiko. ¿Mbaʼéichapa jajapo upéva?

⁸ Jesús oheja ñandéve ehémplo ‘jaguata hag̃ua hekoitépe ipyporére’ (1 Ped. 2:21; 1 Juan 2:6). Ñaneñeʼẽrendúramo Ñandejárape ha Crístope, jahechauka hína jahayhuha chupekuéra. Jesús heʼi vaʼekue: “Pe oguerovia ha ojapóva che mandamiénto, upéva cherayhu hína. Che Ru ohayhúta upe cherayhúvape ha che avei ahayhúta chupe. Ha ajechauka porãta chupe” (Juan 14:21; 1 Juan 5:3).

9. ¿Mbaʼépa ñambohovái ko múndope?

⁹ Koʼág̃a hiʼag̃uimbaitéma pe Konmemorasión, ha ñapensa vaʼerã mbaʼéichapa  jaipuru ñande rekove. Iporã ñañeporandu: “¿Mbaʼéichapa asegi hína koʼág̃a Jesús ehémplo? ¿Mbaʼépepa ikatu amehorave?”. Tekotevẽ ningo jajepyʼamongeta koʼã mbaʼére, pórke ko múndo aña ñandejopy jaiko hag̃ua umi hénte oikoháicha (Rom. 12:2). Nañañatendéiramo, ikatu hína jasegi umi iñarandúvape ko múndope g̃uarã, umi kantánte, aktór, térã umi ifamósovape depórtepe (Col. 2:8; 1 Juan 2:15-17). ¿Mbaʼépa ñanepytyvõta ñambohovái hag̃ua koʼã mbaʼe?

10. a) ¿Mbaʼépa ñañeporandu vaʼerã koʼág̃a hiʼag̃uíva pe Konmemorasión? b) ¿Mbaʼépepa ñakambia vaʼerã, oiméramo tekotevẽ? (Ehecha pe taʼanga oĩva iñepyrũme.)

¹⁰ Jaʼéma haguéicha, pe Konmemorasión hiʼag̃uimbaitéma, ha iporã jajepyʼamongeta jahecha hag̃ua mbaʼéichapa jaiko hína. Ikatu jahecha mbaʼéichapa ñañemonde, mbaʼe músikapa ñahendu, mbaʼe pelíkulapa jahecha, mbaʼe mbaʼépa jareko ñande selulárpe, ñane komputadórape térã ñande távletpe. Ñañeporandumína: “¿Atĩnepa Jesús ohecháramo mbaʼéichapa añemonde?” (elee 1 Timoteo 2:9, 10). “¿Ahechaukápa asegiha Jesús ehémplo añemonde lájare? ¿Ogustánepa Jesúspe umi pelíkula ahecháva ha umi músika ahendúva? ¿Aipurukánepa Jesúspe che selulár térã che távlet? ¿Ahechaukátapa Jesúspe umi videohuégo ahugáva ha amombeʼúta chupe mbaʼérepa chegusta?”. Jahayhúramo Jehovápe, ñamboykéta térã ñamombóta umi mbaʼe naiporãiva kristianokuérape g̃uarã, ijetuʼúramo jepe ñandéve jajapo upéva (Hech. 19:19, 20). Ñañemeʼẽramo guare Jehovápe, ñapromete kuri ñambotuichataha Jesúspe jaikove aja pukukue. Upéicharõ, aníkena jareko mbaʼevete ñandestorvátava jasegi hag̃ua Jesús ehémplo (Mat. 5:29, 30; Filip. 4:8).

11. a) ¿Mbaʼépa jajapóta avei jahayhúramo Jehová ha Jesúspe? b) ¿Mbaʼéichapa ikatu ñaporopytyvõ ñane kongregasiónpe?

¹¹ Jahayhúramo Jehová ha Jesúspe, jasegíta avei japredika ha kyreʼỹme ñamboʼéta umi héntepe la Biblia (Mat. 28:19, 20; Luc. 4:43). Ñañeporandumína: “Og̃uahẽvo pe Konmemorasión tiémpo, ¿ikatúpa añeorganisa porã aservi hag̃ua de prekursór auxiliár ha apredika 30 térã 50 óra?”. Epensamína mbaʼépa ojapo peteĩ ermáno viúdo orekómava 84 áño. Haʼe oimoʼã kuri ndaikatumoʼãveimaha ojapo iprekursorádo auxiliár ijedáma ha hasykatu rupi. Péro umi prekursór oikóva ag̃ui hógagui, ojeofrese ikatu hag̃uáicha oraha chupe veíkulope, ha oiporavo hag̃ua peteĩ território ndoforsamoʼãiva chupe opredika hag̃ua. Upéva oipytyvõ ko ermánope ohupyty hag̃ua 30 óra predikasiónpe. ¿Ikatúpa ñande avei ñaipytyvõ peteĩ ermáno térã ermána ñane kongregasionguápe, oservi hag̃ua de prekursór auxiliár ko márzope térã abrílpe? Añetehápe ningo naentéroi ikatu jajapo ñande prekursorádo, péro entéro ikatu jaipurumie ñane tiémpo ha ñane enerhía jaservi porãve hag̃ua Jehovápe. Jajapóramo upéicha, jahechaukáta hína jaagradeseha Jesús ñanderayhu haguére, ojapo haguéicha apóstol Pablo. ¿Mbaʼépa ikatu jajapove jaagradeséramo Ñandejárape?

12. ¿Mbaʼépa jajapo vaʼerã jaipotáramo Jehová ñanderayhu?

¹² Segundo, jahechakuaávo Jehová ñanderayhuha, ñanekyreʼỹve jahayhu hag̃ua avei ñane ermanokuérape. Apóstol Juan oskrivi vaʼekue: “Ñandejára ñanderayhúramo péicha, ñande jareko avei ovligasión jajoayhúvo”  (1 Juan 4:7-11). Jaipotáramo Jehová ñanderayhu, ñande avei jahayhu vaʼerã ñane ermanokuérape (1 Juan 3:16). ¿Mbaʼéichapa ikatu ñademostra chupekuéra upéva?

13. ¿Mbaʼe ehémplopa Jesús omoĩ ñandéve?

¹³ Jesús ohechauka ñandéve iñehémplo rupive mbaʼéichapa jahayhu vaʼerã ñande rapichakuérape. Haʼe oĩrõ guare ko yvy ape ári, oipytyvõ umi persóna hekomirĩvape. Omonguera vaʼekue umi hasývape, siégope, noñeʼẽivape, ohenduʼỹvape ha oguataʼỹvape (Mat. 11:4, 5). Jesús ndojoguaiete umi líder rrelihiósope, pórke haʼe omboʼeseterei voi umi hénte oikuaasévape Ñandejárape (Juan 7:49). Haʼe ohayhu umi iñumíldevape ha oñehaʼãmbaite oipytyvõ chupekuéra (Mat. 20:28).

14. ¿Mbaʼéichapa ikatu jahechauka jahayhuha ñane ermanokuérape?

¹⁴ Pe Konmemorasión tiémpope iporãta ñapensa meméramo mbaʼéichapa ikatu ñaipytyvõ umi ermáno ñane kongregasionguápe, koʼýte umi ijedavévape. ¿Ikatúpa javisita ha jaraha chupekuéra hoʼumi vaʼerã? ¿Oikotevẽpa hikuái oipytyvõ vaʼerã chupekuéra umi tembiapo ogapypeguápe? ¿Ikatúpa jaraha chupekuéra rreunionhápe térã ñanohẽ ñanendive predikasiónpe? (Elee Lucas 14:12-14.) Ñañemeʼẽvo enkuénta mbaʼeichaitépa Jehová ñanderayhu, ñanekyreʼỹve avei jahechauka hag̃ua jahayhuha ñane ermanokuérape.

15. ¿Mbaʼépa ñarrekonose vaʼerã enterove?

¹⁵ Tercero, jahechakuaa rupi Jehová ñanderayhuha, katuete ñaperdonaséta ñane ermanokuérape. Enterovete ningo ñanase pekadór ha ñamano Adán kúlpare, upévare avave ndaikatúi heʼi noikotevẽiha Jesús sakrifísiore. Ñandejára siérvo iñeʼẽrenduvéva jepe oikotevẽ upéva. Enterove ñarrekonose vaʼerã Ñandejára operdonaha ñandéve peteĩ déuda tuichaitereíva. ¿Mbaʼérepa ñarrekonose vaʼerã upéva? Jahechamína peteĩ ehémplo Jesús omombeʼu vaʼekue.

16, 17. a) ¿Mbaʼépa Jesús omboʼe omombeʼúvo pe ehémplo oñeʼẽva pe rréi operdonávare peteĩ déuda tuicháva? b) ¿Mbaʼéichapa ikatu jahechauka Jehovápe jaagradeseha chupe ñaneperdona haguére?

¹⁶ Jesús omombeʼu peteĩ ehémplo oñeʼẽva  peteĩ esklávo odevévare peteĩ rréipe 60 millones de monéda de pláta. Péro pe rréi operdona chupe upe déuda tuichaitéva. Upe riremínte, ko esklávo noperdonái ótro ikompañéro odevévape chupe 100 monéda de plátante. Pe esklávo oagradesérire pe rréi operdona haguére chupe idéuda, operdona vaʼerã avei ikompañérope. Upéi pe rréi oikuaa mbaʼépa ojapo pe esklávo iñañáva ha ipochyeterei. Upévare ohenoika chupe ha heʼi: “Nde tembiguái aña, che aheja reínte kuri ndéve nde deveha rejerure asýrõ guare chéve. ¿Ndaikatúi piko nde avei reiporiahuverekomi nde rapichápe, che roiporiahuvereko haguéicha?” (Mat. 18:23-35). ¿Mbaʼépa Jesús omboʼe ko ehémplo rupive? Ohechauka Jehová operdonávo ñande pekádo, ombohasa reinteha peteĩ déuda tuichaitereíva. Upéicharõ, ¿mbaʼépa jajapo vaʼerã jahechauka hag̃ua ñandeagradesidoha?

¹⁷ Ko tiémpo jajepreparahápe pe Konmemorasionrã omeʼẽ ñandéve oportunida ñañeporandu hag̃ua: “¿Chetrata vaípa raʼe peteĩ ermáno? ¿Hasýpa chéve aperdona hag̃ua chupe?”. Upéi ñapensa Jehová ojapo vaʼekuére ha jasegi iñehémplo. Haʼe ningo siémpre oĩ ‘ñaneperdona hag̃uáicha’ (Sal. 86:5, NM; Neh. 9:17). Jaagradeséramo Jehovápe ñaneperdona haguére, katuete ñaperdonáta avei ñande rapichápe ñande pyʼaite guive. Jaipotáramo Jehová ñanderayhu ha ñaneperdona, ñande avei jahayhu ha ñaperdona vaʼerã ñane ermanokuérape (Mat. 6:14, 15). Añetehápe ningo ñaperdona haguére ñande rapichápe nokambiamoʼãi umi mbaʼe oiko vaʼekue yma, péro katuete okambiáta ñane renonderã ha ñanepytyvõta jahupyty hag̃ua heta mbaʼe porã.

18. ¿Mbaʼépa oipytyvõ peteĩ ermánape ani hag̃ua orahaiterei enkuénta ótra ermána defékto?

¹⁸ Sapyʼánte ijetuʼu ñambohasa rei hag̃ua umi defékto orekóva umi ermáno ha ermána (elee Colosenses 3:13, 14 ha Efesios 4:32). Jahechamína peteĩ ermána hérava Lili ehémplo. Haʼe ningo ojeofrese vaʼekue oipytyvõ hag̃ua peteĩ ermána viúdape hérava Carol. [1] Lili oraha chupe haʼe ohosehápe, oipytyvõ chupe ombaʼejogua hag̃ua ha hetave mbaʼépe. Lili heta oiko hese, péro Carol siémpre ojekeha. Ha sapyʼánte ijetuʼu chupe ojogueraha porã hag̃ua hendive. Péro Lili oñehaʼãmbaite ohecha umi kualida porã Carol orekóva. Upéva rupi ikatu kuri oipytyvõ chupe unos kuánto áño. Upéi Carol ou hasy ha omano. Lili heʼi: “Che ningo ahaʼarõiterei Carol orresusita. Upépe aikuaáta mbaʼeichagua persónapa haʼe iperfékta rire”. Jaagradeséramo Ñandejárape ñanderayhu haguére, ñande avei ikatúta ñambohasa rei ñane ermanokuéra defékto. Avei Jehová ñanderayhu haguére, ñanepytyvõ ñahaʼarõkuaa hag̃ua pe día entéronte ñandeperfektotahápe.

19. ¿Mbaʼépa jajapóta jaagradeséramo opa mbaʼe Jehová ojapo vaʼekue ñanderehehápe?

¹⁹ Jehová ningo omeʼẽ ñandéve peteĩ “rregálo ijojahaʼỹva”. Jaaprovechákena pe Konmemorasión tiémpo ñapensa hag̃ua opa mbaʼe Jehová ha Jesús ojapo vaʼekuére ñanderehehápe. Jahechaukákena káda día ñaimeha agradesído. Jasegíkena siémpre Cristo ehémplo, jahayhu ñane ermanokuérape, ha ñaporoperdona ñande pyʼaite guive.