1, 2. (a) “Dirava ena davana lasi harihari gauna” be dahaka? (b) Inai stadi ai edena henanadai rua do ita herevalaia?

IEHOVA ese inai tanobada dekenai iena Natuna korikorina ia siaia neganai, ia ese lalokau ia hahedinaraia! (Ioa. 3:16; 1 Ioa. 4:9, 10) Aposetolo Paulo ia gwau, unai lalokau be “Dirava ena davana lasi harihari gauna.” (2 Kor. 9:15) Dahaka dainai unai bamona ia hereva?

² Paulo ia diba Keriso ena boubou amo Dirava ena gwauhamata ibounai do idia guguru. (2 Korinto 1:20 duahia.) Anina be, Dirava ena “davana lasi harihari gauna” be Iesu ena boubou gauna bona Iehova ese ita dekenai ia hahedinaraia hahenamo ibounai. Oibe, unai harihari gauna be hereadae. Unai dainai, unai harihari gauna be edena bamona ita laloa be namo? Edena dala ai unai harihari gauna ese ita do ia durua, unai amo Wednesday, March 23, 2016 ai do ita karaia Memorial hebouna totona ita hegaegae diba?

3, 4. (a) Ta ese oi dekenai harihari gauna ta ia henia neganai, emu hemami be edena bamona? (b) Edena bamona harihari gauna ese emu mauri ia haidaua diba?

³ Harihari gauna ta oi abia neganai, do oi moale bada, ani? To, harihari gaudia haida be mai anina bada o emu mauri idia haidaua diba. Mani inai oi laloa: Oi be hutuma vairanai oi gini bona kahirakahira oi do idia hamasea, badina kerere badana ta oi karaia. To daudau lasi, hutuma huana amo tau ta ia mai bona sibona ia henia oi dainai ia mase totona. Unai kara be edena bamona do oi laloa?

⁴ Unai tauna ese oi dekenai ia hahedinaraia lalokauna dainai, do oi ura emu kara bona mauri oi haidaua. Bona ma haida dekenai hariharibada karana bona lalokau oi hahedinaraia bona ma haida edia dika do oi gwauatao. Emu mauri ibounai lalonai, oi dainai ia mase tauna do oi laloa bada bona tanikiu henia.

5. Dirava ese ia henia harihari gauna ese edena dala ai harihari gaudia ma haida ia hereaia?

⁵ To, Iehova ese Keriso amo ia henia harihari gauna ese atai ita herevalaia haheitalaina ia hereaia. (1 Pet. 3:18) Dahaka dainai? Badina ita ibounai be mai iseda kara dika bona do ita mase. (Roma 5:12) Unai dainai Iehova ese tanobada dekenai Iesu ia siaia bona “taunimanima ibounai totona ia mase.” (Heb. 2:9) Keriso ena amo Iehova ese ita dekenai mauri do ia henia sibona lasi, to mase danu do ia haorea momokani. (Isa. 25:7, 8; 1 Kor. 15:22, 26) Oibe, Iesu idia abidadama henia taudia be Dirava ena Basileia henunai mauri hanaihanai do idia abia bona tanobada ai mai maino bona moale ida do idia noho, to horoa taudia be Keriso ida unai Basileia lalonai do idia lohia. (Roma 6:23; Apok. 5:9, 10) Iehova amo ita abia harihari gauna dainai dahaka hahenamo ma haida do ita abia?

6. (a) Iehova ena “harihari gauna” dainai, edena hahenamo oi naria? (b) Dirava ena lalokau dainai, dahaka do ita karaia?

⁶ Iehova ese ia henia harihari gauna dainai, vaira nega ai gorere ibounai do idia ore, tanobada be paradaiso ai do ia lao, bona mase taudia be do idia toreisi lou. (Isa. 33:24; 35:5, 6; Ioa. 5:28, 29) Unai dainai Iehova bona ena Natuna ita lalokau henia, badina ita dekenai unai “davana lasi harihari gauna” idia henia. To henanadai be inai: Dirava ena lalokau dainai dahaka do ita karaia? Oibe, Dirava ena lalokau dainai, do ita ura (1) Keriso Iesu ena aena gabudia ita badinaia, (2) iseda tadikaka ita lalokau henidia, bona (3) ma haida edia dika do ita gwauatao.

7, 8. Keriso ena lalokau be edena bamona ita laloa be namo, bona unai ese ita ia hagoadaia dahaka ita karaia totona?

⁷ Gau ginigunana be, iseda mauri ibounai lalonai Keriso Iesu ita badinaia be namo. Aposetolo Paulo ia gwau: “Keriso ena lalokau ese ai ia hagoadaia.” (2 Korinto 5:14, 15 duahia.) Paulo ia laloparara, bema ita ura Keriso totona ita mauri, namona be iena lalokau ita abia dae. Oibe, Iehova ese ita totona ia karaia gaudia bona iena lalokau ita laloa neganai, unai ese ita do ia hagoadaia Keriso Iesu ita badinaia totona. Edena dala ai unai do ita karaia?

⁸ Iehova idia lalokau henia taudia be idia ura Keriso ena haheitalai idia tohotohoa bona iena aena gabudiai idia raka. (1 Pet. 2:21; 1 Ioa. 2:6) Iseda kamonai karana amo ita hahedinaraia Dirava bona Keriso ita lalokau henia. Iesu ia gwau: “Lauegu taravatu ia abia dae bona ia badinaia tauna be lau  ia lalokau henia. Bona lau ia lalokau henia tauna be egu Tamana ese do ia lalokau henia bona lau ese ia do lau lalokau henia, bona ia dekenai sibona do lau hahedinaraia.”—Ioa. 14:21; 1 Ioa. 5:3.

9. Dahaka hahetoho ita davaria diba?

⁹ Memorial negana ai, namona be iseda mauri dalana ita laloa. Bona sibona ita nanadaia: ‘Edena dala ai Keriso Iesu ena aena gabudia lau badinaia? Lauegu mauri lalonai dahaka gaudia lau hanamoa be namo?’ Sibona iseda kara ita tahua be mai anina bada, badina gau idauidau ese ita idia veria diba tanobada taudia ita tohotohoa totona. (Roma 12:2) Bema ita naria namonamo lasi, inai tanobada ena aonega taudia eiava spot gadara bona miusiki o muvi piksa karaia taudia ita tohotohoa diba. (Kol. 2:8; 1 Ioa. 2:15-17) Edena dala ai unai bamona hahetoho ita dadaraia diba?

10. Memorial negana ai, sibona dekenai dahaka henanadai do ita henia, bona unai ese ita ia hagoadaia dahaka ita karaia totona? (Laulau ginigunana herevalaia.)

¹⁰ Memorial negana be nega namona iseda dabua, muvi, bona miusiki ita sekea totona, bona iseda kompiuta, mobael fon, bona tablet lalonai idia noho gaudia ita sekea danu be namo. Emu dabua oi sekedia neganai, sibona oi nanadaia: ‘Bema lau lao gabuna ai Iesu ia noho, inai dabua do lau hahedokilaia, a? Bema lau hahedokilaia, ma haida do idia diba lau be Keriso Iesu ena hahediba tauna ta, a?’ (1 Timoteo 2:9, 10 duahia.) Eiava muvi o miusiki ta oi ura abia hidi neganai, sibona oi nanadaia: ‘Iesu ese inai muvi o miusiki do ia moalelaia, a? Bema egu mobael fon o tablet ia gaukaralaia, do ia itaia gaudia dainai do lau hemarai, a?’ Eiava vidio gadara ena sinado ta oi itaia noho lalonai, sibona oi nanadaia: ‘Inai gadara lau ura henia ena badina be Iesu dekenai lau gwauraia hedinarai diba, a?’ Bema Iehova ita lalokau henia, unai ese ita do ia hagoadaia ia ura henia lasi gaudia ibounai ita negea totona, ena be unai gauna be dava bada. (Kara 19:19, 20) Iseda mauri be Dirava dekenai ita gwauhamatalaia neganai, ita gwau ita be sibona totona do ita mauri lasi to Keriso totona do ita mauri. Unai dainai ita idia koua gaudia ibounai ita dadaraia be namo, unai amo Keriso ena aena gabudia ita badinaia diba.—Mat. 5:29, 30; Fili. 4:8.

11. (a) Iehova bona Iesu edia lalokau ese edena dala ai ita ia hagoadaia? (b) Lalokau ese edena dala ai ita ia hagoadaia ma haida ita durua totona?

¹¹ Namona be Iesu lalokau henia karana ese ita ia hagoadaia, mai kudouna ibounai ida haroro bona hahediba gaukarana ita durua totona. (Mat. 28:19, 20; Luka 4:43) Memorial negana be nega namona heduru painia gaukara ita karaia totona bona hora 30 o 50 do ita ripotilaia. Emu noho dalana hegeregerena unai oi karaia diba, a? Mauri lagani 84 dogae ta ia laloa ia heduru painia diba lasi, badina ia buruka bona ena goada be hegeregere lasi. To, painia taudia ese ia idia durua. Edia motuka amo ia idia udaia bona ia dekenai ia hegeregere teritori ta idia karaia, unai amo ena hora 30 ia hagugurua. Memorial negana ai, emu kongrigeisen tadikaka o taihu ta oi durua diba ia heduru painia totona, a? Momokani, ita ibounai be heduru painia gaukara ita karaia diba lasi. To, iseda nega bona goada ita gaukaralaia diba iseda hesiai gaukara Iehova dekenai ita habadaia totona. Unai bamona ita karaia neganai, Paulo bamona, ita hahedinaraia Keriso ena lalokau ese ita ia hagoadaia. Vadaeni Dirava ena lalokau ese ita ia hagoadaia dahaka ita karaia totona?

12. Dirava ena lalokau ese ita ia hagoadaia dahaka ita karaia totona?

¹² Gau iharuana be, Dirava ena lalokau  ese ita ia hagoadaia iseda tadikaka ita lalokau henidia totona. Aposetolo Ioane ia gwau: “Lalokau taudia e, bema Dirava ese unai dala ai ita ia lalokau henia, vadaeni ita danu be mai iseda maduna ita lalokau heheni totona.” (1 Ioa. 4:7-11) Oibe, bema ita ura Dirava ese ita ia lalokau henia, gau badana be iseda tadikaka ita lalokau henidia. (1 Ioa. 3:16) Edena dala ai iseda lalokau ita hahedinaraia diba?

13. Iesu ese dahaka haheitalai namona ia hahedinaraia?

¹³ Iesu ena haheitalai mani ita laloa. Tanobada ai ena haroro gaukara ia karaia neganai, ia ese ogogami taudia ia laloa bada. Bona gorere taudia ia durua. Hegeregere, aena dika taudia, matakepulu taudia, taia kudima taudia, bona idia hereva diba lasi taudia ia hanamoa. (Mat. 11:4, 5) Danu, Iuda tomadiho gunalaia taudia idia gwau, Dirava idia ura dibaia taudia be “Dirava ena lalonamo do idia abia lasi,” to Iesu ese mai moale ida idia ia hadibaia. (Ioa. 7:49) Ia ese unai bamona taudia ia lalokau henia bona ia gaukara goada idia ia hesiai henia totona.—Mat. 20:28.

14. Edena dala ai tadikaka taihu dekenai lalokau oi hahedinaraia diba?

¹⁴ Iesu hegeregerena, Memorial negana be nega namona, iseda kongrigeisen ai idia noho tadikaka taihu ita durua totona. Unai amo ma haida be oi hahedinaraia lalokauna dainai namo do idia davaria. Reana emu kongrigeisen ai buruka tadikaka taihu idia noho. Idia oi vadivadi henidia diba, a? Idia totona aniani oi nadua, o edia ruma gaukara haida oi karaia diba, a? Eiava emu motuka amo hebou dekenai oi abidia lao, o oi boiria oi ida do idia haroro, a? (Luka 14:12-14 duahia.) Namona be Dirava ena lalokau ese ita ia hagoadaia, iseda tadikaka dekenai lalokau ita hahedinaraia totona.

15. Dahaka ita laloatao be namo?

¹⁵ Gau ihatoina be, Iehova ena lalokau ese ita ia hagoadaia iseda tadikaka taihu edia kerere ita gwauatao totona. Ita be Adamu ena natudia dainai, kara dika bona mase ita abia hanai. Unai dainai ta ia gwau diba lasi, “Lau dekenai mauri davana be anina lasi.” Oibe, Dirava ena hesiai taudia ibounai be Iehova ese Keriso amo ia hahedinaraia hebogahisi hereadaena amo namo idia  davaria. To, namona be inai ita laloatao, iseda abitorehai Dirava dekenai be bada herea. Dahaka dainai unai be mai anina bada? Haere be Iesu ena parabole ta ai do ita davaria.

16, 17. Iesu ena parabole amo dahaka ita dibaia?

¹⁶ Iesu ena parabole lalonai, ia gwau igui hesiai tauna ta be king amo 10,000 talent o 60,000,000 denario ia abitorehai, to king ese ena abitorehai ia gwauatao. To, unai igui hesiai tauna ese ia amo 100 denario ia abitorehai igui hesiai tauna ia hebogahisi henia lasi. King ese unai sivarai ia kamonai neganai, ia badu dikadika. King ia gwau: “Igui hesiai tauna dikana e, lau oi noinoi henia neganai, emu abitorehai ibounai lau gwauatao. Oi lau hebogahisi henia hegeregerena, oi danu emu bamona oi hebogahisi henia be namo, ani?” (Mat. 18:23-35) Oibe, king ese ia hahedinaraia hebogahisina ese unai igui hesiai tauna ia hagoadaia be namo, igui hesiai tauna ma ta ena abitorehai ia gwauatao totona. Unai hegeregerena, Iehova ese ia hahedinaraia lalokau bona hebogahisi ese edena dala ai ita ia hagoadaia be namo?

¹⁷ Bema tadikaka o taihu ta dekenai ita badu noho, Memorial negana be nega namona iena kerere ita gwauatao totona. Unai amo Iehova ena kara ita tohotohoa, badina ia be “kara dika gwauatao Diravana.” (Neh. 9:17; Sal. 86:5) Oibe, Iehova ese iseda abitorehai bada hereana ia gwauatao, unai dainai mai iseda kudouna ibounai ida ma haida edia kerere ita gwauatao be namo. Bema ma haida ita lalokau henia bona edia dika ita gwauatao, Dirava ese ita do ia lalokau henia bona iseda dika do ia gwauatao. (Mat. 6:14, 15) Momokani, ma ta ena dika ita gwauatao neganai, unai ese ia vara gauna do ia haidaua lasi, to iseda vaira nega do ia hanamoa.

18. Edena dala ai taihu ta ese taihu ma ta ena kara ia haheaukalaia?

¹⁸ Momokani, iseda tadikaka taihu edia kara ita “haheaukalaia noho” be mai ena hekwarahi. (Kolose 3:13, 14; Efeso 4:32 duahia.) Hegeregere kongrigeisen ta ai, singul taihuna Lily ^[1] be mai ura ida vabu ta ladana, Carol ia durua. Hebou totona Lily ese ena motuka amo ia udaia, ia totona gaukara haida ia karaia, bona dala ma haida ai iena hebogahisi ia hahedinaraia. Ena be Lily be unai ia karaia, Carol ena kara be auka. To, Lily be Carol ena kara namodia ia laloa. Ia ese lagani haida lalonai Carol ia naria ela bona Carol ia gorere bona ia mase. Lily ia gwau: “Carol ia toreisi lou neganai, lau ura bada ia lau itaia. Bona ia goevadae neganai, ia do lau dibaia namonamo.” Oibe, Dirava ena lalokau ese ita ia hagoadaia iseda tadikaka taihu edia kara ita haheaukalaia totona, bona taunimanima ibounai be goevadae taudia ai do idia lao negana ita naria.

19. Dirava ena “davana lasi harihari gauna” dainai, dahaka ita karaia be namo?

¹⁹ Ita ibounai ese Iehova amo “davana lasi harihari gauna” ita abia. Bona unai harihari gauna namo hereana ita laloa bada be namo. Unai dainai inai Memorial negana ai, namona be Iehova bona Iesu ese ita totona idia karaia gaudia ibounai ita laloa dobu. Oibe, namona be idia hahedinaraia lalokauna ese ita ia hagoadaia, Iesu ena aena gabudia ita badinaia, iseda tadikaka taihu ita lalokau henia, bona mai iseda kudouna ibounai ida iseda tadikaka taihu edia kerere ita gwauatao totona.