1, 2. (a) Moathimo amwe ma ũla ‘mũthĩnzĩo ũtaweteka’ nĩ meva? (b) Twĩsũngĩa makũlyo mekũ ĩsomonĩ yĩĩ?

ĨVINDA yĩla Yeova watũmie Mwana wake mũsyawa weka kũũ nthĩ atũnengie mũthĩnzĩo wa vata mũno. Ũsu nĩw’o mũthĩnzĩo ũla mũnene vyũ wonanasya kana nũtwendete! (Yoa. 3:16; 1 Yoa. 4:9, 10) Mũtũmwa Vaulo awĩtie ‘mũthĩnzĩo ũtaweteka.’ (2 Ako. 9:15) Nĩkĩ watũmĩie ndeto isu?

² Vaulo nĩweesĩ kana maũndũ onthe ma ũsengy’o ala Ngai wathanie makeanĩa nũndũ wa ĩla nthembo ĩte naĩ Klĩsto waumisye. (Soma 2 Akolintho 1:20.) Kwoou moathimo amwe ma ‘mũthĩnzĩo ũsu ũtaweteka’ nĩ ũseo w’onthe ũla Yeova waĩ atwĩke kwĩsĩla vala ve Yesũ vamwe na kũtwenda kũla ũtwendete. Mũthĩnzĩo ũsu nĩ mũseo vyũ ũkethĩa o na mũndũ ndaũeleekya nesa. Twaĩle kwĩka ata twasũanĩa mũthĩnzĩo ũsu wa vata tũnengetwe? Na mũthĩnzĩo ũsu waĩlĩte kũtwĩkĩa vinya maũndũnĩ meva ĩvindanĩ yĩĩ tweteele kũlilikana kĩkw’ũ kya Klĩsto Wakatatũ wa Matukũ 23, Mwei wa 3, 2016?

3, 4. (a) Wĩw’aa ata ĩla mũndũ waũnenga mũthĩnzĩo? (b) Thayũ waku ũtonya kũalyũka ata ũkanengwa mũthĩnzĩo wa mwanya?

³ Vai nzika kana nĩwĩw’aa mũyo ĩla wakwata kamũthĩnzĩo. Ĩndĩ mĩthĩnzĩo ĩmwe yĩthĩawa yĩ ya mwanya kana yĩ ya vata mũno ũkethĩa wamĩkwata maũndũ maku nĩmavĩndũka vyũ. Kwa ngelekany’o, sũanĩa wĩ mũsikate na ũitw’ĩĩwa kĩnyonga. Ĩndĩ ũilangye ũyona mũndũ ũtamwĩsĩ aumĩlĩla vandũ na ayĩyumya oawe vandũ vaku. Na ũyona ta ngũĩ, ũyĩthĩa mũndũ ũsu eĩka ũu na ngenda! We wĩka ata wonete ũndũ ta ũsu?

⁴ Mũndũ ũkũtethya eyumĩtye ũu onany’a nũkwendete mũno, na vate nzika kĩko kĩu kyake kĩũthing’ĩĩsya ũsũanĩe kelĩ ĩũlũ wa mwĩkalĩle waku na ũyenda kũalyũka. Kĩu no kĩtume wenda kwĩthĩwa wĩ mũlau kwĩ tene na wambĩĩa kwenda ala angĩ mũnango, o na no kĩtume ũekea ala maũvĩtĩsye. Kuma ĩvinda yĩu nginya ũkakw’e, wĩthĩwa ũyenda kũtũngĩa mũvea mũndũ ũsu weeyumisye na ngenda oawe vandũ vaku.

5. Nĩkĩ mũthĩnzĩo ũla Ngai ũtũnengete wa wovosyo nĩ wa vata vyũ kwĩ mũthĩnzĩo o na wĩva?

⁵ Ĩndĩ mũthĩnzĩo ũla Yeova ũtũnengete kwĩsĩla vala ve Klĩsto nĩ wa vata vyũ kũvĩtũka ũsu wawetwa. (1 Vet. 3:18) Nĩkĩ? Nĩkwĩthĩwa ithyonthe nĩtwasilĩlwe kĩkw’ũ nũndũ wa naĩ ĩla twatiĩwe. (Alo. 5:12) Ĩndĩ nĩkwĩthĩwa Yeova nũtwendete, nĩweekie mũvango Yesũ oke kũũ nthĩ nĩ kana “asame kĩkw’ũ vandũ va kĩla mũndũ.” (Aevl. 2:9) Ĩla Yeova weekie ũu, nĩwatũtangĩĩie na atũnenga wĩkwatyo wa kwĩsa kũtũvetea kĩkw’ũ tene na tene. (Isa. 25:7, 8; 1 Ako. 15:22, 26) Onthe ala mamũĩkĩĩaa Yesũ makatanĩa kwĩkala thayũ tene na tene kwĩ mũuo masumbĩkĩtwe nĩ Ũsumbĩ wa Ngai, ũla ũkethĩwa ũtongoew’e nĩ Klĩsto. Namo Aklĩsto etĩkĩw’a mauta makatanĩa kũsumbĩka vamwe na Klĩsto Ũsumbĩnĩ ũsu. (Alo. 6:23; Ũvu. 5:9, 10) Nĩ moathimo angĩ meva tũkakwata nũndũ wa mũthĩnzĩo ũsu Yeova watũnengie?

6. (a) We wendete ũathimo wĩva katĩ wa moathimo ala tũkakwata nũndũ wa ũla mũthĩnzĩo Yeova watũnengie? (b) Weta maũndũ atatũ tũthing’ĩĩaw’a kwĩka nũndũ wa ũla mũthĩnzĩo Ngai watũnengie.

⁶ Moathimo angĩ tũkakwata nũndũ wa mũthĩnzĩo ũsu Yeova ũtũnengete nĩ aa: tũkavetewa mowau onthe, nthĩ ĩno ĩkaseũvw’a yĩkale ũndũ mũũnda wa Eteni wailyĩ, na ala akw’ũ makathayũũkw’a. (Isa. 33:24; 35:5, 6; Yoa. 5:28, 29) Ithyĩ nĩtũmwendete Yeova mũno na Mwana wake mwendwa nĩkwĩthĩwa nĩmatũnengie ‘mũthĩnzĩo ũsu ũtaweteka.’ Ĩndĩ ĩkũlyo nĩ atĩĩ, Nĩ ĩtambya yĩva twaĩle kwosa twasũanĩa ũndũ Ngai ũtwendete? Kwaekai tũsũanĩe ũndũ wendo wa Ngai ũtũthing’ĩĩasya maũndũnĩ aa atatũ: (1) kũatĩĩa nyaaĩ sya Klĩsto Yesũ, (2) kwenda ana-a-asa maitũ, na (3) kũekeanĩa kuma ngoonĩ.

7, 8. Twaĩlĩte kwĩw’a ata twasũanĩa ũndũ Klĩsto ũtwendete? Wendo wa Klĩsto waĩlĩte kũtũthing’ĩĩsya twĩke ata?

⁷ Mbee vyũ, nĩtwĩw’aa twathing’ĩĩw’a twĩkale kwondũ wa Klĩsto Yesũ. Mũtũmwa Vaulo aandĩkie atĩĩ: “Wendo wa Klĩsto nũũtũthing’ĩĩsya.” (Soma 2 Akolintho 5:14, 15.) Vaulo nĩweesĩ kana twakwatya nesa ũndũ Klĩsto ũtwendete, tũkathing’ĩĩw’a, kana tũkasukumwa, twĩkale kwondũ wake. Ĩla ilĩko sitũ syakwatya nesa maũndũ ala Yeova ũtwĩkĩte na ĩla ngoo sitũ syakiitwa nĩ wendo wake, nĩtwĩthĩawa na mea ma kwĩyumya na ngoo yonthe kwondũ wa Klĩsto Yesũ. Tũtonya kwĩka ata nĩ kana twonany’e twĩ na mea asu?

⁸ Ala mamwendete Yeova nĩmew’aa maithing’ĩĩw’a meke ũndũ Klĩsto weekaa na maatĩĩe nyaaĩ syake. (1 Vet. 2:21; 1 Yoa. 2:6)  Ĩla twamwĩw’a Ngai na Klĩsto, twĩthĩawa tũyonany’a kana nĩtũmendete. Yesũ aisye ũũ: “Ũla wĩ na mĩao yakwa, na ũmĩkwataa, ũsu nĩwe ũmbendete: na ũla ũmbendete akendwa nĩ Asa, nakwa ngamwenda na ngeeyonan’ya kwake.”—Yoa. 14:21; 1 Yoa. 5:3.

9. Tũkomanaa na thĩna wĩva?

⁹ Ĩvindanĩ yĩĩ ya kũlilikana kĩkw’ũ kya Yesũ nũseo tũkavindĩĩsya mũno mwĩkalĩle witũ. Kwekũlye atĩĩ: ‘Nĩ va ngwona nĩatĩĩe nesa nyaaĩ sya Klĩsto Yesũ? Nĩ va ngwona naĩlĩte kwĩka maendeeo?’ Kwosa ĩvinda wĩthiane na makũlyo ta asu nĩ kwa vata nũndũ kĩla ndatĩka nĩtũthing’ĩĩaw’a twĩkale ta andũ ma nthĩ ĩno. (Alo. 12:2) Tũkaema kwĩthĩwa twĩ metho, nĩ laisi tũkatavwa nĩ asomi ma nthĩ ĩno kana nĩ athaũki me nguma na andũ angĩ ala mendetwe nĩ nthĩ. (Ako. 2:8; 1 Yoa. 2:15-17) Tũtonya kwĩka ata nĩ kana tũikavw’anane na andũ ta asu?

10. Nĩ makũlyo ta meva twaĩle kwĩkũlya ĩvindanĩ yĩĩ ya kũlilikana kĩkw’ũ kya Yesũ? Mosũngĩo ma makũlyo asu matonya kũtũtethya ata? (Sisya visa ĩthangũnĩ ya 12.)

¹⁰ Ĩvinda yĩĩ ya kũlilikana kĩkw’ũ kya Yesũ nĩ ĩvinda ĩseo tũtonya kũtũmĩa tũsisye nesa ngũa ila twĩ nasyo, na tũithiana mbathi na sinema ila twĩ nasyo, kana o na syĩndũ ila twĩkĩĩte kombiũtanĩ na simũnĩ. Kwa ngelekany’o, ĩla ũũsisya ngũa ila wĩ nasyo ĩkũlye ũũ: ‘Takeka nĩendaa vandũ Yesũ ũĩ, no nĩw’e nĩ mwĩanĩe nĩendete na ngũa ĩno?’ (Soma 1 Timotheo 2:9, 10.) ‘Na ngaelya ũmĩkĩa andũ onthe no mone kana nĩ mũatĩĩi wa Klĩsto Yesũ?’ No twĩkũlye makũlyo ta asu ĩla tũũsisya nĩ sinema syĩva na nĩ mbathi syĩva twendete. Kwa ngelekany’o, no wĩkũlye-ĩ, ‘Yesũ no ekale nthĩ eloele sinema ĩno kana ethukĩĩsye wathi ũũ? Yesũ akambĩtya simũ yakwa no nĩw’e nthoni nũndũ wa syĩndũ ila nĩkĩĩte vau nthĩnĩ?’ Na ethĩwa nĩwendete ĩthaũ ĩna ya vitio ĩkũlye-ĩ, ‘No nĩw’e vinya wa kũelesya Yesũ nĩkĩ nendete ĩthaũ yĩĩ?’ Kũmwenda kũla tũmwendete Yeova kwaĩlĩte kũtũthing’ĩĩsya twĩkye kĩndũ kyonthe kĩtaĩlĩte kũwetanĩw’a na mũmanyĩw’a wa Klĩsto o na ethĩwa twakĩthooie mbesa iana ata. (Meko 19:19, 20) Ĩla tweeyumisye tũmũthũkũme Yeova nĩtwamwathie kana tũikambĩla kwĩkala ĩngĩ kwondũ witũ, ĩndĩ no kwondũ wa Klĩsto. Kwoou tũyaĩle kũlũmany’a na kĩndũ kĩtonya kũtuma tũemwa nĩ kũatĩĩa nyaaĩ sya Klĩsto.—Mt. 5:29, 30; Avi. 4:8.

11. (a) Kũmwenda Yeova na Yesũ kũtũthing’ĩĩasya twĩke ata wĩanĩ wa kũtavany’a? (b) Wendo ũsu ũtonya kũtũthing’ĩĩsya tũtetheesye ata Aklĩsto ala angĩ kĩkundinĩ?

¹¹ Kũmwenda Yesũ nĩkũtũthing’ĩĩasya tũtavany’e na ngoo yonthe na twĩyumye tũtw’ĩkĩthye andũ amanyĩw’a. (Mt. 28:19, 20; Luka 4:43) Ĩvindanĩ ya kũlilikana kĩkw’ũ kya Yesũ twĩ na mwanya wa kũtw’ĩka mavainia atetheesya nĩ kana tũtavany’e masaa 30 kana 50. We no wĩvange nesa nĩ kana wose ũvainia mũtetheesya? Kwasũanĩa ĩũlũ wa mwana-a-asa ũmwe waĩ na myaka 84. Mwana-a-asa ũsu oonaa atesa kwosa ũvainia mũtetheesya nũndũ nĩ mũkũũ, eew’aa naĩ, na nĩwakw’ĩĩwe nĩ mũka. Ĩndĩ mavainia ala maĩ vakuvĩ nake nĩmamũkwatie kw’oko. Nĩmamũmanthĩie nesa kĩsio kĩla ũtonya kũtavany’a na nĩmamũtwaaa vau nĩ kana eanĩsye ala masaa 30 wavangĩte. We naku no ũtate kũtetheesya mũndũ wĩ vau kĩkundinĩ nĩ kana atanĩe kũtw’ĩka vainia mũtetheesya ĩvindanĩ yĩĩ ya kũlilikana kĩkw’ũ kya Yesũ? Kũneena ũla w’o, ithyonthe tũitonya kũtw’ĩka mavainia atetheesya. Ĩndĩ o na ethĩwa tũitonya, no tũmũtaĩe Yeova mũnango tũtũmĩĩte ĩvinda yĩla twĩ nayo, o na ethĩwa yĩana ata, na vinya ũla twĩ naw’o. Tweeka ũu tũkeethĩawa tũyonany’a kana tũilyĩ o ta Vaulo, ũla waekie wendo wa Klĩsto ũmũthing’ĩĩsye. Nĩ ũndũ ũngĩ wĩva wendo wa Ngai ũtonya kũtũthing’ĩĩsya twĩke?

12. Wendo wa Ngai ũtũthing’ĩĩasya twĩke ata?

¹² Ũndũ wa kelĩ nĩ kana wendo wa Ngai ũkatũthing’ĩĩasya twende ana-a-asa maitũ. Mũtũmwa Yoana nĩweesĩ ũu, na nĩkyo kĩtumi waandĩkie ũũ: “Endwa, ethĩwa Ngai nĩwatwendie ũu, naitũ nĩtwaĩlwe nĩ kwendana.” (1 Yoa. 4:7-11) Kwoou ethĩwa nĩtũkwenda Ngai atwende, no nginya tũmanye kana nĩtwaĩle kwenda ana-a-asa maitũ. (1 Yoa. 3:16) Ĩndĩ tũtonya kwĩka ata nĩ kana twonany’e nĩtwendete ana-a-asa?

13. Yesũ eekaa ata akonany’a nĩwendete andũ ala angĩ?

¹³ Kwavindĩĩsya ũndũ Yesũ weekaa. Ĩla waĩ kũũ nthĩ aitavany’a nĩwasũanĩaa mũno ala mavũthĩtw’e. Nĩwatetheeisye mũno ala maĩ na mathĩna ma mwĩĩ. Kwa ngelekany’o, nĩwatetheeisye ala maĩ au maaũ, ilalinda, vuvu, na ala maĩ au matũ. (Mt. 11:4, 5) Yesũ nĩweew’aa mũyo mũno aitavya ũvoo ala mendaa kũmũmanya Ngai o na kau atongoi ma ndĩni mamatalaa ta ‘aumanĩe.’ (Yoa. 7:49) O na kũtw’ĩka andũ asu nĩmavũthĩtw’e, amendete mũno na nĩwatataa ũndũ ũtonya amavikĩsye ũvoo.—Mt. 20:28.

14. Ũtonya kwĩka ata nĩ kana ũĩkĩĩthye ana-a-asa maku nũmendete?

¹⁴ Ĩvinda ya kũlilikana kĩkw’ũ kya Yesũ nĩ ĩvinda ĩseo mũno ya kũatĩĩa ngelekany’o yake. No ũtũmĩe ĩvinda yĩu ũkasũanĩa ĩũlũ wa ana-a-asa na eĩtu-a-asa ala me kĩkundinĩ kyenyu. Weeka ũu ndwĩema kwona amwe ũtonya kũmatethya. Kwa ngelekany’o, no kwĩthwa ve ana-a-asa na eĩtu-a-asa akũũ mekwenda kũtetheew’a. Wĩona ata ũkamathokea? Kana wĩona ata ũkamauĩa lĩu, kana ũkamatetheesya tũmawĩa o vau mũsyĩ, kana o ũkeyumya ũmatwae ũmbanonĩ, kana o mũkavanga mũthi ĩmwe ũtavany’a? (Soma Luka 14:12-14.) No nginya tũeke wendo wa Ngai ũtũthing’ĩĩsye twĩthĩwe na mea ma kũtetheesya ana-a-asa na kũmony’a nĩtũmendete.

15. Nĩ ũndũ mwaũ twaĩlĩte kwĩtĩkĩla?

¹⁵ Naw’o ũndũ wa katatũ nĩ kana no nginya wendo wa Yeova ũtũthing’ĩĩsye tũekeae ana-a-asa na eĩtu-a-asa. Nĩkwĩthĩwa ithyonthe twĩ ũsyao wa ũla mũndũ wa mbee, Atamu, twasyaiwe na naĩ na nĩtũtalĩlwe kĩkw’ũ. Vai mũndũ o na ũmwe ũkĩla akasya, “Ndi na vata wa wovosyo.” O na mũthũkũmi ũla mũĩkĩĩku vyũ wa Yeova ndekala ate na mumo ũla Yeova watwonisye kwĩsĩla vala ve Klĩsto. No nginya kĩla ũmwe witũ etĩkĩle kana thiĩ ũla tũekewe nĩ mũnene vyũ. Nĩkĩ twaĩle kwĩtĩkĩla kana nĩtũekewe thiĩ  mũnene? Ũsũngĩo no tũũkwate twasisya ĩmwe ya ngelekany’o ila Yesũ wanenganie.

16, 17. (a) Nĩ kyaũ twaĩle kwosa nthĩnĩ wa ĩla ngelekany’o ya Yesũ ya ũla mũsumbĩ na ngombo? (b) We ũtw’ĩte kwĩka ata ĩtina wa kũvindĩĩsya ngelekany’o ĩsu ya Yesũ?

¹⁶ Mũthenya ũmwe Yesũ nĩwawetie ĩũlũ wa mũsumbĩ ũmwe waekeie ngombo yake thiĩ mũnene wa talendi 10,000, ila nĩ ũndũ ũmwe na ndinalĩ 60,000,000. Ngombo ĩsu yaekeiwe nayo yaĩ na thiĩ na ngombo ĩngĩ wa ndinalĩ 100. Ĩndĩ ngombo ĩsu ya mbee nĩyaemiwe nĩ kũekea ngombo ĩla ya kelĩ o na kau thiĩ wayo waĩ mũnini vyũ waelekanw’a na ũla yo mwene yaekewe nĩ mũsumbĩ. Ĩla mũsumbĩ weewie ũvoo ũsu, na amanya ũndũ ngombo ĩsu yaĩ na ngoo yetete, nĩwathatie mũno alilikana ũndũ wamĩw’ĩie tei nginya amĩekea. Nĩvo ĩndĩ mũsumbĩ ũsu waisye: “We ngombo nthũku, ngũekeie thiĩ ũsu w’onthe, nũndũ nũmbĩsũvie: naku ndwaĩlwe nĩ kũmwĩw’ĩa tei mũthũkũmi ũngĩ, tondũ nyie ngwĩw’ĩie tei?” (Mt. 18:23-35) Ngombo ĩsu yaaĩlĩte kũthing’ĩĩw’a nĩ tei wa mũsumbĩ ĩekee ĩla ĩngĩ. Kwoou-ĩ, kũtwenda kũla Yeova ũtwendete na tei ũla ũtwĩw’ĩaa kwaĩlĩte kũtũthing’ĩĩsya twĩke ata?

¹⁷ Ĩvinda ya kũlilikana kĩkw’ũ kya Yesũ nĩ ĩvinda ĩseo ya kwĩthiana ũmanye ethĩwa wĩ na ũndũ na mwana-a-asa mũna kana mwĩĩtu-a-asa mũna. Weethĩa wĩ na ũndũ na mũndũ, manya ĩndĩ kana yĩĩ nĩyo ĩvinda ĩseo ya kũatĩĩa ngelekany’o ya Yeova, nũndũ we nĩ Ngai “wĩyũmbanĩtye kũekea.” (Nee. 9:17; Sav. 86:5) Ethĩwa nĩtũkũelewa nesa kĩla Yeova weekie nĩ kana atũekee thiĩ witũ ũnenevete ũu, tũkeethĩawa twĩyũmbanĩtye kũekea ala angĩ kuma ngoonĩ. Ngai ndesa kũtwenda na kũtũekea ethĩwa tũyendete angĩ na tũimaekeaa. (Mt. 6:14, 15) O na kau nĩtwĩsĩ nesa kana o na twaekea mũndũ tũyĩthĩawa twaalyũla kĩla kĩneekĩkie, kũekea kũileaa kũlũnga maũndũ.

18. Wendo wa Ngai watetheeisye mwĩĩtu-a-asa ũmwe ata oomĩanĩsya na mwĩĩtu-a-asa ũngĩ?

¹⁸ Ti laisi kwa aingĩ maitũ “kũmĩĩasya” ana-a-asa na eĩtu-a-asa kĩla mũthenya. (Soma Akolosai 3:13, 14; Aeveso 4:32.) Kwasũanĩa ngelekany’o ya Lily. Mwĩĩtu-a-asa ũsu ti mũtwae na kĩkundinĩ kyake vaĩ mwĩĩtu-a-asa ndiwa weetawa Carol. ^[1] Lily nĩwatetheeasya Carol kwa kũmũtwaaa kũndũ, kũmũsembeeaa syĩndũ ila ũkwenda ndukanĩ, na kũmwĩka maũndũ angĩ maingĩ. Ĩndĩ o na kau Lily nĩwakũnie wĩa mwingĩ, kĩla ĩvinda Carol atindĩaa kũmumany’a, na kwĩkalany’a nake kũyaĩ laisi. Ĩndĩ Lily ndaatala ũu ta ũndũ, kĩla wasũanĩaa nĩ ũseo wa Carol. Aendeeie kũtetheesya Carol kwa myaka ĩana ũna nginya ĩla wesie kũwaa mũno na akw’a. Lily easya: “O na kwĩthĩwe kwaendie ata, nĩ na wendi mwingĩ mũno wa kwona Carol ĩla wĩthayũũkw’a. Nĩw’aa ndyenda kwĩsa kwona ũndũ ũkethĩwa ailyĩ ate na naĩ.” Ĩĩ, nĩ w’o vyũ, wendo wa Ngai no ũtũthing’ĩĩsye tũmĩanĩsye na ana-a-asa na eĩtu-a-asa na ũituma twĩthĩwa na mea ma kwĩkalany’a ĩmwe ĩvinda yĩla andũ matakethĩwa na naĩ tene na tene.

19. We ũtw’ĩte kwĩka ata nũndũ wa ‘mũthĩnzĩo ũtaweteka’ ũla Ngai ũtũnengete?

¹⁹ Tũi na nzika o na vanini kana Yeova nũtũnengete “mũthĩnzĩo wake ũtaweteka.” Mwa tũikaavũthĩĩsye mũthĩnzĩo ũsu ũtũnengete. Ekai ĩvindanĩ yĩĩ ya kũlilikana kĩkw’ũ kya Yesũ tũsũanĩe twĩ na ũtanu mwingĩ kĩla Yeova na Yesũ mekĩte kwondũ witũ. Ekai mwa wendo woo ũtũthing’ĩĩsye tũatĩĩe nyaaĩ sya Yesũ, twĩthĩwe na mea ma kũtetheesya ana-a-asa maitũ na kũmony’a kana nĩtũmendete, na kũmaekeaa kuma ngoonĩ.