1, 2. (a) ‘Kĩheo kĩa Ngai kĩrĩa gũtarĩ ciugo ingĩtaarĩria ũrĩa gĩtariĩ’ kĩhutĩtie maũndũ marĩkũ? (b) Nĩ ciũria irĩkũ tũkwarĩrĩria gĩcunjĩ-inĩ gĩkĩ?

JEHOVA aatũheire kĩheo kĩrĩa kĩnene mũno kĩa wendo rĩrĩa aatũmire Mũrũ wake wa mũmwe gũkũ thĩ. (Joh. 3:16; 1 Joh. 4:9, 10) Mũtũmwo Paulo aagĩĩtire ‘kĩheo kĩrĩa gũtarĩ ciugo ingĩtaarĩria ũrĩa gĩtariĩ.’ (2 Kor. 9:15) Aahũthĩrire ciugo icio nĩkĩ?

² Paulo nĩ aamenyaga atĩ ciĩranĩro ciothe cia magegania iria Ngai atwĩrĩire ikaahinga nĩ ũndũ wa igongona ikinyanĩru rĩa Kristo. (Thoma 2 Akorintho 1:20.) Nĩ ũndũ ũcio, ‘kĩheo kĩu gũtarĩ ciugo ingĩtaarĩria ũrĩa gĩtariĩ’ kĩhutĩtie maũndũ mothe mega na ma wendo marĩa Jehova agaatwĩkĩra kũgerera Jesu ihinda rĩrĩa rĩroka. Kĩheo kĩu nĩ kĩa magegania ũũ atĩ gũtirĩ mũndũ ũngĩhota gũtaarĩria biũ ũhoro wakĩo. Kĩheo kĩu kĩagĩrĩirũo gũtũhutia  atĩa? Nĩ na njĩra irĩkũ tũngĩonania ngatho citũ nĩ ũndũ wa kĩheo kĩu tũkĩĩharĩria nĩ ũndũ wa Kĩririkano gĩa gĩkuũ kĩa Jesu kĩrĩa gĩgaakorũo Njumatano Machi 23, 2016?

3, 4. (a) Ũiguaga atĩa rĩrĩa waheo kĩheo? (b) Nĩ na njĩra ĩrĩkũ kĩheo kĩa mwanya kĩngĩtũma ũgarũrĩre mũtũũrĩre waku?

³ Nĩ tũkenaga mũno rĩrĩa twaheo kĩheo. O na kũrĩ ũguo iheo imwe nĩ ikoragwo irĩ cia mwanya kana cia bata mũno ũũ atĩ no igarũre ũtũũro witũ. Kwa ngerekano ta tua atĩ ũtuĩrĩirũo kũũragwo nĩ ũndũ wa gwĩka ũndũ mũru mũno. O rĩmwe hakoimĩra mũndũ mũtoyaine na akerutĩra kũũragwo ithenya rĩaku. Gĩĩko ta kĩu kĩngĩtũma ũigue atĩa?

⁴ Gĩĩko ta kĩu kĩa wendo wa kwĩima no gĩgũtindĩke ũgarũrĩre mũtũũrĩre waku. No kũhoteke gĩtũme ũtuĩke mũtaana na mũndũ ũrĩ wendo kwerekera andũ arĩa angĩ na wohere mũndũ o wothe wanakũhĩtĩria. Ũtũũro-inĩ waku wothe no ũiguage ũrĩ na thiirĩ harĩ mũndũ ũcio warutire muoyo wake nĩ ũndũ waku.

5. Kĩheo kĩa Ngai gĩa ũkũũri nĩ kĩa bata makĩria gũkĩra kĩheo kĩngĩ o gĩothe nĩkĩ?

⁵ Kĩheo kĩrĩa Jehova aatũheire kũgerera Kristo nĩ kĩa goro mũno gũkĩra kĩheo kĩu twagweta thĩinĩ wa ngerekano ĩyo. (1 Pet. 3:18) Nĩkĩ? Nĩ ũndũ wa mehia marĩa twagaire, ithuothe nĩ twatuĩrĩirũo gĩkuũ. (Rom. 5:12) Ĩndĩ nĩ ũndũ wa wendo, Jehova nĩ aatũmire Jesu oke gũkũ thĩ nĩguo “acame gĩkuũ nĩ ũndũ wa andũ othe.” (Ahib. 2:9) Makĩria ma gũtũhonokia, nĩ harĩ ũndũ ũngĩ igongona rĩa Jesu rĩkaahingia. Nĩ rĩkaanina gĩkuũ tene na tene. (Isa. 25:​7, 8; 1 Kor. 15:​22, 26) Arĩa othe monanagia wĩtĩkio harĩ Jesu nĩ makaaheo muoyo we tene na tene thĩinĩ wa thĩ ĩrĩ na thayũ na gĩkeno marĩ raiya a Ũthamaki wa Ngai, na arĩa aitĩrĩrie maguta matuĩke athamaki Ũthamaki-inĩ ũcio. (Rom. 6:23; Kũg. 5:​9, 10) Nĩ irathimo irĩkũ ingĩ ikoimana na kĩheo kĩu tũheetwo nĩ Jehova?

6. (a) Nĩ irathimo irĩkũ cia Jehova wĩriragĩria mũno? (b) Gweta maũndũ matatũ marĩa wendo wa Ngai ũtũtindĩkaga gwĩka.

⁶ Kũniinwo kwa mĩrimũ yothe, thĩ kũgarũrũo ĩtuĩke paradiso, na kũriũkio kwa arĩa makuĩte nĩ irathimo ingĩ iria ikoimana na kĩheo kĩu kĩa Jehova. (Isa. 33:24; 35:​5, 6; Joh. 5:​28, 29) Nĩ twendete Jehova na Mũriũ wake mũno nĩ ũndũ wa gũtũhe ‘kĩheo kĩu gũtarĩ ciugo ingĩtaarĩria ũrĩa gĩtariĩ.’ Tondũ nĩ tũmendete-rĩ, wendo ũcio wagĩrĩirũo gũtũtindĩka twĩkage atĩa? Rekei twarĩrĩrie ũrĩa wendo witũ harĩ Ngai ũtũtindĩkaga (1) kũrũmĩrĩra makinya ma Jesu, (2) kwenda aarĩ na ariũ a Ithe witũ, na (3) kuohagĩra arĩa angĩ biũ.

7, 8. Wendo wa Kristo ũtũmaga tũigue atĩa, na ũtũtindĩkaga gwĩka atĩa?

⁷ Ũndũ wa mbere nĩ atĩ nĩ twagĩrĩirũo nĩ gũtindĩkwo kũhũthĩra ũtũũro witũ gũtĩithia Kristo. Mũtũmwo Paulo aandĩkire ũũ: “Wendo wa Kristo nĩ ũtũtindĩkaga.” (Thoma 2 Akorintho 5:​14, 15.) Paulo nĩ aamenyaga atĩ tũtingĩtĩkĩra wendo wa magegania wa Kristo na twage gũtindĩkwo kũmũtũũrĩra. Rĩrĩa twataũkĩrũo biũ nĩ maũndũ marĩa Jehova atwĩkĩire, na ngoro citũ igatindĩkwo nĩ wendo wake, tũiguaga tũkĩĩrirĩria kwĩrutĩra na ngoro yothe harĩ Kristo. Twĩkaga ũguo na njĩra ĩrĩkũ?

⁸ Arĩa mendete Jehova nĩ matindĩkagwo kwĩgerekania na kĩonereria gĩa Kristo, gũkorũo na mĩthiĩre ta ĩrĩa aakoragwo nayo, na kũrũmĩrĩra makinya make. (1 Pet. 2:21;  1 Joh. 2:6) Tuonanagia nĩ twendete Ngai na Kristo na njĩra ya gwathĩka. Jesu oigire ũũ: “Mũndũ o wothe wĩtĩkagĩra maathani makwa na akamaathĩkĩra, ũcio nĩwe ũnyendete. Nake ũrĩa wothe ũnyendete nĩ arĩendagwo nĩ Awa, na niĩ nĩ ndĩrĩmwendaga na ngemenyithania wega harĩ we.”​—Joh. 14:21; 1 Joh. 5:3.

9. Nĩ maũndũ marĩkũ matũhatĩkaga?

⁹ Ihinda-inĩ rĩrĩ rĩa Kĩririkano nĩ wega gwĩcũrania ũrĩa tũrahũthĩra ũtũũro witũ. No wĩyũrie ũũ: ‘Nĩ maũndũ-inĩ marĩkũ nyonanĩtie atĩ nĩ ndĩrarũmĩrĩra biũ makinya ma Jesu? Nĩ maũndũ marĩkũ ingĩbatara kũrutĩra wĩra?’ Gwĩthuthuria na njĩra ĩyo nĩ kwa bata mũno tondũ kũrĩ na maũndũ maingĩ maratũhatĩka tũrũmĩrĩre mĩthiĩre ya andũ a gũkũ thĩ. (Rom. 12:2) Tũngĩaga kwĩmenyerera, no tũtuĩke arũmĩrĩri a andũ arĩa njũhĩga cia gũkũ thĩ kana andũ arĩa marĩ igweta na athaki arĩa marĩ gatũ. (Kol. 2:8; 1 Joh. 2:​15-17) Tũngĩka atĩa nĩguo twĩtheme kũhatĩkwo nĩ maũndũ macio?

10. Nĩ ciũria irĩkũ tũngĩĩyũria ihinda-inĩ rĩrĩ rĩa Kĩririkano na macokio ma cio mangĩtũtindĩka gwĩka atĩa? (Rora mbica kĩambĩrĩria-inĩ gĩa gĩcunjĩ gĩkĩ.)

¹⁰ No tũhũthĩre ihinda rĩrĩ rĩa Kĩririkano kũrora nguo iria twĩhumbaga, thenema iria twĩroragĩra, nyĩmbo iria tũthikagĩrĩria, na maũndũ marĩa tũngĩkorũo twĩkĩrĩte kompiuta-inĩ citũ, thimũ-inĩ, na tablet. Ũkĩrora nguo ciaku nĩ wega kwĩyũria ũũ: ‘Ingĩkorũo ngĩthiĩ handũ Jesu arĩ-rĩ, hihi no njigue njiganĩire njĩkĩrĩte nguo ĩno?’ (Thoma 1 Timotheo 2:​9, 10.) ‘Ingĩmĩĩhumba-rĩ, andũ no mone atĩ ndĩ mũrũmĩrĩri wa Kristo?’ No twĩyũrie ciũria o ta icio ũhoro-inĩ wĩgiĩ thenema iria twĩroragĩra na nyĩmbo iria tũthikagĩrĩria. ‘Hihi Jesu no erorere thenema ĩno kana athikĩrĩrie rwĩmbo rũrũ? Angĩnjĩtia tablet kana thimũ yakwa-rĩ, hihi no njonoke nĩ maũndũ marĩa angĩona thĩinĩ wayo?’ Ũhoro-inĩ wĩgiĩ mũthako wa video wĩyũrie ũũ: ‘Hihi no hote gũtaarĩria Jesu kĩrĩa gĩtũmaga nyende mũthako ũyũ?’ Wendo witũ harĩ Jehova wagĩrĩirũo nĩ gũtũtindĩka tweherie biũ kĩndũ o gĩothe kĩrĩa kĩngĩkorũo gĩtarĩ kĩagĩrĩru harĩ mũrũmĩrĩri wa Kristo, gũtekũmakania nĩ kĩa mbeca cigana. (Atũm. 19:​19, 20) Hĩndĩ ĩrĩa tweyamũrĩire Jehova nĩ twatuire itua atĩ tũtirĩtũũraga nĩ ũndũ witũ ithuĩ ene ĩndĩ tũrĩtũũraga nĩ ũndũ wa Kristo. Nĩ ũndũ ũcio, tũtiagĩrĩirũo nĩ gũikara na kĩndũ o gĩothe kĩrĩa kĩngĩtũgirĩrĩria kũrũmĩrĩra makinya ma Kristo.​—Mat. 5:29, 30; Afil. 4:8.

11. (a) Wendo witũ harĩ Jehova na Jesu ũtũteithagia atĩa wĩra-inĩ wa kũhunjia? (b) Wendo witũ ũngĩtũtindĩka atĩa gũteithia arĩa angĩ kĩũngano-inĩ?

¹¹ Ningĩ wendo witũ harĩ Jesu nĩ ũtũtindĩkaga kũhunjia na kũruta andũ na kĩyo. (Mat. 28:​19, 20; Luk. 4:43) Ihinda-inĩ rĩrĩ rĩa Kĩririkano tũrĩ na mweke wa gũtuĩka mapainia a gũteithĩrĩria tũhunjie mathaa 30 kana 50. Hihi no ũbange gũtuĩka painia wa gũteithĩrĩria ihinda-inĩ rĩrĩ? Mũrũ wa Ithe witũ ũmwe wa ndigwa wa mĩaka 84 ndoonaga ta angĩhota gũtuĩka painia wa gũteithĩrĩria nĩ ũndũ wa ũkũrũ na mathĩna ma mwĩrĩ. O na kũrĩ ũguo mapainia a gĩcigo kĩao nĩ maamũteithĩrĩirie. Makĩĩrutĩra kũmũkuaga na magĩthuura gĩcigo kĩrĩa angĩhota kũhunjia, na nĩ ũndũ ũcio agĩkinyia mathaa 30. Hihi no wĩrutĩre gũteithia mũndũ kĩũngano-inĩ kĩanyu ahote gũtuĩka painia wa gũteithĩrĩria ihinda-inĩ rĩrĩ rĩa Kĩririkano? Ma nĩ atĩ ti andũ othe mangĩhota gũtuĩka mapainia a gũteithĩrĩria. O na kũrĩ ũguo, no tũhũthĩre mahinda na hinya ũrĩa tũrĩ naguo kuongerera ũtungata witũ harĩ Jehova. Tweka ũguo nĩ tũrĩonanagia atĩ tũratindĩkwo nĩ wendo harĩ  Kristo o ta mũtũmwo Paulo. Nĩ maũndũ marĩkũ mangĩ wendo wa Ngai ũrĩtũtindĩkaga gwĩka?

12. Wendo witũ harĩ Ngai ũtũtindĩkaga gwĩka atĩa?

¹² Ũndũ wa kerĩ nĩ atĩ mũtũmwo Johana nĩ aamenyaga atĩ wendo witũ harĩ Jehova nĩ ũrĩtũtindĩkaga kwenda aarĩ na ariũ a Ithe witũ. Aandĩkire ũũ: “Endwa akwa, angĩkorũo ũguo nĩguo Ngai aatwendire-rĩ, o na ithuĩ nĩ twagĩrĩirũo kwendanaga.” (1 Joh. 4:​7-11) Nĩ ũndũ ũcio twetĩkĩra wendo wa Ngai, no mũhaka twendage aarĩ na ariũ a Ithe witũ. (1 Joh. 3:16) Tũngĩmonia wendo na njĩra irĩkũ?

13. Jesu aaigire kĩonereria kĩrĩkũ harĩ kwenda andũ?

¹³ Ta wĩcirie ũhoro wa Jesu. Hĩndĩ ĩrĩa aarĩ gũkũ thĩ nĩ aarũmbũyanagia mũno na athĩni. Nĩ aahonagia arĩa arũaru, atumumu, arĩa mataakoragwo na ũhoti wa kwaria kana kũigua. (Mat. 11:​4, 5) Jesu nĩ aakenagĩra kũruta andũ arĩa maarĩ ahũtu kĩĩroho, arĩa moonagwo nĩ atongoria a ndini ya Kĩyahudi ta marĩ ‘arume.’ (Joh. 7:49) Nĩ eendete andũ acio enyihia na nĩ eerutanagĩria mũno kũmatungatĩra.​—Mat. 20:28.

14. Ũngĩka atĩa nĩguo wonie arĩa angĩ kĩũngano-inĩ atĩ nĩ ũmendete?

¹⁴ Ihinda rĩa Kĩririkano nĩ rĩtũheaga mweke wa kwĩgerekania na Jesu na njĩra ya gwĩciria ũrĩa tũngĩteithia aarĩ na ariũ a Ithe witũ kĩũngano-inĩ gitũ na makĩria arĩa akũrũ. Na githĩ to ũceerere aarĩ na ariũ a Ithe witũ ta acio? Ũkuona atĩa ũngĩmatwarĩra irio, ũmateithie wĩra mũna wa mũciĩ, ũmakuue mũgĩthiĩ mĩcemanio, kana ũmanyite ũgeni mũhunjie nao? (Thoma Luka 14:12-14.) Twagĩrĩirũo kũreka wendo witũ harĩ Ngai ũtũtindĩkage kwenda aarĩ na ariũ a Ithe witũ.

15. Nĩ ũndũ ũrĩkũ twagĩrĩirũo nĩ kũririkana?

¹⁵ Ũndũ wa gatatũ nĩ atĩ wendo witũ harĩ Jehova wagĩrĩirũo nĩ gũtũtindĩka kuohagĩra aarĩ na ariũ a Ithe witũ. Tondũ tũrĩ njiarũa cia Adamu, ithuothe nĩ tũgaĩte mehia na gĩkuũ. Gũtirĩ o na ũmwe witũ ũngiuga, “Niĩ ndirabatara ũkũũri.” O na mũndũ ũrĩa mwĩhokeku atĩa nĩ abataraga ũkũũri. Ithuothe nĩ twagĩrĩirũo nĩ  kũririkana atĩ nĩ tuoheirũo thiirĩ mũnene mũno. Kũririkana ũguo nĩ kwa bata nĩkĩ? Macokio ma kĩũria kĩu marĩ thĩinĩ wa ngerekano ĩmwe ya Jesu.

16, 17. (a) Nĩ ũndũ ũrĩkũ tũngĩĩruta kuumana na ngerekano ya Jesu ĩgiĩ mũthamaki na ngombo? (b) Thutha wa gwĩcũrania ũhoro wa ngerekano ĩyo ya Jesu-rĩ, ũtuĩte gwĩka atĩa?

¹⁶ Jesu aaheanire ngerekano ya mũthamaki ũmwe woheire ngombo yake thiirĩ mũnene mũno wa taranda 10,000 kana dinari 60,000,000. O na kũrĩ ũguo ngombo ĩyo yoheirũo thiirĩ mũnene ũguo, nĩ yaregire kuohera ngombo ĩngĩ yarĩ na thiirĩ mũnini tu wa dinari 100. Rĩrĩa mũthamaki ũcio aaiguire ũrĩa ngombo ĩyo aaiguĩrĩire thaa yekĩte, nĩ aarakarire mũno. Oigire ũũ: “‘Wee ngombo ĩno njũru, rĩrĩa ũthaithire nĩ ngũrekeire thiirĩ waku wothe. Githĩ o nawe ndũkwagĩrĩirũo nĩ kũiguĩra ngombo ĩrĩa ĩngĩ tha o ta ũrĩa ngũiguĩrĩire tha?’” (Mat. 18:​23-35, kohoro ka magũrũ-inĩ) Tha cia mwanya iria ngombo ĩyo yoonetio nĩ mũthamaki ciagĩrĩirũo nĩ kũmĩtindĩka yohere ngombo ĩyo ĩngĩ. O ũndũ ũmwe na ũcio-rĩ, hihi wendo na tha iria Jehova atuonetie ciagĩrĩirũo gũtũtindĩka twĩkage atĩa?

¹⁷ Ihinda rĩa Kĩririkano nĩ rĩtũheaga mweke wa gwĩthuthuria kana nĩ kũrĩ mũrũ kana mwarĩ wa Ithe witũ tũigĩire muku ngoro-inĩ. Angĩkorũo nĩ tũigĩte muku, rĩrĩ nĩ ihinda rĩega rĩa kwĩgerekania na Jehova “Ngai muohanĩri.” (Neh. 9:17; Thab. 86:5) Twecũrania ũrĩa Jehova atũrekeire thiirĩ mũnene nĩ tũrĩtindĩkagwo kuohera arĩa angĩ kuuma ngoro. Tũtingĩgunĩka nĩ wendo na wohanĩri wa Jehova angĩkorũo tũtirĩendaga na tũkohera arĩa angĩ. (Mat. 6:14, 15) O na gũtuĩka kuohanĩra gũtingĩcenjia maũndũ marĩa mahĩtũku no gũtũteithie tũkaagĩa na gĩkeno mahinda marĩa maroka.

18. Wendo wa Ngai wateithirie mwarĩ wa Ithe witũ ũmwe atĩa gũkirĩrĩria kwaga gũkinyanĩra kwa mwarĩ wa Ithe witũ ũngĩ?

¹⁸ Harĩ aingĩ aitũ no ũkorũo ũtarĩ ũndũ mũhũthũ gũkirĩrĩria aarĩ na ariũ a Ithe witũ. (Thoma Akolosai 3:​13, 14; Aefeso 4:32.) Kwa ngerekano, mwarĩ wa Ithe witũ ũmwe ũtarĩ mũhiku wĩtagwo Lily nĩ eerutĩire gũteithia mwarĩ wa Ithe witũ ũmwe wa ndigwa wĩtagwo Carol. ^[1] Lily nĩ aakuuaga Carol na ngari agĩthiĩ kũndũ gũtiganĩte, agathiĩ kũmũgũrĩra indo, na akamuonia ũtugi na njĩra ingĩ nyingĩ. O na akĩmwĩkagĩra maũndũ macio mothe, kaingĩ Carol ndoonanagia ngatho. O na kũrĩ ũguo, Lily ndaatindanagĩrĩra na maũndũ macio, aaroraga ngumo njega cia Carol. Aathiire na mbere kũmũteithia mĩaka ĩigana ũna nginya rĩrĩa aarũarire mũno na agĩkua. O na gũtuĩka ndwarĩ ũndũ mũhũthũ gũteithia Carol, Lily oigire ũũ: “Nĩ njĩrĩgagĩrĩra mũno gũkoona Carol ariũkio. Nĩ ndĩriragĩria gũkanamuona arĩ mũkinyanĩru.” Wendo wa Ngai no ũtũtindĩke gũkiragĩrĩria aarĩ na ariũ a Ithe witũ na kwĩriragĩria hĩndĩ ĩrĩa andũ magacokerio ũkinyanĩru tene na tene.

19. Ũgũtindĩkwo gwĩka atĩa nĩ ‘kĩheo kĩrĩa Ngai atũheete kĩrĩa gũtarĩ ciugo ingĩtaarĩria ũrĩa gĩtariĩ’?

¹⁹ Hatarĩ nganja, Jehova nĩ atũheete ‘kĩheo gũtarĩ ciugo ingĩtaarĩria ũrĩa gĩtariĩ.’ Rekei tũtikanahũthie kĩheo kĩu. Na makĩria hĩndĩ ĩno ya Kĩririkano, rekei twĩcũranie tũrĩ na ngatho igũrũ rĩgiĩ maũndũ mothe marĩa Jehova na Jesu matwĩkĩire. Wendo wao ũrotũtindĩka kũrũmagĩrĩra makinya ma Jesu, kuonagia aarĩ na ariũ a Ithe witũ wendo, na kũmohagĩra kuuma ngoro.