1, 2. (a) ‘Mich ma Nyasaye chiwo nono mokalo awacha’ oriwo ang’o? (b) Gin penjo mage ma wabiro nono e sulani?

KANE Jehova ooro Wuode ma miderma e piny, nochiwo mich ma ne dhi bedo maduong’ie mogik ma nyiso kaka oherowa. (Joh. 3:16; 1 Joh. 4:9, 10) Jaote Paulo luongo michno ni ‘mich ma Nyasaye chiwo nono mokalo awacha.’ (2 Kor. 9:15) Ang’o momiyo notiyo gi wechego?

² Paulo nong’eyo ni singo mabeyo duto mag Nyasaye ne dhi chopo mana kokalo kuom misango makare ma Kristo nochiwo. (Som 2 Jo-Korintho 1:20.) Omiyo, ‘mich ma Nyasaye chiwo nono mokalo awacha’ oriwo gik mabeyo duto kod hera mosiko ma ne odhi nyisowa kokalo kuom Yesu. Kiwacho adier, en mich maber miwuoro ma dhano ok nyal lero tiende e yo makare chuth kata gitem ma chalo nade. Mich ma nomiwano onego omi watim ang’o? To michno onego ochwalwa waikre nade ne Rapar mar tho Kristo ma ibiro tim chieng’ Tich Adek tarik 23 dwe mar Mach e higa mar 2016?

3, 4. (a) Iwinjoga nade sama ng’ato omiyi mich moro? (b) Ere kaka mich makende ma ng’ato omiyi nyalo loko ngimani?

³ Onge kiawa ni ibedoga mamor ka ng’ato omiyi mich moro. Kata kamano, nitie mich moko ma inyalo kawo mapek nikech ginyalo kelo lokruok e ngimani. Kuom ranyisi, par ane ni ong’adni buch tho nikech odonjni ni itimo tim njore moro. Apoya nono, ng’ato ma ikia wuok e kind oganda kendo ochiwore mondo okume e loyi. Oikore kata mana tho ma kari! Tim makendeno biro miyo iwinj nade?

⁴ Ka ng’ato onyisi ni oheri e yo ma chalo kamano, onge kiawa ni mano biro chwali mondo ilok timbeni kod yo midakgo. Mano biro jiwi mondo imed bedo jachiwo, iher jomoko, kendo ing’won ne ng’at ang’ata mosegachwanyi. E ngimani duto, ibiro neno ni in gi gop ng’at ma noyie thonicha.

5. Ang’o momiyo mich mar rawar ma Nyasaye nomiyowa duong’ moloyo mich mamoko duto?

⁵ Kata kamano, mich ma Jehova osemiyowa kokalo kuom Kristo duong’ moloyo mich mowuo kuome e ranyisi ma wasewuoyeno. (1 Pet. 3:18) Ne ane gimomiyo. Nikech ne wayudo richo kuom Adam, waduto wan e bwo kum mar tho. (Rumi 5:12) Gima ber en ni Jehova noloso chenro mondo Yesu obi e piny mondo “obil tho ne ji duto.” (Hib. 2:9) Jehova ne ok oreso ngimawa ma sani kende, to noketo mise mar tieko chuth gima kelonwaga tho. (Isa. 25:7, 8; 1 Kor. 15:22, 26) Ji duto ma keto yie kuom Yesu biro yudo ngima mochwere mopong’ gi mor kod kuwe e pinyka, ka gin raia mag Pinyruodh Nyasaye ma Kristo lochee ka Jokristo mowal bende locho kode e Pinyruodhno. (Rumi 6:23; Fwe. 5:9, 10) Mich ma Jehova nomiyowano, biro miyo wayud gueth mage mamoko?

6. (a) Gin gueth mage ma igeno ahinya yudo motudore gi mich ma Jehova omiyowa? (b) Wach ane gik moko adek ma mich ma Nyasaye omiyowa biro chwalowa mondo watim.

⁶ Mich moa kuom Jehova oriwo tiekonwa tuoche, loko pinywani obed paradiso, kendo chiero jomotho. (Isa. 33:24; 35:5, 6; Joh. 5:28, 29) Wahero Jehova gi Wuode mogeno ahinya nikech gimiyowa ‘mich mochiw nono mokalo awacha.’ Kata kamano, penjo ma pod wapenjore en niya, Hera ma Nyasaye oherowago, biro chwalowa watim ang’o? We wane ane kaka hera moherowagono miyo (1) waluwo ondamo mag Kristo Yesu machiegni kaka nyalore, (2) wahero owetewa, kendo miyo (3) waweyo ne jomoko kethogi kowuok e chunywa.

7, 8. Hera ma Kristo oherowago miyo wawinjo nade, to mano onego ochwalwa watim ang’o?

⁷ Mokwongo, nyaka wadag e yo ma moro Kristo Yesu. Jaote Paulo noluwo niya: “Hera mar Kristo chunowa.” (Som 2 Jo-Korintho 5:14, 15.) Paulo nofwenyo ni ok wanyal wacho ni warwako hera makende ma Kristo nonyisowa, ka ok gimoro ochwalowa kata ochunowa dak e yo modwaro. Ka waparo e yo matut gima Jehova osetimonwa kendo chunywa mor nikech herane, wabiro tiyo gi ngimawa e yo ma Kristo Yesu oyiego. Ere kaka wanyalo timo mano?

⁸ Joma ohero Jehova temo kar nyalogi mondo giluw ranyisi mar Kristo, ka giluwo ondamoge machiegni. (1 Pet. 2:21; 1 Joh. 2:6) Wanyiso ni wahero Nyasaye gi Kristo kuom winjogi. Yesu nowacho niya:  “Ng’ato ang’ata ma nigi chikena kendo ma ritogi, mano e ng’at mohera. Kamano bende, ng’ato ang’ata mohera, Wuora biro here, kendo abiro here, mi ananyisrane ayanga.”—Joh. 14:21; 1 Joh. 5:3.

9. Gin gik mage ma thung’owaga?

⁹ E kinde mag Rapar, ber paro matut yo ma watiyogo gi ngimawa. Penjri ane kama: ‘Gin kuonde mage ma atime maber e luwo ondamo mag Kristo Yesu? To gin kuonde mage monego atimie dongruok?’ Nonruok e yo ma kamano dwarore ahinya nikech wadak e piny ma thung’owa mondo waluw yorege. (Rumi 12:2) Ka ok watang’, wanyalo po ka waluwo jopuonj mag pinyni, joma nigi huma, kod joma ong’ere e weche tuke. (Kol. 2:8; 1 Joh. 2:15-17) Ere kaka wanyalo geng’o gik ma kamago kik timrenwa?

10. Gin penjo mage ma wanyalo penjore e kinde Raparni, to dwoko mag penjogo onego ochwalwa watim ang’o? (Ne picha manie chak sulani.)

¹⁰ Kinde mag Rapargi nyalo miyowa thuolo mar nono lewni ma warwako, sinembe ma waneno, thumbe ma wawinjo, samoro gik ma wakano e kompyuta magwa, simbewa, kaachiel gi tablet magwa. Sama inono lewni ma irwako, penjri ane kama: ‘Dabed ni adhi kama Yesu nitiere, be chunya nyalo chanda ka arwako lawni?’ (Som 1 Timotheo 2:9, 10.) ‘Kapo ni arwake, be ji duto biro fwenyo ayanga ni an jalup Kristo Yesu?’ Wanyalo penjore penjogo bende kodok korka sinembe ma waneno kod thumbe ma wawinjo. ‘Be Yesu nyalo bedo ma mor koneno sinemani kata kowinjo thumni? Ka po ni Yesu okwaya simba kata tabletna, be wiya biro kuot koneno gik manie iye?’ To ka po ni ihero tugo moro mar kompyuta, penjri ane niya: ‘Be dhoga nyalo moko sama atemo lero ne Yesu gimomiyo tugono mora?’ Hera ma waherogo Jehova onego omi wawere gi gimoro amora ma ok owinjore gi jalup Kristo kata bed ni timo kamano tek ma chalo nade. (Tich 19:19, 20) Ka ne wachiwo ngimawa ne Nyasaye, ne wasingore ni ok wabi dak ne wan wawegi to ne Kristo. Omiyo, ok onego wamakre gi gimoro amora ma nyalo monowa luwo ondamo mag Kristo.—Mat. 5:29, 30; Fil. 4:8.

11. (a) Hera ma waherogo Jehova gi Yesu jiwowa nade e tij lendo? (b) Ere kaka hera ma wan-go nyalo miyo wakony jomoko e kanyakla?

¹¹ Hera ma waherogo Yesu bende jiwowa mondo walend gi chunywa duto kendo walok ji obed jopuonjrene. (Mat. 28:19, 20; Luka 4:43) Kinde mag Rapar, wabiro bedo gi thuolo mar bedo jopainia makonyo ka walendo kuom seche 30 kata 50. Be inyalo loso chenro maber mondo ibed painia makonyo? Owadwa moro ma jahigni 84 ma bende chiege nosetho ne paro ni ok onyal bedo painia makonyo nikech hike ne ng’eny kendo midekre ne chande. Kata kamano, jopainia ma ne gidakgo e alworagi ne oriwore mondo okonye. Ne gichung’ne e yore mag wuoth kendo ne giyiero alwora ma ne onyalo lende to mano nokonye chopo seche 30 mana kaka nogombo. Be inyalo konyo ng’ato e kanyaklau mondo obed painia makonyo e kinde Rapar mondo oyud mor ma bedoe kuom timo kamano? En adier ni jomoko kuomwa ok nyal bedo jopainia makonyo. Ka en kamano, wanyalo tiyo gi thuolo kod teko ma wan-go mondo wamed chiwore e pako Jehova. Ka watimo kamano, to wanyiso ni hera mar Kristo chwalowa mana kaka nochwalo Paulo. Hera ma Nyasaye oherowago biro chwalowa mondo watim ang’o kendo?

12. Hera ma Nyasaye oherowago jiwowa timo ang’o?

¹² Mar ariyo, jaote Johana nong’eyo ni hera ma Nyasaye oherowago ne dhi chwalowa mondo waher owetewa. Nondiko niya: “Un joma ahero, ka kamano e kaka Nyasaye noherowa, kare wan bende onego waherre e kindwa.” (1 Joh. 4:7-11) Ka wadwaro mondo Nyasaye oherwa, nyaka wayie ni wan bende wan gi ting’ mar hero owetewa. (1 Joh. 3:16) Gin yore mage ma wanyalo nyisogo ni wahero owetewa?

13. Yesu noketo ranyisi mane kodok korka hero jomamoko?

¹³ Par ane ranyisi mar Yesu. E kinde ma ne en e piny, nodewo ahinya jochan. Nokonyo joma ne nigi kit tuoche mopogore opogore kaka rong’onde, mwofni, rodin, kod momni. (Mat. 11:4, 5) Yesu ne mor ahinya puonjo joma ne nigi riyo mar ng’eyo wach Nyasaye ma jotend dinde mag Jo-Yahudi ne kawo ni gin “joma osekuong’.” (Joh. 7:49) Nohero joma ngimagi ne ni pinygo kendo notiyo matek mondo okonygi.—Mat. 20:28.

14. En ang’o ma inyalo timo mondo inyis ni ihero Jokristo weteni?

¹⁴ Kinde mag Rapar miyowa thuolo mar luwo ranyisi mar Yesu kuom paro owete gi nyiminewa ma wan-go e kanyakla. Sama watimo kamano, wabiro fwenyo joma wanyalo konyo. Samoro nitie owete gi nyimine ma hikgi oseniang’ ma diher ni okonygi. Be inyalo limogi? Be inyalo teronegi chiemo, konyogi timo tije mag ot, ting’ogi gi mtoka kiterogi e chokruok, kata gwelogi mondo gilend kodi? (Som Luka 14:12-14.) Nyaka wawe hera ma Nyasaye oherowago ochwalwa mondo wakony kendo wanyis ni wahero owetewa.

15. En ang’o ma nyaka wang’e waduto?

¹⁵ Mar adek, hera ma Jehova oherowago onego ochwalwa wang’won ne owete gi nyiminewa. Kaka nyikwa Adam, waduto ne onyuolwa e richo kendo watho nikech richono. Onge ng’ato ang’ata kuomwa ma nyalo wacho ni, “An rawar ok obadha.” Ng’wono mogundho ma Jehova nyiso dhano kokalo kuom Kristo, en gima dhano duto dwaro kata obed jatich Nyasaye mochung’ motegno ma chalo nade. Gima nyaka wang’e en ni waduto  osewenwa gowi maduong’ ahinya. Ang’o momiyo mano en wach maduong’? Dwoko yudore e achiel kuom ngeche ma ne Yesu ogoyo.

16, 17. (a) Ang’o ma wanyalo puonjore e wi ngero ma Yesu nogoyo e wi ruoth kod misumba? (b) Bang’ paro matut ngero ma Yesu nogoyono, ing’ado mar timo ang’o?

¹⁶ Yesu nogoyo ngero mar ruoth moro ma noweyo ne misumbane gowi maduong’ mar talanta 10,000 ma be romo dinari 60,000,000. To ni e ma misumba ma ne owene gowi maduong’ kamano, nodagi weyo ne misumba wadgi gowi ma romo dinari 100 kende. Ruodhno iye nowang’ matek bang’ winjo ni misumbano ne ok oweyo ne misumba wadgi gowi matin bang’ keche malich kamano. Ruodhno nowacho niya: “In misumba marach, ne aruchoni gowi duto kane isesaya. Donge in bende nonego ikech misumba wadu kaka ne akechi?” (Mat. 18:23-35) Ee, nikech ne okech misumbano e yo malach kamano, mano nonego ochwale mondo en be owe ne misumba wadgi gope. Kamano bende, hera ma Jehova oherowago kod kech mokechowago onego ochwalwa watim ang’o?

¹⁷ Kinde Rapar miyowa thuolo mar paro ka be wamako sadha ne owete gi nyiminewa moko. Ka en kamano, magi e kinde mowinjore mar luwo ranyisi mar Jehova, ma oikore ‘weyonwa kethowa.’ (Neh. 9:17; Zab. 86:5) Ka wamor adier gi gima Jehova osetimonwa kuom rucho gopewa, wabiro dwaro weyo ne jomoko kethogi kowuok e chunywa. Nyasaye ok nyal herowa kendo ng’wononwa ka wan to ok waikore hero kendo ng’wono ne jomoko. (Mat. 6:14, 15) Kata obedo ni weyo ne ng’ato kethoge ok bi loko gik mosetimo, timo kamano nyalo kelo ber bang’e.

18. Hera ma Nyasaye oherogo dhano nokonyo nyaminwa moro nade nano gi nyawo mag nyaminwa machielo?

¹⁸ Ok en gima yot ne ng’enywa “nano” gi owete kod nyiminewa pile ka pile. (Som Jo-Kolosai 3:13, 14; Jo-Efeso 4:32.) Kuom ranysi, nyaminwa moro ma pok okendi miluongo ni Lily, nochiwore konyo nyaminwa machielo ma nyinge Carol ma en chi liel. ^[1] Lily nochung’ ne Carol e yore mag wuoth, ne odhinega e chiro, kendo nokonyega e yore mopogore opogore. Kata obedo ni Lily ne timo gigi duto, Carol nosiko ng’ur kendo nochendo ahinya. Kata kamano, Lily noketo pache kuom kido mabeyo ma Carol ne nigo. Nodhi nyime konye kuom higni mogwaro ma ochopo kama Carol otuore matek mi otho. Lily wacho niya: “Pod agombo neno Carol kochier. Daher ng’eye ka koro oonge gi richo mar Adam.” Ee, hera ma Nyasaye oherowago nyalo chwalowa wanan gi owete kod nyiminewa ka warito kinde ma richo ma nonyuolwago norum nyaka chieng’.

19. ‘Mich ma Nyasaye chiwonwa nono’ biro chwalowa mondo watim ang’o?

¹⁹ En adier ni Jehova osemiyowa ‘mich mochiwo nono mokalo awacha.’ Kik wakaw michni mayot. Kar mano, waparuru matut gima Jehova gi Yesu osetimonwa kendo wago erokamano, to ahinya ahinya e kinde Raparni. We mondo hera ma giherowago ochwalwa waluw ondamo mag Yesu, okonywa timo kinda e nyiso ni wahero owetewa, kendo ng’wononegi kowuok e chunywa.