1, 2. (1) Menin letok eo an Anij me “el̦ap jãn maroñ in ba” ekitibuj ta? (2) Ta kajjitõk ko jenaaj etali ilo katak in?

 JEOVA ear letok ñan kõj menin letok eo em̦m̦antata me ej kaalikkar an lukkuun yokwe kõj ke ear jilkintok Nejin, Jijej, ñan lal̦ in! (Jon 3:16; 1 Jon 4:9, 10, UBS) Rijjilõk Paul ear ba bwe men in ej “menin letok eo an el̦ap jãn maroñ in ba!” (2 Korint 9:15, UBS) Etke Paul ear ba men in?

² Paul ear ba men in kõnke ejel̦ã bwe ikijjeen katok in mour eo an Jijej, aolep kallim̦ur ko an Anij renaaj jejjet im m̦ool. (Riit 2 Korint 1:20, UBS.) Bõtab, “menin letok eo an el̦ap jãn maroñ in ba” ejjab baj kitibuj wõt katok in mour eo an Jijej ak ebar kitibuj elõñ men ko. Ekitibuj aolep men ko rem̦m̦an Jeova enaaj kõm̦m̦ani ñan kõj ilju im jekl̦aj ñan kaalikkar joñan an yokwe kõj. Joñan an l̦ap im aorõk menin letok in an Jeova ñan kõj jejjab maroñ in kõmel̦el̦eiki. Menin letok in an Jeova ñan kõj ej kõm̦akũt  kõj ñan ta? Ewi wãween an menin letok in an maroñ jipañ kõj bwe jen pojak ñan iien Kwõjkwõj in Keememej mej eo an Kũraij ilo naaj Wõnje, M̦aaj 23, 2016?

3, 4. (1) Ewi wãween am̦ eñjake ñe rej lewaj juon menin lewaj ñan eok? (2) Ewi wãween an juon menin lewaj ejejuwaan maroñ ukot mour eo am̦?

³ El̦ap ad m̦õn̦õn̦õ ñe ro jet rej letok menin letok ko ñan kõj. Bõtab, jet iaan menin letok kein joñan aer aorõk im jejuwaer, remaroñ kõm̦m̦an bwe jen ukot mour ko ad. Ñan waanjoñak, jen ba bwe kwaar kõm̦m̦ane juon bõd el̦ap. Kõn men in, rej ba bwe kaje eo am̦ ñan bõd in kwaar kõm̦m̦ane ej mej. Bõtab ilo jidimkij, juon armej me kwõjaje kajjien ej itok im ba bwe em̦õn̦õn̦õ in bõk kaje eo am̦ im mej kõn kwe! Enaaj kar ta eñjake eo am̦ kõn men in armej in ej kõm̦m̦ane ñan eok?

⁴ Ejjel̦o̦k pere bwe an armej in kõm̦m̦ane men in enaaj kar kõm̦akũt eok ñan lale ewõr ke oktak ko ilo mour eo am̦ kwõj aikuj kõm̦m̦ani. Enaaj kar kõm̦akũt eok bwe kwõn kwal̦o̦k jouj im yokwe ñan ro jet. Bareinwõt, kwõnaaj m̦õn̦õn̦õ in jol̦o̦k bõd ko an ro rar nana aer kõm̦m̦an ñan eok. Ilo aolepen mour eo am̦, kwõnaaj kõn̦aan kwal̦o̦k am̦ kam̦m̦oolol armej eo ear m̦õn̦õn̦õ in mej kõn kwe.

5. Etke menin letok eo an Anij ikijjeen katok in mour eo an Jijej el̦apl̦o̦k an aorõk jãn jabdewõt menin letok ko jet?

⁵ Menin letok eo an Anij ikijjeen katok in mour eo an Jijej el̦apl̦o̦k an aorõk jãn ta eo armej eo ilo waanjoñak eo ear kõm̦m̦ane. (1 Piter 3:18, UBS) Etke? Eokwe, l̦õmn̦ak m̦õk kõn men in: Kõj aolep jej bõdañe Adam im jej rijjerawiwi. Eñin unin, kõj aolep jej mej. (Rom 5:12) Bõtab, yokwe eo an Jeova ñan kõj ear kõm̦akũti bwe en jilkintok Jijej ñan lal̦ in bwe en “edjoñ mej ñan armej otemjej.” (Hibru 2:9) Ejjab men in wõt, ak ebar wõr men ko jet renaaj wal̦o̦k ikijjeen katok in mour eo an Jijej! Ikijjeen katok in mour eo an, Anij enaaj jol̦o̦k mej ñan indeeo. (Aiseia 25:7, 8, UBS; 1 Korint 15:22, 26) Aolep ro rej kwal̦o̦k aer tõmak ilo Jijej renaaj aenõm̦m̦an im m̦õn̦õn̦õ ñan indeeo meñe kõjatdikdik eo aer ej ñan kiiñ ippãn Kũraij ilañ ak mour ijin ioon lal̦ ium̦win tõl eo an Aelõñ eo. (Rom 6:23; Revelesõn 20:6) Bar ta jeraam̦m̦an ko jet renaaj wal̦o̦k ikijjeen menin letok in an Jeova?

6. (1) Ta jeraam̦m̦an ko kwõj reim̦aanl̦o̦k ñani me renaaj wal̦o̦k ikijjeen menin letok eo an Jeova? (2) Ta men ko 3 menin letok eo an Anij enaaj kõm̦akũt kõj ñan kõm̦m̦ani?

⁶ Menin letok eo an Jeova ebar kitibuj an lal̦ in naaj erom pedetaij, an ejjel̦o̦k bar nañinmej, im an ro remej bar mour. (Aiseia 33:24; 35:5, 6; Jon 5:28, 29, UBS) El̦ap ad yokwe Jeova im Nejin kõn aer letok ñan kõj ‘menin letok eo el̦ap jãn maroñ in ba.’ Menin letok in enaaj kõm̦akũt kõj bwe jen ta? Enaaj kõm̦akũt kõj bwe jen (1) lukkuun anõke joñak eo an Jijej Kũraij, (2) yokwe rũttõmak ro jeid im jatid, im (3) m̦oolin jol̦o̦k bõd ko an ro jet.

7, 8. En ewi wãween ad l̦õmn̦ak kõn yokwe eo an Kũraij, im men in enaaj kõm̦akũt kõj ñan ta?

⁷ M̦oktata, jej aikuj m̦õn̦õn̦õ in kõjerbal mour eo ad ñan kautiej Jijej. Rijjilõk Paul ear ba: “Yokwe eo an Kũraij ñan kõm ej irooj ioom.” (Riit 2 Korint 5:14, 15, UBS.) Paul ear jel̦ã bwe ñe jemel̦el̦e kõn yokwe eo el̦ap an Jijej, men in enaaj kõm̦akũt kõj bwe jen yokwe e im kautieje. Ñe jejel̦ã im mel̦el̦e kõn men ko Jeova ear kõm̦m̦ani im an kwal̦o̦k an yokwe kõj, men in enaaj kõm̦akũt kõj bwe jen mour ilo wãween eo Jijej em̦õn̦õn̦õ kake. Ewi wãween ad kõm̦m̦ane men in?

⁸ Yokwe eo ad ñan Jeova enaaj kõm̦akũt  kõj bwe jen anõke joñak eo an Jijej. (1 Piter 2:21; 1 Jon 2:6, UBS) Ñe jej pokake Anij im Kũraij, jej kaalikkar ad yokwe er. Jijej ear ba: “Eo ej bõk kien ko aõ im pokaki, e eo ej yokwe eõ. Jema enaaj yokwe eo ej yokwe eõ; bareinwõt ña inaaj yokwe e im kwal̦o̦k eõ make ñane.”​—Jon 14:21, UBS; 1 Jon 5:3.

9. Ta eo emaroñ wal̦o̦k ñan kõj ñe jejjab kõjparok?

⁹ Ilo raan ko m̦okta jãn iien Kwõjkwõj eo im ãlikin, em̦m̦an ñe jej kõl̦mãnl̦o̦kjen̦ kõn wãween mour ko ad. Jej aikuj kajjitõk ippãd make im ba: ‘Ta ko ij kõm̦m̦ani me rej kaalikkar ke ij anõke joñak eo an Jijej? Ta ko ij aikuj kakõm̦anm̦anl̦o̦k bwe in maroñ anõke Jijej?’ Eaorõk ñan ad etali kajjitõk kein kõnke elõñ men ko ilo jukjukun pãd in an Setan me remaroñ kareel kõj bwe l̦õmn̦ak im kõm̦m̦an ko ad ren ãinwõt armej in lal̦ in. (Rom 12:2, UBS) El̦aññe jejjab kõjparok, jenaaj jino kõn̦aan anõke rũmmãlõtlõt ro, ro rebuñbuñ, im ro relukkuun jel̦ã iukkure ilo jukjukun pãd in an Setan. (Kolosse 2:8, UBS; 1 Jon 2:15-17) Ewi wãween ad maroñ kõjparok bwe jen jab l̦õmn̦ak im kõm̦m̦an ãinwõt rein?

10. (1) Ta kajjitõk ko jej aikuj kajitũkin kõj kaki ilo raan ko m̦okta jãn iien Kwõjkwõj eo im ãlikin? (2) Uwaakin kajjitõk kein renaaj kõm̦akũt kõj bwe jen ta? (Lale pija eo ilo jinoin katak in.)

¹⁰ Ilo raan ko m̦okta jãn iien Kwõjkwõj eo im ãlikin, ej juon iien em̦m̦an ñan etale kain nuknuk rot ko jej kõn̦aki, pija ko jej alwõji, im al ko jej roñjaki. Ebar em̦m̦an ñan lale ta ko rej pãd ilo kampiutõr, jeel̦boon, ak tablet eo nejid. Kwõn kajjitõk ippam̦ make im ba: ‘Ñe Jijej en kar pãd ijin im loe eõ, inaaj ke kar jook kõn nuknuk in ij kõn̦ake?’ (Riit 1 Timote 2:9, 10.) ‘Nuknuk kã aõ rej ke kaalikkar bwe ij juon Kũrjin? Jijej enaaj ke kar kõn̦aan alwõji pija ko ij alwõji? Enaaj ke kar kõn̦aan roñjake al ko ij roñjaki? Ñe Jijej ear kajjitõk bwe in lel̦o̦k jeel̦boon eo ak tablet eo nejũ bwe en kõjerbale, inaaj ke kar ãliklik im jook kõn men ko enaaj loi? Enaaj ke kar pen aõ kõmel̦el̦eik Jijej kõn unin an em̦m̦an ippa keem ko ij iukkure kaki?’ Yokwe eo ad ñan Jeova ej aikuj kõm̦akũt kõj bwe jen ilo̦k jãn jabdewõt men me ejjab jim̦we ñan juon Kũrjin, jekdo̦o̦n ñe jaar jol̦o̦k el̦ap jããn ñane. (Jerbal 19:19, 20) Ke jaar ajel̦o̦k mour eo ad ñan Jeova, jaar kallim̦ur bwe jenaaj kõjerbale ñan nõbar im kautiej Kũraij. Kõn men in, jen jab kõm̦m̦ane jabdewõt men me emaroñ kapañ ad anõke joñak eo an Jijej.​—Matu 5:29, 30; Pilippai 4:8.

11. (1) Ewi wãween an yokwe eo ad ñan Jeova im Jijej kõm̦akũt kõj ilo jerbalin kwal̦o̦k naan? (2) Ewi wãween an yokwe eo ad maroñ kõm̦akũt kõj ñan jipañ ro jet ilo eklejia eo?

¹¹ Yokwe eo ad ñan Jijej ej kõm̦akũt kõj bwe jen niknik im tiljek ilo jerbalin kwal̦o̦k naan im katakin ro jet. (Matu 28:19, 20; Luk 4:43, UBS) Ilo raan ko m̦okta jãn iien Kwõjkwõj eo im ãlikin, kwõmaroñ ke kõm̦m̦ane juon am̦ jikejuul̦ ñan lale ñe kwõmaroñ akjel̦õri bainier im katõprak 30 ak 50 awa ilo jerbalin kwal̦o̦k naan? Juon l̦al̦l̦ap me 84 an iiõ im emej lel̦l̦ap eo pãleen ear l̦õmn̦ak bwe ejjab maroñ kõm̦m̦ane men in kõnke erũtto im m̦õjn̦o̦. Bõtab, bainier ro ilo jikin eo ej pãd ie rar kõn̦aan jipañe. Rar jipañ kõn ial̦ im kããlõt juon teretore ekkar ñane. Kõn aer kar jipañe l̦al̦l̦ap in, ear tõprak mejãnkajjik eo an ñan tõpar 30 awa ilo jerbalin kwal̦o̦k naan. Kwõmaroñ ke jipañ juon ilo eklejia eo am̦ ñan akjel̦õri bainier ilo M̦aaj ak Eprõl̦? M̦ool bwe ejjab aolep remaroñ bainier. Bõtab, jemaroñ kõjerbal iien ko ad im kajoor eo ad ñan kal̦apl̦o̦k ijo kun̦aad ilo ad karejar ñan Jeova. Ãinwõt Paul, ñe jenaaj kõm̦m̦ane men in, jej kaalikkar bwe yokwe eo an Jijej ej kõm̦akũt kõj. Ta ko jet yokwe eo an Anij enaaj kõm̦akũt kõj bwe jen kõm̦m̦ani?

12. Yokwe eo an Anij ñan kõj ej kõm̦akũt kõj bwe jen ta?

¹² Kein karuo, yokwe eo an Anij ej bar kõm̦akũt  kõj bwe jen yokwe rũttõmak ro jeid im jatid. Rijjilõk Jon ear ba: “Kom̦, ro jitõnbõro, el̦aññe ãindein an Anij kar yokwe kõj, innem jen yokwe doon.” (1 Jon 4:7-11, UBS) Kõn men in, el̦aññe jemel̦el̦e kõn yokwe eo an Anij ñan kõj, innem jej aikuj in bar yokwe rũttõmak ro jeid im jatid. (1 Jon 3:16, UBS) Ewi wãween ad maroñ kaalikkar bwe jej yokwe er?

13. Joñak ta eo Jijej ear likũti me ej kaalikkar yokwe eo an ñan ro jet?

¹³ Joñak eo an Jijej ej katakin kõj kõn wãween ad maroñ kwal̦o̦k yokwe ñan ro jet. Ke Jijej ear pãd ijin ioon lal̦, ear jipañ armej ro, el̦aptata ro ettã bũrueer. Jijej ear kõmour ro rar nañinmej, ro rekũrro, ro repilo, ro rejarroñroñ, im ro rejaje kõnnaan. (Matu 11:4, 5) Jijej ear oktak jãn rũtõl in kabuñ ro kõnke ear m̦õn̦õn̦õ in katakin armej ro me rar kõn̦aan jel̦ã kõn Anij. (Jon 7:49, UBS) Jijej ear yokwe armej ro ettã bũrueer im ear kate ñan jipañ er.​—Matu 20:28, UBS.

14. Ta ko kwõmaroñ kõm̦m̦ani ñan kwal̦o̦k am̦ yokwe rũttõmak ro jeim̦ im jatũm̦?

¹⁴ Raan ko m̦okta jãn Kwõjkwõj eo im ãlikin, rej jet iien ko rem̦m̦an ñan ad anõke joñak eo an Jijej ilo ad l̦õmn̦ak kõn wãween ad maroñ jipañ rũttõmak ro jeid im jatid ilo eklejia eo, el̦aptata ro rerũtto. Kwõmaroñ ke lol̦o̦k rein? Kwõmaroñ ke bõkl̦o̦k kijeer m̦õñã, jipañ er kõn jerbal ko ilo m̦weo im̦weer, jipañ er kõn ial̦ ñan kweilo̦k ko, ak kajjitõk ippãer bwe ren jerbal ippam̦ ilo kwal̦o̦k naan? (Riit Luk 14:12-14.) Yokwe eo an Anij en kõm̦akũt kõj bwe jen kwal̦o̦k ad yokwe rũttõmak ro jeid im jatid!

15. Ta eo eaorõk bwe jen kile?

¹⁵ Kein kajilu, yokwe eo an Jeova ej kõm̦akũt kõj ñan jol̦o̦k bõd ko an rũttõmak ro jeid im jatid. Kõj aolep jej bõdañe Adam im jej jerawiwi im mej. Eñin unin ejjel̦o̦k juon emaroñ in ba, “Ijjab aikuji katok in mour eo an Jijej.” Meñe rũkarejar ro retiljek an Anij ak rebar aikuji katok in mour eo an Jijej. Kõj kajjojo el̦ap ad m̦uri ippãn Anij bõtab em̦õj an jeorl̦o̦k m̦uri in ad! Etke eaorõk bwe jen kile men in? Jenaaj loe uwaakin kajjitõk in ilo juon iaan waanjoñak ko an Jijej.

16, 17. (1) Ta eo jemaroñ katak jãn waanjoñak eo an Jijej kõn kiiñ eo im rũkam̦akoko ro? (2) Ãlikin am̦ kõl̦mãnl̦o̦kjen̦ kõn waanjoñak in, ta eo kwõj aikuj kate eok ñan kõm̦m̦ane?

 ¹⁶ Jijej ear kwal̦o̦k juon waanjoñak kõn juon kiiñ me ear jeorl̦o̦k m̦uri ko an rũkõm̦akoko eo an. Joñan m̦uri ko an ej 60 milien denarii. Bõtab, tokãlik rũkam̦akoko eo ear jab jeorl̦o̦k m̦uri ko an rũkam̦akoko eo juon m̦õttan me ear m̦uriik 100 wõt denarii. An kiiñ eo kar tũriam̦okake rũkam̦akoko eo im jeorl̦o̦k m̦uri ko an en kar kõm̦akũti bwe en jeorl̦o̦k m̦uri ko an rũkam̦akoko eo juon m̦õttan. Kiiñ eo ear lukkuun illu ippãn rũkam̦akoko eo ke ear roñ bwe ear jab jeorl̦o̦k m̦uri eo an rũkõm̦akoko eo juon meñe elukkuun dik. Kiiñ eo ear ba: “Kwe rũkõm̦akoko enana! Iar jeorl̦o̦k aolepen dettan ijo kwaar m̦uri kake ñan eõ, kõnke kwaar kajjitõk. Kwõ aikuj in kar tũriam̦o kõn rũkarejar eo juon m̦õttam̦ ãinwõt aõ kar tũriam̦okake eok.” (Matu 18:23-35, UBS) Ãinwõt kiiñ eo, el̦ap ad kar m̦uri ñan Jeova bõtab ear jeorl̦o̦k m̦uri eo ad. An Jeova yokwe im tũriam̦okake kõj en kar kõm̦akũt kõj bwe jen ta?

¹⁷ Ilo ad pojak ñan iien Kwõjkwõj in Keememej eo, jej aikuj kajitũkin kõj make: ‘Em̦õj ke an juon iaan rũttõmak ro jeiũ im jatũ kal̦õkatip eõ? Epen ke aõ jol̦o̦k an bõd?’ El̦aññe uwaak eo am̦ ej aet, eokwe iien in em̦m̦an ñan am̦ anõke Jeova, eo im “em̦õn̦õn̦õ in jol̦o̦k bõd.” (Nihimaia 9:17; Sam 86:5) El̦aññe jej kam̦m̦oolol Jeova kõn an tũriam̦okake kõj, jenaaj bareinwõt kwal̦o̦k ad tũriam̦okake ro jet im m̦oolin jol̦o̦k bõd ko aer. El̦aññe jejjab yokwe im jol̦o̦k bõd ko an rũttõmak ro jeid im jatid, jejjab maroñ kõtmãne an Jeova yokwe im jol̦o̦k ad bõd. (Matu 6:14, 15) Ñe jej jeorl̦o̦k bõd ko an ro jet, ejjab mel̦el̦ein bwe em̦m̦an ippãd men eo ear kõm̦m̦ane, ak enaaj jipañ kõj bwe jen m̦õn̦õn̦õ wõt.

18. Ewi wãween an yokwe eo an Anij kar jipañ juon jeid im jatid ñan kijenmej kõn likjab ko an juon iaan rũttõmak ro m̦õttan?

¹⁸ Emaroñ pen ñan kijenmej kõn likjab ko an rũttõmak ro jeid im jatid. (Riit Epesõs 4:2, 32, UBS.) Men in ear wal̦o̦k ñan juon iaan ro jeid im jatid etan Lily. Lily ear l̦ap an jipañ Carol, juon iaan ro jeid im jatid me ear mej l̦eo pãleen jãne. ^[1] (Lale kõmel̦el̦e eo ilo jem̦l̦o̦kin katak in.) Ñan waanjoñak, Lily ear jipañ Carol kõn ial̦ ñan jabdewõt jikin eo ear aikuj etal ñane, jipañe kaikujkuj, im jipañe ilo elõñ wãween ko jet. Meñe Lily ear kõm̦m̦ani aolep men kein, ak Carol ekõn jab jouj ñane, im jet iien ear pen an Lily jipañe. Mekarta, ak Lily ear l̦õmn̦ak wõt kõn em̦m̦an ko an Carol im ear jipañe ium̦win elõñ iiõ ñan iien eo Carol ear nañinmej im mej. Meñe ear pen ippãn Lily ñan jipañ Carol ak ear ba: “Ij reim̦aanl̦o̦k ñan iien eo Carol enaaj bar mour, ikõn̦aan jel̦ã kajjien ilo iien en̦ eweeppãn.” Elukkuun alikkar bwe yokwe eo an Anij emaroñ kõm̦akũt kõj bwe jen kijenmej ippãn rũttõmak ro jeid im jatid im reim̦aanl̦o̦k ñan iien eo me aolep renaaj weeppãn ñan indeeo.

19. Menin letok eo an Anij “el̦ap jãn maroñ in ba” enaaj kõm̦akũt eok ñan ta?

¹⁹ Em̦õj an Jeova letok ñan kõj juon menin letok “el̦ap jãn maroñ in ba.” Kõn men in, aolep iien jen kwal̦o̦k ad kam̦m̦oolol Jeova kõn men in! Raan ko m̦okta jãn iien Kwõjkwõj eo im ãlikin, rej jet iien ko rem̦m̦an ñan ad kõl̦mãnl̦o̦kjen̦ kõn aolep men ko Jeova im Jijej rar kõm̦m̦ani ñan kõj. Yokwe eo aer ñan kõj en kõm̦akũt kõj bwe jen anõke joñak eo an Jijej, yokwe rũttõmak ro jeid im jatid, im m̦oolin jol̦o̦k bõd ko aer.