1, 2. (a) Ekiconco kya Ruhanga ‘ekitarikubaasa kushoboororwa’ nikitwariramu ki? (b) Nituza kushwijuma bibuuzo ki omu kicweka eki?

YEHOVA akatuha ekiconco ekirikukirayo kworeka rukundo ye, obu yaayohereza omu nsi Omwana we omwe ou yaayehangiire! (Yoh. 3:16; 1 Yoh. 4:9, 10) Entumwa Paulo akakyeta ‘ekiconco ekitarikubaasa kushoboororwa.’ (2 Kor. 9:15) Ahabw’enki yaakoreise ebigambo ebyo?

² Paulo akaba naamanya ngu Ruhanga okuhayo Kristo nk’ekitambo, n’obuhame ngu byona ebi yaaraganiise nibiija kuhikiirira. (Shoma 2 Abakorinso 1:20.) N’ahabw’ekyo, ‘ekiconco ekitarikubaasa kushoboororwa’ nikitwariramu ekitambo kya Yesu n’emigisha yoona ei Yehova arikutuha. Buzima, ekiconco ekyo n’eky’omuhendo munonga tikirikubaasa kushoboororwa omu muringo ogu abantu barikubaasa kwetegyereza gye. Okutunga ekiconco ky’omutaano eki kishemereire kutukwataho kita?  Kandi ekiconco eki kishemereire kutuhiga kukora ki obu turiyo nitwetebeekanisiza Ekiijutsyo ky’okufa kwa Yesu ekiraabeho Okwakashatu, Orwakashatu 23, 2016?

3, 4. (a) Nooyehurira ota omuntu yaakuha ekiconco? (b) Ekiconco ky’omutaano nikibaasisa kuhindura kita amagara gaawe?

³ Waatunga ekiconco, buzima nooshemererwa munonga. Kwonka, ebiconco ebimwe nibiba biri eby’omutaano nari biri eby’omugasho munonga birikubaasa kuhindura amagara gaitu. Nk’eky’okureeberaho, teekateeka waacwerwa orubanja rw’okufa ahabw’okuteekateekwaho kuba oine eki oshobize. Ahonaaho, omuntu ou otarikumanya ayehayo kuba niwe yaafubirwa omu mwanya gwawe. Kandi ayeteekateekire kukufeera! Ekiconco nk’eki eky’omutaano nikikureetera kwehurira ota?

⁴ Hatariho kubanganisa rukundo nk’egyo etarimu kweyendeza, eshemereire kukugyemesereza kuteekateeka aha bikorwa byawe kandi okahindura aha mitwarize yaawe. Ekyo kishemereire kukuhiga kuba efura, okakunda abandi, kandi okasaasira n’abakushobeize. Ebiro by’amagara gaawe byona, noija kuhurira oine eibanja ahabw’omuntu ogwo owaayehaireyo ahabwawe.

5. Ekiconco eki Ruhanga atuhaire eky’ekitambo nikitaana kita n’ebiconco ebindi?

⁵ Kwonka, eki Yehova atuhaire kurabira omuri Kristo nikikira ekiconco ekyagambwaho omu ky’okureeberaho eki. (1 Pet. 3:18) Yetegyereze ahabw’enki. Nitufa ahabw’ekibi eki twahungwire. (Rom. 5:12) Yehova ayekundiire, akakora entebeekanisa kwohereza Yesu omu nsi “ngu aroze aha kufa omu mwanya gw’abantu boona.” (Heb. 2:9) Yehova akatuteeraho omuhanda gw’okutujuna embeera ei turimu hati, n’okwija kwihiraho kimwe okufa ebiro byona. (Isa. 25:7, 8; 1 Kor. 15:22, 26) Boona abarikwikiriza Yesu nibaija kutunga amagara agatahwaho bagire obusingye n’okushemererwa omu Bukama bwa Ruhanga oburikwebemberwa Kristo, n’abashukirweho amajuta, abaraategyeke nawe. (Rom. 6:23; Kush. 5:9, 10) Ekiconco eki Yehova atuhaire nikiija kutubaasisa kutunga migisha ki endiijo?

6. (a) Ekiconco kya Yehova nikiija kureetaho migisha ki ei oyiniire ekihika? (b) Gamba ebintu bishatu ebi ekiconco kya Ruhanga kirikutuhiga kukora.

⁶ Ekiconco eki Yehova atuhaire nikitwarimu okutambirwa endwara zaitu zoona, okuhindura ensi yaitu kuba paradiso, n’okuzooka kw’abafu. (Isa. 33:24; 35:5, 6; Yoh. 5:28, 29) Buzima nitukunda Yehova n’omwana we ahabw’okutuha ‘ekiconco ekitarikubaasa kushoboororwa.’ Kwonka shi, rukundo ei Ruhanga atwiniire neija kutuhiga kukora ki? Ka tureebe oku rukundo ya Ruhanga erikutuhiga (1) kutooreza Yesu Kristo, (2) kukunda ab’eishe-emwe, (3) n’okusaasira abandi twihire aha mutima.

7, 8. Tushemereire kutwara tuta rukundo ei Kristo atwiniire, kandi eine kutuhiga kukora ki?

⁷ Eky’okubanza eki twine kukora, n’okubaho ahabwa Kristo Yesu. Entumwa Paulo akagira ati: “Okukunda kwa Kristo nikwo kutugyema.” (Shoma 2 Abakorinso 5:14, 15.) Paulo akaba naamanya ngu twasiima rukundo y’omutaano ei Kristo atwiniire, neija kutugyema nari kutuhiga kubaho ahabwe. Twamanya ebi Yehova atukoreire na rukundo ei atwiniire, nitugira ekyetengo ky’okubaho ahabwa Kristo Yesu. Nitworeka tuta ekyetengo ekyo?

⁸ Rukundo ei twiniire Yehova neetugyema kutooreza eky’okureeberaho kya  Kristo, turikukora nk’oku yaakozire. (1 Pet. 2:21; 1 Yoh. 2:6) Nitworeka rukundo ei twiniire Ruhanga na Kristo turikuboorobera. Yesu akagira ati: “Oine ebiragiro byangye akabyorobera niwe arikunkunda, kandi orikunkunda aryakundwa Tata, naanye ndyamukunda, mmweyorekye.”​—Yoh. 14:21; 1 Yoh. 5:3.

9. Hariho kugyemeserezibwa ki obunaku obu?

⁹ Omu bwire bw’Ekiijutsyo, ni kirungi kuteekateeka aha mitwarize yaitu. Yebuuze oti: ‘Ni miringo ki ei ndikutoorezamu gye Kristo Yesu? Ni nkahi ahu ndikubaasa kwongyeramu amaani?’ Okweshwijuma oku ni kukuru, omu nsi egi erikutugyemesereza kutooreza emitwarize yaayo mibi. (Rom. 12:2) Twaba tutegyendesereize, nitubaasa kuba abakuratsi b’abanyabwengye b’ensi egi nari ab’abarikurangaanwa omu by’emizaano n’agandi mamanzi. (Kol. 2:8; 1 Yoh. 2:15-17) Nitubaasa kwangira tuta okugyemeserezibwa okwo?

10. Tushemereire kwebuuza bibuuzo ki omu bwire bw’Ekiijutsyo eki, kandi eby’okugarukamu nibibaasa kutuhiga kukora ki? (Reeba ekishushani aha kutandika.)

¹⁰ Omu bwire bw’Ekiijutsyo twine omugisha gw’okushwijuma omu kabada zeitu, vidiyo n’ebyeshongoro, nangwa n’ebiri aha kompyuta zeitu, aha simu, na tabuleti. Waaba nooshwijuma omu kabada, yebuuze oti: ‘Ku ogire ngu ninza omu mwanya ogu Yesu araabe arimu, niinyija kwehurira kubi naajwara omwenda ogu?’ (Shoma 1 Timoseo 2:9, 10.) ‘Naajwara omwenda ogu, buri omwe naaza kurahuka kukimanya ngu ndi omwe aha bakuratsi ba Kristo Yesu?’ Tushemereire kwebuuza ebibuuzo nk’ebyo na twaba nitutoorana vidiyo nari ebyeshongoro. ‘Mbwenu shi Yesu naabaasa kureeba vidiyo egi nari kuhurikiza ekyeshongoro eki? Ku yaakunshaba kureeba aha simu nari kompyuta yangye, nkaahemuka ahabw’ebi yaareebaho?’ Nimbaasa kushoboororera Yesu ahabw’enki niinzaana omuzaano ogu?’ Rukundo ei twiniire Yehova eshemereire kutugyemesereza kweyihaho kyona eki omukuratsi wa Kristo atashemereire kureeba, n’obu kyakuba kiri eky’omuhendo munonga. (Byak. 19:19, 20) Obu twayehayo ahari Yehova tukaraganisa ngu tituraabeho ahabwaitu, kureka ahabwa Kristo. N’ahabw’ekyo, titwine kuhamira aha kintu kyona ekirikuturemesa kutooreza Yesu.​—Mat. 5:29, 30; Fil. 4:8.

11. (a) Rukundo ei twiniire Yehova na Yesu neetuhiga eta omu murimo gw’okubuurira? (b) Rukundo yaitu neebaasa kutuhiga eta kuhwera abandi omu kibiina?

¹¹ Rukundo ei twiniire Yesu nayo neetureetera kukora n’omutima gumwe omu murimo gw’okubuurira n’okuhindura abantu abeegi. (Mat. 28:19, 20; Luk. 4:43) Obwire bw’Ekiijutsyo, nitwija kugira omugisha gw’okuheereza nka baapayoniya abahwezi turikubuurira eshaaha 30 nari 50. Mbwenu shi noobaasa kukora entebeekanisa kuba payoniya omuhwezi? Omufaakazi omwe ow’emyaka 84 akaba naahurira ngu tarikubaasa kuba payoniya omuhwezi ahabwa bukuru n’amagara mabi. Kwonka, baapayoniya ab’omu kicweka ekyo bakamuhwera. Bakamuhwera omu by’engyenda kandi baamuha ekicweka ky’okubuuriramu, kubaasa kuhitsya eshaaha 30. Noobaasa kuhwera omwe aha b’omu kibiina kyanyu kutunga amashemererwa agarikuruga omu kuheereza nka payoniya omuhwezi omu bwire bw’Ekiijutsyo? Buzima, twena titurikubaasa kuba baapayoniya abahwezi. Kwonka nabwo, nitubaasa kukoresa buri mugisha gwona n’amaani gaitu kwongyera kuheereza Yehova. Twakora ekyo, nitworeka ngu nituhigwa rukundo ya Kristo nka Paulo. Rukundo ya Ruhanga neija kutuhiga kukora ki ekindi?

12. Rukundo ya Ruhanga neetuhiga kukora ki?

¹² Ekya kabiri, rukundo ya Ruhanga eshemereire kutugyemesereza kukunda ab’eishe-emwe. Entumwa Yohaana akahandiika ati: “Abarikukundwa, Ruhanga ku araabe yaatukunzire atyo, naitwe tushemereire kukundana.” (1 Yoh. 4:7-11) Eego, twaba nitwenda ngu Ruhanga atukunde, twine n’okumanya obujunaanizibwa bwaitu bw’okukunda ab’eishe-emwe. (1 Yoh. 3:16) Nitubaasa kworeka tuta rukundo ei twiniire ab’eishe-emwe?

13. Yesu akataho ky’okureeberaho ki eky’okukunda abandi?

¹³ Yetegyereze eky’okureeberaho kya Yesu. Obu yaabaire ari omu nsi, akaba afayo aha bantu abarikutwarwa nk’ab’ahansi. Akaba ahwera abaine amagara mabi, ebirema, empumi, ebifa-matu, n’ebiteta. (Mat. 11:4, 5) Yesu akaba naakunda kwegyesa abaine enjara y’eby’omwoyo, abu Abayudaaya abeebembezi b’amadiini baabaire bareeba ‘nk’abakyeenirwe.’ (Yoh. 7:49) Akaba naakunda abarikutwarwa nk’ab’ahansi, kandi ateeraho kubaheereza.​—Mat. 20:28.

14. Noobaasa kukora ki kworeka ngu nookunda ab’eishe-emwe?

¹⁴ Obwire bw’Ekiijutsyo nibukubaasisa kutooreza Yesu orikuteeraho kuhwera ab’eishe-emwe omu kibiina kyanyu. Waakora ekyo, hatariho kubanganisa noija kureeba bamwe abaraagasirwe ahabwa rukundo yaawe. Nihabaasa kuba hariho ab’eishe-emwe abaine emyaka ya bukuru abarikwetenga obuhwezi. Mbwenu shi noobaasa kubataayaayira? Noobaasa kubatwarira eby’okurya, kubahwera aha mirimo y’omu ka, kubatwara omu nteerane, nari kubuurira nabo? (Shoma Luka 14:12-14.) Rukundo ei Ruhanga atwiniire eshemereire kutuhiga kworeka ngu nitukunda ab’eishe-emwe.

15. Niki eki twine kumanya?

¹⁵ Ekya kashatu, rukundo ya Yehova eshemereire kutugyemesereza kusaasira ab’eishe-emwe bagyenzi baitu. Ahabw’okugira ngu twena turi baijukuru ba Adamu, tukahungura ekibi n’ekifubiro kyakyo nikwo okufa. Tihariho n’omwe ahariitwe orikubaasa kugira ati: “Tindikwetenga ekitambo.” Nangwa n’omuheereza wa Yehova orikukirayo kuba omwesigwa, naabaho  ahabw’embabazi za Ruhanga kurabira omuri Kristo. Buri omwe aine kumanya ngu tukasaasirwa eibanja rihango. Ahabw’enki eki ni kukuru? Eky’okugarukamu nikishangwa omuri emwe aha nfumu za Yesu.

16, 17. (a) Nitwega ki omu ky’okureeberaho kya Yesu eky’omukama n’omwambari? (b) Bwanyima y’okuteekateeka aha ky’okureeberaho ekyo, niki eki omaririire kukora?

¹⁶ Yesu akaha enfumu erikukwata aha ku omukama yaasaasiire omwambari we eibanja rihango eririkwingana etalanta 10,000 nari edenaari 60,000,000. Kwonka, omwambari ogwo akanga kusaasira omwambari mugyenzi we eibanja rikye munonga eririkwingana edenaari 100. Omukama ogwo kikamugwisa kubi munonga kureeba omwambari ou yaasaasiire eibanja rihango atarikwenda kusaasira mugyenzi we. Omukama ogwo akagira ati: “Iwe mwambari ‘we omubi, nkusaasiire eibanja eryo ryona ahabw’okuunyeshengyereza, naiwe toshemereire kusaasira omwambari mugyenzi waawe, nk’oku nkusaasiire?” (Mat. 18:23-35) Buzima, embabazi nyingi ezi omukama ogwo yaayorekire zikaba zishemereire kugyema omwambari kusaasira mugyenzi we. Buzima, rukundo ya Yehova n’embabazi ze bishemereire kutugyema kukora ki?

¹⁷ Ekiijutsyo nikitubaasisa kweshwijuma kureeba yaaba haine ow’eishe-emwe ou twiniire enziika. Waashanga oine enziika, ka nibwija kuba obwire burungi bw’okutooreza Yehova ‘oyeteekateekire kusaasira!’ (Neh. 9:17; Zab. 86:5) Twayetegyereza eki Yehova atukoreire arikwihaho eibanja ryaitu rihango, nitwija kusaasira abandi twihire aha mutima. Twaba tutarikubaasa kukunda abandi kandi tukabasaasira, na Ruhanga tarikwija kutukunda kandi akatusaasira. (Mat. 6:14, 15) N’obu okusaasira abandi kuraabe kutarikubaasa kuhindura eby’enyima, nikubaasa kuhindura ebiro byaitu eby’omumaisho bibe birungi.

18. Rukundo ei munyaanyazi-itwe omwe yaabaire ainiire Ruhanga ekamubaasisa  eta kugumisiriza okutahikiirira kwa mugyenzi we?

¹⁸ Baingi ahariitwe, ‘okugumisiririza’ ab’eishe-emwe buri izooba nikibaasa kutugumira. (Shoma Abakolosai 3:13, 14; Abaefeso 4:32.) Nk’eky’okureeberaho, munyaanyazi-itwe Lily otakataahire omu bushwere, akahwera omukazi efaakazi orikwetwa Carol. ^[1] Lily akaba ahwera Carol omu by’engyenda, omu kugura ebintu, amukorera n’ebindi bintu bingi. N’obu Lily araabe yaakozire ebyo byona, Carol akaba agumire kandi arikukira kwetomboita. Kwonka, Lily akaba ata omutima aha mitwarize ya Carol emirungi. Akagumizamu naamuhwera kumara emyaka mingi, kuhitsya obu yaafa. Lily naagira ati: “Nyine ekihika ky’okureeba Carol omu kuzooka. Niinyenda ngu mmumanye ku araabe ohikiirire.” Buzima, rukundo ya Ruhanga neebaasa kutuhiga kugumisiririza ab’eishe-emwe kandi tukategyereza n’ekihika obu okutahikiirira kw’abantu kuraahwereho kimwe.

19. ‘Ekiconco kya Ruhanga ekitarikubaasa kushoboororwa’ nikiija kukuhiga kukora ki?

¹⁹ Buzima Yehova atuhaire ‘ekiconco ekitarikubaasa kushoboororwa.’ Titushemereire kuzaanazaanisa ekiconco eki eky’omuhendo. Omu mwanya gw’ekyo, omu bwire bw’Ekiijutsyo twine kuteekateeka munonga ahari byona ebi Yehova na Yesu batukoreire. Buzima, rukundo yaabo k’etuhigye kutooreza Yesu, turikukunda ab’eishe-emwe, kandi tubasaasire twihire aha mutima.