1, 2. (a) Wanem nao datfala “nambawan present” wea God givim? (b) Wanem tufala kwestin nao bae iumi storyim long disfala study?

JEHOVAH givim wanfala present for showimaot hem barava lovem iumi taem hem sendem kam spesol Son bilong hem Jesus long earth! (John 3:16; 1 John 4:9, 10) Aposol Paul sei datwan hem wanfala “nambawan present.” (2 Cor. 9:15) Why nao Paul sei olsem?

² Paul savve evri nambawan promis bilong God bae kamap tru bikos long ransom sakrifaes bilong Jesus. (Readim 2 Corinth 1:20.) So datfala “nambawan present” hem ransom sakrifaes bilong Jesus, and evri gud samting wea Jehovah hem duim for iumi. Iumi no savve markem datfala present witim eni nara samting. Wanem nao iumi shud duim for showimaot iumi tinghae long datfala present? And hao nao datfala present savve helpem  iumi for redi for taem bilong Memorial long Wednesday, March 23, 2016?

3, 4. (a) Hao nao tingting bilong iu taem samwan givim iu wanfala present? (b) Wanem nao bae iu duim for showimaot iu tinghae long spesol present wea samwan givim?

³ Iumi hapi tumas taem samwan givim present long iumi. Samfala present iumi barava tinghae long hem and hem barava spesol. Olsem example, tingim sapos iu duim wanfala samting wea brekem law, and panis wea iu shud kasem hem for iu mas dae. Then seknomoa, samwan wea iu no savve long hem sei hem willing for kasem datfala panis. Hem nao bae dae for iu! Hao nao bae iu ting long datwan?

⁴ Sapos samwan willing for duim bigfala samting olsem for iu, bae iu barava tinghae long datwan. Maet datwan mekem iu for changem samfala wei bilong iu. And tu, maet iu laek for duim samfala samting moa for showimaot love and for kaen long narawan, and iu bae willing for forgivim eniwan wea no kaen long iu. And for full laef bilong iu, iu bae laek for showimaot iu tinghae long samting wea datfala man duim for iu.

5. Hao nao ransom sakrifaes bilong Jesus hem winim eni nara present?

⁵ Ransom sakrifaes bilong Christ hem nambawan present wea winim datfala example wea iumi storyim. (1 Pet. 3:18) Tingim diswan: Iumi evriwan kasem sin from Adam, and panis bilong datwan hem dae. (Rome 5:12) From Jehovah lovem iumi, hem sendem Jesus kam daon long earth for “dae for evriwan.” (Heb. 2:9) So sakrifaes bilong Jesus savve sevem iumi. And tu, hem bae finisim dae for olowe! (Isa. 25:7, 8; 1 Cor. 15:22, 26) Evriwan wea showimaot faith long Jesus bae stap gud and hapi for olowe. Samfala bae kamap olketa king wea bae rul witim Christ long heven, and staka narawan bae stap long earth anda long Kingdom bilong God. (Rome 6:23; Rev. 5:9, 10) Wanem nao olketa nara blessing wea iumi bae kasem long future?

6. (a) Olketa wanem blessing nao iu luk forward long hem? (b) Wanem nao thrifala wei for showimaot iumi tinghae long present wea God givim?

⁶ Jehovah bae mekem earth kamap paradaes, no eniwan bae sik, and olketa wea dae bae laef bak. (Isa. 33:24; 35:5, 6; John 5:28, 29) Iumi barava lovem Jehovah and Son bilong hem wea givim iumi disfala “nambawan present.” Wanem nao iumi savve duim for showimaot iumi tinghae long disfala present? Iumi laek for (1) barava followim gud example bilong Christ Jesus, (2) lovem olketa brata and sista bilong iumi, and (3) willing for forgivim olketa narawan.

7, 8. Love wea Jesus showimaot for iumi hem mekem iumi laek for duim wanem samting?

⁷ Firstfala samting, evri samting iumi duim long laef shud showimaot iumi tinghae long wanem Jesus duim for iumi. Aposol Paul sei iumi gohed strong for duim olsem “from Christ hem lovem iumi.” (Readim 2 Corinth 5:14, 15.) Paul hem savve taem iumi tinghae long love wea Jesus showimaot for iumi, datwan bae mekem iumi for lovem Jesus and laek for obeyim hem. Tru nao, taem iumi savve long wanem Jehovah duim for iumi and bigfala love bilong hem, iumi bae traem best for duim samting wea showimaot iumi tinghae long Jesus. Hao nao iumi savve duim datwan?

⁸ Love wea iumi garem for Jehovah bae helpem iumi for barava followim gud example bilong Jesus. (1 Pet. 2:21; 1 John 2:6) Taem iumi obeyim God and Christ, datwan showimaot iumi lovem tufala. Jesus sei: “Man wea acceptim and obeyim olketa law bilong mi, hem nao man wea lovem mi. Dadi  bilong mi bae lovem man wea lovem mi. Mi bae lovem datfala man tu and bae mi mekem hem savve gud long mi.”—John 14:21; 1 John 5:3.

9. Wanem nao samfala samting wea iumi mas careful long hem?

⁹ Long taem bilong Memorial, hem gud for iumi ting raonem olketa samting wea iumi duim long laef bilong iumi. So ting raonem tufala kwestin hia: ‘Wanem nao samfala samting wea mi duim finis wea showimaot mi followim example bilong Jesus? Wanem moa samfala samting wea mi mas duim for followim example bilong Jesus?’ Hem important for ting raonem olketa kwestin hia bikos pipol long world laekem iumi for followim wei bilong olketa. (Rome 12:2) Sapos iumi no careful, maet iumi start for followim teaching bilong olketa savveman long world, and followim wei bilong olketa sports pipol and olketa wea garem bignem. (Col. 2:8; 1 John 2:15-17) Wanem nao bae helpem iumi for no duim datwan?

10. Olketa wanem kwestin nao hem gud for iumi ting raonem long taem bilong Memorial, and wanem nao maet iumi savve duim? (Lukim piksa long start bilong study.)

¹⁰ Long taem bilong Memorial, hem gud for lukluk moa long olketa kaleko bilong iumi, olketa movie, olketa music wea iumi garem, and chekim tu olketa samting wea iumi keepim long computer, mobile phone, or tablet bilong iumi. And then ting raonem olketa kwestin hia: ‘Sapos mi werem disfala kaleko, bae mi shame for Jesus lukim mi?’ (Readim 1 Timothy 2:9, 10.) ‘Waswe, kaleko wea mi werem showimaot mi wanfala disaepol bilong Christ? Waswe, Jesus bae hapi for lukim olketa movie wea mi garem? Waswe, bae hem lisin long olketa music wea mi garem? Sapos Jesus iusim mobile phone or tablet bilong mi, bae mi shame long wanem Jesus lukim long datfala mobile or tablet? Waswe, bae mi shame for storyim long Jesus why mi laekem olketa video game hia?’ Love wea iumi garem for Jehovah bae helpem iumi for torowem eni samting wea no fitim wanfala Christian, nomata hem expensive. (Acts 19:19, 20) Taem iumi dedicate long Jehovah, iumi promis long hem for no duim wanem iumiseleva laekem, bat for duim wanem Christ laekem. So iumi shud no keepim eni samting wea savve mekem hem no isi for iumi followim gud example bilong Jesus.—Matt. 5:29, 30; Phil. 4:8.

11. (a) Love wea iumi garem for Jehovah and Jesus bae helpem iumi for duim wanem samting? (b) Wanem nao iumi savve duim for helpem olketa narawan long kongregeson?

¹¹ Love wea iumi garem for Jesus mekem iumi gohed strong long waka for preach and teachim pipol. (Matt. 28:19, 20; Luke 4:43) Long taem bilong Memorial, waswe, iu savve auxiliary pioneer and spendem 30 or 50 hour long preaching waka? Wanfala widow brata wea 84 year tingse hem no savve pioneer from hem olo and body no strong. Bat olketa pioneer long ples wea hem stap laek for helpem hem. Olketa tekem hem long trak bilong olketa and olketa go preach long territory wea fitim hem. From datwan, datfala brata kasem goal bilong hem for 30 hour. Waswe, iu savve duim samting for helpem samwan long kongregeson for auxiliary pioneer long March or April? Hem tru, no evriwan savve pioneer, bat iumi savve iusim taem and strong bilong iumi for duim samfala samting moa long waka bilong Jehovah. Sapos iumi duim olsem, iumi showimaot iumi tinghae long love bilong Jesus olsem Paul. Wanem moa iumi savve duim for showimaot iumi tinghae long love bilong God?

12. Love bilong God for iumi shud mekem iumi for duim wanem samting?

¹² Mek-tu samting, love bilong God for  iumi shud mekem iumi for lovem olketa brata and sista bilong iumi. Aposol John sei: “Olketa brata wea mi lovem, sapos God lovem iumi long wei olsem, iumi mas lovem iumi evriwan tu.” (1 John 4:7-11) So sapos iumi laekem God for lovem iumi, iumi mas lovem olketa brata and sista. (1 John 3:16) Hao nao iumi savve showimaot iumi lovem olketa brata and sista?

13. Wanem nao Jesus duim wea showimaot hem lovem olketa narawan?

¹³ Example bilong Jesus savve helpem iumi for showimaot love long olketa narawan. Taem Jesus stap long earth, hem helpem pipol, especially olketa wea hambol. Hem healim pipol wea sik and kripol, hem mekem olketa wea blind for lukluk, olketa wea earpas for herehere, and olketa wea no savve toktok for toktok. (Matt. 11:4, 5) Jesus no olsem olketa bigman bilong religion, hem hapi for teachim pipol wea laek for lane abaotem God. (John 7:49) Hem lovem olketa wea hambol and waka hard for helpem olketa.—Matt. 20:28.

14. Wanem nao iumi savve duim for showimaot iumi lovem olketa brata and sista?

¹⁴ Long taem bilong Memorial, hem gudfala taem tu for ting raonem wanem iumi savve duim for helpem olketa brata and sista long kongregeson, especially olketa wea olo. Waswe, iu savve visitim olketa hia? Maet iu savve givim kaikai long olketa, helpem olketa for duim samfala waka long haos bilong olketa, tekem olketa kam long meeting long trak bilong iu, or waka witim olketa long ministry. (Readim Luke 14:12-14.) Love bilong God for iumi shud mekem iumi for lovem olketa brata and sista bilong iumi!

15. Wanem nao iumi mas luksavve long hem?

¹⁵ Mek-thri samting, love wea Jehovah garem for iumi helpem iumi for forgivim olketa brata and sista bilong iumi. Iumi evriwan kasem sin from Adam and iumi savve dae, so no eniwan savve sei, “Mi no needim ransom sakrifaes bilong Jesus.” Nomata olketa mature Christian wea worshipim Jehovah for longfala taem needim ransom sakrifaes bilong Christ. Iumi evriwan mas luksavve God hem forgivim sin bilong iumi wea hem olsem bigfala kaon! Why nao hem important for luksavve long datwan? Bae iumi storyim wanfala tokpiksa bilong Jesus for ansarem datfala kwestin.

16, 17. Wanem nao iumi savve lanem from tokpiksa bilong Jesus abaotem wanfala king and tufala wakaman?

 ¹⁶ Jesus storyim tokpiksa abaotem wanfala wakaman wea kaonem 60,000,000 denarii long wanfala king. King hia talem datfala wakaman for no wari for changem bak datfala kaon. Bat bihaen, datfala wakaman no willing for duim sem samting long nara wakaman wea kaonem nomoa 100 denarii long hem. Wei wea king showimaot mercy long hem shud mekem hem for showimaot mercy long nara wakaman hia. Datfala king hem barava kros taem hem herem datfala wakaman talem nara wakaman for mas peim kaon bilong hem. King hem sei: “Iu wanfala rabis man ia. Taem iu barava askem mi for weit mekem iu garem taem for changem bak kaon bilong iu, mi talem iu for no warim datwan. Mi showimaot mercy long iu ia. Hao nao iu no showimaot mercy long datfala man?” (Matt. 18:23-35; footnote) Olsem datfala king, Jehovah hem forgivim olketa sin bilong iumi wea olsem bigfala kaon. Love and mercy wea Jehovah showimaot long iumi shud helpem iumi for duim wanem samting?

¹⁷ Taem iumi mek redi for Memorial, hem gud for iumi ting raonem olketa kwestin hia: ‘Waswe, wanfala brata or sista mekem mi feel nogud? Waswe, mi no laek for forgivim hem?’ Sapos olsem, long disfala taem bilong Memorial hem gud for followim example bilong Jehovah wea “willing for forgive.” (Neh. 9:17; Ps. 86:5) Sapos iumi tinghae long wei wea Jehovah showimaot mercy long iumi, iumi bae willing for forgivim olketa narawan. Sapos iumi no lovem and forgivim olketa brata and sista, hard tumas for Jehovah lovem and forgivim iumi. (Matt. 6:14, 15) Hem tru, taem iumi forgivim narawan datwan no changem samting wea happen finis, bat datwan helpem iumi for kasem gud samting long future.

18. Hao nao wanfala sista deal witim olketa wik point bilong nara sista?

¹⁸ Samfala taem hem no isi for deal witim olketa wik point bilong olketa brata and sista. (Readim Colossae 3:13, 14; Ephesus 4:32.) Lily hem wanfala sista wea mas deal witim wik point bilong nara sista. Hem helpem wanfala widow sista wea nem bilong hem Carol. [1] Olsem example, hem savve draevem Carol go long eni ples wea hem laek for go, helpem Carol for go shopping, and duim staka nara samting for Carol. Nomata Lily duim olketa samting hia, Carol evritaem tok daonem Lily, and samfala taem hem no isi for Lily helpem hem. Nomata olsem, Lily tingim olketa naesfala wei bilong Carol and helpem hem for staka year go kasem taem wea Carol sik big and hem dae. Nomata hem no isi for Lily helpem Carol, Lily sei: “Mi luk forward for lukim Carol taem hem laef bak. Mi laek for savve long hem taem hem perfect.” Tru tumas, love wea God garem for iumi savve helpem iumi for deal witim olketa wik point bilong olketa brata and sista and for luk forward long taem wea evriwan bae perfect.

19. Wanem nao bae iumi duim for showimaot iumi tinghae long datfala “nambawan present” wea God givim?

¹⁹ Tru nao, Jehovah givim iumi wanfala “nambawan present.” Iumi shud evritaem tinghae long datwan! Long taem bilong Memorial, hem gudfala taem for iumi ting raonem evri samting wea Jehovah and Jesus duim for iumi. Bigfala love wea tufala showimaot for iumi shud encouragem iumi for followim gud example bilong Jesus, showimaot love long olketa brata and sista, and willing for forgivim olketa narawan.