1, 2. 1) ¿Imastawantaj Jehová qowanchej? 2) ¿Ima tapuykunamantaj kay yachaqanapi kutichisunchej?

JEHOVAQA mayta munakuwasqanchejrayku may munasqa Wawan Jesucristota kay Jallpʼaman kachamorqa, noqanchejrayku kausayninta qonanpaj (Juan 3:16; 1 Juan 4:9, 10). Kaytaj Jehová tukuy imata qowasqanchejmanta aswan jatun regalo. Chayrayku apóstol Pabloqa ‘mana willay atina qowasqanchej’ kasqanta nerqa (2 Cor. 9:15). Chayta nispa, ¿imamantataj Pablo parlasharqa?

² Pablo yacharqa Jehová, Jesuspa wañuyninnejta tukuy ima nisqanta juntʼananta (2 Corintios 1:20 leey). Dios ‘mana willay atina qowasqanchejqa’ Wawanpa kausayninta qosqanwan, mayta munakuwasqanchejwan, tukuy ima allin kajta qowasqanchejwan ima ninakun. Jehová kay regalota qowasqanchejqa may sumajpuni. ¿Imaynataj sientekunchej aswan jatun regalota  Jehová qowasqanchejmanta? ¿Imatataj ruwasunman Jesuspa Wañuyninta Yuyarinapaj tantakuy qayllapiña kasqanrayku? Chay tantakoyqa miércoles 23 de marzo de 2016 watapi ruwakonqa.

3, 4. 1) ¿Imaynataj sientekunchej pillapis uj regalota qowajtinchej? 2) ¿Imaynatataj uj regalo kausayninchejta tijrachinman?

³ Pillapis uj regalota qowajtinchej mayta kusikunchej. Chaywanpis wakin regalosqa kausayninchejta tijrachinman. Kaypi tʼukuriy, sajra imata ruwasqaykirayku wañuchisqa kanaykipaj juchachasunku. Chayllapitaj mana rejsisqayki runa qanrayku wañunanta nin. Chayta uyarispa, ¿imaynataj sientekuwaj?

⁴ Ichapis kausayniykipi wakin imasta tijrachiwaj. Ichá wajkunatapis astawan munakuwaj, khuyakuwaj ima, sonqoykita nanachisojkunatapis perdonawaj. Chantapis ichá tukuy kausayniykipi qanrayku wañuyta munaj runaman, may agradecesqa kashasqaykita rikuchiwaj.

5. ¿Imaraykú nisunman Jehová wawanta noqanchejrayku kausayninta qonanpaj kachamusqan aswan jatun regalo kasqanta?

⁵ Jehová wawanta noqanchejrayku kausayninta qonanpaj kachamusqanqa, chay kikinchaymanta nisqaqa aswan sumaj regalo (1 Ped. 3:18). Imaraykuchus noqanchejqa Adanmanta juchata herenciata jina japʼisqanchejrayku wañunchej (Rom. 5:12). Chaywanpis Jehovaqa mayta munakuwasqanchejrayku, wawanta kay Jallpʼaman kachamorqa “tukuy runasrayku wañunampaj” (Heb. 2:9). Jesús kausayninta qosqanqa mana wañuyllamantachu kacharichiwanchej, manaqa wañuytapis wiñaypaj chinkachenqa (Isa. 25:7, 8; 1 Cor. 15:22, 26). Jesuspi creejkunaqa wiñaypaj kusisqas, sonqo tiyasqas ima kausakonqanku, wakenqa Cristowan khuska janaj pachapi, wakintaj kay Jallpʼapi (Rom. 6:23; Apo. 5:9, 10). ¿Ima bendicionestawantaj japʼisunchej Jehová wawanta wañunanpaj qosqanrayku?

6. 1) ¿Ima sumaj imastataj qan suyakushanki? 2) ¿Imaynasmantataj agradecesqa kasqanchejta rikuchisunman?

⁶ Jehová Diosninchej wawanta wañunanpaj qosqanrayku, kay Jallpʼa uj kʼachitu paraisoman tukonqa, onqosqas sanoyanqanku, wañusqaspis kausarimonqanku (Isa. 33:24; 35:5, 6; Juan 5:28, 29). Chayraykutaj Jehovata, Jesusta ima mayta munakunchej. ¿Imaynasmantataj rikuchisunman may agradecesqa kashasqanchejta? Jesucristo jina ruwaspa, hermanosninchejta munakuspa, wajkunata tukuy sonqo perdonaspa ima.

7, 8. 1) Cristoj munakuyninmanta agradecekusun chayqa, ¿imatataj ruwasun? 2) ¿Imaynatá Jehovata, Jesusta ima munakusqanchejta rikuchisunman?

⁷ Jehová munakuwasqanchejqa, Jesuspaj kausanapaj yanapawanchej. Apóstol Pablo nerqa: “Cristoj munakuynenqa tanqawayku ñawpajman rinaykupaj”, nispa (2 Corintios 5:14, 15 leey). Pablo nisqanman jina Cristoj munakuyninmanta agradecekusun chayqa, Jesusta munakusun, jatunpajtaj qhawasun. Imatachus noqanchejrayku Jehová ruwasqanta sumajta entiendespaqa, Jesuspaj kausayta munananchejpaj yanapawasunchej. ¿Imaynatataj chayta ruwasunman?

⁸ Jehovata munakuspaqa, Jesús jina ruwasunchej (1 Ped. 2:21; 1 Juan 2:6). Jehovata, Jesusta kasukuspataj, paykunata munakusqanchejta rikuchisunchej. Jesús nerqa: “Pichus kamachisqasniyta japʼikun, kasuntaj, chaymin munakuwajqa.  Noqata munakuwajtataj Tatayqa munakonqa. Noqapis payta munakusaj, rikuchikusajtaj payman”, nispa (Juan 14:21; 1 Juan 5:3).

9. ¿Ima ruwaykunamantaj tanqasqas kanchej?

⁹ Jesuspa Wañuyninta Yuyarinapaj tiempopi, allin kanman imaynatachus kausakushasqanchejpi tʼukurinanchej. Tapurikunataj: “¿Imaspitaj Jesús jinaña ruwashani? ¿Imaspitaj astawan kallpachakunay tiyan Jesús jina ruwanaypaj?”, nispa. Kay tapuykunata ruwakoyqa may sumaj, imaraykuchus kay sajra pachamanta runas jina ruwanapaj tanqasqas kanchej (Rom. 12:2). Mana allinta qhawarikojtinchejqa, ichapis yachayniyoj runas jina, may rejsisqa runas jina, sumajta pujllajkuna jina ruwayta qallarisunman (Col. 2:8; 1 Juan 2:15-17). ¿Imatataj ruwasunman chaykunamanta jarkʼakunapaj?

10. Jesuspa Wañuyninta Yuyarinapaj tiempopi, ¿imastataj tapurikusunman, imatá ruwanapajtaj tanqawanchej? (12 paginapi dibujota qhawariy.)

¹⁰ Jesuspa Wañuyninta Yuyarinapaj tiempopi, allin kanman wasinchejpi ima pʼachaschus, ima peliculaschus, ima takiykunachus kapuwasqanchejta qhawaykurinanchej. Chantapis computadoranchejpi, celularninchejpi, tabletanchejpi imaschus kasqanta qhawaykurinallataj. Tapurikunataj: “¿Pʼenqakuymanchu imayna pʼachallisqachus kashasqayta Jesús rikuwajtin?” (1 Timoteo 2:9, 10 leey). “Imayna pʼachallisqachus kasqay, ¿Jesuspa yachachisqan kasqayta rikuchinchu? ¿Ima peliculastachus qhawasqay, ima takiykunatachus uyarisqay ima Jesusman gustanmanchu? ¿Jesusman celularniyta chayri tabletayta mañariymanchu? ¿Jesusman rikuchiymanchu videojuegosniyta, imaraykuchus gustawasqantapis sutʼinchariyta atiymanchu?” Jehovata munakunchej chayqa, imaschus mana uj cristianopaj jinachu kasqan imasta ashkha qolqe valejtinpis chinkachinanchej tiyan (Hech. 19:19, 20). Bautizakunapaj Jehová Diosman qokushaspaqa, Cristollapaj kausananchejta nerqanchej. Chayrayku Jesús jina ruwanapaj ni ima jarkʼanawanchejta saqenachu (Mat. 5:29, 30; Fili. 4:8).

11. 1) ¿Imatataj ruwasun Jehovata, Jesusta ima munakusqanchejrayku? 2) ¿Imaynatá qotuchakuymanta hermanosta yanapasunman?

¹¹ Jesusta munakusqanchejqa sonqo kʼajaywan willamunapaj, yachachimunapaj ima yanapawanchej (Mat. 28:19, 20; Luc. 4:43). Jesuspa Wañuyninta Yuyarinapaj tiempopi precursores auxiliares jina llankʼayta atisunman 30 chayri 50 horasta ruwaspa. ¿Chayta ruwanaykipaj tiempochakuwajchu? Uj viudo hermano 84 watasniyoj, machitu kasqanrayku, onqosqa kasqanrayku ima, precursor auxiliar jina llankʼayta mana atinanta yuyarqa. Chaywanpis chay lugarmanta precursores autonkupi pusasqankurayku, willananpajpis uj lugarta ajllapusqankurayku ima, chay hermanoqa 30 horasta ruwayta atillarqa. ¿Qotuchakuyniykimanta mayqen hermanollatapis chayri hermanallatapis marzo chayri abril killapi precursor auxiliar kananpaj yanapayta atiwajchu? Mana tukuychu precursores auxiliares kayta atinchej. Jinapis Jehovamanta astawan willamunapaj tiempochakusunman, kallpachakusunman ima. Chayta ruwaspataj Pablo jina Cristoman munakuwasqanchejmanta agradecekusqanchejta rikuchisunman. ¿Imatawantaj ruwasunman Jehovata munakusqanchejrayku?

12. Dios munakunawanchejta munanchej chayqa, ¿imatá ruwananchej tiyan?

¹² Jehová munakuwasqanchejqa, hermanosta  munakunapaj yanapallawanchejtaj. Apóstol Juan nerqa: “Munasqa hermanosníy, chay jinatachus Dios munakuwarqanchej chayqa, noqanchejpis purajmanta munanakunachej”, nispa (1 Juan 4:7-11). Dios munakunawanchejta munanchej chayqa, hermanosninchejta munakunanchej tiyan (1 Juan 3:16). ¿Imaynatá hermanosninchejta munakusqanchejta rikuchisunman?

13. ¿Imatataj yachakunchej Jesuspa ruwasqanmanta?

¹³ Jesusqa ruwasqanwan, imaynatachus wajkunata munakunata yachachiwarqanchej. Kay Jallpʼapi kashaspataj yanapata necesitaj runasta astawan yanaparqa. Onqosqasta, ciegosta, suchusta, joqʼarasta, opasta ima sanoyacherqa (Mat. 11:4, 5). Manataj religionta kamachejkuna jinachu karqa, astawanpis Diosmanta yachakuyta munajkunaman yachachispa mayta kusikorqa (Juan 7:49). Llampʼu sonqosta munakorqa, yanapananpajtaj kallpachakorqa (Mat. 20:28).

14. ¿Imastataj ruwasunman hermanosta munakusqanchejta rikuchinapaj?

¹⁴ Jesuspa Wañuyninta Yuyarinapaj tiempoqa, qotuchakuyninchejmanta hermanosninchejta, astawantaj machitu hermanosninchejta imaynatachus yanapananchejpi tʼukurinapaj yanapawanchej. Machitu hermanosta waturikusunman, mikhunata aparipusunman, wasinpi ruwanastapis ruwaysisunman. Chantapis tantakuykunaman pusasunman chayri willaypi paykunawan khuska llankʼananchejpaj wajyarisunman (Lucas 14:12-14 leey). Jehová munakuwasqanchejqa, hermanosninchejta munakunanchejpaj yanapawanchej.

15. ¿Imatataj sapa ujninchej jatunpaj qhawananchej tiyan?

¹⁵ Jehová munakuwasqanchejqa hermanosninchejta perdonanapaj yanapallawanchejtaj. Tukuypis Adanmanta juchata, wañuytawan herenciata jina japʼinchej. Chayrayku ni pi nisunmanchu wañuymanta, juchamantawan kacharichisqa kayta mana necesitasqanchejta. Diospa aswan cheqa sonqo kamachinpis juchamanta, wañuymanta kacharichisqa kayta necesitan. Chayrayku nisunman kacharichiwasqanchejmanta Jehovaman manu kasqanchejta. ¿Imaraykutaj chayta mana qonqapunanchejchu tiyan? Chayta entiendenapaj  Jesuspa ujnin rijchʼanachinanmanta parlarina.

16, 17. ¿Imatataj Jesuspa rijchʼanachinanmanta yachakunchej?

¹⁶ Jesusqa rijchʼanachinanpi imaynatachus uj rey kamachinta 10.000 talento chayri 60 millones denario qolqe manunta perdonasqanmanta parlarqa. Chaywanpis chay kamacheqa, kamachi masinta 100 denario qolqe manulla kasqanta mana perdonarqachu. Chay kamacheqa rey khuyakusqanta jatunpaj qhawanman karqa chayqa, kamachi masinta perdonayta atillanman karqa. Reyqa mayta phiñakorqa chay sajra kamachi, kamachi masinta mana perdonasqanta yachaspa. Chayrayku wajyachispa nerqa: “Sajra kamachi, noqaqa tukuy manuykita perdonarqayki, khuyay khuyayta mañakuwasqaykirayku. Manachu qampis kamachi masiykita khuyanayki karqa, imaynatachus noqapis qanta khuyarqayki, ajinata?”, nispa (Mat. 18:23-35). Jehovapis chay rey jinallataj juchanchejta chayri manunchejta may jatun kajtinpis perdonawanchej.

¹⁷ Jesuspa Wañuyninta Yuyarinapaj tiempoqa yanapawanchej mayqen hermanollawanpis chayri hermanallawanpis phiñasqallapunichus manachus kashasqanchejta qhawarikunapaj. Phiñasqallapuni kashanchej chayqa, Jehová jina ruwanapaj kallpachakuna, payqa perdonanawanchejpaj “wakichisqa” kashan (Neh. 9:17; Sal. 86:5). Jehová noqanchejrayku imatachus ruwasqanta jatunpaj qhawasunchej chayqa, wajkunata tukuy sonqo perdonasunchej. Jehová perdonanawanchejta, munakunawanchejta munanchej chayqa, noqanchejpis hermanosninchejta munakunanchej, perdonananchej ima tiyan (Mat. 6:14, 15). Wajkunata perdonajtinchejpis, imatachus contranchejpi ruwasqankuta mana allinchayta atisunchu. Chaywanpis perdonayqa kusisqa kausakunapaj yanapawasun.

18. ¿Imataj uj hermanata yanaparqa waj hermanawan allinta kausakunanpaj?

¹⁸ Wakin kuteqa hermanosninchej contranchejpi imatapis ruwajtinku mana ‘pacienciakuyta’ atillanchejchu (Efesios 4:2, 32 leey). Lily sutiyoj hermanamanta parlarina, payqa soltera, tukuy sonqotaj Carol sutiyoj uj viuda hermanata yanaparqa. ^[1] Sutʼincharinapaj, payqa Carolta tukuynejman pusaj, rantej riyta munajtinpis paywan rej, waj imaspipis yanapallajtaj. Jinapis, Carolqa mana kusisqachu kasharqa, nitaj yanapayta atinapaj jinallachu karqa. Lilyqa Carolpa kʼacha kaykunasninta qhawananpaj kallpachakoj. Chayraykutaj ashkha watasta yanapallarqapuni, Carol onqoykuspa wañupunankama. Lily nin: “Carol kausarimunanta munani, juntʼa runa kajtin imaynachus kananta yachanaypaj”, nispa. Tumpamantawanqa manaña juchasapa runaschu kasunchej. Chaykamataj Dios munakuwasqanchejrayku hermanosninchej ‘contranchejpi imatapis ruwajtinku’ pacienciakunallapuni.

19. Jehovaman imatachus noqanchejrayku ruwasqanmanta agradecekunchej chay, ¿imatá ruwasunchej?

¹⁹ Jehovaqa cheqamantapuni may jatun regalota qowanchej. Chayrayku Jesuspa Wañuyninta Yuyarinapaj tiempopi, imatachus noqanchejrayku Jehovawan, Jesuswan ruwasqankupi tʼukurina. Sapa pʼunchay may agradecesqa kasqanchejta rikuchina. Jesús jina ruwana, hermanosninchejta munakuna, tukuy sonqotaj perdonana.