1, 2. (a) Matabisi ti Nzapa “so lo mû ni senge senge, so a lingbi ti fa nda ni kue pëpe” andu nyen? (b) Ahundango ndo wa e yeke bâ na yâ ti article so?

NA NGOI so Jéhovah atokua oko Molenge ti lo na sese, na ndoye lo mû na e mbeni matabisi so ayeke kota ahon atanga ni kue (Jean 3:16; 1 Jean 4:9, 10). Bazengele Paul airi ni “matabisi ti lo so lo mû ni senge senge, so a lingbi ti fa nda ni kue pëpe.” (2 aCor. 9:15). Ngbanga ti nyen la Paul airi ni tongaso?

² Paul ahinga lani so apendere zendo ti Nzapa kue ayeke ga tâ tënë na lege ti sacrifice ti Christ so sioni oko ayeke dä ape. (Diko 2 aCorinthien 1:20.) Tongaso, “matabisi ti [Nzapa] so lo mû ni senge senge, so a lingbi ti fa nda ni kue pëpe” andu aye ti nzoni kue so Jéhovah asara na e nga tâ ndoye so lo fa ni na mbage ti e na lege ti Jésus. Biani, matabisi so ayeke tâ kota mingi ni la zo alingbi pëpe ti fa ndani kue. Tënë ti bê ti e na ndo ti matabisi so ayeke so wa? Aye wa la matabisi so ayeke pusu e ti sara na ngoi  so e yeke leke tere ti dabe ti e na kuâ ti Christ na mercredi lango 23 ti mars, ngu 2016?

3, 4. (a) Tongana mbeni zo amû na mo mbeni cadeau ayeke sara mo tongana nyen? (b) Tongana nyen la mbeni kota cadeau alingbi ti changé ye na yâ ti fini ti mo?

³ Tere ti mo ayeke nzere mingi tongana mbeni zo amû na mo mbeni cadeau. Me teti so ambeni cadeau ayeke kota mingi wala ayeke nde mingi, a lingbi ti changé ye na yâ ti fini ti zo. Na tapande, a ye ti fâ mo ndali ti so mo mû mbage na fango mbeni zo. Mo ye ti bâ, mbeni zo so mo hinga lo ape asigigi hio na popo ti gbâ ti azo na lo yeda ti tene a fâ lo na place ti mo. Lo yeda na bê ti lo kue ti kui na place ti mo. Mo yeke tene nyen na ndo ti mara ti kota matabisi tongaso?

⁴ Mara ti matabisi so, so a mû na mo na ndoye, a yeke pusu mo ti bâ asarango ye ti mo ti bâ wala mo yeke na bezoin ti changé ambeni ye na yâ ni. A yeke pusu mo ti mû ye mingi na azo, ti sara ye na ndoye na azo nga a yeke pusu mo même ti pardonné zo kue so asara ye ti sioni na mo. Na yâ ti fini ti mo kue, mo yeke fa so mo ye ti kiri singila na zo so ayeda na bê ti lo kue ti kui ndali ti mo so.

5. Na lege wa matabisi so Nzapa amû na e, so ayeke sacrifice ti Christ, ayeke kota mingi ahon amatabisi kue?

⁵ Ye so Jéhovah amû na e na lege ti Christ ayeke kota mingi ahon matabisi so e sara tënë ni na yâ ti tapande so (1 Pi. 3:18). Zia e bâ ngbanga ti nyen la e tene tongaso. Ndali ti so siokpari ayeke na tere ti e, a dë ngbanga ti kuâ na li ti e (aRom. 5:12). Na ndoye, Jéhovah aleke si Jésus aga na sese na lo “kui teti zo oko oko kue.” (aHéb. 2:9). Sacrifice ti Jésus ayeke ga ande na ye ti nzoni mingi. A yeke futi ande kuâ biani biani (És. 25:7, 8; 1 aCor. 15:22, 26). Azo kue so amä na bê na Jésus ayeke duti ande na siriri nga na ngia teti lakue lakue, atâa na yayu tongana agbia ti Royaume legeoko na Christ wala na sese tongana azo ti gbe ti Royaume ni (aRom. 6:23; Apoc. 5:9, 10). Ambeni nzoni ye wa la e yeke wara ni na lege ti matabisi so Jéhovah amû na e?

6. (a) Aye ti nzoni wa matabisi so Nzapa amû ayeke ga na ni so mo yeke ku ni kungo? (b) Fa aye ota so matabisi ti Nzapa ayeke pusu e ti sara ni.

⁶ Ambeni nzoni ye so e yeke wara na lege ti matabisi so Nzapa amû na e ayeke so sese ayeke ga ande paradis, kobela ayeke duti ande dä ape na a yeke zingo ande akuâ (És. 33:24; 35:5, 6; Jean 5:28, 29). E ye biani Jéhovah nga na Molenge ti lo Jésus mingi ndali ti ‘matabisi so ala mû ni senge senge, so a lingbi ti fa nda ni kue pëpe.’ Matabisi so ayeke pusu e ti sara nyen? A yeke pusu e (1) ti sara ye tâ gi tongana ti Jésus, (2) ti ye aita ti e nga (3) ti pardonné amba ti e na bê kue.

7, 8. Ndoye ti Christ ayeke pusu e ti sara nyen? E yeke sara ni tongana nyen?

⁷ Kozoni, a lingbi e leke na bê ti e ti duti na fini ndali ti Christ Jésus. Bazengele Paul atene: “Ndoye so Christ ayeke na ni apusu e ti sara ye.” (Diko 2 aCorinthien 5:14, 15.) Paul ahinga lani so tongana e yeda na kota ndoye ti Christ ayeke pusu e ti ye lo nga ti ne lo. Tongana e hinga nzoni mingi ye so Jéhovah asara ndali ti e nga e ye lo na bê ti e kue, a yeke pusu e ti duti na fini na mbeni lege so anzere na Jésus Christ. E yeke sara ni tongana nyen?

⁸ Ndoye so e ayeke na ni na mbage ti Jéhovah ayeke pusu e ti mû tapande ti Jésus  na lege so e yeke mû tâ gi peko ti gere ti lo mbilimbili (1 Pi. 2:21; 1 Jean 2:6). Tongana e mä yanga ti Jéhovah nga na Jésus e yeke fa so e ye ala. Jésus atene lani atene: “Zo so ayeke na acommandement ti mbi na lo bata ni, lo si lo ndoye mbi. Nga, zo so andoye mbi, fade Babâ ti mbi ayeke ndoye lo. Fade mbi ndoye lo na mbi fa tere ti mbi polele na lo.”—Jean 14:21; 1 Jean 5:3.

9. Ambeni ye wa la tongana e sara hange ape bê ti e ayeke pusu e ti sara ni?

⁹ Na ngoi ti Dango bê na kuâ ti Christ, a yeke nzoni e gbu li ti e na ndo ti aye so e yeke sara na yâ ti fini ti e. Hunda tere ti mo: ‘Na yâ ti aye wa mbi mû tapande ti Jésus dä nzoni? Aye wa la na yâ ni a lingbi mbi mû tapande ti lo dä mingi ahon ti kozo?’ A yeke kota ye ti tene e hunda tere ti e na ahundango ndo so ndali ti so azo ti dunia so ayeke pusu e ti sara ye tongana ala (aRom. 12:2). Tongana e sara hange ape bê ti e ayeke pusu e ti to nda ti sara ye tongana awafango ye ti dunia so, azo so iri ti ala awu mingi nga na awanguru so iri ti ala awu mingi (aCol. 2:8; 1 Jean 2:15-17). Tongana nyen la e lingbi ti dö sese?

10. Ahundango ndo wa la e lingbi ti hunda tere ti e na ni? Akiringo tënë ni ayeke pusu e ti sara nyen? (Bâ foto so ayeke na tongo nda ti article ni.)

¹⁰ A yeke nga nzoni ti tene na ngoi ti Dango bê na kuâ ti Christ e mû ngoi ti bâ abongo ti e, abia so e yeke mä, afilm so e yeke bâ, wala aye so ayeke na yâ ti ordinateur ti e, na yâ ti tablette wala téléphone ti e. Tongana mo bâ abongo ti mo ni awe, hunda tere ti mo: ‘Tongana Jésus ayeke ge si lo bâ mbi na yungo mara ti bongo so kamene ayeke sara mbi?’ (Diko 1 Timothée 2:9, 10.) ‘Bongo so mbi yü so afa na azo so mbi yeke disciple ti Christ?’ E lingbi nga ti hunda tere ti e na mara ti tënë so na ndo ti afilm so e yeke bâ nga na amozoko so e yeke mä. ‘Jésus ayeke yeda ti bâ afilm so mbi yeke bâ so? Lo yeke yeda ti mä abia so mbi yeke mä so? Tongana Jésus ahunda na mbi ti mû na lo téléphone wala tablette ti mbi kamene ayeke sara lo ndali ti aye so lo yeke bâ na yâ ni?’ Tongana andu tënë ti jeux vidéo, hunda tere ti mo: ‘A yeke duti ngangu na mbi ti fa na Jésus ngbanga ti nyen la mbi ye jeux vidéo so mingi?’ Ndoye so e yeke na ni ndali ti Jéhovah ayeke pusu e ti bi aye kue so ayeke na lege ni ape ti tene mbeni Chrétien asara kua na ni, même tongana ngere ni ayeke oke (Kus. 19:19, 20). Na ngoi so e mû lani tere ti e na Jéhovah e mû zendo so e yeke mû fini ti e ti sara na ye so ane Christ. Tongaso, a lingbi e bata pëpe mbeni ye so asara si a yeke ngangu na e ti sara ye tongana ti Jésus.—Mat. 5:29, 30; aPhil. 4:8.

11. (a) Tongana nyen la ndoye ti Jéhovah nga na ti Jésus ayeke pusu e ti fa tënë? (b) Ndoye so e yeke na ni ayeke pusu e ti mû maboko na ambeni zo ti congrégation ti e tongana nyen?

¹¹ Ndoye so e yeke na ni ndali ti Christ ayeke pusu e ti yapu na yâ ti kua ti fango tënë nga ti sarango adisciple (Mat. 28:19, 20; Luc 4:43). Na ngoi ti Dango bê na kuâ ti Christ e yeke ande na pasa ti sara kua ti pionnier auxiliaire ti fa tënë teti ngbonga 30 wala 50. Mo lingbi ti leke yâ ti kapa ti mo ti sara ni? Mbeni ita so ayeke na ngu 84 so wali ti lo akui abâ lani so lo peut ti sara kua ti pionnier ape ndali ti so lo ga mbakoro awe nga lo yeke na kpale ti seni. Me apionnier ti ndo so lo yeke dä amä tere ti mû maboko na lo. Ala payé lege na lo, na ala soro nzoni mbeni territoire so lo lingbi ti fa tënë dä, tongaso so si lo lingbi ti fa tënë ti wara ngbonga 30. Mo lingbi ti gi ti mû maboko na mbeni zo ti congrégation ti mo ti tene lo sara kua ti pionnier auxiliaire na ngoi ti Dango bê na kuâ ti Christ? E kue la e lingbi ti sara kua ti pionnier auxiliaire ape. Ye oko, e lingbi ti mû ngoi ti e nga na ngangu ti e ti sara asacrifice mingi ti gonda na Jéhovah.  Tongana e sara tongaso, e yeke fa so, legeoko tongana ti Paul, ndoye ti Christ apusu e ti sara ye. Mbeni ye so ndoye ti Nzapa ayeke pusu e ti sara ni ayeke so wa?

12. Ndoye ti Nzapa ayeke pusu e ti sara nyen?

¹² Use ni, ndoye ti Nzapa ayeke pusu e ti ye aita ti e. Bazengele Jean ahinga lani. Lo tene: “Ala so mbi ndoye ala mingi, tongana a yeke tongaso si Nzapa andoye e, a yeke ngbanga ti e nga ti ndoye tere na popo ti e.” (1 Jean 4:7-11). E lingbi pëpe ti ye Nzapa sân ti hinga so e doit ti ye aita ti e (1 Jean 3:16). Na yâ ti aye wa la e lingbi ti fa so e ndoye amba ti e?

13. Tapande wa la Jésus azia na e na ndo ti tënë ti yengo azo?

¹³ Zia e bâ tapande ti Jésus. Na ngoi so lo yeke lani na sese lo bi bê ti lo mingi na ndo ti azo so ye ti ala ayeke dä ape. Lo gi lani ti mû maboko na azo so mbage ti tere ti ala abuba: azo so gere ti ala abuba, azo so lê ti ala abuba nga na azo so mê ti ala akanga (Mat. 11:4, 5). A nzere lani na Jésus mingi ti fa ye na azo so aye ti hinga ye na ndo ti Jéhovah, ala so akota zo ti vorongo nzapa ti aJuif abâ ala tongana “azo so a deba ala awe.” (Jean 7:49). Lo ye azo so mingi na lo sara kue ti fa tënë na ala.—Mat. 20:28.

14. Nyen la mo lingbi ti sara ti fa so mo ndoye azo ti congrégation ti mo?

¹⁴ Ngoi ti Dango bê na kuâ ti Christ ayeke mbeni nzoni ngoi ti tene mo mû tapande ti Jésus ti mû maboko na aita ti congrégation ti mo. Tongana mo sara tongaso, mo yeke bâ ande so ambeni zo ayeke tâ na bezoin ti mungo maboko. Peut-être ambeni ita so ayeke mbakoro ayeke na bezoin ti mungo maboko. Mo lingbi ti sara vizite na ala? Wala mo lingbi ti ga na ala mbeni ye ti tengo ni? Wala ti mû maboko na ala ti sara ambeni kua ti ala ti yanga-da, ti gue na ala na bungbi, wala ti fa tënë legeoko na ala? (Diko Luc 14:12-14.) A lingbi ndoye ti Nzapa apusu e ti fa ndoye ti e na mbage ti aita ti e.

15. Nyen la a lingbi e hinga?

¹⁵ Ota ni, a lingbi ndoye ti Nzapa apusu e ti pardonné aita ti e. Teti so e yeke amolenge ti Adam, e kue e wara siokpari na peko ti lo nga e yeke kui ndali ni. Zo oko alingbi ti tene pëpe: “Mbi yeke pëpe na bezoin  ti ngere so a futa ti zi na azo.” Même mbeni wakua ti Jéhovah so ayeke be-ta-zo na lo mingi ayeke na bezoin ti nzoni bê ti Jéhovah na lege ti Christ. A lingbi e kue e hinga so a zi mbeni kota bon na li ti e. Ngbanga ti nyen a yeke nzoni e hinga ni? Kiringo tënë ni ayeke na yâ ti mbeni toli ti Jésus.

16, 17. (a) Nyen la e lingbi ti manda na lege ti tapande ti gbia so apardonné kota bon ti ngbâa ti lo so? (b) Na peko ti so mo gbu li ti mo na ndo ti toli ti Jésus so, mo leke na bê ti mo ti sara nyen?

¹⁶ Jésus afa tongana nyen la mbeni gbia apardonné lani mbeni ngbâa ndali ti mbeni kota bon ti atalent 10000, wala denier 60000000. Ngbâa so ake ti pardonné kete bon ti lo so ayeke na li ti mba ti lo ngbâa so wungo ni ayeke gi denier 100. Ngonzo agbu gbia ni ngangu so lo mä so ngbâa so lo pardonné lo ake ti pardonné mba ti lo ngbâa. Lo tene: “Mo sioni ngbâa so, tongana mo voro yanga ti mo fade na mbi, mbi zi kuda na li ti mo kue. Mo nga kue, a lingbi mo sara fade nzoni bê na mba ti mo so, tongana ti so mbi kue mbi sara na mo fade so pëpe?” (Mat. 18:23-35). Nzoni bê so gbia ni asara na ngbâa so alingbi fade ti pusu lo ti pardonné mba ti lo ni. Legeoko nga, a lingbi ndoye ti Nzapa nga nzoni bê ti lo apusu e ti sara nyen?

¹⁷ Ngoi ti Dango bê na kuâ ti Christ ayeke pendere ngoi ti tene e bâ wala e ngbâ ti bata tënë na bê ti e na tere ti mbeni ita ti e. Tongana a yeke tongaso, a yeke pendere ngoi ti tene e sara ye tongana Jéhovah so ayeke ‘nduru ti pardonné zo.’ (Néh. 9:17; Ps. 86:5). Tongana e bâ na nene ni ye so Jéhovah asara ti zi kota bon na li ti e, e yeke duti nduru ti pardonné amba ti e na bê ti e kue. Tongana e ndoye amba ti e ape nga e pardonné ala ape, Jéhovah kue ayeke ndoye e ape nga lo yeke pardonné e ape (Mat. 6:14, 15). Atâa so pardon alingbi ti changé ye so asi lani ape, a lingbi ti sara si kekereke ti e aduti nzoni.

18. Tongana nyen la ndoye ti Nzapa amû maboko lani na mbeni ita-wali ti kanga bê na wokongo ti mbeni mba ti lo?

¹⁸ A lingbi ti duti ngangu na e ti “kanga bê” lâ na lâ na aita ti e. (Diko aColossien 3:13, 14; aÉphésien 4:32.) Na tapande, Lily mbeni ita-wali kumbamba amû maboko lani na mbeni womua so iri ti lo ayeke Carol. ^[1] Lily ague na lo na ando kue so lo ye ti gue dä, lo gue lo vo na lo aye so lo yeke na bezoin ni nga lo sara ambeni ye mingi na lo. Atâa aye kue so Lily asara, Carol ayeke kasa ndo mingi, na ambeni ngoi mungo maboko na lo ayeke ngangu. Me Lily abâ gi anzoni sarango ye ti lo. Lo ngbâ ti mû maboko na lo teti angu mingi juska na ngoi so tere ti lo ason ngangu na lo kui. Atâa so mungo maboko na Carol ayeke lani kete ye ape na Lily, Lily atene: “Mbi yeke ku kungo ti bâ Carol na ngoi ti zingongo akuâ. Mbi ye ti hinga lo na ngoi so lo yeke ga nzoni-kue.” Biani, ndoye ti Nzapa alingbi ti pusu e ti kanga bê na aita ti e nga ti ku kungo ngoi so a yeke zi ande siokpari na tere ti e biaku biaku.

19. ‘Matabisi so Nzapa amû ni senge senge, so a lingbi ti fa nda ni kue pëpe’ ayeke pusu mo ti sara nyen?

¹⁹ Jéhovah amû na e biani ‘matabisi so a lingbi ti fa nda ni kue pëpe.’ Zia e bâ ni lakue na nene ni. Ngoi ti Dango bê na kuâ ti Christ ayeke pendere ngoi ti gbu li na ndo ti ye kue so Jéhovah na Jésus asara ndali ti e. Zia ndoye ti ala apusu e ti mû tapande ti Jésus, ti fa ndoye ti e na aita ti e nga ti pardonné aita ti e na bê ti e kue.