1, 2. (a) Nanga sortu sani a kado di Gado gi wi abi fu du tu? (b) Sortu aksi wi o luku na ini na artikel disi?

A MORO bigi kado di Yehovah gi wi fu sori taki a lobi wi, na di a seni en fosi Manpikin kon na grontapu (Yoh. 3:16; 1 Yoh. 4:9, 10). Na apostel Paulus taki dati disi ben de „wan kado di bigi pasa marki” (2 Kor. 9:15). Fu san ede a taki so?

² Paulus ben sabi taki na ofrandi fu Krestes ben o de wan dyaranti taki Gado o du ala den moi sani di a pramisi. (Leisi 2 Korentesma 1:20.) Sobun, a kado fu Gado „di bigi pasa marki” a no na ofrandi fu Yesus nomo, ma a abi fu du tu nanga ala den bun sani di Yehovah o du gi wi na ini a ten di e kon èn nanga a lobi di a o sori wi. Iya, wortu no de fu taki o bigi a kado disi de. Fa a moi kado disi musu meki wi firi? Na sortu fasi a kado disi musu yepi wi fu sreka wisrefi gi a Memrefesa tapu dridewroko 23 maart 2016?

3, 4. (a) Fa yu e firi te wan sma e gi yu wan kado? (b) Te wan sma du wan bigi sani gi yu, dan fa dati kan kenki yu libi?

³ Te yu kisi wan kado, yu e breiti. Ma son kado warti so te taki den kan kenki wi heri libi. Fu eksempre, kon meki wi taki dati yu de na fesi krutu èn yu kisi dedestrafu fu di sma denki taki yu du wan ogri. Ma dan wan sma drape di yu no sabi e kon na fesi èn a e taki dati a o teki a strafu na en tapu. Fu taki en leti, a wani dede gi yu srefi! Fa yu ben o firi efu wan sma ben o du so wan bigi sani gi yu?

⁴ Te wan sma ben o sori so wan bigi lobi gi yu, dan yu ben o luku efu wan sani de di yu musu kenki na ini yu libi. Kande a sani disi ben o meki taki yu sori moro lobi gi trawan, taki yu e suku moro okasi fu gi sma sani noso srefi taki yu e gi ala sma pardon di du yu wan hati sani. Solanga yu de na libi, yu ben o firi taki yu de na paiman na a sma di ben wani dede gi yu.

5. Fu san ede wi kan taki dati a lusu-paiman di Gado gi wi bigi moro iniwan tra kado?

⁵ Ma a sani di Yehovah du gi yu nanga yepi fu Krestes, bigi moro a kado di wi kari na ini na eksempre (1 Petr. 3:18). Fu san ede wi kan taki disi? Wi alamala na sondusma èn dati meki wi kisi dedestrafu (Rom. 5:12). Ma fu di Yehovah lobi wi, meki a seti sani taki Yesus kon na grontapu fu „dede gi ala sma” (Hebr. 2:9). Ma boiti taki Yehovah kan kibri wi libi nownow kaba, a seti sani tu fu puru dede na pasi na ini a ten di e kon (Yes. 25:7, 8; 1 Kor. 15:22, 26). Ala sma di e bribi na ini Yesus, o kisi têgo libi na wan grontapu pe nowan problema no de èn pe den o de koloku. Den salfuwan o libi na hemel pe den nanga Krestes o tiri Gado Kownukondre (Rom. 6:23; Openb. 5:9, 10). Sortu tra blesi de tu na ini a bigi kado di Yehovah gi wi?

6. (a) Sortuwan fu den blesi fu Yehovah yu wani kisi? (b) Sortu dri sani a kado di Gado gi wi musu meki wi du?

⁶ Tra sani di Yehovah o du gi wi, na taki a o dresi ala siki, a o kenki a grontapu fu wi kon tron wan paradijs èn a o meki dedesma kon na libi (Yes. 33:24; 35:5, 6; Yoh. 5:28, 29). Wi abi bigi lobi gi Yehovah nanga en Manpikin, fu di den gi wi „wan kado di bigi pasa marki”. Ma toku wi musu aksi wisrefi san a lobi fu Yehovah musu meki wi du. Meki wi go luku fa a lobi fu Gado kan yepi wi (1) fu teki na eksempre fu Krestes Yesus, (2) fu sori lobi gi wi brada èn (3) fu gi trawan pardon nanga wi heri ati.

7, 8. Fa wi musu si a lobi di Krestes sori wi èn san dati musu meki wi du?

⁷ A fosi sani di wi musu du, na taki wi musu wani libi gi Krestes Yesus. Na apostel Paulus ben taki: ’A lobi fu Krestes e naki wi ati.’ (Leisi 2 Korentesma 5:14, 15.) Paulus ben kon si taki efu a lobi fu Krestes no naki wi ati, wi no o man libi leki fa a wani. Te wi kon frustan krin fa Yehovah sori lobi gi wi èn te a sani dati naki wi ati, dan dati o meki taki wi o wani libi gi Krestes Yesus. Fa wi o du dati?

⁸ Den sma di lobi Yehovah e meki muiti fu teki na eksempre fu Krestes. Dati meki den e waka soifri na en baka (1 Petr. 2:21; 1 Yoh. 2:6). Te wi e gi yesi na Gado, dan wi e sori taki wi lobi en èn taki wi lobi Krestes. Yesus ben taki: „Efu wan sma sabi den komando fu mi èn a e du san den e taki, dan a sma disi lobi mi. Sosrefi, mi Tata o lobi a sma di lobi mi,  mi o lobi en, èn mi o sori en krin suma na mi.”​—Yoh. 14:21; 1 Yoh. 5:3.

9. San a grontapu disi wani dwengi wi fu du?

⁹ Na a ten fu a Memrefesa, wi musu denki dipi fu a fasi fa wi e libi. Aksi yusrefi: ’Sortu sani mi e du kaba fu sori taki mi e teki na eksempre fu Krestes Yesus? Sortu sani mi musu du moro bun?’ A prenspari fu ondrosuku wisrefi na a fasi disi, fu di a grontapu disi wani dwengi wi fu du san den e du (Rom. 12:2). Efu wi no e luku bun, dan wi kan teki a denki abra fu den koniman fu grontapu di denki taki den sabi ala sani. Noso wi kan bigin denki srefi leki den pôpi singiman nanga sportman, noso leki den pôpi sma di e plèi na ini felem (Kol. 2:8; 1 Yoh. 2:15-17). Fa wi kan wai pasi gi den sortu sani dati?

10. Sortu sani wi kan aksi wisrefi na a ten fu a Memrefesa fu a yari disi èn san a piki tapu den aksi disi musu meki wi du? (Luku a prenki na a bigin fu na artikel.)

¹⁰ Na a ten fu a Memrefesa a bun fu luku efu den krosi fu wi, den felem, den poku, den sani di wi abi tapu wi computer, wi telefon nanga wi tablet bun gi wan Kresten. Te yu luku sortu krosi yu abi, aksi yusrefi: ’Efu mi ben o go na wan presi pe Yesus de, dan fa mi ben o firi efu mi ben o weri a krosi disi? Efu mi ben o weri a krosi disi, sma ben o si taki mi na wan bakaman fu Krestes Yesus?’ (Leisi 1 Timoteyus 2:9, 10.) Te a abi fu du nanga den felem noso den poku fu wi, dan aksi yusrefi: ’Yesus ben o lobi a felem noso a poku disi? Efu mi ben o leni en mi cel noso mi tablet, mi ben o syen fu den sani di a o si na en tapu?’ Efu yu ben o luku den video game di yu abi, aksi yusrefi: ’A ben o muilek fu fruteri Yesus fu san ede mi lobi plèi a game disi?’ Te wi lobi Yehovah, dan dati musu yepi wi fu trowe ala sani di no fiti gi wan Kresten, awinsi omeni moni wi pai fu en (Tori 19:19, 20). Di wi gi wisrefi abra na Gado, wi pramisi en taki wi no ben o libi moro gi wisrefi, ma gi Krestes. Dati meki wi no musu abi nowan sani di kan tapu wi fu teki na eksempre fu Krestes.​—Mat. 5:29, 30; Fil. 4:8.

11. (a) Te wi lobi Yehovah nanga Yesus, dan fa wi o du a preikiwroko? (b) Te wi abi lobi, dan fa dati o meki taki wi yepi trawan na ini a gemeente?

¹¹ A lobi di wi abi gi Yesus e meki tu taki wi e wroko fayafaya te wi e preiki èn e meki disipel (Mat. 28:19, 20; Luk. 4:43). Na a ten fu a Memrefesa wi abi na okasi fu wroko 30 noso 50 yuru leki yepi-pionier na ini a preikiwroko. Yu man seti sani fu du dati? Wan owru brada fu 84 yari di no abi wefi moro, ben denki taki a no ben o man dini leki yepi-pionier fu di a owru èn fu di a no abi wan bun gosontu. Ma den pionier na ini a birti fu en ben wani yepi en. Den ben e go teki en nanga wagi èn den ben e luku sortu kontren ben bun gi en fu wroko. Na so a ben man preiki 30 yuru leki yepi-pionier. Yu kan yepi wan sma na ini yu gemeente so taki a kan dini leki yepi-pionier na a ten fu a Memrefesa? A tru taki a no ala sma man dini leki yepi-pionier. Ma toku wi alamala kan gebroiki wi ten nanga wi krakti fu du moro gi Yehovah na ini a preikiwroko. Te wi e du dati, dan wi e sori taki neleki Paulus, wi abi lobi gi Krestes. Sortu tra sani a lobi fu Gado o yepi fu du?

12. San a lobi fu Gado o yepi wi fu du?

¹² A di fu tu sani, na taki a lobi fu  Gado o meki taki wi lobi wi brada nanga sisa. Na apostel Yohanes ben frustan disi tu. Dati meki a skrifi: „Un lobiwan, efu disi na fa Gado lobi wi, dan wisrefi de fruplekti fu lobi makandra tu” (1 Yoh. 4:7-11). Iya, efu wi wani taki Gado lobi wi, dan wi musu lobi wi brada nanga sisa (1 Yoh. 3:16). San wi kan du fu sori taki wi lobi wi brada nanga sisa?

13. Fa Yesus sori taki a lobi sma?

¹³ Luku na eksempre fu Yesus. Di a ben e du a diniwroko fu en na grontapu, a ben e poti prakseri spesrutu na den mofinawan. A ben e yepi den lanwan, den breniwan, den dofusma nanga den sma di no ben man taki (Mat. 11:4, 5). Yesus ben lobi fu preiki gi den sma di ben wani kon sabi Gado. Den Dyu kerki fesiman ben e si den sortu sma disi leki „frufruktu sma” (Yoh. 7:49). Ma Yesus ben lobi den sma disi èn a ben e du ala muiti fu preiki gi den.​—Mat. 20:28.

14. San yu kan du fu sori taki yu lobi yu brada nanga sisa?

¹⁴ Na a ten fu a Memrefesa yu abi okasi fu sori taki yu e teki na eksempre fu Yesus. Yu kan luku sortu brada noso sisa na ini yu gemeente abi yepi fanowdu. Te yu du dati, dan seiker yu o si wan sma di yu kan yepi. Kande na wan owru brada noso sisa. Yu kan go luku den lobiwan disi? Yu kan tyari wan nyanyan gi den? Kande yu kan yepi den nanga osowroko, noso yu kan go teki den nanga wagi tyari go na konmakandra. Noso kande yu kan aksi den fu wroko makandra nanga yu na ini a preikiwroko. (Leisi Lukas 14:12-14.) A lobi di Gado sori wi, musu meki taki wi lobi wi brada nanga sisa.

15. San wi musu frustan?

¹⁵ A di fu dri sani, na taki a lobi di Yehovah sori wi musu meki taki wi gi den brada nanga sisa fu wi pardon. Fu di wi na bakapikin fu a fosi man Adam, meki wi alamala kisi sondu èn a paiman fu dati na dede. Nowan fu wi kan taki: „Mi no abi a lusu-paiman fanowdu.” Srefi den reti-ati futuboi fu Gado di ala ten ben e du san a taki abi a lusu-paiman  fanowdu. Wi alamala musu frustan taki Gado pai wan bigi paiman gi wi. Fu san ede a prenspari fu frustan dati? Wi e feni a piki na ini wan agersitori fu Yesus.

16, 17. (a) San wi e leri fu na agersitori di Yesus fruteri fu a srafu di ben musu pai a kownu wan bigi moni? (b) Baka di yu denki dipi fu na agersitori fu Yesus, dan san yu wani du?

¹⁶ Yesus fruteri wan agersitori fu wan srafu di ben musu pai wan kownu 10.000 talenti. Dati na sowan 60.000.000 denari. Ma fu di a no ben man pai a moni, meki a kownu taigi en taki a no abi fu pai en moro. Ma bakaten a srefi srafu disi no ben wani sori sari-ati gi wan tra srafu di ben musu pai en 100 denari nomo. Di a kownu yere taki a srafu disi no ben sori sari-ati gi a tra srafu, dan a taki: „Yu takru srafu yu. Fu di yu begi mi so, meki mi taki dati yu no ben abi fu pai mi noti moro. Dan yu no ben musu abi sari-ati nanga a tra srafu tu, neleki fa mi ben abi sari-ati nanga yu?” (Mat. 18:23-35, futuwortu) Iya, fu di a kownu ben sori so furu sari-ati gi a srafu disi, meki a srafu ben musu sori sari-ati tu gi a trawan. Te wi e luku a tori disi, dan san wi musu du fu di Yehovah sori lobi nanga sari-ati gi wi?

¹⁷ A ten fu a Memrefesa na wan moi okasi tu fu luku efu wi e hori wan brada noso sisa na ati. Efu dati de so, dan a ben o de wan moi sani fu teki na eksempre fu Yehovah di „de klariklari fu gi sma pardon” (Neh. 9:17; Ps. 86:5). Te wi e warderi en taki Yehovah e gi wi pardon aladi wi e sondu ibri dei, dan wi o gi wi brada nanga sisa pardon tu nanga wi heri ati. Efu wi no e sori lobi gi wi brada nanga sisa èn efu wi no e gi den pardon, dan Gado no o sori lobi gi wi èn a no o gi wi pardon tu (Mat. 6:14, 15). Te wi e gi trawan pardon, dan dati no wani taki dati a sani di den du no hati wi. Ma fu di wi gi den pardon, meki wi de koloku.

18. Fa a lobi fu Gado yepi wan sisa fu tan frudrage wan tra sisa?

¹⁸ Gi furu fu wi, a no makriki fu „frudrage” wi brada nanga sisa ibri dei. (Leisi Kolosesma 3:13, 14; Efeisesma 4:32.) Fu eksempre, Lily, wan sisa di no trow ben de klariklari fu yepi Carol, wan sisa di masra dede kaba. Te Carol [1] ben wani go na wan presi, dan Lily ben e go teki en nanga wagi, a ben e yepi en fu go bai sani èn a ben e du tra bun sani gi en. Awinsi o furu bun sani Lily ben e du, toku Carol ben e krutukrutu ibri leisi èn a ben krakeri. Ma Lily ben e poti prakseri na den bun fasi fu Carol. A tan yepi en omeni yari langa teleki Carol kon siki seryusu èn a dede. Lily e taki: „Ma toku mi e wakti a ten te Carol o kisi wan opobaka. Mi wani sabi fa Carol o de te a no de wan sondusma moro.” Iya, a lobi fu Gado kan yepi wi fu tan frudrage wi brada nanga sisa èn fu wakti a ten te libisma no o abi sondu moro.

19. San a bigi kado di Gado gi yu o meki yu du?

¹⁹ Soleki fa wi si, dan Yehovah gi wi wan „kado di bigi pasa marki”. Meki wi tan warderi a kado disi ala ten. Ma spesrutu na a ten fu a Memrefesa wi musu denki dipi fu ala sani di Yehovah nanga Yesus du gi wi. Meki a lobi fu den yepi wi fu teki na eksempre fu Yesus, fu sori moro lobi gi wi brada nanga sisa èn fu gi den pardon nanga wi heri ati.