1, 2. (a) Maromak nia “prezente boot liu” inklui mós saida? (b) Iha lisaun neʼe ita sei koʼalia kona-ba pergunta saida deʼit?

JEOVÁ fó mai ita prezente domin neʼebé boot liu hotu bainhira nia haruka ninia Oan-Mane mesak Jesus mai iha rai. (João 3:16; 1 João 4:9, 10) Apóstolu Paulo bolu prezente neʼe nuʼudar Maromak nia “prezente boot liu”. (2 Korinto 9:15) Tanbasá mak Paulo hatete hanesan neʼe?

² Apóstolu Paulo hatene katak liuhusi Jesus nia sakrifísiu neʼe mak Maromak fó garantia katak ninia promesa hotu sei sai loos. (Lee 2 Korinto 1:20.) Tan neʼe, “prezente boot liu” inklui mós Jesus nia sakrifísiu, Jeová nia laran-diʼak hotu no ninia domin neʼebé ho laran-metin neʼebé nia hatudu mai ita. Se atu esplika didiʼak kona-ba prezente furak neʼe, karik ita ema sala-naʼin nia kakutak la bele komprende hotu, tanba signifika ba prezente neʼe kleʼan tebes. Ita tenkesér sente oinsá kona-ba prezente neʼe? No oinsá mak prezente neʼe bele book ita atu prepara ba komemorasaun kona-ba Kristu nia mate iha loron Kuarta, 23 Marsu 2016?

3, 4. (a) Bainhira ema fó prezente ba Ita, Ita sente oinsá? (b) Oinsá mak prezente espesiál ida bele troka ita-nia moris tomak?

³ Bainhira ita simu prezente ida, ita-nia laran sente kontente tebes, loos ka lae? Maibé, dala ruma prezente ida bele iha signifika espesiál ba ita, no neʼe bele troka ita-nia moris tomak. Porezemplu, imajina toʼok se Ita mak hein hela ema atu fó kastigu-mate ba Ita tanba Ita envolve iha atividade krime ruma. Maibé, derrepente iha ema ida neʼebé Ita la koñese mosu mai, no nia dehan katak nia mak sei troka Ita atu simu kastigu-mate neʼe. Nia hakarak fó ninia an ba mate tanba Ita. Hanoin toʼok Ita sente oinsá kona-ba prezente neʼebé ema neʼe atu fó ba Ita?

⁴ Simu prezente hanesan neʼe bele book ita atu troka ita-nia hahalok no halo mudansa ba dalan neʼebé ita halaʼo ita-nia moris. Karik neʼe mós sei book ita atu hatudu laran-luak liután ba ema seluk, no fó perdua ema bainhira sira halo sala kontra ita. Iha ita-nia moris tomak ita sei sente debe hela ba ema neʼebé mate ba ita.

5. Oinsá mak Maromak nia prezente kona-ba Jesus nia sakrifísiu boot liu fali prezente hotu?

⁵ Maibé prezente neʼebé Jeová fó liuhusi Jesus, boot liu fali prezente neʼebé temi iha leten. (1 Pedro 3:18) Tanbasá? Hanoin toʼok, ita hotu ema sala-naʼin, no ita hotu sei simu kastigu-mate. (Roma 5:12) Maibé tanba domin mak Jeová haruka Jesus mai toʼo iha rai atu “koko mate ba ema hotu”. (Ebreu 2:9) Liuhusi arranju neʼe mak Jeová sei salva ita-nia moris no nia mós sei halakon mate ba nafatin iha futuru. (Isaías [Yesaya] 25:7, 8; 1 Korinto 15:22, 26) Ema hotu neʼebé tau fiar ba Jesus sei moris iha dame no solok ba nafatin iha rai. No ema kose-mina sira sei simu liman-rohan atu ukun hamutuk ho Jesus iha lalehan. (Roma 6:23; Apokalipse 5:9, 10) Jeová nia prezente furak mós inklui saida tan?

6. (a) Ita hakarak liu atu simu bensaun saida husi Maromak iha futuru? (b) Maromak nia prezente book ita atu halo buat tolu saida?

⁶ Liuhusi Jeová nia prezente neʼe, nia sei halakon moras hotu husi mundu neʼe, mundu tomak sei sai paraízu ida, no ema neʼebé mate ona sei hetan moris-hiʼas fali. (Isaías [Yesaya] 33:24; 35:5, 6; João 5:28, 29) Ita hadomi duni Jeová no Jesus tanba fó ita “prezente boot liu” neʼe. Maibé, Maromak nia domin neʼe book ita atu halo saida? Domin neʼe book ita atu halo buat tolu, (1) laʼo tuir Jesus nia ain-fatin ho didiʼak, (2) hadomi ita-nia irmaun-irmán sira, no (3) perdua ema seluk husi laran.

7, 8. Ita tenkesér sente oinsá kona-ba Jesus nia domin, no domin neʼe book ita atu halo saida?

⁷ Primeiru, domin tenkesér book ita atu moris tuir Jesus Kristu. Hodi nuneʼe mak apóstolu Paulo hatete katak: “Kristu nia domin book ami makaʼas.” (Lee 2 Korinto 5:14, 15.) Paulo rekoñese katak se ita simu Kristu nia domin, domin neʼe sei book ita atu hadomi no hatudu respeitu ba Jesus. Loos duni, bainhira ita komprende didiʼak saida mak Jeová halo ona mai ita, ninia domin neʼe sei book ita atu fó ita-nia laran tomak atu moris tuir Jesus Kristu. Oinsá mak ita bele halo nuneʼe?

⁸ Domin ba Jeová mak book ita atu banati-tuir Jesus nia ezemplu, no laʼo tuir ninia ain-fatin ho didiʼak. (1 Pedro 2:21; 1 João 2:6) Bainhira ita halo tuir Jeová no Jesus, ita hatudu katak ita mós hadomi sira. Tan neʼe mak Jesus hatete: “Ema neʼebé hatene haʼu-nia ukun-fuan no halo tuir sira, ema neʼe mak hadomi haʼu. No ema  neʼebé hadomi haʼu, haʼu-nia Aman mós sei hadomi nia, no haʼu sei hadomi nia, no haʼu sei halo nia hatene didiʼak kona-ba haʼu.”—João 14:21; 1 João 5:3.

9. Ita hetan tentasaun saida deʼit?

⁹ Iha tempu Memoriál, diʼak atu haree didiʼak fali ba dalan neʼebé ita halaʼo ita-nia moris. Husu ba ita-nia an: ‘Iha dalan saida mak haʼu halo tuir ona Jesus? Haʼu bele halo tan mudansa saida ba haʼu-nia moris?’ Diʼak atu husu beibeik hanesan neʼe ba ita-nia an tanba mundu neʼe sempre lori tentasaun ba ita-nia moris. (Roma 12:2) Se ita la kuidadu, karik ita mós bele moris tuir ema neʼebé hanorin filozofia, artista, ka desportu-naʼin sira-nia moris. (Koloso 2:8; 1 João 2:15-17) Oinsá mak ita bele kontra hasoru tentasaun sira-neʼe?

10. Ita bele husu ba ita-nia an pergunta saida deʼit iha tempu Memoriál, no halo hanesan neʼe bele book ita atu halo saida? (Haree dezeñu iha pájina 12.)

¹⁰ Ita bele uza tempu Memoriál neʼe atu haree didiʼak toʼok ita-nia almari laran, filme ka múzika sira neʼebé ita iha, no karik programa sira neʼebé ita hatama iha komputadór, telemovel, no tablet sira. Bainhira ita loke ita-nia almari, husu ba ita-nia an: ‘Se haʼu mak hatais roupa neʼe atu bá fatin neʼebé Jesus mós atu bá, haʼu sei sente an ka lae atu hatais roupa neʼe iha Jesus nia oin?’ (Lee 1 Timóteo 2:9, 10.) ‘Se haʼu mak hatais roupa neʼe, neʼe bele halo ema seluk koñese kedas katak haʼu mak ema kristaun ida ka lae?’ Ita mós bele husu pergunta hanesan neʼe kona-ba filme ka múzika neʼebé ita iha. Porezemplu, ‘Jesus gosta haree filme ka rona ba múzika hanesan neʼe ka lae? Se nia mak empresta haʼu-nia telemovel ka tablet, haʼu sei sente moe ka lae se nia haree ba programa ka foto balu neʼebé haʼu hatama iha laran?’ Kona-ba vídeo game, husu ba ita-nia an: ‘Haʼu sente susar ka lae, atu esplika ba Jesus tanbasá haʼu gosta halimar game balu?’ Domin ba Jeová tenkesér book ita atu soe hotu buat neʼebé mak ladiʼak ba ema kristaun, maski karun mós ita tenke soe. (Apóstolu 19:19, 20) Iha tempu neʼebé ita halo ita-nia dedikasaun, ita promete katak ita sei la moris tuir tan ita rasik nia hakarak, maibé moris deʼit ba Jesus. Tan neʼe ita lakohi atu kaer metin ba buat sira neʼebé mak bele hanetik ita atu laʼo tuir Jesus nia ain-fatin ho didiʼak.—Mateus 5:29, 30; Filipe 4:8.

11. (a) Oinsá mak domin ba Jeová no Jesus bele book ita iha dalan haklaken nian? (b) Iha dalan saida mak domin bele book ita atu ajuda ema seluk husi ita rasik nia kongregasaun?

¹¹ Ita-nia domin ba Jesus mós bele book ita atu haklaken no hanorin ema kona-ba Bíblia ho laran. (Mateus 28:19, 20; Lucas 4:43) Iha tempu Memoriál, ita iha oportunidade atu bele hili foti pioneiru estra ho oras 30 ka 50. Ita bele halo nuneʼe ka lae? Irmaun faluk ida idade ona, nia tinan 84. Nia sente kusta atu foti pioneiru estra tanba ninia idade no saúde ladún diʼak. Maibé pioneiru barak hakarak ajuda nia. Sira lori karreta bá tula nia no sira hili fatin haklaken neʼebé fasil ba nia atu haklaken, tan neʼe nia kumpre duni ninia pioneiru estra ho oras 30. Ita mós bele halo tuir ezemplu neʼe ka lae atu ajuda ema seluk iha ita rasik nia kongregasaun atu foti pioneiru estra iha tempu Memoriál nian? Dala ruma laʼós ita hotu bele foti pioneiru estra. Maski nuneʼe, ita hakarak hakaʼas an nafatin atu uza ita-nia tempu no forsa tomak hodi halo sakrifísiu barak liután atu hahiʼi Jeová. Se ita halo nuneʼe, ita hatudu duni katak ita mós hanesan Paulo neʼebé halo buat hotu tanba hadomi Jesus.  Maromak nia domin bele book ita atu halo saida tan?

12. Maromak nia domin book ita atu halo saida?

¹² Segundu, Maromak nia domin tenkesér book ita atu hatudu domin ba malu. Apóstolu João hatete katak: “Maluk doben sira, se Maromak hadomi ita iha dalan neʼe, entaun ita mós tenke hadomi malu.” (1 João 4:7-11) Loos duni, ita la bele simu Maromak nia domin se ita la rekoñese katak ita mós iha obrigasaun atu hadomi ita-nia irmaun-irmán sira. (1 João 3:16) Iha dalan saida mak ita bele hatudu domin ba malu?

13. Jesus hatudu ezemplu saida kona-ba hadomi ema seluk?

¹³ Haree toʼok kona-ba Jesus nia ezemplu. Bainhira nia haklaken, nia fó atensaun tebes ba ema haraik-an. Nia mós kura ema ho moras oioin, hanesan ain-kudeʼik, matan-delek, tilun-diuk, no monok. (Mateus 11:4, 5) Jesus la hanesan ho ulun-naʼin relijiaun sira, nia gosta tebes hanorin ema seluk kona-ba Maromak. (João 7:49) Nia hadomi tebes ema neʼebé haraik-an no nia mós hakaʼas an tebes hodi ajuda sira.—Mateus 20:28.

14. Saida mak ita bele halo atu hatudu domin ba ita-nia irmaun-irmán sira?

¹⁴ Tempu Memoriál mak tempu neʼebé diʼak ba ita atu banati-tuir Jesus, tanba neʼe fó oportunidade ba ita atu haree oinsá mak ita bele ajuda irmaun-irmán sira husi ita rasik nia kongregasaun, liuliu sira neʼebé idade ona. Ita bele bá vizita sira ka lae? Ita bele lori hahán ruma ba fahe ho sira ka lae? Ita bele ba ajuda sira ho serbisu uma laran nian ka lae? Ita bele tula sira bá tuir reuniaun ka lae? Ita bele konvida sira atu bá haklaken hamutuk ho ita ka lae? (Lee Lucas 14:12-14.) Ita tenkesér husik Maromak nia domin atu book ita hatudu domin ba ita-nia irmaun-irmán iha dalan sira-neʼe.

15. Ita tenkesér rekoñese kona-ba saida?

¹⁵ Terseiru, Jeová nia domin tenkesér book ita atu fó perdua ba ita-nia irmaun-irmán sira. Ita hotu mai husi Adão, ita hotu sala-naʼin, ita hotu bele mate. Tan neʼe mak laiha ema ida mak bele dehan, “Haʼu la presiza Jesus nia sakrifísiu.” Maski ema ida laran-metin tebes ba Jeová mós ninia moris depende nafatin ba Jesus nia sakrifísiu neʼe. Ita ida-idak tenke  rekoñese katak Maromak fó tiha ona perdua boot ida ba ita-nia sala. Tanbasá mak neʼe importante? Mai ita haree Jesus nia ai-knanoik ida.

16, 17. Saida mak ita bele aprende husi Jesus nia ai-knanoik?

¹⁶ Jesus konta ai-knanoik kona-ba liurai ida neʼebé fó perdua boot ba ninia atan neʼebé debe hela nia osan denáriu 60.000.000. Iha atan ida seluk debe fali husi atan neʼe osan denáriu 100, maibé atan neʼe lakohi fó perdua ba atan ida seluk, maski debe neʼe laʼós debe boot. No bainhira liurai neʼe hatene kona-ba ninia atan nia hahalok, nia hirus tebes, tanba atan neʼe laran aat lakohi fó perdua ba ema seluk. Liurai neʼe dehan ba nia: “Atan aat, haʼu halo ó livre husi ó-nia debe hotu kuandu ó husu ba haʼu. Entaun, tansá ó la hatudu laran-sadiʼa ba ó-nia maluk, hanesan haʼu hatudu ona laran-sadiʼa ba ó?” (Mateus 18:23-35, nota-rodapé.) Loos duni, atan neʼe tenkesér duni fó perdua ba atan ida seluk, tanba ninia liurai hatudu ona laran-sadiʼa boot ida ba nia. Hanesan neʼe Jeová mós fó ona perdua ba ita. Entaun, Jeová nia domin no laran-sadiʼa bele book ita atu halo saida?

¹⁷ Ita bele aproveita tempu Memoriál sai oportunidade ba ita atu haree toʼok ita rai hela odi ba ita-nia irmaun-irmán ka lae. Se ita iha, entaun neʼe mak tempu neʼebé diʼak tebes atu banati-tuir Jeová nia hahalok neʼebé “prontu atu fó perdua”. (Neemias 9:17; Salmo [Mazmur] 86:5) Se ita mak hafolin buat neʼebé Jeová halo hodi hamoos ita-nia tusan, ita mós hakarak fó perdua ba ema seluk husi laran. Tanba se ita mak la fó perdua ba ema seluk, ita mós la bele simu domin no hetan perdua husi Jeová. (Mateus 6:14, 15) Maski ita fó ona perdua, neʼe la dehan katak buat neʼebé ema halo ba ita hanesan buat ida neʼebé nunka akontese. Karik ita sei sente kanek, maibé fó perdua bele halo ita sente kontente.

18. Oinsá mak Maromak nia domin book irmán ida hatudu pasiénsia ba irmán neʼebé susar atu tahan?

¹⁸ Ba ita balu, karik susar atu bele “hatudu pasiénsia” ba irmaun-irmán loroloron. (Lee Koloso 3:13, 14; Éfeso 4:32.) Porezemplu, iha irmán klosan ida naran Lily. Ho laran-diʼak, nia gosta ajuda irmán faluk ida naran Carol. ^[1] (Haree nota husi lisaun.) Lily mak tula Carol bá-mai, ajuda hola ninia sasán, no halo tan buat seluk ba Carol. Maski nuneʼe, Carol sempre muramura nafatin, no dala ruma susar atu tahan ho ninia hahalok sira. Maibé Lily la fokus ba buat sira neʼebé Carol halo, nia tau fokus deʼit ba Carol nia hahalok diʼak hodi tau matan nafatin ba nia toʼo Carol mate. Maski susar atu tahan Carol, maibé Lily hatete: “Haʼu hein ba mundu foun atu haree Carol neʼebé perfeitu bainhira nia hetan fali moris-hiʼas.” Loos duni, Maromak nia domin bele book ita atu hatudu pasiénsia ba ita-nia irmaun-irmán sira, no book mós ita atu hein ba mundu foun bainhira ema hotu sai perfeitu fali.

19. Jeová nia “prezente boot liu” book ita atu halo saida?

¹⁹ Jeová fó duni “prezente boot liu” ida ba ita. Ita tenke hafolin didiʼak prezente neʼe. Liuliu iha tempu Memoriál, ita hakarak hanoin didiʼak saida mak Jeová no Jesus halo ona ba ita. Mai ita hotu husik Jeová nia domin atu book ita laʼo tuir Jesus nia ain-fatin ho didiʼak, hatudu domin ba ita-nia irmaun-irmán, no fó perdua ba sira ho laran.