1, 2. (a) Ano an nahiuupod han kanan Dios “maopay gud nga regalo nga waray bayad”? (b) Ano nga mga pakiana an aton hihisgotan hini nga artikulo?

HAN ginsugo ni Jehova an iya bugtong nga Anak nganhi ha tuna, Iya iginhatag an pinakadaku nga regalo nga nagpapakita han gugma! (Juan 3:16; 1 Juan 4:9, 10) Gintawag ito ni apostol Pablo nga an kanan Dios “maopay gud nga regalo nga waray bayad.” (2 Cor. 9:15) Kay ano nga gin-gamit niya ito nga mga pulong?

² Maaram hi Pablo nga an halad han Kristo garantiya nga matutuman an ngatanan nga makalilipay hinduro nga mga saad han Dios. (Basaha an 2 Corinto 1:20.) Salit, inin “maopay gud nga regalo nga waray bayad” nag-uupod han ngatanan nga pagkamaopay ngan maunungon nga gugma nga ipapakita ni Jehova ha aton pinaagi kan Jesus. Oo, makatirigamnan gud ito nga regalo nga tungod hini waray pulong nga bug-os nga makakaghulagway hito. Paonan-o sadang makaapekto ha aton an pakakarawat hinin espesyal gud nga regalo? Ngan paonan-o sadang magpagios ha aton ini nga regalo ha pagpangandam ha pagsaurog han Memoryal  han kamatayon han Kristo ha Mierkoles, Marso 23, 2016?

3, 4. (a) Ano an imo inaabat kon may naghahatag ha imo hin regalo? (b) Paonan-o an usa nga espesyal nga regalo mahimo makagbag-o han imo kinabuhi?

³ Kon gintagan ka hin regalo, sigurado nga malilipay ka gud. Pero may mga regalo nga espesyal o mapulsanon gud nga mahimo pa ngani makagbag-o han kinabuhi. Pananglitan, handurawa nga ginsentensyahan ka hin kamatayon tungod han imo nahimo nga krimen. Pero tigda nga may nagboluntaryo pagkarawat han sentensya nga para ha imo. Andam gud hiya mamatay para ha imo! Ano an imo aabaton ha sugad nga espesyal nga regalo?

⁴ Ito nga nagsasakripisyo nga gugma sigurado nga magpapagios ha imo nga hunahunaon an imo mga ginbubuhat ngan bag-uhon pa ngani an imo pagkinabuhi. Posible nga magpagios ito ha imo nga mas magin mahinatagon, mahigugmaon, ngan magin mapinasayloon pa ngani ha mga nakasala ha imo. Ha bug-os mo nga kinabuhi, magigin mapasalamaton ka gud hito nga tawo nga nagsakripisyo para ha imo.

5. Kay ano nga an regalo han Dios nga lukat mas labaw gud ha bisan ano nga regalo?

⁵ Pero an regalo nga iginhatag ni Jehova pinaagi han Kristo mas labaw gud ha regalo nga iginsaysay ha ilustrasyon. (1 Ped. 3:18) Kay ano? Kay kita ngatanan naatubang ha sentensya nga kamatayon tungod han aton napanunod nga sala. (Roma 5:12) Pero tungod han gugma, ginsugo ni Jehova hi Jesus nganhi ha tuna basi ‘maeksperyensyahan niya an kamatayon para ha ngatanan.’ (Heb. 2:9) Diri la kay naghatag hi Jehova ha aton hin katalwasan yana, kondi naghatag liwat hiya han basihan nga wad-on ha kadayonan an kamatayon. (Isa. 25:7, 8; 1 Cor. 15:22, 26) An ngatanan nga natoo kan Jesus magkakaada mamurayawon ngan malipayon nga kinabuhi ha waray kataposan, sugad nga mga hadi kaupod han Kristo ha langit o sugad nga mga sakop han Ginhadian han Dios ha tuna. (Roma 6:23; Pah. 5:9, 10) Ano an iba pa nga nahiuupod hini nga regalo ni Jehova?

6. (a) Ano nga mga bendisyon han regalo ni Jehova an imo ginpapamulat? (b) Pag-unabi hin tulo nga butang nga mapapagios kita nga buhaton tungod han regalo han Dios.

⁶ An regalo ni Jehova nag-uupod han pagtambal han ngatanan naton nga sakit, paghimo han tuna nga paraiso, ngan pagbanhaw ha mga patay. (Isa. 33:24; 35:5, 6; Juan 5:28, 29) Sigurado nga hinigugma naton hi Jehova ngan an iya pinaura nga Anak tungod ha paghatag ha aton hinin “maopay gud nga regalo nga waray bayad.” Pero an pakiana, An gugma han Dios magpapagios ha aton nga buhaton an ano? Aton hisgotan kon paonan-o an gugma han Dios nagpapagios ha aton nga (1) sundon hin maopay an mga pitad ni Kristo Jesus, (2) ipakita an aton gugma ha kabugtoan, ngan (3) kinasingkasing nga magpasaylo.

7, 8. Ano an sadang magin epekto ha aton han gugma han Kristo, ngan mapapagios kita hito nga buhaton an ano?

⁷ Siyahan, sadang kita mapagios nga gamiton an aton kinabuhi para kan Kristo Jesus. Hi apostol Pablo nagsiring: “An gugma han Kristo nag-aaghat ha amon.” (Basaha an 2 Corinto 5:14, 15.) Nasantop ni Pablo nga diri naton makakarawat an daku nga gugma han Kristo kon diri kita maaaghat, o mapapagios nga magkinabuhi para ha Iya. Kon bug-os nga nasasabtan naton an ginbubuhat ni Jehova para ha aton ngan kon napapagios kita tungod han iya gugma, maruruyag gud kita nga gamiton an aton bug-os nga kinabuhi para kan Kristo Jesus. Paonan-o naton ito maipapakita?

⁸ Adton nahigugma kan Jehova napapagios  nga subaron an Kristo pinaagi ha pagsunod hin maopay han iya mga pitad. (1 Ped. 2:21; 1 Juan 2:6) Pinaagi han aton pagkamasinugtanon, iginpapakita naton nga hinigugma naton an Dios ngan an Kristo. Hi Jesus nagsiring: “An nakarawat han akon mga sugo ngan nagtutuman hito, nahigugma ha akon. An nahigugma ha akon hihigugmaon liwat han akon Amay, ngan akon hiya hihigugmaon ngan ipapakilala ko ha iya an akon kalugaringon.”—Juan 14:21; 1 Juan 5:3.

9. Ano nga mga impluwensya an kinahanglan naton atohan?

⁹ Ha panahon han Memoryal, maopay nga pamalandungon naton kon paonan-o naton ginagamit an aton kinabuhi. Pakianhi an imo kalugaringon: ‘Ano nga mga bahin ha akon pagkinabuhi an nagpapakita nga ginsusubad ko gud hi Kristo Jesus? Ano pa nga mga bahin an mahimo ko pauswagon?’ Importante gud ini nga pag-usisa ha kalugaringon kay padayon kita nga gin-iimpluwensyahan nga sundon an mga paagi hini nga kalibotan. (Roma 12:2) Kon diri kita magbabantay, mahimo kita magin disipulo han mga pilosopo o mga artista ngan mga sikat ha isport. (Col. 2:8; 1 Juan 2:15-17) Paonan-o naton maaatohan ito nga mga impluwensya?

10. Ano an mahimo naton ipakiana ha aton kalugaringon ha panahon han Memoryal, ngan an aton mga baton mahimo magpagios ha aton nga buhaton an ano? (Kitaa an retrato ha tinikangan hini nga artikulo.)

¹⁰ An panahon han Memoryal maopay nga higayon nga usisahon naton an aton mga bado ha kabinet, mga koleksyon hin pelikula, pati an mga file ha kompyuter, celfon, ngan tablet. Samtang gin-uusisa mo an imo mga bado, pakianhi an imo kalugaringon: ‘Kon makadto ako ha usa nga lugar nga aadto liwat hi Jesus, maaawod ba ako tungod hini nga bado?’ (Basaha an 1 Timoteo 2:9, 10.) ‘Kon isusul-ot ko ini, makikilala ba ako nga sumurunod ni Kristo Jesus?’ Mahimo liwat naton gamiton an sugad nga mga pakiana ha aton ginpili nga mga pelikula ngan musika. ‘Malilipay daw la hi Jesus pagkita hini nga pelikula o pagpamati hini nga musika? Kon huhuramon niya an akon celfon o tablet, maaawod daw la ako ha iya makikita dida hito?’ May kalabotan ha video game, pakianhi an imo kalugaringon: ‘Diri ba ako makukurian pagsaysay kan Jesus kon kay ano nga nalilipay ako pag-inuyag hini?’ An aton gugma kan Jehova sadang magpagios ha aton nga wad-on an bisan ano nga diri angayan ha usa nga disipulo han Kristo, anoman an nahiuupod hito. (Buh. 19:19, 20) Han nagdedikar kita kan Jehova, nagsaad kita nga diri na kita magkikinabuhi para ha aton kalugaringon kondi para na han Kristo. Salit diri naton sadang tipigan an bisan ano nga makakaulang ha aton ha pagsunod hin maopay ha mga pitad han Kristo.—Mat. 5:29, 30; Fil. 4:8.

11. (a) Paonan-o an aton gugma kan Jehova ngan kan Jesus nagpapagios ha aton nga magsangyaw? (b) Paonan-o an aton gugma mahimo magpagios ha aton nga buligan an iba ha kongregasyon?

¹¹ An aton gugma kan Jesus nagpapagios liwat ha aton nga bug-os nga makigbahin ha pagsangyaw ngan paghimo hin disipulo. (Mat. 28:19, 20; Luc. 4:43) Ha panahon han Memoryal may-ada kita higayon nga mag-auxiliary payunir ngan abuton an 30 o 50 ka oras ha ministeryo. Maipapahiuyon mo ba an imo kahimtang basi mahimo ito? Inabat han usa nga 84 anyos nga balo nga diri hiya makakagpayunir tungod han iya edad ngan maluya nga kahimsog. Pero nagkaurosa an mga payunir ha iya kongregasyon nga buligan hiya. Nagtagana hira hin transportasyon para ha iya ngan nagpili hin angayan nga teritoryo nga puydi niya sangyawan basi maabot an iya tumong nga 30 ka oras. May-ada ka ba kakongregasyon nga puydi mo buligan basi maeksperyensyahan niya an kalipay ha pag-auxiliary payunir ha panahon han Memoryal? Syempre diri ngatanan makakag-auxiliary payunir. Bisan pa hito, mahimo naton gamiton an aton panahon ngan  kusog basi mapauswag an aton halad han pagdayaw kan Jehova. Kon bubuhaton naton ito, maipapakita naton nga napapagios kita han gugma han Kristo, pariho kan Pablo. Ano pa an aton mahihimo tungod han gugma han Dios?

12. An gugma han Dios nagpapagios ha aton nga buhaton an ano?

¹² Ikaduha, an gugma han Dios magpapagios ha aton nga higugmaon an kabugtoan. Maaram hini hi apostol Juan. Hiya nagsurat: “Mga hinigugma, kon sugad hito an paghigugma ha aton han Dios, kinahanglan higugmaon liwat naton an usa kag usa.” (1 Juan 4:7-11) Oo, diri kita makakalaom nga makakarawat naton an gugma han Dios kon diri naton hihigugmaon an aton kabugtoan. (1 Juan 3:16) Paonan-o naton maipapakita an aton gugma ha ira?

13. Ano nga ehemplo an iginpakita ni Jesus may kalabotan ha paghigugma ha iba?

¹³ Tagda an ehemplo ni Jesus. Durante han iya ministeryo ha tuna, gintagan niya hin espesyal nga atensyon an mga pobre. Gintambal niya an mga may depekto ha lawas—an piang, buta, bungol, ngan ngula. (Mat. 11:4, 5) Nalipay hi Jesus pagtutdo ha mga nagugutom ha espirituwal, adton “ginpanhimaraot” han mga lider han relihiyon han mga Judio. (Juan 7:49) Hinigugma niya ini nga mga pobre ngan nangalimbasog hiya nga buligan hira.—Mat. 20:28.

14. Ano an puydi mo himoon basi ipakita an gugma ha imo kabugtoan?

¹⁴ An panahon han Memoryal maopay nga higayon nga subaron hi Jesus pinaagi ha paghunahuna kon paonan-o ka makakabulig ha kabugtoan ha iyo kongregasyon. Samtang ginbubuhat mo ito, sigurado nga may makikita ka nga puydi magpahimulos han imo gugma. Bangin may mga lagas nga nagkikinahanglan han imo bulig. Puydi mo ba hira bisitahon? Puydi mo ba hira dad-an hin pagkaon, buligan ha ira buruhaton ha balay, pasakyon pakadto ha mga katirok, o iupod ha ministeryo? (Basaha an Lucas 14:12-14.) Hinaot mapagios kita han gugma han Dios nga ipakita an aton gugma ha kabugtoan.

15. Ano an sadang naton hinumdoman?

¹⁵ Ikatulo, an gugma ni Jehova sadang magpagios ha aton nga pasayloon an aton kabugtoan. Kita ngatanan nakapanunod han sala ngan kamatayon tikang kan Adan, salit waray usa ha aton nga makakasiring nga “Diri ko kinahanglan an lukat.” Bisan an pinakamatinumanon  nga surugoon han Dios nagkikinahanglan gud han diri matupngan nga pagkabuotan ni Jehova pinaagi han Kristo. Kinahanglan naton hinumdoman nga ginpasaylo kita ha aton daku hinduro nga utang. Kay ano nga importante ito? Hibabaroan naton an baton ha usa han mga ilustrasyon ni Jesus.

16, 17. (a) Ano an aton hibabaroan ha ilustrasyon ni Jesus mahitungod han hadi ngan han mga uripon? (b) Katapos pamalandungon an ilustrasyon ni Jesus, ano an imo determinasyon?

¹⁶ Hi Jesus naghatag hin ilustrasyon may kalabotan ha usa nga hadi nga nagpasaylo ha iya uripon nga may daku hinduro nga utang—10,000 ka talento, o 60,000,000 ka denaryo. Pero ito nga ginpasaylo nga uripon waray magpasaylo ha mas gutiay nga utang han iya igkasi-uripon—100 ka denaryo. Nasina gud an hadi han hinbaroan niya nga an iya ginkaloy-an nga uripon waray malooy ha iya igkasi-uripon. An hadi nagsiring: “Maraot nga uripon, waray ko ikaw pabayara han imo utang han nakimalooy ka ha akon. Diri ba sadang ka liwat malooy ha imo igkasi-uripon, sugad la nga ginkaloy-an ko ikaw?” (Mat. 18:23-35, ftn.) Oo, an daku nga kalooy nga iginpakita han hadi nagpagios unta ha uripon nga pasayloon an iya igkasi-uripon. Sugad man, an gugma ngan kalooy ni Jehova sadang magpagios ha aton nga buhaton an ano?

¹⁷ An panahon han Memoryal maopay nga higayon nga hunahunaon naton kon may-ada ba kita mga pagdumot ha aton kabugtoan. Kon may-ada ka pagdumot, maopay ini nga higayon nga subaron hi Jehova, an usa nga “andam ha pagpasaylo.” (Neh. 9:17; Sal. 86:5) Kon gin-aapresyar naton an ginbuhat ni Jehova ha pagpara han aton daku hinduro nga utang, mapapagios kita nga kinasingkasing nga magpasaylo. Diri kita makakalaom nga makakarawat naton an gugma ngan pagpasaylo han Dios kon diri naton hihigugmaon ngan papasayloon an iba. (Mat. 6:14, 15) Oo, diri mababag-o han pagpasaylo an naglabay, pero mabulig ito nga magkaada kita makalilipay nga tidaraon.

18. Paonan-o an gugma han Dios nakabulig ha usa nga sister nga makapailob ha mga kaluyahan han usa nga bugto?

¹⁸ Damu ha aton an bangin nakukurian pag-ilob ha mga kaluyahan han aton kabugtoan. (Basaha an Colosas 3:13, 14; Efeso 4:32.) Tagda pananglitan hi Lily, usa nga solo nga sister nga kinaburut-on nga binulig ha iya balo nga kakongregasyon nga hi Carol. ^[1] Iginmamaneho ni Lily hi Carol, ginbubuligan pamalit ngan ha iba pa nga buruhaton. Bisan pa han ngatanan nga ginbuhat ni Lily, pirme la nagpipinamiling hi Carol hin sayop ngan makuri hiya pakiangayan. Pero nagpokus hi Lily ha mag-opay nga kalidad ni Carol. Padayon nga ginbuligan niya hi Carol ha sulod hin pipira ka tuig tubtob han nagkasakit hin grabe ngan namatay. Bisan kon nakurian hi Lily pagbulig kan Carol, hiya nagsiring: “Ginpapamulat ko gud nga makita hi Carol ha pagkabanhaw. Karuyag ko nga makilala hiya kon perpekto na hiya.” Oo, an gugma han Dios magpapagios ha aton nga magpailob ha kaluyahan han aton kabugtoan ngan pamulaton an panahon nga perpekto na an mga tawo.

19. Paonan-o ka mapapagios han kanan Dios “maopay gud nga regalo nga waray bayad”?

¹⁹ Gintagan kita ni Jehova hin “maopay gud nga regalo nga waray bayad.” Hinaot diri gud naton igbalewaray inin presyoso nga regalo. Lugod, ha panahon han Memoryal, hinaot nga magin mapasalamaton kita ngan pamalandungon naton an ngatanan nga ginhimo ni Jehova ngan ni Jesus para ha aton. Oo, mapagios unta kita han ira gugma nga sundon hin maopay an mga pitad ni Jesus, ipakita an aton gugma ha kabugtoan, ngan kinasingkasing nga magpasaylo.