1, 2. (a) Mang e ba muun ko fare tow’ath ni ke pi’ Got “ndabiyog puluwon”? (b) Mang deer e gad ra weliy e fulweg riy ko re article ney?

 NAP’AN ni l’og Jehovah Fak ni kari maagirag rok nga fayleng, me pi’ e bin th’abi fel’ e tow’ath ko girdi’. Re tow’ath nem e be m’ug riy gelngin feni t’uf e girdi’ rok! (John 3:16; 1 John 4:9, 10) I yog apostal Paul nre tow’ath nem ni pi’ Got e ba tow’ath “ndabiyog puluwon!” (2 Kor. 9:15) Mang fan ni yog Paul e re thin ney?

² Manang Paul nib mudugil nra buch urngin e pi n’en ni ke micheg Got ni bochan fare maligach ni pi’ Kristus. (Mu beeg e 2 Korinth 1:20.) Ere, re tow’ath nem “ndabiyog puluwon” ni ke pi’ Jehovah e ba muun ngay urngin ban’en nib manigil ni ke pi’ ngodad u daken Jesus ni kub muun ngay e t’ufeg rok ngodad. Arrogon, dabiyog i weliy ko thin rogon feni fel’ e re tow’ath nem. Ere, susun ni nge uw rogon u wan’dad e re tow’ath nem nrib manigil? Ma mang boch e kanawo’ nra ayuwegdad e re tow’ath nem riy u nap’an ni gad be fal’eg rogodad ni fan ko fare Puguran ko yam’ ni tay Kristus ni yira tay ko rofen ni Dalip Fen e Maruwel ko March 23, 2016?

3, 4. (a) Mang e ga ma lemnag u nap’an nra pi’ be’ reb e tow’ath ngom? (b) Uw rogon nrayog ni nge thilyeg reb e tow’ath nrib manigil boch ban’en u lan e yafas rom?

³ Dariy e maruwar riy nnap’an nra pi’ be’ reb e tow’ath ngom ma rib gel e felfelan’ ni ga ma tay. Machane, bay boch e tow’ath ni yima pi’ nrib manigil ara yugu ba thil nrayog ni nge thilyeg e yafas rok be’. Bod nsusun e kan dugliy ni ngan li’em nga mum’ ni bochan reb e oloboch ni kam ngongliy nrib gel e kireb riy. Machane, nap’an ni ke dugil ni ngan li’em nga mum’ ma yigi yib be’ ndam nang owchen i ognag ir ni nge pi’ e pogofan rok ni fan ngom. Ere, ke m’agan’ e cha’nem ngay ni nge yim’ ni fan ngom! Gur, ra uw rogon e binem e tow’ath u wan’um ni yugu ba pag feni manigil?

⁴ Ra dag be’ e t’ufeg ngom ni aram gelngin ma dariy e maruwar riy nra k’aringem ni ngam lemnag rogon e ngongol rom mu kum adag ni ngam thilyeg boch ban’en u lan e yafas rom. Dabisiy nra k’aringem ni ngam gol ko girdi’ mu um dag e t’ufeg ngorad, mu kum n’ag fan e kireb ko piin ni kar rin’ed boch ban’en nib kireb ngom. Dabisiy ni gubin ngiyal’ u n’umngin nap’an e yafas rom nra um pining e magar ngak ko n’en ni ke rin’ ni fan ngom.

5. Mang fan ni fare biyul nib tow’ath ni ke pi’ Got e kab pag feni fel’ ko tin ni ka bay e tow’ath?

⁵ Machane, fare tow’ath ni ke pi’ Jehovah u daken Kristus ni fan ngodad e kab pag feni fel’ ko fare tow’ath ni ka fin da weliyed murung’agen. (1 Pet. 3:18) Am lemnag fan ni aray rogon. Bochan ni ke af e denen ngodad, ma aram fan ni gad gubin ni gad ra yim’. (Rom. 5:12) Machane, bochan nri gad ba t’uf rok Jehovah ma aram fan ni pi’ Jesus nge yib nga fayleng ni nge “yim’ ni fan ngak urngin e girdi’.” (Heb. 2:9) Ere, gathi kemus ni ke ayuweg Jehovah e yafas rodad, ya kki bing e kanawo’ nrayog ni nge chuweg e denen ndariy n’umngin nap’an. (Isa. 25:7, 8; 1 Kor. 15:22, 26) Gubin e piin nra m’ug nriyul’ nib mich Jesus u wan’rad e boch i yad e ra yag e yafas ndariy n’umngin nap’an ngorad u fithik’ e gapas nge felfelan’ u fayleng u tan Gil’ilungun Got ni Kristus e ir e ra gagiyegnag, ma boch i yad e ra un i gagiyegnag Gil’ilungun Got u tharmiy. (Rom. 6:23; Rev. 20:6) Ku mang boch e flaab ni kub muun ko re tow’ath nem ni ke pi’ Jehovah?

6. (a) Mang boch ban’en u rarogon fare tow’ath ni ke pi’ Jehovah ni ga be athapeg ni nge buch? (b) Mu weliy dalip ban’en nra k’aringdad e t’ufeg rok Got ni ngad rin’ed.

⁶ Re tow’ath nem ni ke pi’ Jehovah e kub muun ngay nra golnag e m’ar ko girdi’, me fal’eg e re fayleng ney nge mang ba paradis, me faseg e piin ni kar m’ad. (Isa. 33:24; 35:5, 6; John 5:28, 29) Rib t’uf Jehovah nge Fak rodad ni bochan e re tow’ath nem ni kar piew ni fan ngodad “ndabiyog puluwon.” Machane, ka bay reb e deer nib t’uf ni ngad nanged e fulweg riy. Re deer nem e, Mang e gad ra rin’ ni bochan e re t’ufeg nem ni ke dag Got ngodad? Chiney e ngad weliyed rogon nra k’aringdad e t’ufeg rok Got ni ngad (1) leked luwan ay Jesus Kristus, (2) mu ud t’ufeged pi walagdad, (3) mu ud n’aged fan u wan’dad e kireb ni ke rin’ boch e girdi’ ngodad.

7, 8. Susun ni nge uw rogon u wan’dad e t’ufeg ni ke dag Kristus ngodad? Mang e susun nra k’aringdad e re n’ey ni ngad rin’ed?

⁷ Som’on e thingar da adaged ni ngad fanayed e yafas rodad ni fan ngak Kristus Jesus. I yog apostal Paul ni gaar: “Gelngin fanmad t’uf rok Kristus e ir e be gagiyegnagmad.” (Mu beeg e 2 Korinth 5:14, 15.) Manang Paul ni faanra fel’ u wan’dad e t’ufeg ni ke dag Kristus ngodad, ma aram e ra k’aringdad ni ngad rin’ed gubin ban’en ni fan ngak. Nap’an nra tamilang u wan’dad urngin ban’en ni ke rin’ Jehovah ni fan ngodad, ma aram e ra k’aringdad e t’ufeg rok ni ngaud ngongolgad u rogon nib m’agan’ Kristus Jesus ngay. Uw rogon ni ngad rin’ed e re n’ey?

⁸ Piin nib t’uf Jehovah rorad e yad baadag ni ngar folwokgad rok Kristus ni aram e ngaur ngongolgad ni bod ir mu ur leked luwan ay nib fel’ rogon. (1 Pet. 2:21; 1 John 2:6) Gad ma micheg nib t’uf Got nge Kristus rodad u daken e fol ni gad ma tay. I yog Jesus ni gaar: “En nra fel’ u wan’ e tin ni kug ta’ chilen ngomed me fol riy, e ereram e cha’ ni gub t’uf  rok. Chitamag e ra t’ufeg e cha’ ni gub t’uf rok; ma ku er rogog ni ra t’uf rog mu gguy rogon ni nge nangeg.”​—John 14:21; 1 John 5:3.

9. Mang boch e magawon ni gad ma mada’nag?

⁹ Chiney ni ke chugur ko Puguran e rib manigil ni nge bagadad me fal’eg i yaliy rarogon e par rok. Am fithem ni nge lungum: ‘Mang boch ban’en ni gu ma rin’ ni be m’ug riy ni gu be lek luwan ay Kristus Jesus nib fel’ rogon? Machane, mang boch ban’en ni ku rayog ni nggu mon’og riy?’ Rib ga’ fan ni ngad fal’eged i yaliy rarogodad ni bochan e gubin ngiyal’ ni yima towasariydad ni ngad folwokgad ko pi n’en ni yibe rin’ ko re fayleng ney. (Rom. 12:2) Faanra dab da kol ayuwgad, ma rayog ni ngaud folwokgad ko piin ni yad ma fil e pi llowan’ ko re fayleng ney, ara piin nib gilbuguwrad ni bod rogon e piin ni yima pag yaarad u boch e kachido, ara boch e girdi’ ni yad ma tang, ara yad ba salap u ba mit e gosgos. (Kol. 2:8; 1 John 2:15-17) Ere, uw rogon nrayog ni ngad siyeged e pi n’ey?

10. Mang boch e deer nrayog ni ngad fithed gadad riy e chiney ni gad be chugur i yan ko ngiyal’ ni yira tay e Puguran riy? Mang e rayog ni nge k’aringdad e re n’ey ni ngad rin’ed? (Mu guy e sasing ni bay u tabolngin e re article ney.)

¹⁰ Rayog ni ngad fanayed e re ngiyal’ i n’ey ni ke chugur ko Puguran ni ngad fal’eged i yaliy boch ban’en u rarogodad ni bod rogon e mad ni gad ma chuw ngay, nge pi kachido ni gad ma yaliy, nge pi musik ni gad ma motoyil ngay, nge pi n’en ni kad ted nga lan e computer rodad, nge cellphone rodad, nge tablet rodad. Nap’an ni gad be yaliy rogon e mad ni gad ma chuw ngay, mab fel’ ni ngad fithed gadad ni nge lungudad: ‘Faanra nggu wan nga bang ni bay Jesus riy, ma gu ra adag ni nggu chuw ko re mad ney, fa?’ (Mu beeg e 1 Timothy 2:9, 10.) ‘Ma faan gomanga kug chuw ngay, ma gur, yira guyeg ma yira nang ni gag reb i gachalpen Kristus Jesus?’ Ku bay l’agruw e deer ni taareb rogon ko gal deer ney ni kub fel’ ni ngad fithed gadad riy u rarogon e miti kachido ni gad ma yaliy nge miti musik ni gad ma motoyil ngay. Ngad fithed gadad ni nge lungudad, ‘Gur, ra adag Jesus ni nge yaliy e re miti kachido ney ara motoyil ko re miti musik ney? Faan gomanga yog ngog ni nggu pi’ e cellphone ara tablet rog ngak ni nge yaliy, ma gur, gu ra tamra’ ko pi n’en nra guy riy?’ Nap’an ni ga be lemnag rogon e pi video game ni ga ma fafel ngay, ma ngkum fithem ni nge lungum: ‘Gur, ra mo’maw’ ngog ni nggu weliy ngak Jesus fan ni gu baadag ni gu ma fafel ko re miti gosgos ney?’ Susun ni t’ufeg rodad ngak Jehovah e ir e ra k’aringdad ni ngad chuweged boch ban’en ni bay rodad nde m’ag ngak pi gachalpen Kristus, ni yugu aram rogon ni sana rib mo’maw’ ngodad ni ngad rin’ed. (Acts 19:19, 20) Nap’an nda ognaged e yafas rodad ngak Got, ma gad micheg ngak ndab kud pared ni fan ngodad ya ngad pared ni fan ngak Kristus. Ere, susun ni ngad digeyed boch ban’en nrayog ni nge magawonnag rogon ni gad ma lek luwan ay Kristus.​—Matt. 5:29, 30; Fil. 4:8.

11. (a) Mang e ra k’aringdad e t’ufeg rodad ngak Jehovah nge Jesus ni ngad rin’ed ni fan ko fare maruwel ni machib? (b) Uw rogon nrayog ni nge k’aringdad e t’ufeg rodad ni ngad ayuweged boch e walag u lan e ulung?

¹¹ T’ufeg rodad ngak Jesus e ir e ku ra k’aringdad ni ngad machibgad u fithik’ e pasig ma gad ayuweg boch e girdi’ ni ngar manged boch i gachalpen. (Matt. 28:19, 20; Luke 4:43) Nap’an nra chugur ko fare Puguran ko re duw ney ngu tomuren, ma rayog ni ngad uned ko pioneer ni ayuw ni aram e ngad machibgad u lan 30 ara 50 e awa. Ere, rayog ni ngam thilyeg boch ban’en u rarogom ya nge yag nim un ko pioneer ni ayuw, fa? Bay reb e walag ni pumoon ni 84 e duw rok ni ke yim’ e ppin rok ni lemnag ndabiyog ni nge un ko pioneer ni ayuw ni bochan e ke pilibthir ma kki m’ar. Machane, bay boch e walag ni yad ma pioneer ko gin ni ma par riy nra ayuweged. Bayi n’en mu ur feked ko machib, maku yad ma mel’eg yu yang ni ngan machib riy ni yad manang nrayog rok ni nge un riy ko machib ya nge yag ni thognag 30 e awa. Gur, rayog ni ngam ayuweg be’ ko ulung rom ya nge yag ni un ko pioneer ni ayuw u m’on ngu tomuren e Puguran ni yira tay ko re duw ney? Riyul’ ni gathi gad gubin nrayog ni ngad uned ko pioneer ni ayuw. Machane, yugu aram rogon ma rayog ni ngad fanayed e tayim rodad nge gelngidad ni ngad yoornaged e tayim ni gad be pigpig riy ngak Jehovah. Faan gad ra rin’ ni aray rogon ma aram e gad be dag ni gad be folwok rok Paul gad be rin’  boch ban’en ni fan ngak Got ni bochan e t’ufeg rodad ngak Kristus. Machane, mang e ku ra k’aringdad e t’ufeg rok Got ni ngad rin’ed?

12. Mang e ra k’aringdad e t’ufeg rok Got ni ngad rin’ed?

¹² Bin migid e susun ni nge k’aringdad e t’ufeg rok Got ni ngad t’ufeged pi walagdad. Manang apostal John e re n’ey. Ere, aram fan ni yoloy ni gaar: “Pi tafager rog ni gimed ba t’uf rog, faanra ereray rogon ni gadad ba t’uf rok Got, me ere susun e nge bagadad me t’uf rok bagadad.” (1 John 4:7-11) Arrogon, dabiyog ni nge fel’ e t’ufeg rok Got u wan’dad ni faanra dab da t’ufeged pi walagdad. (1 John 3:16) Ere, mang boch e kanawo’ nrayog ni ngad t’ufeged pi walagdad riy?

13. Mang boch e kanawo’ ni i dag Jesus nib t’uf e girdi’ rok riy?

¹³ Am lemnag e n’en ni i rin’ Jesus. Nap’an ni immoy u fayleng ni i machib, mab ga’ ni ma ayuweg e piin nib sobut’an’rad. I ayuweg e piin ni yad ba m’ar, nge piin ni yad ba mugutgut, nge piin ni yad ba malmit, nge piin ni yad bbiling, nge piin ndabiyog ni ngar nonad. (Matt. 11:4, 5) Baadag Jesus ni ma ayuweg e piin ni yad baadag ni ngar filed murung’agen Got, ya pi girdi’ nem e ma tayrad e pi tayugang’ ko teliw rok piyu Jew ni yad bogi girdi’ ni “ke bucheg Got waathrad.” (John 7:49) Rib t’uf e pi girdi’ nem rok ma i athamgil ni nge machibnagrad.​—Matt. 20:28.

14. Mang boch ban’en nrayog ni ngam rin’ ni nge m’ug riy nib t’uf rom e pi walag u lan e ulung?

¹⁴ Chiney ni ke chugur ko Puguran e ku ireray e ngiyal’ nib fel’ ni ngam folwok rok Jesus ni aram e ngam lemnag rogon nrayog ni ngam ayuweg e pi walag u lan e ulung. Faan ga ra rin’ e re n’ey, ma dariy e maruwar riy ni ga ra guy ni bay boch i yad nriyul’ nib t’uf e ayuw rorad. Sana pi walag nem nib t’uf e ayuw rorad e kar pilibthirgad. Ere gur, rayog ni ngam man mu guy e pi walag nem? Rayog ni ngam ngongliy rogon buchuuw e ggan ngam man mu pi’ ngar ked, ara mu ayuwegrad u boch e maruwel nib t’uf ni ngar rin’ed u tabinaw rorad, ara mog ngorad ni ngam man mu fekrad ko muulung, ara mu piningrad ni ngar uned ngom ko machib, fa? (Mu beeg e Luke 14:12-14.) Thingar da paged e t’ufeg rok Got ni nge k’aringdad ni ngad rin’ed boch ban’en ni fan ngak pi walagdad ma gad dag ngorad ni yad ba t’uf rodad.

15. Mang e thingar da nanged?

¹⁵ Bin dalip e ra k’aringdad e t’ufeg rok Jehovah ni ngaud n’aged fan e kireb ni ke rin’ pi walagdad ngodad. Bochan ni gadad pi fak Adam, ma aram fan ni ke af e denen nge yam’ ngodad. Ere, dariy bagadad nrayog ni nge gaar, “De t’uf fare biyul rog.” Ya  mus ko tin th’abi yul’yul’ e tapigpig rok Jehovah nib t’uf ni nge runguyrad Got u daken Kristus. Ma gad gubin nib t’uf ni ngad nanged nrib ga’ e malfith rodad ni ke n’ag Got fan. Mang nib ga’ fan ni ngad nanged e re n’ey? Gad ra pirieg e fulweg riy u lan reb fapi fanathin ni weliy Jesus.

16, 17. (a) Mang reb e ban’en ni susun e ngad filed ko fare fanathin ni weliy Jesus ni murung’agen fare pilung nge fa gal sib? (b) Tomuren ni kam fal’eg i lemnag fare fanathin rok Jesus, ma mang e kam dugliy ni ngam rin’?

¹⁶ I weliy Jesus murung’agen ba sib ni immoy e malfith rorow ba pilung ni in e milyon e dolla. Machane, me runguy fare pilung fare sib me n’ag fan fare malfith u wan’. Yugu aram rogon, ma de n’ag fare sib fan u wan’ e malfith rorow yugu reb e sib ni kemus ni in e dolla urngin. Nap’an ni nang fare pilung e n’en ni ke buch ma aram mi ri damumuw ngak fare sib ni ke n’ag fan e malfith rok. Ma aram me gaar ngak: “Dariy ban’en ni gab fel’ ngay, i gur e binir e sib! Kug n’ag fan u wun’ug urngin e salpiy ni malfith rom ngog, ni bochan e mwenig ngog. Ere susun e ka ga ra runguy e re tapigpig ni gimew nem, ni bod rogon ni gu runguyem.” (Matt. 18:23-35) Arrogon, susun e nge n’ag fare sib fan u wan’ e malfith rorow e bin baaram e sib ni bochan e runguy ni ke dag fare pilung ngak. Ma gadad, mang e susun ni ngad rin’ed ni bochan e t’ufeg nge runguy ni ke dag Jehovah ngodad?

¹⁷ Chiney ni ke chugur ko Puguran e ba fel’ ni ngad lemnaged ko bay boch ban’en ni ke rin’ pi walagdad ni dubdad ni ka gad be tay u lanin’dad fa dariy. Ya faanra bay, mab fel’ ni ngad folwokgad rok Jehovah nib papey ni ‘ma n’ag fan u wan’ e kireb’ ni ke rin’ be’. (Neh. 9:17; Ps. 86:5) Faanra rib ga’ fan u wan’dad e n’en ni ke rin’ Jehovah ni fan ngodad ni aram e ke n’ag fan u wan’ e malfith rodad nrib ga’, ma aram e gad ra adag ni ngkud n’aged fan u wan’dad e pi n’en ni ke rin’ boch e girdi’ ngodad ni dubdad. Ya dabiyog ni nge t’ufegdad Got me n’ag fan e kireb rodad u wan’ ni faanra dab da t’ufeg pi walagdad ma gad n’ag fan e kireb rorad u wan’dad. (Matt. 6:14, 15) Riyul’ ni gad ra n’ag fan e kireb ni ke rin’ be’ ngodad ma dabkiyog ni nge sul facha’ nge thilyeg e n’en ni ke rin’ ngodad, machane re n’ey e ra ayuwegdad ni ngad felfelan’gad e chiney i yan nga m’on.

18. Uw rogon ni ayuweg e t’ufeg rok Got reb e walag nib pin ni nge k’adan’ u puluwon reb e walag ni i ayuweg?

¹⁸ Rayog ni nge mo’maw’ ngodad ni ngaud ‘n’iged fan u wan’dad’ e pi n’en ni ma rin’ pi walagdad ngodad ni dubdad. (Mu beeg e Kolose 3:13, 14; Efesus 4:32.) Bod ni bay reb e walag ni ka nog Lily ngak ni i ayuweg reb e walag nib pin ni ke yim’ figirngin ni ka nog Carol ^[1] ngak. Ba ga’ ni ma fek ko yungi n’en nib t’uf ni nge yan ngay, maku ma ayuweg u boch ban’en nib t’uf ni nge rin’ u reb e rran ngu reb, nge ku boch e maruwel. Yugu aram rogon gelngin e ayuw ni ma pi’ Lily ngak, machane yug ra i par ma be gun’gun’ ma be mo’maw’nag ngak Lily ni nge ayuweg. Machane, ma athamgil Lily ni nga i sap nga fel’ngin e re walag nem. I athamgil nga i ayuweg u lan in e duw nge yan i mada’ ko ngiyal’ ni m’ar Carol nge yim’. I yog Lily ni gaar: “Yugu aram rogon, ma gu be athapeg ni nge taw ko ngiyal’ ni ka gamow ra mada’ Carol bayay u nap’an ni kan faseg ko yam’. Gu baadag ni nggu nang boch ban’en u rarogon ko ngiyal’ ni ke flont.” Arrogon, rayog ni nge k’aringdad e t’ufeg rok Got ni ngad n’aged fan u wan’dad e pi n’en ni ma rin’ pi walagdad ngodad ni dubdad, mu kud athapeged e ngiyal’ nra flont urngin e girdi’.

19. Mang e ra k’aringem fare tow’ath ni ke pi’ Got ngodad “ndabiyog puluwon” ni ngam rin’?

¹⁹ Riyul’ ni ke pi’ Jehovah reb e ‘tow’ath ngodad ndabiyog puluwon.’ Ere, dariy e ngiyal’ ni ngad darifannaged e re tow’ath ney. Ya chiney ni ke chugur ko Puguran e ngad fal’eged i lemnag urngin ban’en ni ke rin’ Jehovah nge Jesus ni fan ngodad. Arrogon, manga yigi k’aringdad e re t’ufeg ney ni ngaud leked luwan ay Jesus, ma gad athamgil ni ngaud daged ngak pi walagdad ni yad ba t’uf rodad, mu ud n’aged fan u wan’dad e pi n’en ni kar rin’ed ni dubdad.