1, 2. a) Xi guiráʼ nuu lu regalu ni bidii Dios laanu. b) Gunáʼ nga ca guendarinabadiidxaʼ zacábinu lu tema riʼ.

NABÉ nadxii Jiobá laanu, nga runi dede biseendaʼ Xiiñiʼ Jesucristu lu Guidxilayú riʼ para gudii xquendanabani pur laanu (Juan 3:16; 1 Juan 4:9, 10). Ndiʼ nga regalu ni jma risaca bidii Dios laanu. Nga runi guníʼ apóstol Pablu de regalu riʼ: «Nin qué zanda idxela nu diidxa para iní nu pabiáʼ sicarú ni biʼni be pur laanu» (2 Corintios 9:15). Xiñee guníʼ Pablu ca diidxaʼ riʼ yaʼ.

² Nanna Pablu zaquiiñeʼ guendaguti stiʼ Jesús para gaca cumplir guiráʼ promesa ni maʼ biʼniʼ Dios para laanu (biindaʼ 2 Corintios 1:20). Nga runi, lade ca cosa sicarú ni biʼniʼ Dios «pur laanu» riʼ, nuu sacrificiu biʼniʼ Jesús, guiráʼ modo rusihuinni Dios nadxii laanu ne guiráʼ ca cosa galán rudii Dios laanu. Nabé sicarú regalu riʼ, dede qué ridxélanu diidxaʼ para guininu ximodo ni. Xi naquiiñeʼ gucaa regalu sicarú riʼ laanu guni sentirnu  yaʼ. Xi naquiiñeʼ gúninu yanna ra maʼ zeeda dxiña dxi guietenaláʼdxinu guendaguti stiʼ Cristu yaʼ. Iza riʼ zaca ni miércoles 23 de marzo.

3, 4. a) Ximodo runi sentirluʼ ora gudii tuuxa lii ti regalu. b) Ximodo zanda guchaa ti regalu xquendanabáninu.

³ Guiranu riéchenu ora guicaanu regalu, peru nuu tiru rusigáʼdecabe laanu xiixa ni ruchaa xquendanabáninu. Quíxhenu ti ejemplu. Bixuiʼlú bíʼniluʼ ti cosa nabé malu ne pur laani naquiiñeʼ gátiluʼ. Yanna bixuiʼlú maʼ chiguuticabe lii, peru málasi biree tuuxa ni qué runibiaʼluʼ lade guiráʼ ca binni nuu raqué ne guníʼ laa gatiʼ pur lii. Ximodo ñuni sentirluʼ óraque yaʼ.

⁴ Zándaca nucaa ndiʼ lii niníʼ íqueluʼ ximodo caquiiñeluʼ xquendanabániluʼ. Ne zándaca dede nucaani lii nuchaaluʼ modo nabániluʼ. Zándaca laaca ñacaneni lii ñannaxhiiluʼ binni jma, nucaani lii nudiiluʼ de ni nápaluʼ stobi ne ñuni perdonarluʼ cani nucheené lii. Ne qué ñuu dxi nusaana de nudiiluʼ xquíxepeʼ binni ni gutiʼ pur lii que, cadi dxandíʼ la?

5. Xiñee jma risaca regalu bidii Dios laanu que intiica stobi.

⁵ Regalu bidii Dios laanu que jma risaca ni que ni biʼniʼ hombre bizéʼtenu lu ejemplu ca (1 Pedro 3:18). Cumu binni gulené donda guiranu la? zadxiña dxi gátinu (Romanos 5:12). Peru nabé nadxii Dios laanu ne biseendaʼ Xiiñiʼ ndaaniʼ Guidxilayú para beeda gatiʼ pur laanu (Hebreos 2:9). Peru cadi guendaguti si nga zaluxe pur sacrificiu stiʼ Cristu, laaca zanda gacaneni laanu guicaanu ti guendanabani ni qué zaluxe (Isaías 25:7, 8; 1 Corintios 15:22, 26). Zacá nga laani, guiráʼ tu gapa fe Jesús zanda guibani nayecheʼ ne zapa guendariuudxi. Caadxi de laacabe zié guibáʼ para guni mandarné Cristu, peru xcaadxi zabani lu Guidxilayú (Romanos 6:23; Apocalipsis 5:9, 10). Peru, xi xcaadxi cosa sicarú nuu lu regalu bidii Dios laanu riʼ yaʼ.

6. a) Lade guiráʼ ca cosa sicarú chiguni Jiobá, gunáʼ nga ni jma racaláʼdxiluʼ gúʼyaluʼ gaca. b) Xi chonna modo zanda gusihuínninu rudiʼnu xquíxepeʼ Dios pur nadxii laanu.

⁶ Ndiʼ nga xcaadxi cosa sicarú nuu lu regalu bidii Dios laanu: zaree guiráʼ guendahuará, zaca Guidxilayú riʼ ti paraísu ne zabani ca binni ni maʼ guti (Isaías 33:24; 35:5, 6; Juan 5:28, 29). Cadi dxandíʼ nápanu stale razón para gannaxhiinu Jiobá ne Jesús pur regalu sicarú ni maʼ bidiicaʼ laanu riʼ la? Yanna, ximodo zanda gusihuínninu rudiʼnu xquíxepeʼ laacabe yaʼ. Nuu chonna modo. Primé, chinándanu ejemplu stiʼ Jesús. Guiropa, gannaxhiinu ca hermanu stinu. Ne guionna, guni perdonarnu de guidubi ladxidoʼno ora gucheené tuuxa laanu.

7, 8. a) Xi zuni sentirnu pa rudiʼnu xquíxepeʼ Jesús pur nadxii laanu. b) Xi naquiiñeʼ gúninu pa rudiʼnu xquíxepeʼ Jesús pur nadxii laanu.

⁷ Primeru la? naquiiñeʼ gucaa guendarannaxhii ni napa Dios laanu riʼ iquiiñenu xquendanabáninu para gusisácanu Jesús. Apóstol Pablu guníʼ: «Intiica guni du, runi du ni purti nadxii du Cristu» (biindaʼ 2 Corintios 5:14, 15). Ora gueeda guiene ti cristianu pabiáʼ nadxii Jesús laa pur sacrificiu biʼniʼ la? na Pablu ziale de laa gannaxhii ne gusisaca Jesús. Ne zacá nga laani, ora guiene chaahuinu xi biʼniʼ Jiobá pur laanu, ridxátipa ladxidoʼno de guendarannaxhii ne riale de laanu guibáninu para gusisácanu Jesús. Ximodo rúninu ndiʼ yaʼ.

⁸ Ca binni nadxii Jiobá rinándacaʼ ejemplu stiʼ Cristu ne rúnicaʼ stipa pur gúnicaʼ cásipeʼ bíʼnibe (1 Pedro 2:21; 1 Juan 2:6). Sti modo rusihuínninu nadxiinu Dios ne Cristu nga guzúʼbanu stiidxacaʼ. Jesús  guníʼ: «Ni ma napa stiidxaʼ ne guni ni na ni la? ngue nga ni nadxii naa. Ne ni nadxii naa la? zanaxhii Bixhoze laa, ne naa laca zanaxhiee laa ne zulué laa tu pe nga naa» (Juan 14:21; 1 Juan 5:3).

9. Xi rucaa guidxilayú riʼ laanu gúninu.

⁹ Yanna ra maʼ cadxiña dxi guietenaláʼdxinu guendaguti stiʼ Cristu, naquiiñeʼ guiníʼ íquenu ximodo caquiiñenu xquendanabáninu. Gunabadiidxaʼ laca lii: «Gunáʼ nga ca cosa runeʼ ni rusihuinni maʼ zinandaʼ ejemplu stiʼ Jesús. Ñee nuuruʼ xiixa ni caquiiñeʼ guneʼ jma jneza la?». Nabé risaca cani gunabadiidxanu riʼ, purtiʼ guidxilayú riʼ nabé rucaani laanu gúninu guiráʼ xixé ni cayuni binni (Romanos 12:2). Pa qué gatananu la? chaahuiʼ chaahuiʼ zaníʼ íquenu cásica riníʼ ique ca binni ni na nuu xpiaaniʼ tiempu riʼ, ne zúninu cásica runi ca artista ne cani riguite xiixa deporte (Colosenses 2:8; 1 Juan 2:15-17). Xi zanda gacané laanu gucáʼnanu guiráʼ ni nuu lu guidxilayú riʼ yaʼ.

10. a) Xi naquiiñeʼ guinabadiidxanu laca laanu tiempu rietenaláʼdxinu guendaguti stiʼ Cristu riʼ. b) Xi naquiiñeʼ gúninu para guicábinu ca guendarinabadiidxaʼ zeeda lu párrafo riʼ. (Biiyaʼ ca foto ni zeeda ra ruzulú tema riʼ).

¹⁰ Tiempu rietenaláʼdxinu guendaguti stiʼ Cristu riʼ laaca galán para guidúʼyanu xi clase lari nápanu, xi canción rucaʼdiáganu, xi película ridúʼyanu, xi nápanu lu teléfono celular, lu computadora o lu tableta stinu. Guinabadiidxanu laca laanu: «Ñee nituiluáʼ ñuuyaʼ Jesús modo nacuaʼ lari la?» (biindaʼ 1 Timoteo 2:9, 10). «Ora guʼyaʼ binni naa nacuaʼ lari riʼ, ñee zaníʼ íquecabe testigu stiʼ Jiobá naa la? Ñuulaʼdxiʼ Jesús ca película ruuyaʼ ne ca canción ni rucaadiaʼgaʼ la? Ñanda nutiiñeʼ teléfono celular o tableta stinneʼ Jesús la? Ñanda nulueeʼ Jesús ca videojuego stinneʼ ne nusieneʼ laa xiñee riuuladxeʼ cani la?». Pa dxandíʼ nadxiinu Jiobá la? zusáʼbinu guiráʼ cosa feu ni cadi naquiiñeʼ gapa ti xpinni Cristu, neca gaca ni nagana para laanu (Hechos 19:19, 20). Dxi bidiʼnu xquendanabáninu Jiobá, bidii stiidxanu laa zaquiiñenu ni para gusisácanu Cristu. Nga runi, qué zanda diʼ gápanu xiixa ni gucueeza laanu de chinándanu ejemplu stiʼ Jesús (Mateo 5:29, 30; Filipenses 4:8).

11. a) Xiruʼ zúninu pa nadxiinu Jiobá ne Jesús. b) Xi zanda gúninu pur ca hermanu pa nadxiinu laacaʼ.

¹¹ Sti cosa ni zanda gúninu para gusihuínninu nadxiinu Jiobá ne Jesús nga gucheechenu diidxaʼ ne gusíʼdinu binni né stale gana (Mateo 28:19, 20; Lucas 4:43). Ñanda niguixhe íquenu ñácanu precursor auxiliar ne nucheechenu diidxaʼ 30 o 50 hora tiempu rietenaláʼdxinu guendaguti stiʼ Cristu riʼ la? Guzéʼtenu ejemplu stiʼ ti hermanu viudu de 84 iza. Laa guníʼ ique qué zanda gaca precursor auxiliar purtiʼ maʼ nagola ne maʼ huará. Peru biyubi ca precursor ni nabeza gaxha de laabe ti carru chebe ne gulicaʼ ti territorio biáʼsipeʼ para laabe. Pur ni bíʼnicabe riʼ, gunda biʼniʼ predicarbe 30 hora ti beeu. Ñee zanda gacanenu tuuxa hermanu ni nuu ndaaniʼ congregación stinu para gaca precursor lu beeu marzo o abril la? Dxandíʼ qué zanda diʼ gaca guiráʼ hermanu precursor. Peru guiranu zanda iquiiñenu tiempu ne stipa stinu para gúninu jma lu xhiiñaʼ Jiobá. Pa gúninu zacá la? zusihuínninu rudiʼnu xquíxepeʼ Cristu pur nadxii laanu, casi biʼniʼ apóstol Pablu. Xiruʼ zanda gúninu pa rudiʼnu xquíxepeʼ Dios pur nadxii laanu.

12. Xi naquiiñeʼ gúninu pa racaláʼdxinu gannaxhii Dios laanu.

¹² Guiropa, guendarannaxhii ni napa Dios laanu naquiiñeʼ gucaani laanu gannaxhiinu ca hermanu. Maca guníʼ apóstol Juan ora bicaa  ca diidxaʼ riʼ: «Pa nadxii Dios laanu biaʼ cá la? laca naquiiñe ganaxhii saa nu» (1 Juan 4:7-11). Ngapeʼ nga laani, pa racaláʼdxinu gannaxhii Dios laanu la? naquiiñeʼ gannaxhiinu ca hermanu stinu (1 Juan 3:16). Yanna, ximodo zanda gusihuínninu dxandíʼ nadxiinu laacabe yaʼ.

13. Xi ejemplu galán bisaana Jesús para laanu.

¹³ Bisiidiʼ Jesús laanu né ejemplu stiʼ ximodo gannaxhiinu stobi. Dxi bibánibe lu Guidxilayú riʼ, jma nga gucanebe ca binni ni nachaʼhuiʼ ne cani nayá ladxidóʼ. Bisiándabe cani huará, cani nachiitaʼ ñee, cani qué ruuyaʼ, cani qué runadiaga ne ca mudu (Mateo 11:4, 5). Qué ñaca diʼ Jesús cásica ca fariseu, laacaʼ nabé feu modo biʼniʼ tratarcaʼ binni ne guniʼcaʼ mal de laacabe (Juan 7:49). Nabé gunnaxhiibe binni qué rudxiibaʼ laca laa ne bíʼnibe stipa pur gusiidibe laacaʼ de Dios neca maʼ bidxágabe (Mateo 20:28).

14. Xi zanda gúninu para gusihuínninu nadxiinu ca hermanu.

¹⁴ Tiempu rietenaláʼdxinu guendaguti stiʼ Cristu riʼ, galán guiníʼ íquenu ximodo gacanenu ca hermanu ni nuu ra congregación stinu. Zándaca nuu tuuxa ni jma caquiiñeʼ gacanenu, casi ca hermanu ni maʼ nagola. Ñee zanda chigánnanu laacabe, chinenu xiixa ni gócabe, gacanenu gaca xiixa dxiiñaʼ ra lídxicabe, chinenu laacabe reunión o guni invitarnu laacabe para gucheechenécabe laanu diidxaʼ la? (biindaʼ Lucas 14:12-14). Guendarannaxhii ni napa Dios laanu naquiiñeʼ gucaani laanu guyúbinu modo gusihuínninu nadxiinu ca hermanu.

15. Xi naquiiñeʼ ganna cada tobi de laanu.

¹⁵ Guionna, guendarannaxhii ni napa Dios laanu naquiiñeʼ gucaani laanu guni perdonarnu ca hermanu stinu. Guiranu gulenenu donda ne rátinu purtiʼ xiiñiʼ Adán laanu. Nin tobi de laanu qué zanda guiníʼ cadi caquiiñeʼ sacrificiu biʼniʼ Jesús. Dede ti xpinni Dios ni jma ruzuubaʼ diidxaʼ laaca caquiiñeʼ ni. Guiranu naquiiñeʼ gánnanu maʼ biʼniʼ perdonar Dios cani nuzáʼbinu laa. Xiñee risaca gánnanu ni yaʼ. Zacábinu guendarinabadiidxaʼ riʼ né ti ejemplu guníʼ Jesús.

16, 17. Xi rizíʼdinu lu historia stiʼ rey ni biʼniʼ perdonar guiráʼ ni nuzaabiʼ ti esclavu laa.

¹⁶ Guníʼ Jesús historia stiʼ ti esclavu ni nuzaabiʼ 60 millón de moneda de plata ti rey. Peru biʼniʼ perdonar rey que laabe ne gudxi laabe gusiaandabe ni nuzaabibe  laa. Gupa si ratu bidxaaga esclavu riʼ tobi de ca xcompañeru ni nuzaabiʼ laa ti gayuaa moneda de plata, peru qué niná ñuni perdonar laabe. Para nusihuinni esclavu riʼ rudii xquíxepeʼ rey que pur biʼniʼ perdonar laa la? laaca naquiiñeʼ ñuni perdonar ne nusiaandaʼ ni nuzaabiʼ xcompañeru laa. Guizáʼ bidxiichi rey que ora gunna xi biʼniʼ esclavu malu que. Ngue runi biseendacaa rey que laabe ne gudxi laabe: «Naa bine ni unaba lu naa, bine perdonar lii irá ni nuzaabi lu naa. Yanna lii, qué ñanda ñá lu stobi ca casi biaʼya lii la?» (Mateo 18:23-35). Xii ndiʼ racalaʼdxiʼ Jesús gusiidiʼ né ejemplu riʼ yaʼ. Ora runi perdonar Jiobá ca donda stinu, zeeda gácani casi ora nusiaandabe guiráʼ ni nuzáʼbinu laabe. Yanna, xi naquiiñeʼ gúninu pa rudiʼnu xquíxepeʼ laabe pur laani yaʼ.

¹⁷ Maʼ cadi candaa diʼ para guietenaláʼdxinu guendaguti stiʼ Cristu. Nga runi, galán guinabadiidxanu laca laanu: «Ñee huayuni tratar tuuxa hermanu naa mal la? Ñee cayaca nagana para naa guneʼ perdonar laabe la?». Pa zacá nuunu la? yanna nga tiempu para chinándanu ejemplu stiʼ Jiobá, ti Dios ni nuu «listu para [guni perdonar]» guiráʼ ni ruchéʼnenu laa (Salmo 86:5; Nehemías 9:17). Cumu rudiʼnu xquíxepeʼ laabe pur rilaseláʼdxibe laanu la? rúninu stipa para guni perdonarnu ca hermanu stinu de guidubi ladxidoʼno. Ne cadi guiaandaʼ ndiʼ laanu: pa racaláʼdxinu gannaxhii Jiobá ne guni perdonar laanu la? naquiiñeʼ gannaxhiinu ne guni perdonarnu ca hermanu stinu (Mateo 6:14, 15). Dxandíʼ qué zanda diʼ guchaʼnu ca cosa ni guca dxiqué, peru ora runi perdonarnu la? racaneni laanu guibáninu jma nayecheʼ.

18. Xi gucané Lily guni huantar cani biʼniʼ Carol.

¹⁸ Nuu biaje raca nagana para laanu guni huantarnu ca hermanu ne ca hermana stinu ora gúnicaʼ laanu xiixa ni cadi jneza (biindaʼ Efesios 4:32 ne Colosenses 3:13, 14). Guidúʼyanu ni bizaaca ti hermana láʼ Lily. ^[1] Biale de laabe chigacanebe Carol, ti hermana viuda nuu ndaaniʼ congregación stibe. Riquiiñeʼ Lily carru stiʼ para chiné laabe ne para guedasaana laabe, risíʼ guiráʼ ni caquiiñebe ne racané laabe lu xcaadxi cosa. Neca nabé racané Lily Carol, peru laa nisi maʼ cadxiichi guiráʼ ora. Nuu biaje raca nagana para xcaadxi binni guidxaaga laabe. Peru runi Lily stipa pur guʼyaʼ ca guenda sicarú napa Carol. Gucané Lily laabe chupa chonna iza. Últimu la? guca huará Carol ne guti. Lily na guizáʼ napa gana guʼyaʼ dxi guiasa Carol lade gueʼtuʼ para gunibiáʼ laabe ora maʼ gácabe binni sin donda. Pa rudiʼnu xquíxepeʼ Dios pur nadxii laanu la? laaca zanda guni huantarnu ca hermanu stinu ora gúnicaʼ laanu xiixa ni cadi jneza. Laaca racané guendarannaxhii riʼ laanu cuézanu dxi gaca guiranu binni sin donda ne maʼ qué ziuuruʼ dxi guchee nin tobi de laanu.

19. Xi zúninu pa rudiʼnu xquíxepeʼ Dios pur regalu sicarú ni bidii laanu.

¹⁹ Rihuinni dxíchica maʼ bidii Jiobá laanu ti regalu nabé risaca ne «qué zanda idxela nu diidxa para iní nu pabiáʼ sicarú ni biʼni be pur laanu». Qué chuʼ dxi guiaandaʼ ni laanu. Iquiiñenu tiempu rietenaláʼdxinu guendaguti stiʼ Cristu riʼ para guiníʼ íquenu ne guni meditarnu guiráʼ ni maʼ biʼniʼ Jiobá ne Jesús pur laanu. Zacá zudiʼnu xquíxepeʼ Jiobá guiráʼ dxi ne zucaani laanu chinándanu ejemplu stiʼ Jesús. Laaca zacaneni laanu gannaxhiinu ca hermanu ne guni perdonarnu laacaʼ de guidubi ladxidoʼno ora gucheenecaʼ laanu.