1, 2. (a) Ginihe ga Mbori “gasigasi gamahe” akodaha? (b) Gini asanahe ani nika wisigopai tipaha rogo gi kekeapai re?

HO YEKOVA akedi bangisa Wiriko ni ku auru kpotosende ane, Ko afu gu bakere gamahe nga ga nyemuse! (Yo. 3:16; 1 Yo. 4:9, 10) Gu mokedi nangia Pauro ayambuhe nga ga Mbori “gasigasi gamahe.” (2 Kor. 9:15) Tipagine du ko amangisunge ti ni na gu fugo re?

² Pauro aima ino gupai nga gu wene akidohe dunduko Mbori akidopaha arengbe ka manga kina vurube gu rengberengbe motumo nga ga Kristo. (Oni gedi 2 AKorindo 1:20.) Rogo gi gene re, si adu nga gu “gasigasi gamahe” re nika koda gu wene asino na gu bangabanga nyemuse Yekova nika yugoho furani vurube Yesu. Nirengo, gu gamahe re ni iˈiriwoho na boro arengbanga ka ringbisapaha nzunzu na agu afugo nga ga aboro te. Gini ome si aidapa dia ani gu gamahe re du na ni kurirani? Na gini kura agene du si aida gi gamahe re fõngbaduraniyo ngbaha wa ani ambakadatirani tipa Tingida Pakpio Yesu Rago Biata, rogo Marungu 23, 2016?

3, 4. (a) Mo nidu wai ho boro afu gamahe ni foro? (b) Wai du rengbe wene gamahe ka manga ariapai na gamo raka?

³ Ho mo agbia gamahe ni, kango ti ni te nga mo naduadu na ngbarago. Ono tie, kura agamahe kinaho rengbe kadu na nyanyakipaha foro nga gu rengbe ka aria gamo raka. Ni kpiapai, mo berẽnga gupai nga, i saringbanga ro sa kpio mbiko mo mangi kerepai. Wakina ikpirogumba, boro kini kuru nga gu ni mo ainongo ni dagba aboro yo ya kini idi ka kpi tipa ro. Nirengo, ni ima ida ka kpi tipa ro! Gini ome du rengbe gu ngbatunga nyanyakipa gamahe re kadu na ni kuriro?

⁴ Pa yugo ni gu ngbatunga nyemuse re foro zanga kapa ima rengba ka saro mo aria gamo mangaapai na zavura ki aria gu gene mo aaraka mbata ngbaha. Si nawira wa si rengbe ka saro mo ni gamuhe esuesu na kini kpinyemu kura aboro na kini mbupai fu agu aboro naingapai kutiro. Rogo gamo raka naabaha, mo rengbe kaa bi tiro nga si naida mo mangipai amanga tipa gupai ni amangihe foro re.

5. Wai du du ga Mbori gamahe nga ga motumo na nyanyakipaha kisusi kura agamahe?

⁵ Wa vura duhe wo, gu gamahe Yekova nafuhe furani vurube Kristo ima kio kisusi gu gamahe i nafura tipaha rogo gu kpiapai re. (1 Pet. 3:18) Oni bingo gu ndupai duhe ti ni wo. Mbiko gu ingapai i avungu rani na ni, ani dunduko i asaringbanga rani sa kpio. (Rom. 5:12) Mbiko ga Yekova nyemuse, ko amangi mbakadapai tipa Yesu ye ku auru kpotosende ane tipa “ka hia kpio tipa aboro dunduko.” (Eb. 2:9) Anga kina gu raka rani du awere Yekova abatasihe te ono ko amangi mbakadapai nga gu nika dia kpio kusayo nyeanye kindi. (Yes. 25:7, 8; 1 Kor. 15:22, 26) Agu aboro dunduko du na idapase kuti Yesu nika gbia nyenye unga rogo zereda na ngbarago ni agu azogo nga ga ga Mbori Kindo vurube Kristo watadu vurube mbedimbedi aKristano nga abadia zogarago rogo gu Kindo re. (Rom. 6:23; Yugo. 5:9, 10) Gini kura amaku du rogo gu ga Yekova gamahe re?

6. (a) Gini amaku nga ga ga Yekova gamahe mo angera tipaha kumbatayo? (b) Mo yambu rimo ahe biata ga Mbori gamahe nika fõngbaduraniyo ani mangihe?

⁶ Ga Yekova gamahe nakodapa husa gaani akaza dunduko, sa gi kpotosende re ni paradizo, na zingisa kpikpi aboro. (Yes. 33:24; 35:5, 6; Yo. 5:28, 29) Nirengo, ani nakpinyemu Yekova na Wiriko mbikopa gu “gasigasi gamahe” i nafuhe furani. Ono wa vura duhe wo, gu sanahe nanye kindi nga, Ginipai ga Mbori nyemuse nika fõngbaduraniyo ani mangihe? Oni wisigingo wai ga Mbori nyemuse afõngbaduraniyo tipa (1) ka pekafuo ndu Kristo Yesu teketeke, (2) ka yugo nyemuse fu awirinarani, na (3) ka mbupai fu akuarani kina boro ngbaduraniyo.

7, 8. Wai du si aida ani bi ga Kristo nyemuse, na ginipai si aida si fõngbaduraniyo ani mangihe?

⁷ Bambatapai nga, si naida ngbaduraniyo fõ rani ani raki gaani raka fu Kristo Yesu. Gu mokedi nangia Pauro aya: “Gu nyemuse duti Kristo tipa rani, si nasoda rani.” (New World Translation of the Holy Scriptures.) (Oni gedi 2 AKorindo 5:14, 15.) Pauro aima inoho nga ani arengbanga ka ida na ga Kristo bakere nyemuse zanga si fõngbaduraniyo ani raki fuko te. Ho ani agiarogo gupai yo ni wenengai Yekova namangihe furani na gako nyemuse kini fõngbaduraniyo, si nasarani ani kpinyemu ka raka gaani raka naabaha fu Kristo Yesu. Wai du ani ayugo gu nyemupai re?

⁸ Agu aboro nakpinyemu Yekova si nafõngbaduyo yo i pekefuo ga Kristo kpiapai, kini ta kina wai ko aata na kini pekefuo nduko teketeke. (1 Pet. 2:21; 1 Yo. 2:6) Ani nayugo gaani nyemuse tipa Mbori na Kristo rogo gaani giasangba yo. Yesu aya: “Gu ni du  gi rugute be ni ni ki ka kuti ni, kina ni nakpi nyemu re; gu ni du nyemu re ti ni Buba akpi nyemu ni akpi, mi akpi nyemu ni akpi a, ki yugu tire fu ni.”​—Yo. 14:21; 1 Yo. 5:3.

9. Gini sosodapai ani agbiatirani na ni?

⁹ Rogo agu adiwi nga ga Tingida Pakpio Yesu, si adu ni wenepai ani berẽkurii gaani gene raka. Mo sananga tiro nga: ‘Rogo gini abangiriaba du mi apekafuo Kristo Yesu rogoho wenengai? Gini abangiriaba rengbe mi ka manga ariapai rogoho?’ Gi wisigotise re na nyanyakipaha mbiko ani dedede ni sosodi sosodi rani ka pekafuo gu gene mangaapai nga ga gi zegino re. (Rom. 12:2) Ka ani adu nga na rubangirise ya, ani ima rengba kadu ni agu abawiriki nga ga abawisigipai dudunguroo tipa raka watadu abaworimo na atakandi nga ga gi zegino yo re. (Koro. 2:8; 1 Yo. 2:15-17) Wai du rengbe ani ka ká gu sosodahe re?

10. Gini asanahe rengbe ani ka sana tirani na ni rogo agu adiwi nga ga Tingida Pakpio Yesu, na ginipai rengbehe gaha akaragapai ka fõngbaduraniyo ani mangihe? (Oni bi gu sura duti tonatonaha.)

¹⁰ Ani rengbe ka mangasunge na agu adiwi nga ga Tingida Pakpio Yesu ni momu tipa ka wisigo gaani aroko, afirimi, na gaani amanzigo, isoke zavura agu ahe du rogo gaani akompiuta, aterefuni, na ataburet (tablets). A wa mo nikaa wisigo gamo aroko, mo sananga tiro nga: ‘Ka si nidu nga mi nandu ku rogo gu ba Yesu nika du kina rogoho, ya mo rago agberã tire na gi roko re? (Oni gedi 1 Timoteo 2:9, 10.) ‘Ka mi voho, ya mo si ayugoho nga mi napekafuo Kristo Yesu?’ Ani rengbe arengba ka sana tirani na ngbatunga asanahe wa gure nibipa gaani afirimi na amanzigo a. ‘Ya mo ka rago angba ti Yesu ka bi gi firimi re watadu ka gia gi bia re? Ka si adu nga ko di gimi terefuni watadu taburet, ya mo ka zee azi re na agu apai ka ko abihe rogoho?’ Wa mo nikaa wisigopai tipa agu ambaro i angihe rogo kompiuta watadu aterefuni, mo sananga tiro nga: ‘Ya mo si rengbe kadu fere ni mbumbuhe mi pe gu ndupai fu Yesu ngba gi mbaro re ti ni tire?’ Si naida gaani nyemuse tipa Yekova fõngbaduraniyo ani mbu guhe rengbe kadu ni gbegberẽhe fu ga Kristo bawiriki, ka pa nyakaha vura du kina wai vurũ. (Amo. 19:19, 20) Ani akidohe ti regbo gaani kparatise fu Mbori nga ani arakanga berewe fu tirani te ono fu kina Kristo. Sidu tie, si aidanga ani kakuti guhe rengbe ka ká na ani ti pekafuo ndu Kristo teketeke te.​—Mt. 5:29, 30; Frp. 4:8.

11. (a) Wai du gaani nyemuse tipa Yekova gbiati Yesu afõngbaduraniyo gene tungusapai yo? (b) Wai du rengbe gaani nyemuse ka fõngbaduraniyo ani undo kura aboro rogo dungurati?

¹¹ Gaani nyemuse tipa Yesu nafõngbaduraniyo a ani mangisunge tungusapai na sunge sa aboro ni abawiriki na ngbaduraniyo dunduko. (Mt. 28:19, 20; Rk. 4:43) Rogo agu adiwi nga ga Tingida Pakpio Yesu, ani nika duadu na momu ka mangasunge ni moundo abazakigene na ki di asaa 30 watadu 50 kutingba tungusapai. Ya mo mo rengbe ka mbakada agu apai du tipa ro tipa ka mangaha wo? Gu kura sosono wirinarani sa du garãko nga 84 diako aima kpi abihe nga ko arengbanga ka mangasunge moundo abazakigene te mbiko garãko na ko nawoka awoka dedede. Wa si avura duwo, agu abazakigene naadu rogo gako dagbarago adunguratiyo ka undoko. I aundo ko na ũnduge na ki sia gu dagbarago ko arengbe arengba ka tungusapai rogoho, wa ka ko dati gako sasa nga ka gbia asaa 30. Ya mo mo rengbe ka undo boro rogo gamo dungurati tipa ni gbia gu ngbarago nga ga mangasunge ni moundo bazakigene rogo agu adiwi nga ga Tingida Pakpio Yesu? Rengo ngaha nga, anga ani dunduko rengbe ka mangasunge moundo abazakigene te. Ono wa vura duhe wo, ani rengbe arengba ka mangasunge na gu regbo gbiati gu ome du tirani tipa ka kiiso gaani motumo nga ga tambuahe  fu Yekova. Ka ani mangihe wo, ani nika yugoho nga ani wakina Pauro na ga Kristo nyemuse du nafõngbaduraniyo. Gini kurapai berewe ga Mbori nyemuse nika fõngbaduraniyo ani mangihe?

12. Ga Mbori nyemuse nafõngbaduraniyo ani mangi gine?

¹² Uepai nga, ga Mbori nyemuse nika fõngbaduraniyo ani kpinyemu awirinarani. Gu mokedi nangia Yoane aima ino gipai re. Ko akepai nga: “Abadiangba, ka nyemurani du ti Mbori were, nyemu akuarani du adu ti rani a.” (1 Yo. 4:7-11) Nirengo, ani arengbanga ka ida na ga Mbori nyemuse zanga na ino gupai nga si naida ani kpinyemu awirinarani te. (1 Yo. 3:16) Wai du rengbe ani ka yugo gaani nyemuse rogo mangimangipai yo?

13. Gini kpiapai Yesu amoihe nibipa kpinyemu kura aboro?

¹³ Oni bingo gu kpiapai nangia ga Yesu. Ti gu regbo ko aatungusapai auru kpotosende, ko anaaberãpa agu aboro payo adu kusende. Ko anaaundo gbarĩgbarĩ aboro, airavurari, airangbiongo, na airabubo. (Mt. 11:4, 5) Yesu adu na ngbarago ka yugopai fu agu aboro naadu na gomoro rogo toro yo, nga agu aboro ga aYudo abangbembatayo rogo pambori anaabiyo nga “tiwa” tiwa aboro. (Yo. 7:49) Ko adu na nyemu agu aboro payo adu kusende na kini mangapai fuyo nyanyaki.​—Mt. 20:28.

14. Ginipai rengbe mo ka mangaha tipa ka yugo gamo nyemuse fu awirinamo?

¹⁴ Agu adiwi nga ga Tingida Pakpio Yesu nafu momu foro tipa mo wiriki Yesu ni dia mo regbo ka wisigopai tipa agu awirina du rogo gamo dungurati. A wa mo nikaa mangaha wo, zanga kapa, mo nika bi aboro abi nga aguyo rengbe arengba ka gbia undo ti gamo nyemuse. Isoke sosono awirina kinaho nga aguyo naida na undo. Ya mo mo rengbe ka ndu ka bi agi wene awirinarani re? Ya mo mo rengbe ka ndu na riahe fuyo, ka undoyo ti sunge kporo, ka undoyo na ũnduge ku ba dunguratise yo, watadu ka tungusapai na yo? (Oni gedi Ruka 14:12-14.) Si naida ani mbu ga Mbori nyemuse si fõngbaduraniyo tipa ani undo awirinarani na ki yugu gaani nyemuse fuyo.

15. Ginipai si aida ani inipai tipaha?

¹⁵ Biatapai nga, si naida ga Yekova nyemuse fõngbaduraniyo ani mbupai fu awirinarani. Wangia ani awiri gu bambata kumba nangia Adamu, ani dunduko naima dia ingapai na sangbanaha nga kpio. Boro ho dagbarani yo rengbe ka ya, “Mi aidanga ga  Yesu motumo te” te. Zavura gu ga Yekova moyambu du ni ruru ni, ni naida aida na gu ga Yekova weneringise arẽnga ani tipaha ya nga gu ko afuhe vurube Kristo. Ani dunduko si aida ani ini gupai nga i aima mbupa bakere bape furani. Tipagine du gipai re ti ni na nyanyakipaha? Karagapai gudu rogo sanza yo sa dagba agu asanza Yesu agumbaha.

16, 17. (a) Ginipai si aida ani wirikihe ti ga Yesu kpiapai du tipa bakindo na moyambu? (b) Tingbafuo berã mo kurii ga Yesu kpiapai, ginipai mo nadiberã ka mangaha?

¹⁶ Yesu agumbapa wai bakindo ambupai fu gako moyambu tipa gu bakere bape ko adihe beko nga ataranda 10,000, watadu adenario nga 60,000,000. Ono wa si avura du wo, gu moyambu i ambupai fuko re aaidanga ka mbupai fu gu kurako naadu na gako bape beko nga adenario 100 gbua te. Gu bakindo re adu na bakere zinga ho ko agihe ni nga gu moyambu ko ambupai fuko re aaidanga ka inapai fu kurako te. Gu bakindo re aya: “Gbegbere moyambu nga mo! Mi ahe gi bape foro dunduko, mbiko wa mo azungadi re; ka mo ini nga pai fu kuaro wa mi aini pai foro te?” (Mt. 18:23-35) Nirengo, si aaida ga bakindo bakere inapai fõngbadu gu moyambu re yo ko mbupai fu kurako. Wakina gure a, ginipai si aida ga Yekova nyemuse na inapai fõngbaduraniyo ani mangihe?

¹⁷ Agu adiwi nga ga Tingida Pakpio Yesu nafu momu furani tipa ani wisigi tirani singia ani nakpipai kuti wirinarani. Kangia wo duhe, gure nga wene regbo tipa ani wiriki Yekova “du zaza tipa vu aboro.” (Nem. 9:17; Tam. 86:5) Ka ani bi gupai na nyanyakipaha Yekova namangihe ka mbupa bakere bape furani, ani duadu na nyemu ka mbupai fu kura aboro kina boro ngbaduraniyo. Mbori arengbanga ka kpinyemu rani na ki mbupai furani te kina gu ka ani akpinyemu akuarani na kini mbupai fuyo. (Mt. 6:14, 15) Wa vura duhe nirengo nga, pa mbupai arengbanga ka aria gupai namangi kusayo te, zanga kapa, si ima rengba ka aria gaani raka ku mbatayo ni wenehe.

18. Wai du ga Mbori nyemuse aundo kura wirinarani sa ri hi ga gu kura wirinari zangarengba?

¹⁸ Tipa dungu rani, si ni kpakarakpakaraha ani “nihi pai” fu awirinarani na aˈuru dunduko. (Oni gedi AKorosaio 3:13, 14; AEfeso 4:32.) Ni kpiapai, Lily nga wirinarani ata dianga kumba ya aundo dekurugbo na nyemuhe rimori angia Carol. ^[1] Lily anaaundo ri na ũnduge, ngbekaahe furi, na kini yugu wenesino furi rogo dungu agene yo. Wa Lily avura kaa manga agi apai re, Carol anaabisirahe abisira kindi na si kidu ni mbumbuhe ka mangapai na ri. Wa si avura du wo, Lily aagbeberã ri kina kuti gu wene asino naadu ti Carol. Ri anaaundo ri kindi tipa dungu agarã daho kaza azi Carol ni ni nyanyakihe ri ki kpi. Lily aya, “wa si avura du wo, mi namaabangire ka bi Carol ti regbo zingabekpio. Mi naida ka inori ho ri nika du ni nga rengberengbe boro.” Nirengo, ga Mbori nyemuse rengbe arengba ka fõngbaduraniyo ani inipai fu awirinarani na kini ngere kumbatayo tipa gu regbo ga aboro zangarengba nika go kusayo nyeanye kindi.

19. Wai du ga Mbori “gasigasi gamahe” nika fõngbaduroyo?

¹⁹ Nirengo, ani aima gbia “gasigasi gamahe” be Yekova. Ka ani ya bingo gi nyanyakipa gamahe re na taatapaha ya. Kuba gure, ani berẽnga aberã kurii gupai Yekova gbiati Yesu namangihe furani na tambuahe, gbe vuru agu adiwi yo nga ga Tingida Pakpio Yesu. Nirengo, gayo nyemuse fõnga ngbaduraniyo afõ ani pekefuo ndu Yesu teketeke, ka undo awirinarani na kini yugu gaani nyemuse fuyo, na kini mbupai fuyo kina boro ngbaduraniyo.