1. E ui o Ieova o le Silisili Ese, ae o le ā ua ia valaaulia isi e faia?

O IEOVA o le Silisili Ese. Na ia foafoaina mea uma lava, ma e tele lona atamai ma le mana. Na malamalama Iopu i lenā tulaga. Ina ua uma ona fesiligia e Ieova Iopu e faatatau i Ana foafoaga, na tali atu Iopu: “Ua ou iloa e mafai ona e faia mea uma lava, e lē mafai foʻi ona vaoia se mea e te finagalo i ai.” (Iopu 42:2) E mafai e Ieova ona faia so o se mea ua ia finagalo i ai e aunoa ma se tasi e fesoasoani iā te ia. Peitaʻi ua ia valaaulia ma le alofa isi ina ia galulue faatasi ma ia e faataunuu lona finagalo.

2. O le ā le galuega tāua na valaaulia e Ieova Iesu e faia?

² O le foafoaga muamua lava a le Atua o lona Alo e toʻatasi. Na faataga e Ieova lona Alo e fesoasoani iā te ia e faia isi foafoaga uma. (Ioa. 1:1-3, 18) Na tusi Paulo e faatatau iā Iesu: “Na foafoaina isi mea uma i le lagi ma le lalolagi e ala iā te ia, o mea e vaaia ma mea e lē vaaia, e tusa lava po o nofoālii, po  o alii sili, po o malo, po o pule. Na foafoaina isi mea uma e ala iā te ia ma na foafoaina foʻi mo ia.” (Kolo. 1:15-17) Na faamamaluina e Ieova lona Alo e ala i le faaaofia o ia i galuega o le foafoaga ma faailoa atu i isi le matafaioi tāua a lona Alo.

3. O le ā na valaauliaina e Ieova Atamu e fai, ma aiseā?

³ Ua valaaulia foʻi e Ieova tagata ina ia galulue faatasi ma ia. O se faaaʻoaʻoga, na ia faatagaina Atamu e faaigoa meaola. (Kene. 2:19, 20) O se fiafiaga iā Atamu le mātauina o nei meaola ma o latou uiga, ona filifili lea o se igoa e talafeagai ma ia manu. Na mafai e Ieova lava ia ona faaigoa meaola, auā o ia na foafoaina. Ae ua ia faatagaina ma le alofa Atamu e faia lea galuega. Na tuu atu foʻi e le Atua iā Atamu le avanoa e faalautele atu ai le Parataiso. (Kene. 1:27, 28) Ae pagā lea, e leʻi manaʻo Atamu e galulue faatasi ma le Atua, ma ua seleseleina ai le tele o iʻuga mataʻutia mo ia ma lana fanau.—Kene. 3:17-19, 23.

4. Na faapefea ona fesoasoani tagata i le Atua i le faataunuuina o lona finagalo?

⁴ Mulimuli ane na valaaulia e le Atua isi ina ia fesoasoani i le faataunuuina o lona finagalo. Na fausia e Noa se vaa ma na faasaoina ai o ia ma lona aiga mai i le Lolo. Na laveaʻiina e Mose le nuu o Isaraelu mai Aikupito. Na taʻitaʻia atu e Iosua le fanauga a Isaraelu i le Nuu Folafolaina. Na fausia e Solomona le malumalu i Ierusalema. Na avea Maria ma tinā o Iesu. Sa galulue faatasi Ieova ma nei tagata faamaoni ma isi e faataunuu lona finagalo.

5. O le ā le galuega e mafai ona fai ai so tatou sao, ma pe e mafai e Ieova ona faia lea galuega na o ia? (Tagaʻi i le ata i luga aʻe o le matua.)

⁵ I aso nei, ua valaaulia i tatou e Ieova ina ia lagolagoina atoatoa le Malo faa-Mesia. E tele vala o la tatou auaunaga paia. E lē tutusa auala e auauna ai Kerisiano uma, ae o i tatou uma lava e mafai ona fai se sao i le talaʻiga o le tala lelei o le Malo. E mafai lava e Ieova ona faia na o ia lenei galuega. E mafai ona ia fetalai tuusaʻo mai i tagata i le lalolagi. Na fetalai Iesu e mafai e Ieova ona faapogaia maa e alalaga atu e faatatau i le Tupu o lona Malo. (Luka 19:37-40) Peitaʻi, ua faataga e Ieova i tatou e avea ma ana “ʻaufaigaluega.” (1 Kori. 3:9) Na tusi le aposetolo o Paulo: “I le galulue faatasi ma ia, ua matou ʻaiʻoi atu ai foʻi iā te outou, e aua neʻi talia le agalelei faifua o le Atua, ma misia ai lona fuafuaga.” (2 Kori. 6:1) O se faaeaga tautele ma olioli ai le valaaulia o i tatou e Ieova e galulue faatasi ma ia. Aiseā?

6. O ā faalogona o le Alo ulumatua o le Atua a o galulue ma lona Tamā?

⁶ E mai lava i le amataga, o le galulue ma le Atua e maua ai e ana auauna le fiafia. A o leʻi afio mai le Alo ulumatua o le Atua i le lalolagi, na ia fetalai: “O Ieova lava na faia aʻu, o le amataga o lona ala . . . na ou faatasi ma ia o se tufuga poto, na avea foʻi aʻu ma lē na ia matuā fiafia i ai i lea aso ma lea aso, na ou fiafia foʻi i ona luma i taimi uma.” (Faata. 8:22, 30) A o galulue Iesu ma lona Tamā, na fiafia o ia ona o mea na ia faataunuuina, faapea lona iloaina o le alofa o lona Tamā iā te ia. Ae faapefea i tatou?

7. Aiseā e tatou te olioli ai i le galuega talaʻi?

⁷ Na fetalai Iesu e sili le fiafia e maua i  le foaʻi atu nai lo o le talia mai. (Galu. 20:35) E tatou te olioli ona ua tatou maua le upu moni ma tufa atu foʻi i isi. A o talaʻi atu upu moni o le Tusi Paia i isi, e tatou te iloa le olioli o ē galala faaleagaga ona ua amata ona latou malamalama i upu moni o le Tusi Paia ma maua se faiā lelei ma le Atua. E pāʻia ai o tatou loto i le vaai atu ua suia o latou mafaufauga ma olaga. E tatou te iloa ai e tāua le talaʻiga o le tala lelei. Ua tatala ai le auala o le ola e faavavau mo i latou ua toe lelei ma le Atua. (2 Kori. 5:20) E leai se isi galuega sili ona faamalieloto nai lo o le fesoasoani i tagata e maua le ola e faavavau.

8. O ā faamatalaga a nisi e faatatau i le fiafia ona o le galulue ma Ieova?

⁸ E ui e tatou te fiafia pe a tali lelei mai tagata i la tatou feʻau, ae e tatou te olioli foʻi i le iloaina o loo tatou faafiafiaina le finagalo o Ieova. E na te talisapaia a tatou taumafaiga e auauna iā te ia. (Faitau le 1 Korinito 15:58.) Ua faapea mai Marco e nofo i Italia: “Ua ou maua le olioli i le iloaina o loo oʻu faia le mea silisili mo Ieova ae lē o se tagata, auā e galo i le tagata mea ou te faia.” Ua faapea mai foʻi Franco, mai i Italia: “E ala mai i lana Afioga ma ana sauniuniga faaleagaga, ua faamanatu mai ai e Ieova i aso uma lona alofa mo i tatou. E tāua iā te ia mea uma o loo tatou faia mo ia, e ui lava e foliga mai e lē o aogā a tatou taumafaiga. O le pogai lea ua avea ai le galulue ma le Atua o se mea e faafiafiaina ai aʻu, ma ua iai se faamoemoe i loʻu olaga.”

9. Na faapeʻī le faiā a Ieova ma Iesu, ma aiseā?

⁹ Pe a galulue ma ē tatou te alolofa i ai, e tatou te māfana atu ai iā i latou ma iloa lelei ai i latou ma o latou uiga. Ua tatou iloa mea o loo latou mananaʻo e faataunuuina ma le auala e faatino ai. Na galulue Iesu ma Ieova pe ā ma le faitau piliona tausaga, ma na matuā malosi le alofa i lo laʻua va. Na fetalai Iesu e faatatau i la laʻua faiā māfana: “E tasi i maʻua ma le Tamā.” (Ioa. 10:30) Na la olioli i se faiā matagofie ma galulue ma le autasi.

10. Aiseā ua tatou vavalalata atu ai i le Atua ma isi ona o le talaʻiga?

¹⁰ Na tatalo Iesu iā Ieova ina ia leoleo i ona soo. Aiseā? Na ia tatalo: “Ina ia tasi i latou e pei o i taʻua.” (Ioa. 17:11) Pe a tatou ola i tapulaa a le Atua ma faia se sao i le talaʻiga, e tatou te malamalama ai i ona uiga lelei. E tatou te aʻoaʻoina ai le māfuaaga e tāua ai le maufaatuatuaina o ia ma mulimuli i lana taʻitaʻiga. A o tatou vavalalata atu i le Atua, e vavalalata mai foʻi o ia iā i tatou. (Faitau le Iakopo 4:8.) E tatou te vavalalata atu foʻi i o tatou uso ma tuafāfine faaleagaga, auā e tutusa luʻi, sini ma mea e tatou te fiafia ai. E tatou te  galulue, olioli ma tutumau faatasi. Ua faapea mai Octavia mai i Peretania: “O le galulue ma Ieova ua atili ai ona matou vavalalata ma isi, ona e tutusa o matou sini ma taʻiala i le olaga.” Pe e faapena ou faalogona? Pe e te lē vavalalata atu i isi pe a e iloa a latou taumafaiga e faafiafia Ieova?

11. Aiseā o le a atili ai ona tatou māfana atu iā Ieova ma o tatou uso i le lalolagi fou?

¹¹ E malosi le fusi o le alofa lea tatou te olioli ai ma le Atua ma o tatou uso, ae o le a atili ona faamalosia i le lalolagi fou. Faauta i galuega matagofie o le a tatou faia i le lumanaʻi! O le a tatou faafeiloaʻia ē o le a toetutū ma aʻoaʻoina i latou i ala o Ieova. O le a liua le lalolagi e avea ma parataiso. O le a tele galuega, ae maʻeu le olioli o le galulue faatasi ma faasolosolo ina ausia le tulaga lelei atoatoa i lalo o le pulega o le Malo faa-Mesia. O le a māfana a tatou faiā ma tagata faapea la tatou faiā ma le Atua, o Lē e “faamalie le manaʻo o mea ola uma lava.”—Sala. 145:16.

12. E faapefea ona avea le talaʻiga o se puipuiga?

¹² E manaʻomia ona puipuia lo tatou itu faaleagaga. Talu ai o loo tatou ola i se lalolagi e pulea e Satani le Tiapolo ma e tatou te lē lelei atoatoa, e faigofie ai la ona tatou atiaʻe mafaufauga sesē ma amioga a le lalolagi. E ono faatusa le agaga o le lalolagi i se au o le sami o loo tuleia i tatou i se itulagi tatou te lē mananaʻo e ō i ai. E tatau ona tatou aau malosi ina ia lē tafetafea ai. I se tulaga talitutusa, e manaʻomia foʻi taumafaiga malolosi ina ia lē tafefea ese ai ona o le agaga o le lalolagi a Satani. Pe a tatou talaʻi atu i isi, e tatou te taulaʻi atu i le tāua ma le aogā o mataupu faaleagaga, ae lē o mea e faavaatuʻia ai lo tatou faatuatua. (Fili. 4:8) O le talaʻiga, e faamalosia ai lo tatou faatuatua, auā e faamanatu mai ai folafolaga a le Atua ma ana tapulaa alofa. E fesoasoani foʻi e tausia ai lo tatou ofutau faaleagaga.—Faitau le Efeso 6:14-17.

13. O ā faalogona o se Molimau i Ausetalia e faatatau i le talaʻiga?

¹³ Afai e tatou te pisi i le talaʻiga ma isi gaoioiga faaleagaga, ua leai la se taimi tatou te soona popole ai i o tatou faafitauli. O le a puipuia ai i tatou. Ua faapea mai Joel, e nofo i Ausetalia: “Ua fesoasoani le galuega talaʻi iā te aʻu e iloa ai mea o loo tutupu moni i olaga o tagata. Ua faamanatu mai ai iā te aʻu luʻi o loo fesagaʻia e tagata, ma aogā ua ou maua ona o le faatatauina o taʻiala a le Tusi Paia i loʻu olaga. Ua fesoasoani le talaʻiga iā te aʻu e lotomaulalo ai, ua ou maua ai foʻi le avanoa e faalagolago ai iā Ieova ma oʻu uso ma tuafāfine.”

14. E faapefea i lo tatou tutumau i le galuega talaʻi ona faamaonia ai o loo iā i tatou le agaga o le Atua?

¹⁴ E faamalosia foʻi e le talaʻiga lo tatou mautinoa e faatasi mai le agaga o le Atua iā i tatou. Seʻi manatu i le faataʻitaʻiga lenei: Seʻi faapea o lau galuega o le tufatufaina atu o falaoa i tagata i lo outou vaipanoa. E lē totogia oe ma e tatau ona e totogia au tupe faaalu. Ua e iloa o le toʻatele o tagata e lē mananaʻo i falaoa ma ua feita nisi iā te oe ona o le tufatufaina atu o falaoa. O le ā le umi o le a e galue ai pea i lenā galuega? O le a e lagona le lotovaivai ona o le lē tali lelei mai o tagata, ma atonu o le a e tuua ai le galuega. O le toʻatele o i tatou, sa tutumau i le faiva mo le  tele o tausaga ma sa faaalu ai a tatou lava tupe, e ui i tauemuga ma le feita mai o tagata. Pe e lē faamaonia ai ea le fesoasoani mai o le agaga o le Atua iā i tatou?

15. E faapefea ona fesootaʻi le talaʻia o le tala lelei ma le finagalo o le Atua mo tagata?

¹⁵ Seʻi mafaufau i le auala e fesootaʻi ai le talaʻia o le tala lelei ma le finagalo o Ieova mo tagata. Na finagalo o ia e nonofo tagata i le lalolagi e aunoa ma le oti. E ui na agasala Atamu ae e leʻi suia ai le finagalo o Ieova. (Isa. 55:11) Nai lo o lea, na ia faia se faatulagaga ina ia laveaʻiina ai tagata mai i le agasala ma le oti. Na afio mai Iesu i le lalolagi ma faataulaga lona ola mo tagata usiusitaʻi, ina ia faataunuuina ai le finagalo o le Atua. O lea, sa manaʻomia ona latou malamalama i mea o loo faafinagaloina e le Atua. Na aʻoaʻo foʻi e Iesu tagata i mea o loo faatalitalia mai e le Atua, ma sa ia faatonuina ona soo ia faia faapea. O le fesoasoani i isi ia lelei ma le Atua, ua faia ai so tatou sao i lana faatulagaga alofa o le laveaʻiina o tagata mai i le agasala ma le oti.

16. E faapefea ona fesootaʻi la tatou talaʻiga ma poloaʻiga silisili a le Atua?

¹⁶ Pe a tatou fesoasoani i isi ia maua le ola e faavavau, ua faaalia ai e tatou te alolofa iā i latou. E tatou te alolofa foʻi iā Ieova “o lē e finagalo ina ia faaolaina ituaiga uma o tagata, ma ia maua le poto saʻo i le upu moni.” (1 Timo. 2:4) Ina ua fesiligia Iesu po o le ā le poloaʻiga silisili na tuu atu i le nuu o Isaraelu, na ia fetalai: “ʻIa e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.’ O le poloaʻiga silisili ma le muamua lenā. E faapena foʻi le poloaʻiga lona lua, ʻIa e alofa atu i lou tuaoi e pei o oe lava iā te oe.’” (Mata. 22:37-39) O le faia o se sao i le talaʻiga, ua faaalia ai lo tatou usiusitaʻi i nei poloaʻiga.—Faitau le Galuega 10:42.

17. O le ā sou lagona e faatatau i le faaeaga o le talaʻia o le tala lelei?

¹⁷ Maʻeu le faamanuiaina o i tatou! Ua aumaia e Ieova se galuega e tatou te maua ai le fiafia, e vavalalata atu ai iā te ia ma isi, ma e puipuia ai i tatou faaleagaga. Ua aumaia ai foʻi iā i tatou le avanoa e faaalia ai le alofa i le Atua ma isi. E matuā eseese lava tulaga o tagata o le Atua i le lalolagi aoao. E tusa pe e matutua pe lāiti, mauʻoa pe matitiva, malolosi pe vaivai, ae o loo maumauaʻi le faitau miliona o i latou e faailoa atu lo latou faatuatua i isi. Atonu e tutusa o oulua manatu ma Chantel, lea e nofo i Falani. Ua ia faapea mai: “Ua fetalai mai iā te aʻu Lē e Sili ona malosi i le vateatea, Lē na faia mea uma, o ia o le Atua fiafia: ʻIa alu ma tautala e faatatau iā te aʻu mai i lou loto. Ou te avatu iā te oe le malosi, o laʻu Upu le Tusi Paia, o le lagolagosua a agelu, o aumea lelei, o toleniga, ma faatonuga maʻoti i le taimi talafeagai.’ Maʻeu se faaeaga tele o le faia o le mea o loo faafinagaloina e Ieova ma ia galulue faatasi ma le Atua!”