E rangi ni kaan ma tamana neie Bebe. Ao taeka akekei bon ana taeka raoraoia, ma e noria neiei bwa a bon aki karaunano taeka aikai ma a rangi ni kauruakinano. E aki toki n iango ni kangai: “Bon tiaki te kabanea n tamaroa matena.” Ngkana e ururinga te baere e riki arei Bebe tabeua te ririki imwina, ao e oti bwa e bon teimatoa naba n nanokawaki.

N aron ae e kakoauaa Bebe, e kona ni maan te tai n nanokawaki, moarara riki ngkana te aomata are e mate e rangi ni kaan ma ngkoe. E bon tau ngke e aranaki te mate n te Baibara bwa “te tia kairiribai are te kabane.” (1 I-Korinto 15:26) E rinnakoi maiura te mate n akea ae kona n tukia, man uotiianako raora aika tangiraki iroura, ao n angiin te tai ti bon aki tauraoi imwaina. Ti bane n rotaki n ana urubwai. Ngaia are ti aki mimi ngkana ti a manga taonakinako n te nanokawaki ngkana iai ae mate.

Ko bae n titiraki ni kangai: ‘Kaanga maanra ao e na toki te nanokawaki ae korakora? E na kangaa te aomata ni kekeiaki ribuakon te nanokawaki ae korakora? N na kangaa ni kabebetei nanoia akana nanokawaki ni maten raoia? Iai te kantaninga ibukia raora aika tangiraki ake a mate?’