Bebe i wa ranzana nguvu ni papai wakwe. I hlevelwe magezu lawo hi wasati a nga hi munghana wa hombe wa laha kaya kabye, kanilezi ma lo mu tlhava wutshanwini go mu khongotela. “A kufa kakwe ku lo neha kukarateka ntsena,” hi lezo Bebe a nga tshama hi ku wula. A xikhati lexi Bebe a nga hlawutela a ximaho lexo ka bhuku go kari na ku hunzile malembe, zi dlunyatekile lezaku a kufa loko ku wa ha mu bayisa.

Hi laha Bebe a nga zi wona hi kona, a kukarateka hi kota ya kufelwa zi nga teka xikhati xo leha, nguvunguvu loku loyi a fileko ni loyi a felweko va vile vanghana. A Biblia gi wula hi kona loku giku: A kufa i “nala wo gumesa.” (1 Va Le Korinte 15:26) A kufa ku tala ku humelela na hi nga zi rinzelangi, ku hi hambanyisa ni vanhu hi nga va ranza nguvu. A ku na munhu a hulukako ka makhombo ya kona. Hikwalaho, a zi hlamalisi loku hi djudjiwa kupima hi tlhela hi vumala ni xo maha hi kota ya kufelwa ni wuyelo ga kona ga bihela ga cima.

Kuzilava wa ti wutisa uku: ‘A munhu i mbheta xikhati muni na a ha karatekile hi kota ya kufelwa? A nga zi kotisa kuyini a ku yimisana ni kukarateka loko? Nzi nga va chavelelisa kuyini lava va felweko? Xana a maxaka ya hina ma fileko ma ta vuka hi tlhela hi ma wona?’