Jich albot yuʼun jtul yamiga te ma yuʼunuk ay bin chopol ay ta yoʼtan-a te kʼalal jich la yale. Jaʼukmeto ta skaj te kʼayem ta lek sok stat te Bebe, te kʼalal jich albot yuʼun te yamigae maba mukʼubtesbot yoʼtan yuʼun, jaʼ lajinotxan. Bayal buelta jich la sjojkʼoybey sba: «¿Bin-utʼil te jaʼ lek te bin kʼot ta pasele?». Bayal jaʼbil ta patil la stsʼibay ta jpajk libro te bin kʼax ta swentae, jaʼ-abi ya yakʼ ta naʼel te yakto ta woklajel yuʼun-a te machʼa laj yuʼune.

Te bin kʼax ta skuxlejal te Bebe ya yakʼ ta ilel te ya xkʼax bayal tiempo ta swenta ya xchʼay bael te skʼuxul mel-oʼtane, kʼaxto-a te kʼalal jaʼ ya xlaj te machʼa jun koʼtan jbatik soke. Jaʼ yuʼun ma yan-nuknax ya kaʼiytik te kʼalal ya yal ta Biblia te jaʼ «slajibal jcontrahinwanej» te lajele (1 Corintios 15:26). Animal ya xtal sjin te jkuxlejaltik te lajele sok ma spisiluk-ora ya sjultes ta koʼtantik te kʼalal ya smil te machʼa kʼax kʼux ta koʼtantike. Maʼyuk machʼa ya xkol ta skʼab. Jaʼ yuʼun stalel te ma jnaʼtik bin ya jpastik ta swenta te lajel sok te wokoliletik ya yakʼe.

Ayniwan ajojkʼoybeyoj aba: «¿Jayeb tiempo ya xkʼax swenta ya xchʼay bael te skʼuxul mel-oʼtane? ¿Bin ya skʼan pasel swenta ya xjuʼ ta tsʼikel? ¿Bin–utʼil ya xjuʼ ya jkoltaytik te machʼa yak ta yaʼiybeyel skʼuxul te mel-oʼtane? ¿Aybal bin ya xjuʼ ya smaliyik te machʼatik lajemikix te kʼux ta koʼtantike?».