Eie ua katele kiá? Nange ki ku bhiti izuua iavulu, ua disanze, nange ua jimbile kiá o ndolo. Maji kiki ki kiene ki bhita ni ndolo ijila mu kufunda ndandu. Mu divulu diê dia lungu ni kudibhana ni ndolo ia kufunda (Healing a Spouse’s Grieving Heart) O ngijiie ngana Alan Wolfelt ua soneka-mu kuila, “o ndolo ijila mu kufunda ndandu ki i bhu. Maji mu kubhita thembu, ni kikuatekesu kia akuenu, o ndolo ia-nda sosoloka.”

Mu kifika, tala kiebhi kia divu Mbalahamu kioso muhatu’ê kiafu. O Bibidia i zuela kuila, “Mbalahamu anga uiza kudila thambi ia Sala.” O kizuelu “anga” kilombolola kuila kua bhitile thembu iavulu kiene ngó Mbalahamu kia tenene kudivua kiambote. * O musoso ua mukuá ua lungu ni Jakobo, a mu nganele kuila mon’ê Zuze a mu jibhile ku kiama kia mu xitu. Muéne ua didi “mu izuua iavulu,” muiji uê ka tenene ku mu konda o malamba. Kua bhitile mivu iavulu, maji Jakobo ua kexile hanji mu kuívua ndolo mukonda dia mon’ê Zuze.​—Dimatekenu 23:2; 37:34, 35; 42:36; 45:28.

Kiene ué kiene mu divua o athu lelu kioso kia funda ndandu. Tu tange o misoso ia athu kiiadi.

• “Muadi uami, Robert ua fu mu kizuua kia 9 kia mbeji ia Kavua ka 2008. Mu kamene kioso kiafu, tua balumuka, tua matala mukonda kiexile kifua kietu, kumatala ande dia kuia ku salu, tua dibhana jinzóbole, tua dibhubhala, ‘etu tua dilekela.’ Kua bhitile samanu dia mivu, o ndolo ia kexile hanji ku muxima uami. Manhí se hádia o ndolo ia-nda bhua.”​—Gail uala ni 60 a mivu.

• “Tundé kiafu kazola kami, kua bhiti kiá 18 dia mivu, maji ngala hanji ni ngunzu iavulu, ngi dila hanji kiavulu. Kioso ki ngi mona kima kia uabha, kála kithulu, ngi banza kua muéne kuila ueji sanguluka kiavulu mu kumona o kima kia uabha ki nga mu tala.”​—Etienne uala ni 84 kia mivu.

Mu kidi ki kima kia iibha kukala ni kikote ku muxima, mukonda dia ndandu ietu uafu. Kala muthu uala ni ukexilu uê ua kudila thambi, kienhiki kikôla ku a fundisa. Ki tu tokala kudivua kia iibha ni ukexilu uetu ua kudila. Kiebhi ki tu tena kukolokota se tuala ni kikote ku muxima?