Yu dɔn ɛva sik fɔ shɔt tɛm? Sɔntɛm yu wɛl kwik kwik wan ɛn fɔgɛt bɔt ɔl wetin bin apin to yu. Bɔt di pen we pɔsin kin fil we in pɔsin day difrɛn frɔm di pen we pɔsin de fil we i sik. Wan dɔktɔ we nem Alan Wulfɛlt bin rayt wan buk we gɛt di taytul Healing a Spouse’s Grieving Heart. Insay da buk de, i bin rayt se: “I nɔ pɔsibul fɔ lɛ sɔmbɔdi fɔgɛt in pɔsin we dɔn day.” Bɔt i kɔntinyu fɔ tɔk se: “As tɛm de go ɛn we ɔda pipul dɛn de sɔpɔt yu, yu go bigin fɔ bia di pen.”

Fɔ ɛgzampul, lɛ wi tɔk bɔt aw Ebraam bin fil we in wɛf we na Sera day. Di Baybul se: “Ebraam fil am bad ɛn kray fɔ am.” We di Baybul se Ebraam “fil am bad,” i sho se i tek lɔng tɛm fɔ lɛ i bia we in wɛf day. * Wan ɔda ɛgzampul na Jekɔb, we dɛn bin lay pan se wan wayl animal dɔn kil in bɔy pikin we na Josɛf. Jekɔb kray “fɔ lɔŋ” tɛm, ɛn in fambul dɛn nɔ bin ebul fɔ kɔrej am. Afta lɔng tɛm dɔn pas, Jekɔb bin stil de tink bɔt in pikin Josɛf we bin dɔn day.—Jɛnɛsis 23:​2; 37:​34, 35; 42:​36; 45:​28.

Dis sem tin kin apin to bɔku pipul dɛn we de kray fɔ di wan dɛn we dɛn lɛk we dɔn day. Lɛ wi tɔk bɔt dɛn tu ɛgzampul ya.

• “Mi man, Rɔbɔt, bin day Julay 9, 2008. Da mɔnin de we i day pan aksidɛnt nɔ bin difrɛn frɔm ɛni ɔda de. Afta wi it da mɔnin de, wi kis, wi ɔg wisɛf, ɛn tɛl wisɛf se, ‘A lɔv yu,’ jɔs lɛk aw wi kin du ɛni mɔnin bifo i go wok. Pan ɔl we i dɔn pas siks ia, di pen stil de na mi at. A nɔ tink se a go ɛva fɔgɛt Rɔb.”—Gel, i ol 60 ia.

• “Pan ɔl we i dɔn pas 18 ia we mi wɛf dɔn day, a stil de mis am ɛn a kin fil am. Ɛnitɛm we a si fayn tin dɛn we Gɔd mek, a kin mɛmba am. A nɔ kin ebul stɔp fɔ tink bɔt aw i fɔ dɔn ɛnjɔy fɔ si di tin dɛn we a de si.”—Etyɛn, i ol 84 ia.

Wi dɔn si klia wan se i nɔmal fɔ lɛ wi at pwɛl fɔ lɔng tɛm we pɔsin we wi lɛk day. Ɔlman in at kin pwɛl difrɛn we we in pɔsin day, so i nɔ go mek sɛns fɔ jɔj di we aw ɔda pipul dɛn kin fil we bad tin apin to dɛn. Ɛn wi nɔ fɔ vɛks pan wisɛf if wi si se wi at pwɛl pasmak ɔ wi de kray bad bad wan. Wetin go ɛp wi fɔ bia we wi pɔsin day?