Bo a yega di bira malo pa un tempo cortico? Kisas bo a recupera asina lihe cu bo a lubida cu bo tabata malo. Pero, e dolor cu bo ta sinti ora bo perde un ser keri no ta asina. Dr. Alan Wolfelt a skirbi den su buki Healing a Spouse’s Grieving Heart: “E tristeza di perde un ser keri no ta algo cu ta bay asina asina.” Pero el a agrega: “Cu tempo y cu yudansa di otro hende, bo dolor lo bira menos.”

Por ehempel, wak con e patriarca Abraham a reacciona ora su esposa a muri. E texto original di Bijbel ta bisa cu “Abraham a cuminsa tene rouw pa Sara y yor’e.” E expresion “a cuminsa” ta duna e idea cu a tuma tempo pa e trata cu e perdida di su esposa. * Un otro ehempel ta Jacob, kende a kere cu ta un bestia salbahe a mata su yiu homber Jozef, sin sa cu ta gaña nan a gañ’e. El a tene rouw pa “hopi dia”, y su famia no por a consol’e. Hopi aña despues, ainda e tabata corda e morto di su yiu.—Genesis 23:2; 37:34, 35; 42:36; 45:28.

Awe ta mescos. Hopi hende ta sufri debi na morto di un ser keri. Wak e siguiente ehempelnan.

• “Mi esposo, Robert, a fayece den un accidente dia 9 di juli 2008. E dia ey tabata un dia mescos cu cualkier otro dia. Despues cu nos a desayuna, nos a haci loke semper nos tabata haci ora e tabata sali pa bay trabou; nos a duna otro un brasa y un sunchi y a bisa otro ‘mi stima bo.’ Seis aña a pasa y ainda mi ta sinti e dolor di e perdida di Rob. Mi no ta kere cu un dia lo mi supera e dolor di a perd’e.”—Gail di 60 aña.

• “Aunke mi esposa stima a fayece mas cu 18 aña pasa, ainda mi ta tristo y ta sinti su falta. Cada biaha cu mi mira algo bunita den naturaleza, mi ta corda riba dje, y mi no por keda sin pensa cuanto lo el a disfruta di mira loke mi ta mira.”—Etienne di 84 aña.

Claro cu ta natural cu nos ta sinti dolor, y e sintimentonan ey no ta kita facil. Cada persona ta trata cu tristeza na su mes manera, y lo no ta sabi pa husga otro hende pa e manera cu nan ta reacciona riba un tragedia. Pero na mes momento, nos mester evita di sinti nos mes malo si e manera cu nos ta reacciona ta parce di ta un poco exagera. Awor, kico por yuda nos trata cu e tristeza di perde un ser keri?