Dhibbu shiima yanna calla quuxxi asse dhiwe egenninohe? Mulenni huroottoha ikkiro, hakkawote assiheta hawoottoha ikkara dandaanno. Shiiˈne xissiisiˈra kayinni hakkiinni saˈinote. Dr. Alaani Wulfelti galte shiirino manna sheshifachinshanni gara kulanno maxaafisi giddo togo yiino: “‘Xisso hawa’ didandiinanni.” Ikkirono isi lede togo yiino: “Yanna saˈanni hadhu kiironna wolu manni kaaˈlonni xissoˈne ajjanni hadhanno.”

Hanni Abirihaami minaamasi shiiri wote macciishshaminosire hedi. Qullaawu Maxaafi “Abirihaamino Saarara wiˈle lowo geeshsha manchiti” yaanno. “Manchiti” yaanno qaali isi xissiisiˈre mito geeshshi yanna keeshshinota leellishanno. * Hattoo coyi tuncu yiinosihu wolu manchi Yaiqoobiiti; iso beettosi Yooseefi moyichu itino yine dongoonnisi. Isi “lowo barra” dadillino, hattono minisi manni sheshifachishinosiha ikkirono sheshifata hoogino. Yaaiqoobi lowo diri gedensaanni nafa Yooseefi reyo qaaganni xissiisiˈra diagurino.―Kalaqama 23:2; 37:34, 35; 42:36; 45:28.

Yannankerano batinyu manni baxanno mancho shiiranno wote seeda yanna xissiisiˈranno. Hanni aane nooha lame lawishsha laˈno.

• “Minaanniˈya Rooberti reyinohu Maaja 9, 2008nniiti. Reyote geeshsha iillishshanno dano tuncu yitusi barra, hatte soodo bashshowiinni baxxinore assinoommori dino. Afoo seekkiˈne kaˈne bashsho isi loosoho haˈranno wote assineemmonte gede mimmito sunqine, rimmi assine mimmito ‘Baxeemmohe’ yineennalla isi loosoho haˈrino. Lewu diri gedensaannino, hatti xisso wodaniˈya giddonni dibaˈino. Roobiˈya shiire xissiisiˈroomma xisso haweemmaha dilawannoe.”—Geeli, 60 diriti.

• “Muxxe minaamaˈya shiirummonku 18 diri sainoha ikkirono, xaa geeshsha ise qalli assitannoe; hattono ise shiiraˈya xissiissannoe. Mitto kalaqamunni biifado ikkinore laummo kiiro ise qaageemmo; hattono ani laˈˈanni noommore laˈoommero lowo geeshsha hagiidhitanno yee hedeemmo.”—Etiyeeni, 84, dirihu.

Seeda yanna xissiisiˈra nooreentilla. Mittu mittunku manchi caacce fulanno gari babbaxxara dandaanno; hakko daafira wolu manchi dadillisanno coyi iilleennasi xissiisiˈranno gara misha hayyo diˈˈikkitino. Qoleno quwa saˈne xissiisiˈnoommoha lawinkero ninkeneeto bushiisha dihasiissannonke. Ikkina xisso dandiine heeˈnannihu ma garinniiti?