SIHLOKO LESINGUMGOGODLA | NAKUFA UMUNTFU LOMTSANDZAKO
Kubi Yini Kuva Buhlungu Nawufelwe?
Uke wabanjwa yini kugula sikhashana? Mhlawumbe washeshe welulama, sewuze ukhohliwe nekutsi uke wagula. Buhlungu lobuvako nawufelwe abusinjalo. Encwadzini yakhe lenesihloko lesitsi Healing a Spouse’s Grieving Heart, Dr. Alan Wolfelt utsi: “Buhlungu bekufelwa abupheli.” Kodvwa uchubeka atsi: “Ngekuhamba kwesikhatsi buba ncono nangabe kunebantfu labakudvudvutako.”
Nasi sibonelo: Ngesikhatsi Abrahama afelwe ngumkakhe liBhayibheli litsi, “Abrahama wakhalela umkakhe, Sara.” Kubonakala shengatsi kwaphela sikhatsi lesidze Abrahama solo eva buhlungu ngekufelwa ngumkakhe. * Jakobe naye weva buhlungu ngesikhatsi bamyengile kutsi indvodzana yakhe Josefa idliwe silwane sesiganga. “Walilela lendvodzana yakhe emalanga lamanyenti” futsi ngesikhatsi bantfwana bakhe bamdvudvuta, akazange advudvuteke. Ngisho nobe besekuphele iminyaka leminyenti kutsiwa Josefa ufile, Jakobe bekasolo eva buhlungu.—Genesisi 23:2; 37:34, 35; 42:36; 45:28.
Abrahama walila ngesikhatsi kufe umkakhe lamtsandzako, Sara
Nalamuhla banyenti labeva buhlungu sikhatsi lesidze ngenca yekutsi bafelwa ngumuntfu labamtsandzako. Nati tibonelo:
-
“Indvodza yami Robert yashona mhlaka 9 July 2008. Lilanga Robert lafa ngalo belifana nalamanye emalanga. Njengasemihleni, ngemuva kwekudla, wangivalelisa, wangicabuza, wangitjela kutsi uyangitsandza wase uyahamba uya emsebentini. Sekuphele iminyaka lesitfupha umyeni wami ashona, kodvwa solo ngiva buhlungu. Angicabangi kutsi ngiyoke ngikukhohlwe kufa kwaRob.”—Gail, loneminyaka lengu-60.
-
“Ngisho nobe sekuphele iminyaka lengu-18 umkami ashona, nanyalo solo ngisamkhumbula futsi ngiseva buhlungu. Njalo nangibona intfo lenhle ngivele ngikhumbule yena, ngicabange kutsi bekangajabula kangakanani kubona lentfo lenhle lengiyibonako.”—Etienne, loneminyaka lengu-84.
Kuyabonakala kutsi kuyintfo levamile kuva buhlungu sikhatsi lesidze nasifelwe. Indlela lesenta ngayo nasiva buhlungu ayifani, ngako akusiko kuhlakanipha kutsi nangabe lomunye eva buhlungu sitsi uyatentisa, kufanele ngabe sewukwengcisile. Natsi akukafaneli sive ngatsi sesenta kakhulu nangabe sekuphele sikhatsi lesidze solo siva buhlungu. Singachubeka njani nemphilo ngisho nobe siva buhlungu bekufelwa?
^ sig. 4 Na-Isaka, indvodzana ya-Abrahama, weva buhlungu sikhatsi lesidze ngekufelwa. Njengobe sitawubona esihlokweni lesitsi “Lingisa Kukholwa Kwabo” lesikulomagazini, Isaka abesolo eva buhlungu ngekushona kwamake wakhe Sara, ngisho nobe besekuphele iminyaka lemitsatfu ashona.—Genesisi 24:67.
