کیا کبھی ایسا ہوا ہے کہ آپ بیمار ہوئے ہوں اور بہت جلد ٹھیک بھی ہو  گئے  ہوں؟‏ شاید اب آپ کو وہ وقت یاد بھی نہ ہو۔‏ لیکن کسی عزیز کی موت کے غم کو بُھلا‌نا اِتنا آسان نہیں ہوتا۔‏ اِس سلسلے میں ڈاکٹر ایلن وول‌فالٹ نے اپنی ایک کتاب میں لکھا:‏ ”‏غم کو بُھلا‌نا ممکن نہیں ہوتا البتہ وقت کے ساتھ ساتھ اور دوسروں کی مدد سے اِس کی شدت کم ضرور ہو جاتی ہے۔‏“‏‏—‏جیون ساتھی کی موت کے صدمے سے اُبھرنا ‏(‏انگریزی میں دستیاب)‏۔‏

اِس سلسلے میں ابراہام نبی کی مثال پر غور کریں۔‏ جب اُن  کی  بیوی  سارہ  وفات  پا گئیں تو اُنہوں نے بہت ماتم کِیا۔‏ پاک کلام میں بتایا گیا ہے کہ ’‏ابرہام نے سارہ کے لیے ماتم اور نوحہ کِیا۔‏‘‏ دراصل عبرانی زبان میں یہ آیت یوں ہے:‏ ”‏ابراہام نے سارہ کے لیے ماتم اور نوحہ کرنا شروع کِیا۔‏“‏ اِصطلا‌ح ”‏شروع کِیا“‏ سے پتہ چلتا ہے کہ ابراہام اپنی بیوی کی موت پر کچھ عرصے تک ماتم کرتے رہے۔‏ * دوسری مثال یعقوب نبی کی ہے۔‏ اُنہیں یہ بتایا گیا کہ اُن کے بیٹے یوسف کو کسی جنگلی جانور نے ہلا‌ک کر دیا ہے۔‏ وہ ”‏بہت دنوں تک“‏ اپنے بیٹے کے لیے ماتم کرتے رہے اور اُن کے گھر والے اُنہیں تسلی نہ دے پائے۔‏ اِس واقعے کے کئی سال بعد بھی یعقوب کے دل میں یوسف کی موت کا غم تازہ تھا۔‏—‏پیدایش 23:‏2؛‏ 37:‏34،‏ 35؛‏ 42:‏36؛‏ 45:‏28‏۔‏

آج‌کل بھی جب لوگوں کے عزیز موت کی وجہ سے بچھڑ جاتے ہیں تو وہ بہت دیر تک غم میں مبتلا رہتے ہیں۔‏ اِس سلسلے میں دو مثالوں پر غور کریں۔‏

• ‏”‏میرے شوہر رابرٹ 9 جولائی 2008ء کو فوت ہوئے۔‏ اُس دن کی شروعات بھی باقی دنوں کی طرح ہوئی۔‏ روز کی طرح ناشتے کے بعد ہم نے ایک دوسرے کو چُوما،‏ گلے لگا‌یا اور آئی لوَ یو کہا۔‏ رابرٹ کو فوت ہوئے چھ سال ہو چُکے ہیں لیکن اُن کی موت کا غم آج بھی مجھے ستاتا ہے۔‏ مجھے نہیں لگتا کہ مَیں اُنہیں کبھی بُھلا پاؤں گی۔‏“‏—‏60 سالہ گیل۔‏

• ‏”‏حالانکہ میری بیوی کو فوت ہوئے 18 سال ہو گئے ہیں لیکن آج بھی اُسے یاد کر کے میری آنکھیں نم ہو جاتی ہیں۔‏ جب بھی مَیں کسی خوب‌صورت چیز کو دیکھتا ہوں  تو  سوچنے لگتا ہوں کہ اگر وہ اِس چیز کو دیکھتی تو کتنی خوش ہوتی۔‏“‏—‏84 سالہ اٹین۔‏

لہٰذا اپنے پیاروں کی موت کے غم میں مبتلا رہنا ایک فطری  بات  ہے۔‏  لوگ اپنے غم کا اِظہار فرق فرق طریقوں سے کرتے ہیں۔‏ اِس لیے ایک شخص کسی اپنے کی موت پر جیسا بھی ردِعمل ظاہر کرے،‏ ہمیں اُس پر تنقید نہیں کرنی چاہیے۔‏ اور اگر ہم اپنے کسی عزیز کی موت پر بہت ماتم کرتے ہیں اور غم میں مبتلا رہتے ہیں تو ہمیں یہ نہیں سوچنا  چاہیے کہ ایسا کرنا غلط ہے۔‏ تو پھر سوال یہ ہے کہ ہم اپنے غم پر قابو کیسے پا سکتے ہیں؟‏