Tika dong inino mo iwinyo ni pe tye kony mo ma itwero miyone bot ngat ma tye ka kumo pien orwenyo danone me amara i to? I cawa mukene nongo pe wangeyo gin ma omyero wawaci nyo watim​—dok man weko pe wawaco nyo bene pe watimo gin mo keken pi ngat meno. Ento tye jami mogo me kony ma watwero timone.

Pol kare, gin ma mitte aye me bedo tye kacel ki jo ma gikumo ki bene me nyuto cwercwiny pi peko ma otimme-ni. I tekwaro mapol, kwako kor ngat ma tye ka kumo nyo motte kun imako cinge matek obedo yo acel me nyuto ni meno iparo pire. Ka ngat ma tye ka kumo-ni mito lok, ling mot ci iket cwinyi me winyo lokke. Ma dong ber loyo, tim gin mo me konyo lupaco meno calo tedo, gwoko lutino, ki bene konyo i yub me yik ka ce mitte. Timo jami magi ber makato lok ki dog keken.

I nge kare mo, wutwero dong lok wunu i kom lato-ni, kun wutito kite mabeco ki jami mogo ma kelo yomcwiny ma en otimogi. Kodi lok magi twero weko ngat ma kumo-ni cako bwunyo. Me labolle, Pam​—ma orwenyo cware mwaki 6 angec owaco ni: “I kine mukene dano giwacca jami mabeco ma lan otimo ma onongo pe angeyo, man weko awinyo maber adada.”

Lukwed lok guwaco ni meno jo ma gikumo pol kare kilimogi ka peko pud otimme atima kun giminigi kony mapol, ento i ngeye wi dano wil woko i komgi pien nongo jami mapol tye ma odiyogi ma lubbe ki kit me kwogi me nino ducu. Pi meno, tute me keto yub me limo laremi ma tye ka kumo pi peko ma otimme-ni. * Lukumo pol kare gibedo ki pwoc madit tutwal pi yub magi pien konyo me kweyo cwinygi.

Tam kong i kom labol pa Kaori, lamego mo ma a ki i Japan ma cwinye otur pi to pa minne, ci i nge dwe ma romo 15 dok orwenyo laminne i to. Ki pwoc madit, en onongo kony ki bot lureme ma gigenne. Lamego mo ma nyinge Ritsuko madit kato Kaori odyere me bedo lareme macok. Kaori owaco ni: “Ki lok ada, cwinya kong pe obedo yom i acakkine, dok onongo atamo ni pe tye ngat mo ma twero leyo ka wang mamana. Ento, kit ma Mama Ritsuko otera kwede oweko acako bedo cok kwede. Cabit ki cabit, onongo wawoto i tito kwena ki bene i cokke pa Lukricitayo kacel. En onongo lwonga ka mato cai, kela cam, dok bene cona waraga ki kad tyen mapol. Ber kit pa Mama Ritsuko okelo adwogi maber i kwona.”

Mwaki apar aryo dong okato i nge to pa min Kaori, dok i kareni en kacel ki cware gitye i tic calo lutit kwena pi kare malac. Kaori owaco ni, “Mama Ritsuko pud tye ka medde ki nyutiwa mar. Ka adok gang ka lim, pol kare alime dok abedo ka winyo lokke me cuko cwiny-nyi.”

Labol pa ngat mukene ma onongo adwogi maber ki i cuko cwiny ma kimiyo kare ki kare aye Poli, ma tye Lacaden pa Jehovah i lobo Cyprus. Cwar Poli onongo nyinge Sozos dok lakica adada, en oweko lanen maber calo Lakricitayo ma lakwat i jolo ki lwongo lutino kic ki mon to i gange ka galowang ki nywako i cam kacel kwedgi. (Yakobo 1:27) Ki cwercwiny madit, Sozos oto ki mwaka 53 ki two kanca ma mako wic. Poli owaco ni: “Arwenyo cwara ma onongo lagen dok wakwo kwede dong pi mwaki 33.”

I nge yiko cware, Poli odak i lobo Canada kacel ki wode matidi loyo ma nyinge Daniel ma mwakane tye 15. Ki kunu gumedde ki wot i kacokke pa Lucaden pa Jehovah. Poli owacci, “Luremwa me kacokke man manyen-ni onongo pe gingeyo jami ma gutimme i kwowa i kare mukato  angec kacel ki kwo matek ma wakato ki iye. Ento man pe ogengogi me bino botwa ki dok kweyo cwinywa ki lok me kica kun giminiwa kony ma mitte. Kony meno pud dong pire obedo tek ya, tutwalle i kare ma latinna onongo mito wonne adada! Luelda me kacokke gunyuto cwiny me mar madit i kom Daniel. Ngat acel i kingi pol kare onongo lwongo Daniel ka galowang kwede kacel ki lureme nyo ka tuku odilo.” Poli gin ki wode dong gitye maber i kareni.

Ki lok ada, tye yo mapol ma watwero miyo kwede ki kony kacel ki kwe cwiny bot jo ma gikumo. Baibul bene kweyo cwinywa kun tittiwa pi gen mamwonya ma tye anyim.