Eski ou’n deza santi ki ou pa kapab fer nanryen pour enn ou pros ki ti dan dey akoz lanmor en dimoun ki i ti kontan? Parfwa, nou kapab pa asire ki pour dir oubyen fer, alor nou zis reste trankil. Me i annan bann led pratik ki nou kapab ofer.

Souvan, zis nou prezans avek en senp pti mo parey, “Mon senpatiz avek ou,” i ase. Dan bokou kiltir, anmay en dimoun oubyen ser son lanmen i en bon fason pour montre ki ou enterese. Si sa dimoun ki dan dey i anvi koze, ekout li e montre ki ou konsernen. I pli bon pour fer en keksoz pour sa fanmir ki dan dey, petet en travay ki zot pa’n kapab fer, tel parey kwi manze, okip bann zanfan oubyen ede dan bann preparasyon lanterman si zot ti a kontan. Bann tel aksyon i kapab vo plis ki bann zoli parol.

Avek letan, ou kapab koz konsernan sa defen, petet konsantre lo serten son bann bon kalite oubyen moman zwaye. Sa kalite konversasyon i kapab anmenn en sourir lo figir sa dimoun ki dan dey. Par egzanp, Pam, ki ti perdi son msye Ian si-z-an pase, i dir: “Parfwa dimoun i dir mwan bann bon keksoz lo Ian ki mon pa ti zanmen konnen e sa i fer mwan kontan.”

 Bann serser i dir ki bokou dimoun ki dan dey i ganny led o konmansman me apre zot souvan ganny oubliye anmezir ki zot bann zanmi i okipe avek zot prop lavi. Alor, i ti a byen pour fer zefor pour telefonn oubyen al vwar en zanmi ki dan dey tanzantan apre sa lanmor. * Bokou dimoun ki dan dey i vreman apresye sa moman kot zot ganny rekonforte.

Pran par egzanp Kaori, en zenn madanm Zaponnen, ki ti ganny bokou afekte par lanmor son manman ki ti swiv apre par lanmor son gran ser 15 mwan pli tar. Erezman, i ti kontinyelman resevwar led sorti kot son bann zanmi fidel. Enn parmi son bann zanmi ki apel Ritsuko e ki bokou pli vye ki Kaori, ti ofer pour vin son zanmi pros. Kaori i dir,“Onnetman mon pa ti dakor avek sa. Mon pa ti oule personn ranplas mon manman e mon pa ti mazinen ki personn ti pou kapab fer sa. Parkont, akoz lafason ki Mama Ritsuko ti tret mwan, avek letan mon ti vin pros avek li. Tou le semenn, nou ti al prese e asiste bann renyon ansanm. I ti envit mwan bwar dite kot li, anmenn manze pour mwan e en kantite fwa, i ti ekri mwan bann let ek kart. Latitid pozitif Mama Ritsuko ti annan en bon lefe lo mwan.”

Douz an in pase depi ki manman Kaori in mor e ozordi li ek son msye i donn tou zot letan pour servi Bondye. Kaori i dir, “Mama Ritsuko i kontinyen montre ki i konsernen. Ler mon retourn kot mwan, mon touzour vizit li e apresye son lanmitye ankourazan.”

Poli, en Temwen Zeova sorti Sip, i en lot dimoun ki’n benefisye avek led kontinyel. Sozos, msye Poli ti zantiy. Konman en ansyen dan kongregasyon, i ti kit en bon legzanp. I ti souvan envit bann orfelen ek bann vev kot li pour en repa kot zot ti pas bann bon moman ansanm. (Zak 1:27) Malerezman, Sozos ti mor avek en timer dan son laservel a laz 53 an. Poli i dir: “Mon’n perdi mon msye avek ki mon’n marye pour 33 an.”

Apre lanterman, Poli ti al reste Kanada avek son pli zenn garson Daniel, ki ti annan 15 an. Laba, zot ti konmans asosye avek en nouvo kongregasyon Temwen Zeova. Poli i rapel, “Bann zanmi dan mon nouvo kongregasyon pa ti konn nanryen lo nou pase ek nou bann difikilte. Me sa pa ti anpes zot vin pros avek nou e rekonfort nou avek bann zoli parol e donn nou bann led pratik. Sa led ti vin dan en moman apropriye espesyalman a sa moman kot mon garson ti plis bezwen son papa! Bann ansyen dan kongregasyon ti montre en gran lentere personnel dan Daniel. Enn parmi sa bann ansyen ti fer sir ki i ti enkli Daniel dan bann aktivite avek bann zanmi oubyen ler i ti al zwe boul.” Ziska prezan, Poli ek Daniel pe al ase byen.

I vre, i annan en kantite fason ki nou kapab ofer led pratik e rekonfort bann ki dan dey. Labib i osi rekonfort nou atraver sa lespwar pour en lavenir meyer.