Hane fe kö traqa koi së la ketre atr ka meci sineen, angeic a treije xomi së, ngo easa cile menu, ke, thatre kö së la nyine troa kuca? Ame itre xa ijin, tre, jole koi së troa qaja la itre mekuna së me itre nyine tro sa kuca. Ame e cili, easa lapa thaup, ke pë kö hne së hna atreine troa kuca. Eje hi laka, tha ka hmaloi kö troa cile kowe la jole cili, ngo ame pe hetrenyi kö la itre xa aqane troa xatuane la itre atr ka meci sineen.

Ame la ka nyipiewekë e itre xa ijin, tre, troa wange la atr ka meci sineen, me qaja koi angeic ka hape, “Catre pi pe!” Ame ngöne itre xa qenenöj, kola itreije xom, celë hi aqane ujë lai kowe la itre atr ka meci sineen. Maine kola ajane troa ithanata hnene la atr ka meci sineen, loi e tro sa pane drei angeice hnyawa. Loi e tro sa kuca asë la hne së hna atreine matre troa xatuane la itre hnepe lapa ka meci sineen. Tune la troa ixatua, me kuci xen, maine ithupë, maine pena troa ixatuanekeune la itre ejolene göi hnëmec. Ka hetre thangane catre kö la itre huliwa hune la itre trengewekë.

Ketre tune mina fe la itre hne së hna qaja göne la atr ka meci hë, laka, tro fe lai a hetre thangane ka loi kowe la sinee i angeic, e tro sa amexeje hmaca la itre thiina i angeic me itre hnei angeic hna melën ka loi. Itre trengewekë lai ka ithue madrinene la atr ka meci sineen. Drei la ketre ceitun, sikisitre hë lao macatre ne patre Ian, föi Pam. Öni eahlo ka hape: “Hetrenyi la  itre xa ewekë ka loi hna kuca hnei Ian ekö, laka eni petre hi a hane atre, ke hna qaja hnene la itre xan. Itre ewekë lai ka axapone la hning.”

Ngo kola qaja hnene la itre ka inamacane ka hape, nyimutre la itre atr ka meci sineen, hna xatuane lo xötrei ngo canga thëthëhmi nyudrene hi hnene la itre sinee i nyudren, ke, tru catre hnei jole i angatr. Celë hi matre, nyipiewekë troa hë nyudrene lapa e thupen. * Madrine catre la itre atr ka meci sineen la aqane ixatua cili, ke, kösë kola ce thue me nyudren la hace ka eje thei nyudren.

Hanawange la pengöi Kaori, ketre föe hmae ne Zapo ka hleuhleu pine la meci ne la thine i angeic. Ame ju fe kö thupene la 15 lao treu, kolo fe hi a meci la mama i angeic jajiny. Eloine pe, hna xatua angeic pala hi hnene la itre sinee i angeic. Ka tru catre kö Ritsuko hui Kaori nge ka epe catre Kaori koi Ritsuko. Matre kösë ceitui Ritsuko hë me ketre thin. Öni Kaori, “Nyipici laka tha madrine kö ni. Xele ni tro eahlo a xome la göhnë i nenë, ke pëkö ka ijije troa nyihna i nenë. Ngo pine la aqane nyidrawa ni hnei Ritsuko, matre eni ha epe catre koi eahlo. Ame ngöne la nöjei wiik, nyio a ce cainöj me ce tro troa icasikeu. Hnei eahlo hna hë ni troa iji tri, me ce xeni me eahlo, me cinyiany. Hetre thangane catre la hnenge hna ce tro lapa me Ritsuko.”

Truelofe hë lao macatre ne meci la thine i Kaori nge ame enehila, angeic me föi angeic a cainöj ngöne la drai ka pexej. Öni Kaori ka hape, “Ritsuko pala hi a hnehengazo ni. Eahlo a telefone koi ni me iupi fë tus koi ni jëne ëternet. Nge ame la eni a bëeke hmaca kowe la hnalapa, hnenge pala hi hna tro troa wai eahlo nge madrine catre ni troa porotrik me eahlo.”

Poli la ketre Temoë i Iehova ne Chypre, hna hane xatua angeice mina fe. Ka lolo la thina ne la föi Poli, Sozos la ëje i nyidrë. Ka qatre thup Sozos hnine la ekalesia, nge lolo la tulu hnei nyidrëti hna hamën. Hnei nyidrëti hna lapaa hëne la itre hna meci trije hnei kem me thin, me itre sine föe troa ce xen. (Iakobo 1:27) Ngazo pe, meci pi hi Sozos, 53 lao macatre i nyidrë, hna tithi nyidrë hnene la ketre meci ne he. Öni Poli ka hape: “Patre hë la föeng ka nyipici koi ni, nge hnenge hna pane ce mele memin, 33 lao macatre ne faipoipo nyio.”

Thupene la hna kelemi Sozos, hnei Poli hna ce fek a tro Kanada memine la neköi eahlo ka 15 lao macatre, Daniel la ëje i nyën. Ame e cili, hnei nyidroti hna hane sine la ketre ekalesia ne la Itretre Anyipici Iehova. Kola mekune hmaca hnei Poli, ka hape: “Thatre fe kö la itre atrene la ekalesia la itre ewekë ka traqa ekö koi nyio memine la itre jol ka eje thei nyio. Ngo tha celë kö la ka sewe angatre lai troa tro koi nyio, me xatua nyio jëne la itre trengewekë ka menyik, me hane nyinyin la itre jol ka eje thei nyio. Drei la ketre ixatua ka lolo catr hna kapa hnene la neköng, ke, tru la hnei angeic hna meku keme i angeic! Hnene la itre ka elemekene la ekalesia hna epe catre koi Daniel. Hnene fe la ketre e angatr hna thei Daniel matre troa ce feni balo me angatr.” Lolo catre la mele i Daniel me thine i Daniel enehila.

Nyimutre pala kö la itre aqane troa xatuane hnyawa me aupune la treije ne la itre atr ka meci sinen. Hetrenyi fe la ketre mejiune ka lolo catr elany, hna hamëne hnei Tusi Hmitrötr nyine akeukawane la itre hni ne la itre ka meci sinen.