Eesü isale wachiki tü wanüikinjatkat nümüin wanee wayuu ouktakai apüshi, müshii moʼookai neʼe waaʼin. Eepejeʼe süpüla wakaaliinjain nia.

«Aluʼuwatshiaʼaya maʼin pia» wamüle nümüin wanee wayuu, eesüjaʼa anatchonjeerüle naaʼin sutuma wanüiki. Anatchonsü joo naaʼin wayuʼuya müleka wasaküle nia sünain waapüin wajapü nümüin, wokoʼojoole nünain. Yooteere nia, waapaja nünüiki. Eeshi süpüla pükaaliinjain nia sünain türa aʼlakajawaakat, paaʼinmajüin na tepichicheinkana, eeshi süpüla pükaaliinjain sünain tü aainjünüinjatkat nüka chi müliashiikai anale shia namüin. Anashaatasü maʼin paaʼinrüle tia.

Mapa süchikijee tia, eeshi süpüla pukuentajüin süchiki wanee kasa anasü alataka nümüin müliashii kataiwaʼaya noʼu. Aneerü naaʼin na wayuu kaamakashiikana sutuma tia. Majatüinka Pam wanaa sümaa ouktüin Ian chi suʼwayuusekai, alatüirü aipirua juya süchikijee tia. Anuu sünüiki Pam: «Eesü naküjüle tamüin na wayuukana wanee kasa anasü naaʼinraka chi taʼwayuusekai kataiwaʼaya noʼu, anasü taaʼin sutuma taapüin tia».

Naashin na tottootkana, wanaa sümaa ouktüin wanee kasa nünain wanee wayuu, akaaliinjünüshi maʼin nia paala, shiasaʼa mapa, motushi aaʼinyüü süleʼejayaa sümapa shipialuʼumüin tü alapajaasükalüirua. Ayata pükaaliinjain na wayuu kaamakashiikana soʼu kojuya kashi jee juya. * Eeshii na anakana amüin saapajüin wayuu nanüiki süchiki tü kasa alatakat namüin kakalia mapa.

Jamüsüjaʼa Kaori, akaaliinjünüsü shia sutuma wanee saʼaleewain, süka jamüin, ouktüsü tü shiikat jee poloo jaʼralimüin kashi süchikijee tia, ouktüsü tü shipayakat. Ritsuko sünülia tü wayuu akaaliinjakat shia, jaʼapüirü tia wayuukot. «‹Tayeerü aaʼinmajaka pia› wanaa sümaa sümüin Ritsuko tamüin, ‹nnojottaa› tamaka. Nnojotsü keiyaainjatüin taya, waneesia neʼe tü teikat. Taʼaleewajaaka mapa sümaa Ritsuko, aishaatasü shia tapüla mapa, mataasü aka saaʼin wanee tei tamüin. Ojuʼitawaishii waya piamaleʼe sünain aküjaa pütchi jee oʼunawaishii waya sünain tü outkajawaakat. Suunejaʼawalin taya sünain asaa té, shiʼikajaʼawalin teküin otta ashajawaisü karaloukta tamüin. Sütanalüin taaʼin Ritsuko sutuma tü saainjakat tapüleerua».

Alatüirü 12 juya süchikijee ouktüin tü shiikat Kaori. Maaʼutpünaa yaa, aküjüt shia nünüiki Maleiwa nümaa chi suʼwayuusekai. Müsü sünüiki Kaori: «Ayatüsia taya jülüjain saaʼin Ritsuko. Shiyamaajawalin taya jee suluwataawalin tamüin correo, taleʼejapa tepialuʼumüin, tanaʼlaapünaʼawai amüinrü shia ooʼulaka yootowaisü taya sümaa».

Eejatüinka wanee wawala Poli sünülia ooʼulaka Sozos nünülia chi suʼwayuusekai, chejeʼewat shia Chipre. Akaaliinjünüsü shia. Kamaneepuʼushi maʼin chi suʼwayuusekai, wayuu anakai süpüla ashatünaa akuwaʼipa süka jülüjain naaʼin na anoujashiikana. Naya nuunejaapuʼukana sünain ekawaa na mooʼutshiikana ooʼulaka tü anoujasü ouktakalüirua aʼwayuuse (Santiago 1:27). Ouktüshi nia wanaa sümaa 53 nuuyase, eejatü wanee tumor sünain nikii. «Aluʼuwatshi maʼin taʼwayuuse mayaaka nukuwaʼipa, kakaliashi nia tamaain, 33 juya», müsü Poli.

Mapa süchikijee tia, okolojoosü Poli nümaa chi süshaleinkai chaa Canadámüin. Daniel nünülia chi jintüikai, 15 nuuyase. Outkajaʼawaishii naya namaa na aküjüliikana pütchi nüchiki Jeʼwaa chejeʼewaliikana chayaa. Anuu sünüiki Poli: «Kamaneekaʼiya maʼin na wawalayuukana otta nakaaliinjamaatüin waya, nnojotpejeʼe natüjaain aaʼu tü müliaa weʼrakat paala. Shia choʼujaakaʼaya tia nümüin Daniel süka mashin nia. Nakaaliinjain nia na wawalayuu oʼunirakana  sukuwaʼipa tü outkajawaakat. Oʼunawaishi Daniel nümaa wanee wawala sünain jutkatirawaa namaa wanee wawalayuuinnua, eeshii nashaittüle woola». Maaʼulu yaa, talatüsü saaʼin Poli nümaa Daniel.

Watta maʼin saalii tü eekat süpüla waainjain napüleerua na ouktakana apüshi. Atütülaasü waaʼinyaasa sutuma tü pütchi suluʼukat tü Wiwüliakat nachiki na wayuu ouktüinnakana. Paashajeʼera tia sünain tü wanee pütchikat.