Kala nuan berasai nadai daya lebuh orang ke semak nuan tusah ati ketegal lenyau orang ti dikesayauka? Kekadang kitai engka enda nemu utai ti patut disebut tauka digaga. Nya alai, kitai enda nyebut tauka ngereja sebarang utai. Tang bisi utai beguna ke ulih digaga kitai.

Kesuah agi, utai ti diguna iya nya datai sereta madahka diri tusah ati enggau utai ke nyadi. Tang ba mayuh endur, merap orang tauka murus lengan kena ngayanka pengibuh diri. Enti orang ke tusah ati nya deka berandau, dingaka iya. Ke pemadu manah, nulung ruang bilik ke tusah ati nya ngereja pengawa, baka bepandukka utai diempa, nyaga bala anak, tauka nulung ngatur pengawa ke bekaul enggau nguburka orang ke udah mati nya enti dikemendarka orang. Pengawa ke baka tu beguna agi ari jaku peransang.

Nyau kelama, nuan engka deka berandau pasal orang ke udah nadai, engka berandauka sekeda kualiti manah tauka peneleba ti ngagaka ati. Randau ke baka tu ulih ngasuh orang ke tusah ati nya tuchum. Ngambika chunto, Pam, ke udah enam taun mati laki ke benama Ian, madahka: “Kekadang orang madah ngagai aku utai manah ke digaga Ian ke enda kala ditemu aku, lalu tu ngasuh aku lantang ati.”

Bala pemansik madahka, terubah iya mayuh orang ke tusah ati nerima mayuh bantu tang enda lama udah nya utai ti diguna sida enda diperatika agi seraya bala kawan sida berengkah kisuk enggau pengidup sida empu. Nya alai, enggau naka ulih seruran ngabas kawan ke tusah ati nya, pengudah iya lenyau orang ti dikesayauka. * Mayuh orang ke tusah ati amat beterima kasih ke bantu ti baka nya kena sida ngelantangka asai ati ti tusah ke lama ninggang sida.

Peratika chunto Kaori, seiku indu Jipun ke balat tusah ati ketegal pemati indai iya, lalu ditangkanka enggau pemati menyadi indu ke tuai ari iya, 15 bulan udah nya. Iya lantang ati laban terus dikeringka bala kawan ke tetap ati. Seiku indu ke benama Ritsuko ke jauh tuai ari Kaori madahka diri deka nyadi kawan rapat iya. Ku Kaori madahka: “Kebendar, aku enda lantang ati enggau utai tu. Aku enggai orang bukai nganti indai aku, lalu aku ngasaika nadai orang ulih nganti iya. Taja pia, ketegal chara Mama Ritsuko ngintu aku, aku ngasaika diri semak ngagai iya. Ninting minggu, kami duai begulai nginjil sereta datai begempuru. Iya mai aku ngirup, mai pemakai ke aku, sereta suah nulis surat tauka kad ngagai aku. Ulah Mama Ritsuko ke manah nya balat meransang aku.”

Dua belas taun pengudah indai Kaori mati, lalu diatu, iya enggau laki iya nyadi penginjil ke semina gawa ke Jehovah aja. Ku Kaori madahka: “Mama Ritsuko terus nunjukka pengibuh iya. Lebuh aku pulai ke menua asal, aku seruran ngelawa iya sereta rindu begulai enggau iya.”

Siti agi chunto orang ke bulih penguntung ari terus dikeringka iya nya Poli, seiku ari Saksi-Saksi Jehovah ke di menua Cyprus. Laki Poli, Sozos, nya laki ke nelap. Iya nyadi teladan ti manah lebuh nyadi tuai gempuru laban suah mai bala anak ke nadai apai indai sereta bala indu balu ke rumah seduai iya ngambika ulih sama begulai sereta sama makai. (James 1:27) Tang sayau amat, Sozos mati lebuh umur iya 53 taun ketegal kanser untak. Ku Poli: “Aku lenyau laki ke tetap ati ke udah idup begulai enggau aku pengelama 33 taun.”

Pengudah niang laki iya dikuburka, Poli pindah ke Kanada enggau Daniel, anak lelaki iya ti pemadu biak ke beumur 15 taun. Dia, seduai iya berengkah begulai enggau bala Saksi-Saksi Jehovah. Ku Poli ngenang: “Bala kawan ba gempuru ke baru nya enda nemu pasal utai ke nyadi ba kami duai sereta penanggul ke ditapi kami duai. Tang tu enda nagang sida semak ngagai kami duai sereta ngelantangka  ati kami duai ngena jaku ti siru sereta meri bantu ke patut. Endang bantu ti beguna bendar kelebih agi lebuh anak lelaki aku amat begunaka apai! Sida ke ngiring ba gempuru nya ngayanka pengibuh ngagai Daniel. Sida nentuka Daniel bisi sama enggau lebuh sida begulai enggau pangan diri tauka lebuh sida main bol.” Diatu, pengidup seduai iya menyanak nadai apa nama.

Kebendar, bisi mayuh chara kitai ulih mantu sereta ngelantangka ati orang ke tusah ati. Bup Kudus mega ngelantangka ati kitai ngena pengadang ti ngerinduka ati jemah ila.