O kuila ua divuile kiá kia iibha mukonda ku tenene kukuatekesa kamba diê ua fundile ndandu? Saí bhabha ki tuejii’etu i tua-nda zuela mba kubhanga phala kukuatekesa o muthu ua fundu ndandu, mukonda dia kiki-phe tu kala sé kubhanga mba kuzuela kima. Maji saí ima i tua tokala o kubhanga phala ku mu kuatekesa.

Saí bhabha o muthu ua fundu ndandu, u mesena ngó kuila tu kala kumoxi ni muéne ni ku mu tangela kuila, “tua luuala ué mukonda dia ufuilu ua ndandu iê.” Saí ididi, phala kulondekesa ku muthu ua fundu kuila a mu zolo, o athu a mu bhubhala mba a mu bhana jibeju. Se muthu ua fundu ua mesena kuzuela, muívue ni henda ioso. Maji o kia beta-o-kota, o kubhanga kima phala kukuatekesa o muiji ua fundu ndandu, nange u tena ku a kuatekesa ni ikalakalu ku bhata kala o kulamba, kulanga o tuana mba kukuatekesa mu kusokejeka o ima phala kufunda o kimbi sé a kubhinga. O kubhanga kiki, kua beta-o-kota o kuzuela ndenge.

Mu kubhita thembu, u tena kuzuela ia lungu ni difundu, nange u tena kulembalala o ima iambote ia bhangele o difundu mba kuzuela kuila muéne uexile muthu uambote. O kuzuela kuku, kutena kubhangesa o muthu ua fundu kuelela ni kusanguluka. Mu kifika  phang’etu Pam, ua fundu muadi uê, ku muenhu a muixanene Ian, samanu dia mivu kudima, uambe: “Saí ithangana o athu ene mu ngi tangela ima iambote ia bhangele muadi uami, ki ngi’vua kiki, ngi sanguluka kiavulu.”

O jingijiie javulu amba kuila, athu avulu a fundu ndandu, ku dimatekenu ku thambi, a tambula kikuatekesu kiavulu maji ku pholo dia kuenda, kioso o makamba mâ kia mateka o kukalakala, o kikuatekesu kiki ki tola. Mu kiki-phe, kioso ki bhua o thambi, sota kudikunda mba kumenekena kamba diê ua fundu. * Athu avulu a fundu, a sanguluka kiavulu kioso o makamba kia a kunda ithangana ioso, ene a divua kiambote.

Tala o musoso ua phang’etu Kaori, kilumba mukua Japão, ua didi kiavulu mukonda dia ufuilu ua manh’â, mu kubhita 15 kia jimbeji kota diê dia muhatu uafu ué. O makamba mê ni jiphange mu kilunga a mu kuatekesa kiavulu. Saí muhatu a muixana Ritsuko, ua sungu-ku kiá mu kitala, ua kituka dikamba diê dia kazola. Kaori uambe: “Mu kidi, ki ngi sangulukile kana. Ki ngi mesenene kuila mam’etu a mu bhingana ku muthu uéngi, mudiami sé-ku muthu ueji tena ku ngi zola kála mam’etu. Maji Mama Ritsuko ua ngi talatala kiambote ni henda ioso, kiki kia ngi bhangesa ku mu zola kiavulu ni kukala makamba. Semana joso, tua kexile mu boka ni kuia mu kiônge kumoxi. Tua kexile múdia kumoxi, ua kexile mu ngi sonekena ni ku ngi tumikisa jifoto ithangana iavulu. O ukexilu uambote ua Mama Ritsuko ua ngi suínisa kiavulu kuia ku pholo.”

Kua bhiti kiá kuinhi ni kiiadi kia mivu tundé kiafu manh’â Kaori. Lelu Kaori ni muadi uê aboki a thembu ioso. Kaori uambe: “Katé kiki Mama Ritsuko ua ngi zolo hanji kiavulu. Kioso ki ngi vutuka kubhata, ki ngene mu jimba kuia mu mu menekena, nga zolo kiavulu kukala kumoxi ni muéne mukonda muéne u ngi suínisa kiavulu.”

O musoso ua mukuá ua muthu a mu kuatekesa kiavulu ku jiphange, o musoso ua phang’etu Poli, Mbangi ia Jihova ua tungu mu ixi ia Cyprus. Poli ua sakanene diiala diambote mukua henda, a muixanene Sozos, muéne uexile kafunga kambote, muéne ua kexile ni kifua kia kuixana o an’â ithungu ni atudi kubhata phala kúdia kumoxi. (Tiiaku 1:27) Maji kioso Sozos kia tenesa 53 kia mivu, muéne uafu, ua kexile ni kijimbu mu uôngo. Poli uambe: “Tundé ki tua kazala kua bhitile kiá 33 kia mivu.”

Kioso kia fundu muadi uê, Poli ni kasule kê Daniiele, ua kexile ni 15 kia mivu ai mu tunga mu ixi ia Canadá. O kuai’oko, ene a mateka kudilunga ni kilunga kia Jimbangi ja Jihova. Poli uambe: “O jiphange mu kilunga momo kejidile o ima i tua bhitile na-iu m’ukulu. Maji o kukamba kuijiia ki ku a fudisa kuíza ko kuetu phala ku tu kuatekesa, ku tu ximana. Nga sakidila kiavulu o kikuatekesu kiokio benge benge mu kithangana kioso mon’ami kia kexile mu divua ubheka mukonda dia kukamba tata! O adiakimi mu kilunga a zolele kiavulu Daniiele. Mu kifika, kafunga kamoxi ua kexile mu kuixana Daniiele phala kuia kubhata diê kudila kumoxi ni makamba mba phala kuia mu jokala bola.” Katé kiki kiiadi kia ala kiambote.

Mu kidi, saí ndunge javulu ja kukuatekesa ni kukonda o malamba a ió a fundu ndandu. O Bibidia i tu kolokotesa ué mu ku tu bhana kidielelu kia dikota ku pholo.