Baa kɔllo lakasiaŋ num niŋ mɛɛ ŋ che wana nya chiɛɛliaŋndo mɔnɛi biyɔɔ le wana ndɔ kaalaa vi wo? Lepum, ŋ sina nyɛ naŋ nɔ miŋ dimi ɔɔ tosa wo le. Kɛ nyɔɔŋ cho ŋ naŋ nɔ miŋ tosa le wana koŋ malaa wo.

Nyɛ yeemaŋ lepumndo cho ni, kɔlaŋ o bɛɛ biisioo ma dimul wana biisioo komallo aa, “Mɔnɛi cho ya bɔɔ le nyɛ yɔŋnuŋ numndo.” O naamula bɔɔbɔɔ niŋ, wana biisioo komallo kɔmaŋndo ɔɔ baa ndu saa mɔɔsu cho nɛi sɔviɔɔ ni le chɔmndo maa a buulaŋ a ndu. Te wana biisioo komallo yeema pɛ suɛi, yaŋ nilaŋ nyɛkɛndɛi. I hiou bɛnda kpou ve cho ni, tosa nyɛ le yuŋgu biisioo komallo. Naapum wallo nda malaa tuma nda cho wa mɔnɛi biyɔɔ wo, nyɛdiaa yauwo, chuaambuaa biyɔɔ, ɔɔ sɔɔŋ biisioŋ nda malaa tosaa te yeemɛi wa pɛ. Nyɛm waa naa tosaa bɛnda mbo hiau suɛi bɛnduei.

Te teleŋndo opum hiou pɛ, kɛlɛŋgaa o bɛnda le suɛi a wana vi wo okɔɔ, suiliŋnda ndɔla kɛndɛlaŋ ɔɔ sɔɔŋ kɛndɛŋ ndoo tosa woŋ. Balta suu waa naa dɔuwɔɔ tosa mi wana biisioo komallo wa mamɔɔ muɛɛŋ muɛɛŋ. Le tamaseliiyo, mi Pam vii pɔnɔɔ diolaŋ Iyaŋ. O hiou niŋ wɔsioŋ ŋɔmpum. Mi Pam dimi aa, “Mi waŋnda dimul la teleŋndaŋ lapum a sɔɔŋ kɛndɛŋ Iyaŋ ndoo tosa woŋ, ŋ yaa sina bɛɛ le woŋ. Nduyɛ mi hei nɛŋi ya kɔllo tau.”

Wanaa yaasiaa a sɔɔŋ okɔɔ wa dɔunuŋ kona maa, mi wanaa biisioo komalla a bɔɔbɔɔ sɔla malaa o tase ndɔ. Kɛ mi chaŋyaŋ ndaŋ puɛɛŋ a bahawɛila ndalaŋ okɔɔ chɔ chɔ te a miiŋguŋ pɛ o walta ndalaŋ niŋ. Lelaŋ, kindiŋ ma wa suukaŋndo lɔɔlɔɔ a chaaŋ num biisioo komallo. * Mi wanaa biisioo komalla a bɔɔbɔɔ naŋ kɔl tau, nduyɛ mi suukaŋ waa naa tosa a hiu lɛ mɔnɛi biyɔɔ le.

Ŋ yaasiaŋndɔ tamaselii Kawoli wo. Chua laandu Chepanisiinɔɔ o cho ni. Nduyɛ mi kɔllo tambu ndu tau mɛɛ kala ndɔ vi. Mɛɛ paŋgoŋ 15 hiou, mi bɛ ndɔ bɛɛ wu. Ŋ naŋ kɔl le sinaa maa Kawoli wa malaa sɔlaa chaaŋaa nduaa kaala ndu wa o ba. Lisuko, o wa Kawoli bɛndu wo, wa chaaŋaa nduaa opilɛ ni nduyɛ ma naŋaŋ tau. Mi Kawoli dimi aa, “A tonya, yaa niŋ kɔl a chaŋyɛi keŋ te. Yaa yeema wana o wana le miiŋgoo o foofo kala nuu le, nduyɛ yaa yiyaŋ pɛŋ maa wana o wana nɔla mbo bii ya maa kala nuu le. Kɛ mɛɛ Mama Lisuko bii ya yɛ tosa ni mi sɔɔŋguu ndu ikɛi kpɛɛluŋ. O lɔɔ o lɔɔ bɛŋgu, mi naŋ kuɛ diompilɛ o wali dimiaa yooŋgu kɛndɔɔ niŋ, a o bɔŋaŋnda leKilisiɔŋndaŋ. Mi ndoo veelu ya le tiiyo kolɔɔ latulu, mi ndoo chuu ya nyɛdiaa, nduyɛ mi ndoo poonyial la yaulaŋ le teleŋnda bɔɔbɔɔ. Mi kaa kɛndɛ Mama Lisuko wo mala ya tau.”

O hiou niŋ wɔsioŋ 12 chɔŋ a teleŋ kalaa Kawoli vi wo. Nduyɛ, ndu nda pɔnɔ ndɔ cho hau o wali lɔɔlɔɔ dimiaa yooŋgu kɛndɔɔ niŋ. Mi Kawoli dimi aa, “Mama Lisuko cho wɔ ya kaalaa chɔmndo. Lɔɔlɔɔ ya kuɛ pɛ yilɔɔ o yalo chiee, mɛɛ mi fuuluu o Mama Lisuko lo le chaŋyɛi nduɛi kɛndɛi tueiyɔɔ yeela.”

Tamaselii diiŋ ndɔɔ cho Poli ni. Chɛhowɛinɔɔ o cho o lɛŋnde Saipulɔɔ leŋ niŋ ni. Nduyɛ mi ndu bɛɛ sɔla malaa tau. Poli ndoo nɔ pɔnɔɔ diolaŋ Sozos o naa mahullo diiyo. Nduyɛ simlachinɔ ndoo kɛsi tamasi kɛndɔɔ o kunda leKilisiɔŋndo niŋndo o wa ni. Mi ndoo veelu chuaambuaa viiya a waŋlaanduaa piaandaa ndaa vi wa o ndalo chiɛiniŋ le nyɛdiaa vɛlɛ le chaŋyɛi tosaa a nda. (Chemisi 1:​27) I wa suɛi imɔnɔ mɛɛ naa mahullo dii Sozos teleŋ o wa wɔsioŋ 53 wo. Mi Poli dimi aa, “Mi pɔnɔ ni kaalaa wu, o naŋ wa o nɔɔ niŋ le wɔsilaŋ 33 wo.”

Mɛɛ biisioo chuu, mi Poli kua Kanada nda poombɔ ndɔ wɔsila 15 wo diolaŋ Daaniɛɛ. Loŋ nda kandu kɔlaŋ o bɔŋaŋnda Seiyaa Chɛhowaa ni. Mi Poli dimi aa, “Chaŋyaŋ nuŋ o kunda leKilisiɔŋ sɛnɛiyo hoo niŋ sina kposoŋ nyɛ yɔŋnuŋ naa paandu wo le, nduyɛ a mɛɛ sɔɔŋ kendu naa choo suŋ suŋ yɛ le. Kɛ keŋ kuuna nda chaŋyɛi tosaa a naa, sɔɔŋ kɛndɔŋ naa dimullo, nduyɛ a  naa malaa le. I wa bɔɔ suɛi sɔvɛ le malaa sɔlaa taama taama a teleŋ po nuu ndoo yeema koŋ finya ndɔ tau wo! Mi wanaa wa chilaŋ chuaa o kundaa niŋnda chɔm yeemɛi tau le Daaniɛɛ malaa. Mi opilɛ ndoo kuɛ a Daaniɛɛ latulu le yelelaŋndo tosaa a chaaŋaa nduaa ɔɔ te o wa pɛ kɔlaŋ bɔllo lɔɔ.” Poli nda po ndɔɔ cho o kɛndɔɔ tosaa tau o kundaa niŋ.

A tonya, nɛila naŋ yɔŋgu malaa a kɔl dɛɛniaa o wanaa cho mɔnɛi biyɔɔ wa lo wa la cho tau. Baabuiyo cho naa vɛlɛ dɛɛniaa a tiindaŋ sɔvɛ bɛndu cho o chilaŋ niŋndo.