Kutala kwapwileko lwola lumwe chamikaluhwilile kuvendejeka mukwenu uze afwishile tahi? Shimbu jimwe cheji kutukaluhwilanga kuhanjika chipwe kulinga vyuma vize navivendejeka uze nafwisa, ngocho tweji kutwamanga kaha kulu. Oloze kuli vyuma vimwe navitukafwa tuwane mwakuvendejekela vakwetu.

Kakavulu chuma chasakiwa shina kutambukila uze nafwisa nakuhanjika mazu akufwana nge “Chinapihi chikuma.” Muvisemwa vyavivulu, kuvendejeka mutu chasakiwa kumupakata mukasamba chipwe kumunangika livoko. Nge mutu kana mwasaka kuhanjika, kaha lihulikenu nakumwivwilila kanawa. Oloze chuma chachilemu chikumanyi shina kuzachilako uze nafwisa milimo yimwe, yakufwana nge kutelejeka vyakulya, nakuzakama vana, chipwe kuwahisa vyachipeji nge vanamilweze kulinga ngocho. Vyuma natumuzachila vinahase kumukafwa chikuma kuhambakana namazu akumuvendejeka natuhanjika.

Nge chipeji chinakumu, munahase kushimutwila havilinga vyamwaza apwile navyo mutu uze nafu chipwe vyuma mwalivwishilenga nenyi kuwaha. Echi chinahase kusuulwisa uze nafwisa. Chakutalilaho, Pam uze afwishile lunga lyenyi Ian myaka 6 kunyima, ambile ngwenyi: “Shimbu jimwe vatu veji kungulwezanga  vyuma vyamwaza alingilenga lunga lyami vize kangwatachikijileko, kaha ngweji kwivwanga kuwaha chikuma.”

Vaka-kuhehwojola vanawane nge kakavulu vatu veji kukafwanga kaha vakwavo halwola luze vanafwisa. Oloze kutwala muze, veji kuvasuvililanga nakuhaka kaha mangana kumilimo yavo. Ngocho, mwatela kuwanako lwola lwakushimutwilanga namukwenu uze nafwisa mangana mutwaleho lika kumuvendejeka. * Vatu vavavulu vaze vanafwisa veji kwivwanga kuwaha chikuma nge vanavatambukila mwomwo cheji kuvakafwanga vakeheseko ushona.

Tutalenu hachakutalilaho chamwanapwevo Kaori wamuJapan uze afwishile naye nakufwisa nawa yayenyi wapwevo omu mwahichile tukweji 15 kufuma hakufwa chanaye. Kaori ahombele chikuma. Oloze masepa jenyi vatwalileho lika kumukafwa. Chakutalilaho, Ritsuko uze amuhambakanyine myaka yakusemuka alikwachile nenyi usepa nakupandama chikuma kuli ikiye. Oloze Kaori ambile ngwenyi, “Hakavanga, kangwasuulukileko. Kangwasakile mama vamushise kumutu wekako. Oloze jila anguzakaminyinengamo mama Ritsuko yangulingishile ngupandame chikuma kuli ikiye. Chalumingo hichalumingo twazachilenga hamwe mumulimo wakwambulula nakuyanga hamwe kukukunguluka. Kakavulu angusanyikilenga kuzuvo yenyi tunwenga tiyi, kaha angunehelelenga vyakulya nakungusonekela mikanda. Chakutalilaho chamwaza chamama Ritsuko changukafwile chikuma.”

Munahichi jino myaka 12 kufuma haze Kaori afwishile naye. Oholyapwa apwa muka-kwambulula washimbu yosena hohamwe nalunga lyenyi. Ambile ngwenyi, “Mama Ritsuko achili lika nakunguzakama noholyapwa. Omu ngweji kuyanga kwimbo, ngweji kuyanga kuzuvo yenyi nakushikama.”

Poli uze apwa Chinjiho chaYehova muCyprus naikiye vamukafwile chikuma omu afwishile lunga lyenyi Sozos uze apwile kalama muchikungulwilo. Ou lunga lyenyi apwile wachisambo chikuma, kaha ahanyinenga chakutalilaho chamwaza hakusanyikanga vanginga navatuliwe kuzuvo yavo mangana vashikame nakulya navo vyakulya. (WaYakova 1:27) Chaluvinda, afwile namyaka yakusemuka 53 mwomwo yakupwa naliundu kuwongo. Poli ambile ngwenyi, “Ngwajimbalishile lunga wakushishika uze ngwatwaminenga nenyi muulo hamyaka 33.”

Omu chakumine chipeji, Poli alukilile kuCanada namwanenyi Daniel wamyaka yakusemuka 15. Hakuheta kuze, vatwalilileho lika kukunguluka naVinjiho jaYehova. Ambile ngwenyi, “Masepa ngwawanyine kuchikungulwilo kana kavatachikijile chiyoyelo chetu chakunyima naukalu twahichilemoko. Oloze vatukolezezelenga nakutukafwa. Echi chakafwile chikuma mwanami hakuwana nge kapwile naiseko. Vakulwane muchikungulwilo vamuzakaminenga chikuma. Chakutalilaho, mukulwane umwe amumbachilenga nakuya nenyi kumasepa jenyi nakushikama chipwe kuya nenyi nakwasa ngunja.” Oholyapwa Poli namwanenyi Daniel vali nakutwama jino kanawa.

Chikupu vene kuli jijila jajivulu jakukafwilamo vaze vali nakulishona nakuvavendejeka. Mbimbiliya nawa yeji kutuvendejekanga hakutulweza vyuma vyamwaza twatalilila kulutwe.