Be isegabedo machiegni gi ng’ato ma ywago ng’ate motho to ok ing’eyo kaka dihoye? Nyalo bedo ni ikiya gima onego inyise kata monego itimne, kendo gikone iweyo ma ok ikonye e yo moro amora. Kata kamano, nitie gik ma inyalo timo ma nyalo konyo ng’at mokuyono.

Yo maduong’ minyalo konyego en bedo kode kanyo kendo nyise ni, “Mos ahinya kuom gima otimoreni.” E ogendni mathoth, kwako ng’ato mokuyo kata mako bade, en yo maber mar nyiso ni idewe gadier. Kapo ni ng’ano dwaro wacho gimoro, chikne iti maber. Moloyo duto, inyalo konyo joma okuyo e timo tije mopogore opogore ma ok ginyal timo gie sechego, kaka tedonegi, ritonegi nyithindo, kata konyo e chenro mag liel kapo ni mano dwarore. Timo gik ma kamago nyalo konyo ahinya moloyo mana tiyo gi weche kende.

Bang’ kinde inyalo wacho gimoro e wi jal mothono kaka kido mabeyo ma ne en-go kata gik mabeyo ma notimo kapod ongima. Mbaka ma kamago nyalo kata mana miyo ng’at mokuyono obuonjie matin. Kuom ranyisi, dhako moro miluongo ni Pam ma chwore ne otho higni auchiel mokalo wacho kama: “Samoro ji nyisaga gik mabeyo  ma Ian chwora notimo ma an awuon ok nang’eyo, to mano miyoga awinjo maber e chunya.”

Jotim nonro osefwenyo ni ng’eny joma joggi otho yudoga kony e kinde ma gilalo ng’atgino, kae to bang’e wi ji wilga kodgi nikech dije mang’eny ma ji nigo. Kuom mano, tem matek mondo kinde ka kinde ilim kata itudri gi osiepni molalo ng’ate e tho. * Ng’eny joma okuyo bedoga mamor sama ji olimogi nikech giyudo thuolo mar golo kuyo ma gisebedogo kuom kinde malach.

Wane ane ranyisi mar dhako moro ma wuok e piny Japan miluongo ni Kaori ma min-gi notho, kae to bang’ dweche 15 nyamin-gi maduong’ bende otho. Gimaber en ni osiepene mogeno ne hoye kendo jiwe kinde ka kinde. Ritsuko ma hike ne ng’eny moloye nobedo osiepne machiegnie moloyo. Kaori wacho niya: “Kiwacho awacha adier, ne ok amor gi wach mar ng’ato kawo kar minwa, nikech nang’eyo ni onge ng’at ma nyalo timo kamano. Kata kamano, gik mabeyo ma Ritsuko notimona nokonya sudo machiegni ahinya kode. Juma ka juma ne wadhiga e tij lando wach Nyasaye kod e chokruoge mag Jokristo kanyachiel kode. Nogwelaga mondo wamadh chai kode, nokelonaga chiemo, kendo kinde mathoth nooronaga kad kod barupe. Paro mowinjore ma Ritsuko ne nigo nokonya ahinya.”

Higni apar gariyo osekalo nyaka ne min Kaori tho, kendo sani Kaori gi jaode mor tiyo ne Nyasaye kuom thuologi duto. Kaori wacho kama: “Ritsuko pod dewa ahinya. Samoro amora ma adok dala alimega mondo wajiwre kode.”

Ng’at machielo ma bende oseyudo kony nyaka ne olal ng’at mogeno e tho en Poli ma en Janeno mar Jehova e piny Cyprus. Jaod Poli ma ne iluongo ni Sozos ne en jakwadh maber e kanyakla, kendo kinde ka kinde nogweloga nyithi kiye kod mond liete mondo gichiem kanyachiel. (Jakobo 1:27) Gima lit en ni ka Sozos ne jahigni 53 kansa mar obwongo nonege. Poli wacho kama: “Nalalo jaoda ma nahero kendo ma nasedakgo kuom higni 33.”

Bang’ liel, Poli kod wuode miluongo ni Daniel ma ne jahigni 15 nodar ma gidhi dak e piny Canada. Ne gichako dhi e chokruoge mag Joneno mag Jehova kuno. Poli wacho kaka weche ne chalo: “Osiepe ma ne wayudo e kanyaklawa manyienno ne ok ong’eyo pek kod chal ma ne wasekaloe. Kata kamano, pod ne girwakowa gi weche mang’won kendo ne gimiyowa kony ma dwarore. To mano kaka ne gikonyowa ahinya to moloyo e kinde ma wuoda ne gombo wuon-gi ahinya! Joma ne tayo kanyaklano nonyiso ni gidewo Daniel gadier. Achiel kuomgi nohero gwelo Daniel sa asaya ma nochano dhi budho kamoro gi osiepene, kata sama ne gidwaro dhi tugo opira.” Poli gi wuode sani dhi maber.

Kuom adier, nitie yore mang’eny ma wanyalo konyogo joma kuyo kendo hoyogi. Muma bende hoyo chunywa kuom singonwa gik mabeyo ma biro timore e kinde ma biro.