I ṭhian tuemawin a hmangaih tak a sûn avânga a lungngaih hian ṭanpui ngaihna hre lovin i awm tawh ngai em? A châng chuan, sawi tûr leh tih tûr ber pawh kan hriat loh avângin, engmah sawi lo leh ti lovin kan awm thei a. Mahse, tih theih thil ṭangkai takte a awm a ni.

Tih ngai awmchhun chu va inlan a, ṭawngkam mâwlmang tak, “Pawi ka ti ngawt mai,” tih ang chite sawi mai a ni ṭhîn. Hnam dân tam takah chuan, va kuah emaw, nghet taka a bân va vawnsak emaw chu ngaihsakna lantîr dân kawng ṭha tak a ni. Lusûntuin thu a sawi duh chuan khawngaihna nei takin lo ngaihthlâksak la. A ṭha ber chu, an duh phawt chuan lusûnte’n mahni maia an tih theih loh chaw chhum te, naupang enkawl te, a nih loh leh invui dân chungchâng ruahmanpui ang chite hi tihsak ang che. Chutianga thiltih chu ṭawngkam thiam taka thusawi aiin a ṭangkai zâwk thei a ni.

A hnuah chuan, an sûn tâk mitthi ta mize ṭha leh hun hlimawm tak an hman dân târ langtu thute chu i sawipui thei a. Chutianga tîtîna chuan lusûntu chu hlim takin a nuihtîr hial thei a ni. Entîr nân, tûn hma kum ruk kaltaa a pasal chântu Pam-i chuan: “Mite’n ka hriat ngai loh Ian-a thiltih ṭhatte min hrilh hian ka rilru a nuam thei hle,” tiin a sawi.

Lusûn tam tak chuan a hlim chhâwnah ṭanpuina dawng nasa hle mah se, an ṭhiante chu mahni nuna an buai leh avângin rei lo têah lusûnte mamawh chu an theihnghilh leh mai ṭhîn tih zirchîk mite chuan an sawi. Chuvângin, lusûn i ṭhian chu a khât tâwka biak pawh tum ang che. * Lusûn tam tak chuan chutianga biak pawh chu rei tak an tawrh tawh an lungngaihna tihreh nân an hmang a ni.

Japan hmeichhe tleirâwl Kaori thiltawn hi han ngaihtuah teh. A nu a chân hnu thla 15-ah a u hmeichhia a chân leh a. A ṭhian rinawmte hnên aṭanga chat lak lova ṭanpuina a dawn reng avângin a lâwm hle. Kaori aia upa, Ritsuko-i chuan, a ṭhian ṭha tak ni tûrin Kaori chu a sâwm a. Kaori chuan: “Dik taka sawi chuan, min sâwmna chu ka pawm duh lo. Ka nu hmun tuma luahtîr ka duh lo va, luah thei an awm ka ring hek lo. Mahse, Ritsuko-i chu min cheibâwl dân avângin ka ngaina ta hle a. Chawlhkâr tin hian chanchin ṭha hrilhnaah kan kal dûn a, Kristian inkhâwmah pawh kan kal tlâng bawk. Amah nêna thingpui in tûrin min sâwm a, chaw min rawn kensak a, vawi tam tak lehkhate leh card-te min thawn bawk. Ritsuko-i rilru put hmang ṭha tak chuan ka chungah nghawng ṭha a nei a ni,” tiin a sawi.

Kaori nu thihna kum 12 lai a liam tawh a, tûnah chuan Kaori leh a pasal chu hunbi kima chanchin ṭha hriltu an ni. “Ritsuko-i chuan tûn thlengin min ngaihsak zawm zêl a. Ina ka hâwnte hian, ka tlawh ṭhîn a, inkawmna mi tichak thei tak kan nei ṭhîn a ni,” tiin Kaori chuan a sawi.

Ṭanpui zawm zêlna aṭanga hlâwkna dawngtu entîrna dang leh chu Cyprus rama Jehova Thuhretu Poli hi a ni a. Ani chuan pasal ngilnei tak Sozos-a a nei a, Sozos-a chuan Kristian berâm vêngtu a nih angin, fahrahte leh hmeithaite chu an ina inkâwmho tûr leh chaw ei tûra sâwmin entawn tûr ṭha tak a siam a ni. (Jakoba 1:27) Lungchhiatthlâk takin, Sozos-a chu kum 53 mi a nihin brain tumor avângin a thi a. Poli chuan: “Kum 33 lai ka neih tawh ka pasal chu ka chân ta,” tiin a sawi.

A pasal an vui liam hnu chuan Poli chu a fapa naupang ber kum 15 mi Daniel-a nên chuan Canada ramah an insawn a. Chutah chuan Jehova Thuhretute kohhran pakhat chu an va bêl ṭan a ni. Poli chuan: “Kan kohhran thara ṭhiante chuan kan tûn hma nun leh kan dinhmun harsat dân chu an hre lo va. Mahse, ṭawngkam ngilnei tak leh ṭanpuinate nên min thlamuan a ni. Ka fapain a pa a mamawh ber lai a nih avângin, a bîk takin chu ṭanpuina chu a va hlu tak êm! Kohhran hruaitute chuan  Daniel-a chu an ngaihsak hle a. An zînga pakhat phei chuan ṭhiante nêna intihhlimnaah leh ball pêtnaahte hian Daniel-a hi a hmaih ngai lo,” tiin a sawi. Tûnah chuan an nufain an ṭha tawh hle a ni.

Lusûnte hnêna ṭanpuina leh thlamuanna pêk theih dân kawng tam tak a awm tih a chiang hle. Bible pawhin nakin hun beisei tûr phûrawm tak hmangin min thlamuan bawk a ni. (wp16.03-E)