Mwalithzivaho laja ngweni nevi vimwalingile vyahi omwo vanu vamwalyata navo vakele na vyakuthsa ndi? Thimbu imo mutukakala ku vyakuthsa tukonwa kuthzivuka vya kwendeka nambe vya kulinga, tunatha kutundako ngocho nevi twalingi vyahi. Oloni kuli vimo vitunatha kulinga.

Kakangi nambe kwendela munu nathsitha na kumuleka ngweni “chavihya manene mwane,” kwapwa kwa kulema. Mu vithemwa vimo kuvumbatela munu nathsitha nambe kumukwateleya ku livoko kukamwetha ngwavo mwamwaka mbunge. Nga munu nathsitha athimutwiya, mutolilileni na mbunge yeni yoshe. Vikwavo vya theho vitwatha kulingila munu nathsitha vinapu, kumupangelako vipangi vije katha kulinga, vyakufwa ngwe kuteleka vyakulya nambe kulela vana vendi nambe kumukwathako mu kutulika chivimbi. Kulinga ngechi kukathzembeleka manene kutuvakana kumuthzembeleka lika na majwi.

Mu kwita kwa thimbu, munatha kwendekako ha vyuma vimo vyavivwa vyalingile muthsi vije vyamithzivithile kuvwaha. Kulinga ngocho kwatha kuthzivitha munu nathsitha kuvwaha. Chakumwenako, Pam uje wathsithile munalume wendi myaka 6 inetimo endeka ngwendi: “Thimbu imo, vanu vakanjileke vyuma vimo vyavivwa vyalingile muka-njuvo yange Ian, vije nange kunjithzivuka cho njikalithzivi mwamuvwa.”

Cha luvinda, vaka-kutondethetha vanawana ngwavo vaka-kuthsitha vakavakwatha lika haje vene nga vali ha vyakuthsa, oloni munima ya kuthsinda, vavuthamba vavo vakavevala hivya mwafwa ya kuthzethzama na vipangi vyavo. Ngechi, thimbu yoshe munapande kwendela kavuthamba keni uje nathsitha, nameme muneti ngonde nambe mwaka kutunda ha vyakuthsa. * Vanu vavangi vaje vakathsitha vakalithzivi mwamuvwa kuvendela mwafwa kukavathzembeleka manene.

Chakumwenako chimo chinapu cha Kaori, mumbanda wa ku Japan. Wathzeyele manene mwathsithile vaina, cho lalo munima ya vingonde 15 lika, wathsithile ndokathzi yendi. Oloni wavethzikile mwafwa vavuthamba vendi vatwaleleleho kumutakametha. Kavuthamba kendi Ritsuko uje wapwile mukulunu kuli ikeye, wamuthzemene manene ngwe vaina. Kaori ngwendi: “Kwendeka lika vuthunga, kunjakele na kulithziva mwamuvwa. Kunjashakele munu weka ainge vanana, mwafwa njathinganyekele ngwange kukwethi munu weka atha kunjithzema ngwe vanana. Oloni chithzemo chivanjimwethele va Ritsuko chanjilingithile njivathzeme manene. Chalumingo na chalumingo, njakele na kuya navo mu lihya na ku viwano vya vaka-Kilisitu. Vakele na kunjilanya kukalya navo na kunjinenela vyakulya, cho lalo kakangi vakele na kunjithonekela mikanda. Mbunge yaivwa ya vanana va Ritsuko yanjikwathele kukala na vithinganyeka vyavivwa.”

Muneti oni myaka 12 kutunda havathsililile vaina ya Kaori. Kaori na munalume wendi vanapu vaka-kwambulula va thimbu yoshe. Kaori ngwendi: “Vanana va Ritsuko vachinanjaka mbunge. Vakanjitumina ha foni na kunjithonekela tumithzimbu. Omwo njikeluka kwimbo, njikai ku njuvo yavo na kuthikama, cho tukathimutwiya vya kulitakametha.”

Munu mukwavo ivatwaleleho kutakametha wapwile Poli, Mukaleho wa Yehova wa ku Cyprus. Poli washombokele kuli ndolome wa ngothzi wa lithzina lya Sozos. Ha kupwa kanyungi muka-Kilisitu, Sozos wapwile chakumwenako chachivwa. Wakele na kulanya vithiwa na vafwile ku njuvo yendi kukalya navo na kuthikama navo. (Yakomba 1:27) Oloni Sozos mwakele na myaka 53, mushongo umo wa ku vwongo wamuthsiyile. Poli ngwendi: “Njathzimbalethele munalume wange wa kulongwa uje itwalyambatele nendi ha myaka 33.”

Munima ya vyakuthsa, Poli waile ku Canada na munendi Daniel uje wakele na myaka 15. Vakalikwatathanene na chikungulukilo cha Vakaleho va Yehova. Poli ngwendi: “Vavuthamba vange mu chikungulukilo ocho, kuvathzivukile vukalu vutwakele  navwo. Oloni vakele na kutwendela na kututakametha na kutukwatha. Ovu vukwathi vwethzile ha thimbu yaivwa, mwafwa ikeyo thimbu ije munange yapandele kukala na vaishe. Vakulunu mu Chikungulukilo, vamwethele chithzemo chakama kuli Daniel. Kuli mukulunu umo uje wakele na kulanyako munange Daniel thimbu yoshe mwakele na kuvwahetha vya kuthikama na vavuthamba vendi nambe kulaha mbola.” Poli na munendi vali na kuyoya mwamuvwa ano matangwa.

Kuli vingila vyavingi vyavivwa vitwatha kukwathelamo na kuthzembeleka vanu vanathsitha. Vikulahetho vya mu Mbimbiliya navyo vikatutakametha manene.