Y zoe n makame n na n bels ned sẽn be sũ-sãang pʋgẽ, n pa mi y sẽn na n maan to-to bɩ? Wakat ninga, d pa mi d sẽn na n yeel wall d maane, n kong n sĩnda. La bũmb toor-toor n be d sẽn tõe n maan n sõng ned sẽn be sũ-sãang pʋgẽ.

Naoor wʋsgo, d sã n tɩ kaag a soabã n yeel-a tɩ d kʋmd-a lame, rẽ meng sõngd-a-la wʋsgo. Buud wʋsg pʋgẽ, f sã n mobg sũ-sãang soaba, wall f gãd a nugu, wilgdame t’a yell pak-f lame. A sã n dat n gom bɩ y maag y yĩng n kelg-a. Bũmb sẽn tõe n sõng n yɩɩd yaa y sẽn na n tʋm tʋʋm kẽer n sõng kiidã roagdba. Wala makre, y tõe n segla rɩɩb n kõ-ba, n ges b kambã yelle. B sã n dat me, y tõe n sõnga ne mumbã yɛl kẽere. Woto mi n sõngdame n yɩɩd d sẽn na n dat n bao belsg goam n togs-ba.

Y tõeeme n mi n gom kiidã zʋg-sõma yelle, bɩ bũmb kẽer a sẽn da maan tɩ noom yãmba. Rẽ tõe n yɩɩ kiidã ned noogo. Ad makre. Pag a ye yʋʋr sẽn boond t’a Pam, t’a sɩdã maan kaalem na maan yʋʋm a yoob yeela woto: “Wakat ninga, nebã togsda maam bõn-sõma kẽer m sɩd a Ian sẽn maane, tɩ m da pa miẽ ye. M sã n wʋmd rẽ, m sũur yaa noogo.”

Bãngdbã wilgame tɩ ned sã n maan kaalem, yellã paalmẽ, nebã sõngda a roagdbã, la tɩ taar-n-taarẽ, bãmb me sẽn tar b tʋʋmã yĩnga b wat n yĩma a yelle. Dẽnd yɩta sõma tɩ y tar wakat n tʋgd n kaagd-a, wall y boond-a telefõnnẽ. * Neb wʋsg sẽn be sũ-sãang pʋgẽ yetame tɩ sõngdame tɩ b maood ne b sũ-sãangã.

A Kaori kibarã wilgdame tɩ yaa sɩda. Yaa pag sẽn be Zapõ. A ma wã maana kaalem, t’a kẽem-bi-pugl me ki kiis 15 poore. Yellã sãama a sũur wʋsgo. La a zo-rãmb n sõng-a. Wala makre, pag yʋʋr sẽn boond t’a Ritsuko. A ra yɩɩda a Kaori wʋsgo, la a baoome n na n yɩ a zoa. Ad a Kaori sẽn yeele: “Togs sɩdã, m da pa rat tɩ ned reeg m ma wã zĩig ye. Bala, mam pa tagsd tɩ ned tõe n yɩɩ wa m ma ye. La a Ritsuko sẽn ges m yell to-to wã kɩtame tɩ m da nong-a wʋsgo. Semen fãa, tõnd da moonda koɛɛgã ne taaba, la d tũud taab n kẽnd tigissã. A ra mi n boola maam tɩ m wa tɩ d yũ te, wall a segl rɩɩb n wa kõ-ma, la a gʋlsd-m lɛta, bɩ n toond-m kart-rãmba. A Ritsuko sẽn kell n sõng maam woto wã naf-m-la wʋsgo.”

A Kaori ma wã kaalmã yʋʋm piig la a yiib la woto. Rũndã-rũndã, a Kaori ne a sɩdã yaa wakat fãa so-pakdba. A yeela woto: “A Ritsuko ket n wilgdame tɩ m yell pak-a lame. M sã n lebg n kuil fãa, m kẽnd n kaagd-a lame, n sõsd ne-a tɩ kengd m raoodo.”

A Poli sẽn yaa a Zeova Kaset soab sẽn be Siprã me paama sõngr a woto buudu. A sɩd a Sozos ra yaa nin-sõngo, n da yaa yel-gɛt sẽn tʋmd a tʋʋmd sõma. A ra boonda kɩɩbs la pʋg-kõap b zakẽ wã, tɩ b sõsd la b naagd taab n dɩtẽ. (Zak 1:27) La a Sozos sẽn wa n tar yʋʋm 53, kãnsɛɛr n yõk-a tɩ tũ ne a yõore. A Poli yeela woto: “Mam sɩdã sẽn ki wã, m konga zoa hakɩɩka. Tõnd zĩnda ne taab yʋʋm 33.”

A Poli sɩdã kũum poore, yẽ ne a biig a Daniel sẽn tar yʋʋm 15 wã yikame n kẽng Kanada. B sẽn ta be wã, b tɩ naaga a Zeova Kaset rãmbã tiging a ye. Ad a Poli sẽn yeele: “Tõnd tiging paalgã pʋgẽ, saam-biisã ra pa mi bũmb ning sẽn paam tõndã, la d zu-loeesã  ye. La ne rẽ fãa, b yõga zood ne tõndo, n da kengd d raood ne gom-noodo, la b sõngd tõndo. Woto sɩd naf-d lame, bala, yaa wakat kãng la m biigã da rat a ba wã teelg n yɩɩda. Tigingã taoor lʋɩtbã me wilgame t’a Daniel yell sɩd pak-b lame. B nin-yend n da boond a Daniel wakat fãa t’a naagd yẽ ne a zo-rãmb n tãood balle, wall b reemd reem a taaba.” Rũndã-rũndã, a Poli ne a biigã sũy yaa noog wʋsgo.

Hakɩɩka, bũmb wʋsg la d tõe n maan n sõng neb nins sẽn be sũ-sãang pʋgẽ wã, la d bels-ba. Koe-noog me n be Biiblã pʋgẽ sẽn ki-bã yĩnga, tɩ kengd raoodo.