Fai magaaho nakai a koe ne logona kua nakai maeke ke lagomatai e taha tagata ne tata ki a koe ne maanu he mate e fakahele? Falu magaaho ne liga nakai iloa mitaki e tautolu e tau mena ke talahau po ke taute​—ti fakahiku ne nakai fai mena ke talahau mo e taute. Ka e fai mena a tautolu kua maeke ke taute mo e lagomatai.

He falu magaaho ko e mena ni kua lata, ko e fakalataha mo lautolu ia mo e talahau falu kupu tuga e “Momoko ha ia haaku.” Loga e tau aga fakamotu ne mitaki ke kuku atu ke he tagata po ke aamo atu e lima haana ke fakakite e fakaalofa haau. Ka manako a ia ne maanu ke tutala, fanogonogo ki a ia mo e fakaalofa hofihofi. Mua atu, taute taha mena ke lata ma e magafaoa ne maanu, tuga e taute he tau gahua ne nakai la maeke a ia ke taute, ko e tunu e mena kai, leveki e fanau po ke lagomatai ke he tau fakatokaaga ma e mauku kaeke kua lata. Aoga lahi e tau gahua pihia ka fakatatai ke he tau kupu ne mua e lilifu ne talahau.

Fai magaaho ne mole, liga maeke a koe ke liu tutala hagaao ki a ia ne mate, ke he tau mahani mitaki po ke tau magaaho fiafia haana. Ko e tau tutala pihia ka liga maeke a ia ne maanu ke mamali foki. Ma e fakatai, ko Pam​—ne mate e taane haana ko Ian, he ono e tau kua mole​—ne pehē: “Fa tala mai he tau tagata  ki a au e tau gahua mitaki ne taute e Ian ne nakai iloa e au, ti fiafia e loto haaku.”

Talahau he tau tagata kumikumi, he magaaho fakamua ne loga e lagomatai ki a lautolu ne maanu, ka e ai leva ti nimo e tau manako ha lautolu, ha kua liliu e tau kapitiga ke he tau momoui lavelave ha lautolu ni. Ko e mena ia, kia eketaha ke feleveia tumau mo e kapitiga ne maanu he mole e mauku. * Tokologa a lautolu ne maanu ne loto fakaaue lahi ke he magaaho ia, ke mafanatia a lautolu ha kua leva e momoko.

Manamanatu ke he fakafifitakiaga ha Kaori, ko e fifine fuata i Sapani ne momoko lahi mahaki he mate e matua fifine, ti mate foki e taokete haana he 15 e mahina he mole. Fakaaue ai, ne fakatumau e tau kapitiga mooli haana ke lalago a ia. Tuga a Ritsuko, ne fia kapitiga tata mo ia pete ne motua atu ia Kaori. Talahau e Kaori, “mooli ai, ne nakai fiafia au ke pihia. Nakai manako au ke fai tagata ke hukui e matua fifine haaku, ti manatu au kua ai fai tagata ne maeke. Ka ko e puhala ne leveki e Mama Ritsuko au, ati mafanatia au ki a ia. He tau faahi tapu oti, ne ō tokoua a maua he gahua fakamatala ti ō tokoua foki ke he tau feleveiaaga Kerisiano. Ne uiina e ia au ke inu tī mo ia, tamai e tau mena kai ki a au, mo e tohi mai tumau e tau tohi mo e tau lautohi. Ko e aga mitaki ha Mama Ritsuko ne eke mo fakaohoohoaga mitaki ki a au.”

Kua 12 e tau he mole tali mai he mate e matua fifine ha Kaori, ti ko ia mo e taane haana ko e tau matakainaga fakamatala tumau mogonei. Pehē a Kaori, “ne matutaki a Mama Ritsuko ke fakakite e fakaalofa ki a au. Ka liu au ke he kaina ne tupu hake ai, ti finatu tumau au ki a ia mo e fiafia ke he lafiaga atihake haana.”

Taha fakafifitakiaga foki ko Poli, ko e Fakamoli a Iehova i Cyprus, ne aoga mai he lalagoaga tumau. Totonu e taane ha Poli ko Sozos, ko e leveki mamoe Kerisiano ne fakatoka e fakafifitakiaga mitaki, he fa uiina e tau fanau ne ai fai matua mo e tau takape ke he kaina ha laua ke lafi mo e kai auloa. (Iakopo 1:27) Momoko ai, he 53 e tau he moui, ne mate a Sozos he kenesā e ulu. “Ne mate e taane mahani fakamooli haaku, ne kua 33 e tau he mau a maua,” he talahau e Poli.

Ne mole e mauku, ti hiki atu a Poli ki Kanatā mo e tama taane fakahiku haana ko Daniel, ne 15 e tau he moui. I ai, ne fakalataha atu a laua ke he fakapotopotoaga he Tau Fakamoli a Iehova. Manatu e Poli, “nakai iloa he tau kapitiga he fakapotopotoaga foou ha maua e tau tupetupe mo e tau tuaga uka ha maua he magaaho fakamua. Ka e nakai mataofi a lautolu ha ko e mena ia, ne o mai a lautolu ki a maua mo e talahau e tau kupu totonu mo e taute e tau gahua lagomatai. Kua uho mooli e lagomatai ia, mua atu he magaaho ne lata lahi e tama taane haaku ma e takitakiaga he matua taane haana! Ko e tau matakainaga ne leveki e fakapotopotoaga ne mamata lahi ki a Daniel. Taha ia lautolu ne lali tumau ke fakalataha a Daniel mo lautolu ka lafi e tau kapitiga po ke o atu ke pelē polo.” Kua mitaki e tuaga he matua fifine mo e haana tama taane he mogonei.

Mooli ai, kua loga atu foki e tau puhala kua maeke ia tautolu ke foaki e lagomatai mo e fakamafanaaga ki a lautolu kua maanu. Fakamafana mai foki he Tohi Tapu a tautolu hagaao ke he amaamanakiaga ofoofogia ma e vahā i mua.