Na o kile wa ikwa o sa tsebe seo o ka se dirago ge motho yo o mo tlwaetšego a be a llela motho yo a mo ratago yo a hwilego? Ka dinako tše dingwe re ka ikwa re sa tsebe gore re re’ng goba re dire eng—ka gona re feleletša re homola goba re sa dire selo. Eupša go na le dilo tše di holago tšeo re ka di dirago.

Gantši go no nyakega gore o be le motho yoo a hwetšwego le go bolela mantšu a bonolo a bjalo ka a rego, “Re lla le lena.” Ditšong tše dintši, go gokarela motho yoo goba go mo swara letsogong ka botho ke mokgwa o šomago wa go bontšha gore o mo kwela bohloko. Theetša ka kwelobohloko ge motho yo a hwetšwego a nyaka go bolela. Go feta tšohle, direla ba lapa leo le hwetšwego se sengwe, mohlomongwe o dire mošongwana woo ba paletšwego ke go o dira, go swana le go apea, go hlokomela bana goba go thuša ka ditokišetšo tša poloko, ge e ba go nyakega. Ditiro tše bjalo di ka thuša go feta mantšu ao a kgothatšago.

Ge nako e dutše e eya, le ka rata go bolela ka motho yo a hlokofetšego, mohlomongwe la bolela ka dika tša gagwe tše dibotse goba dinako tše di thabišago tšeo le bilego le tšona. Poledišano e bjalo e ka dira gore motho yo a hwetšwego a ikwe a imologile ganyenyane. Ka mohlala, Pam, yoo a hwetšwego ke monna wa gagwe e lego Ian mengwageng e tshela e fetilego, o re: “Ka dinako tše dingwe batho ba mpotša dilo tše dibotse tšeo Ian a  bego a di dira tšeo ke bego ke sa tsebe ka tšona, gomme seo se a nthabiša.”

Banyakišiši ba bega gore batho ba bantši bao ba hwetšwego ba thušwa kudu mathomong, eupša ba lebalwa kapejana ge batho ba thoma go swarega gape maphelong a bona. Ka baka leo, leka go dula o ikopanya le motho yo a hwetšwego ka morago ga lehu la yo a mo ratago. * Batho ba bantši bao ba hwetšwego ba leboga kudu sebaka se sa gore ba imollwe manyaming ao a ka tšeago nako.

Ela hloko mohlala wa kgarebe ya Mojapane yeo e bitšwago Kaori. O ile a hlakahlakana kudu ka morago ga go hwelwa ke mmagwe gomme ka morago gwa latela sesi wa gagwe ka morago ga dikgwedi tše 15. Se se thabišago ke gore kgarebe ye e ile ya dula e hwetša thekgo ya bagwera ba yona ba botegago. Ritsuko o feta Kaori kgole gomme o ile a ithaopela go ba mogwera wa gagwe wa kgauswi. Kaori o re: “Go bolela therešo, ke be ke sa thabele seo. Ke be ke sa nyake gore motho a tšeele mma legato, e bile ke be ke sa nagane gore go be go na le yo a ka dirago bjalo. Lega go le bjalo, ka baka la tsela yeo Mama Ritsuko a bego a ntshwara ka yona, ke ile ka ikwa re le bjalo ka bagwera. Bekeng e nngwe le e nngwe, re be re etšwa gotee go yo boledišana le batho ka Beibele le go ya dibokeng tša Bokriste mmogo. O be a ntaletša gore ke tlo nwa teye le yena, a ntlišetša dijo le go nngwalela mangwalo le dikarata gantši. Ke thušitšwe ke tsela e botse yeo Mama Ritsuko a lebelelago dilo ka yona.”

Go šetše go fetile mengwaga e 12 go tloga mola mmago Kaori a hlokofalago, gomme lehono yena le monna wa gagwe ba bolela le batho ka Beibele ka nako e tletšego. Kaori o re: “Mama Ritsuko o sa dutše a bontšha go tshwenyega ka nna. Ge ke eya gae, ke dula ke mo etela le go thabela segwera sa gagwe seo se agago.”

Mohlala o mongwe wa motho yoo a ilego a thušwa ke go hwetša thekgo yeo e sa kgaotšego ke Poli, yo e lego Hlatse ya Jehofa ya kua Cyprus. Poli o be a na le monna yo botho yo a bitšwago Sozos, yoo a bego a bea mohlala o mobotse wa go hlokomela phuthego ya Bokriste ka go dula a laletša ditšhiwana le bahlologadi legaeng la bona bakeng sa go thabela bogwera le go ja le bona. (Jakobo 1:27) Ka manyami, Sozos o ile a bolawa ke serurugi sa bjokong (brain tumor) a na le mengwaga e 53. Poli o re: “Ke lobile monna wa ka yo a bego a botega yoo re bego re na le mengwaga e 33 re nyalane.”

Ka morago ga gore monna wa gagwe a bolokwe, Poli o ile a hudugela Canada le morwa wa gagwe yo monyenyane wa mengwaga e 15 yo a bitšwago Daniel. Ge ba le moo, ba ile ba thoma go kopanela le phuthego ya Dihlatse tša Jehofa. Ge Poli a gopola o re: “Batho ba phuthegong ya ka e mpsha ba be ba sa tsebe selo ka bophelo bja rena bja nakong e fetilego le ka mathata a rena. Eupša seo ga se sa ba thibela gore ba re batamele le go re kgothatša ka mantšu a bona a botho le go re thuša. Ruri thušo yeo e bile bohlokwa, kudukudu nakong ya ge morwa wa ka a be a tloga a hloka tatagwe! Bao ba etelelago pele ka phuthegong ba ile ba rata Daniel kudu. Go na le mogolo yo mongwe yo a bego a laletša Daniel ge a be a etela bagwera ba gagwe goba ge a yo bapala kgwele.” Mma yo le morwa wa gagwe ba thabile kudu lehono.

Go bolela therešo, go na le ditsela tše dintši tšeo ka tšona re ka thušago bao ba hwetšwego le go ba homotša. Le gona Beibele e re kgothatša ka go re botša ka kholofelo e kgahlišago ya bokamoso.