Okuti lumwe welitehelele okuti kutyivili okukuatesako una wankhisa wavo? Ovikando vimwe, tukala tyihetyii oityi matupopi ine matulingi. Moluotyo, pamwe katupopi natyike nokuhalingi natyike. Mahi, kuna ovipuka viakolela tupondola okulinga.

Ovikando ovinyingi, etyi tyesukisa okukala vala ponthele ya una wasiwa-po, nokumupopila vala okuti, “nove tyekuihama unene.” Movilongo vimwe okukuatesa-po nokankhenda wokuasiwa-po, tyilekesa okuti wesuka unene nae. Inkha wokuasiwa-po uhanda okupopia, mutehelela nohole nokankhenda. Haunene, kuatesako ombunga yasiwa-po okulinga ovilinga viomeumbo hamwe vehevili okulinga, ngokuteleka nokuyunga ovana, ine ovipuka ovikuavo konthele yokukapaka wavo wokuanyima, inkha tyesukisa. Okulinga ovipuka ovio, tyikuatesa-ko vali unene tyipona onondaka pamwe tupopia, namphila onongwa.

Pamwe, upondola okupopia konthele yovituwa oviwa via una wanyima ine ovipuka oviwa ankho alinga. Okupopia konthele yovipuka ovio, tyipondola alo umwe okuhambukiswa una wasiwa-po. Mongeleka, pahe palamba omanima 6 tunde etyi Ian omulume wa Pam anyima. Pam wati: “Ovanthu pamwe vamphopila ovipuka  oviwa Ian alingaile ame ankho nehei, iya otyo atyinkhalesa nawa.”

Ovaovololi vamwe apopia okuti ovanyingi vokuasiwa-po, omapanga avo evekuatesako vala po tete. Mahi tyina omapanga akondoka movilinga viavo via nthiki na nthiki, avevelimbwa. Moluotyo, linga ononkhono, mbokupopia apeho nepanga liove wasiwa-po no wae. * Ovanyingi vapandula unene tyina ulinga ngotyo, mokonda tyivekuatesa-ko okuhatuala-ko tyeliunga.

Tala oñgeni omuhikuena utiwa Kaori wo ko Japau elitehelela etyi asiwa-po na ina, etyi pakala onohanyi 15 akulandula omukulu wae. Upandula unene omapanga ae o tyotyili mokonda atualako okumukuatesako okukoleleya. Umwe utiwa o Ritsuko ankho omukulu vali tyipona Kaori, aovola okukala epanga liae enene. Kaori wati: “Okupopia otyili ame ankho hahambukilwe netyi alinga. Ankho hihande nawike apinge pu me. Tupu ankho hisoko okuti kuna ou upondola okutyilinga. Mahi, mokonda yonkhalelo Me Ritsuko anthekula, akala epanga liange enene. Ankho tuenda atuho movilinga viokuivisa kese simano no komaliongiyo. Ankho undyihana opo tukanwe otyipuka tyimwe tyikahi ngombulunga, tupu undyetela okulia, nokunthyonekela oumukanda ovikando ovinyingi. Ovituwa oviwa via Me Ritsuko, viankhuatesako unene.”

Pahe palamba omanima 12 tunde etyi me ya Kaori anyima. Iya hono ovaivisi vomuvo auho, kumwe nomulume wae. Kaori wati: “Me Ritsuko utualako okulekesa okuti wesuka na ame. Tyina ndyenda keumbo, apeho ndyikemutalela-po andyihambukwa unene nepameko ampha.”

Ongeleka onkhuavo ya umwe watualako okukuatesuako, o ya Poli Ombangi ya Jeova ko Chipre. Poli ankho una omulume woluembia utiwa o Sozos. Ankho wava ongeleka ongwa yomunthita omuwa mewaneno. Ankho ukonga onosona ine ononthyiwe novahepe okuya meumbo liavo pala okulia navo nokuhipulula navo. (Tiago 1:27) Mahi, mokonda youvela ankho ena mowongo, Sozos anyimi puetyi ankho ena omanima 53. Poli wati: “Omulume wange omukuatyili nakala nae omanima 33, wanthya-po.”

Etyi omutambo wapua, Poli ailukila ko Canada nomona wae omututu Daniel womanima 15. Etyi vehika oko, avahimbika okuliongiya newaneno lio Nombangi mba Jeova. Poli wati: “Ovakuatate mewaneno olio ankho kavei natyike konthele yovitateka viepuiya tualamba navio. Mahi no ngotyo, vafuena puonthue avetuungumanesa no nondaka mbavo, nokutukuatesa-ko mononkhalelo ononkhuavo. Tuapanda unene ekuateso olio, haunene momuvo oo omona wange ankho esukisa unene na tate yae! Ovakulu vewaneno valekesa okuti vesuka unene na Daniel. Umwe puvo, ankho ukonga Daniel povitalukiso viavo nomapanga ine tyina vakayumba ombola.” Hono, ina nomona vekahi nawa.

Tyotyili kuna ononkhalelo ononyingi mbokukuatesa-ko vana vasiwa-po nokuvepameka. Tupu Ombimbiliya itupameka nekevelelo ewa unene komutwe.